“An mga Matanos Masirang na Siring Kaliwanag kan Saldang”
“An mga Matanos Masirang na Siring Kaliwanag kan Saldang”
“Sa panahon na iyan an mga matanos masirang na siring kaliwanag kan saldang sa kahadean kan saindang Ama.”—MAT. 13:43.
1. Naggamit si Jesus nin mga ilustrasyon tanganing ipaliwanag an anong manlaenlaen na aspekto kan Kahadean?
SI Jesu-Cristo naggamit nin dakol na ilustrasyon, o parabola, tanganing ipaliwanag an manlaenlaen na aspekto kan Kahadean. Sia ‘nagtaram sa mga kadaklan paagi sa mga ilustrasyon. Sa katunayan, kun mayo nin ilustrasyon dai sia nagtataram sa sainda.’ (Mat. 13:34) Sa mga ilustrasyon manongod sa pagsabwag kan banhi kan katotoohan dapit sa Kahadean, idinoon ni Jesus an papel kan kamugtakan nin puso nin saro kun dapit sa pag-ako kan mensahe, saka an papel ni Jehova sa espirituwal na pagpatalubo. (Mar. 4:3-9, 26-29) Iinilustrar man ni Jesus an pambihirang pag-oswag kan intereses kan Kahadean digdi sa daga dawa ngani sa primero an pag-oswag na iyan bako pirmeng risang-risa. (Mat. 13:31-33) Saro pa, itinampok nia na bakong gabos na naghihimate sa mensahe kan Kahadean talagang angay na sakop kan Kahadean na iyan.—Mat. 13:47-50. *
2. Sa ilustrasyon ni Jesus dapit sa trigo asin mga doot, ano an irinerepresentar kan marahay na banhi?
2 Minsan siring, an saro sa mga ilustrasyon ni Jesus nakasentro sa pagtipon kan mga mamamahala kaiba ni Jesus sa saiyang Kahadean. Sa parate inaapod ini na parabola kan trigo asin mga doot, asin mababasa ini sa Mateo kapitulo 13. Sa saro pang ilustrasyon, sinabi sa sato ni Jesus na an banhi na isinabwag iyo an “tataramon kan kahadean,” mantang sa ilustrasyon na ini, sinabi nia sa sato na an marahay na banhi nagrerepresentar sa ibang bagay—sa “mga aki kan kahadean.” (Mat. 13:19, 38) An mga ini bakong mga sakop kan Kahadean kundi “mga aki,” o mga paramana, kan Kahadean.—Roma 8:14-17; basahon an Galacia 4:6, 7.
An Ilustrasyon Dapit sa Trigo Asin mga Doot
3. Ipaliwanag an problemang napapaatubang sa tawong nasa ilustrasyon asin kun ano an nagin desisyon nia sa problemang ini.
3 Ini an ilustrasyon: “An kahadean kan kalangitan nakakaagid sa sarong tawo na nagsabwag nin marahay na banhi sa saiyang oma. Mantang nagtotorog an mga tawo, nagdatong an saiyang kaiwal asin nagsabwag man nin mga doot sa tahaw kan trigo, asin naghale. Kan an dahon sumupang na asin magbunga, tuminunga man an mga doot. Kaya an mga oripon kan kagharong nagdaratong asin nagsarabi sa saiya, ‘Kagurangnan, bako daw na marahay na banhi an isinabwag mo sa saimong oma? Kun siring, paanong nagkaigwa iyan nin mga doot?’ Sia nagsabi sa sainda, ‘Sarong kaiwal, sarong lalaki, an guminibo kaini.’ Sinda nagsarabi sa saiya, ‘Kun siring, boot mo daw na kami magduman asin tiponon an mga iyan?’ Sia nagsabi, ‘Dai; ta tibaad, sa pagtipon kan mga doot, magabot nindong kaiba kaiyan an trigo. Pabayae nindong tumubo an mga iyan na magkaibanan sagkod sa pag-ani; asin sa kapanahonan nin pag-ani sasabihan ko an mga paraani, Tiponon nguna nindo an mga doot asin goygoyon nindo iyan tanganing suloon iyan, dangan tiponon nindo an trigo sa sakong tambobong.’”—Mat. 13:24-30.
4. (a) Siisay an tawo sa ilustrasyon? (b) Kasuarin asin paano pinonan ni Jesus an pagsabwag kan banhing ini?
4 Siisay an tawong nagsabwag kan marahay na banhi sa saiyang oma? An simbag sinabi ni Jesus kan huri, kan ipaliwanag nia sa saiyang mga disipulo: “An nagsabwag kan marahay na banhi iyo an Aki nin tawo.” (Mat. 13:37) Durante kan tolo may kabangang taon na ministeryo nia digdi sa daga, si Jesus, an “Aki nin tawo,” nag-andam kan oma para sa pagtanom. (Mat. 8:20; 25:31; 26:64) Dangan poon kan Pentecostes 33 C.E., pinonan niang isabwag an marahay na banhi—“an mga aki kan kahadean.” Minalataw na an pagsabwag na ini nangyari kan ponan ni Jesus, bilang representante ni Jehova, na ibubo an banal na espiritu sa mga disipulo, na paagi kaiyan linahidan sinda bilang mga aki nin Dios. * (Gibo 2:33) An marahay na banhi nagin trigo na lubos nang nagtalubo. Kaya an katuyohan kan pagsabwag kan marahay na banhi iyo na pag-abot nin panahon matipon an kompletong bilang kan mga magigin paramana asin mamamahala kaiba ni Jesus sa saiyang Kahadean.
5. Siisay an kaiwal sa ilustrasyon, asin sairisay an ilinaladawan kan mga doot?
5 Siisay an kaiwal, asin sairisay an mga doot? Sinabi sa sato ni Jesus na an kaiwal “iyo an Diablo.” An mga doot ilinaladawan bilang “an mga aki kan saro na marigsok.” (Mat. 13:25, 38, 39) Sa literal, an mga doot na sinambit ni Jesus posibleng iyo an mabarahibong darnel. An itsura kan nakakahilong tinanom na ini kaagid na marhay kan trigong nagpopoon pa sanang magtalubo. Angay nanggad na paglaladawan sa palsipikadong mga Kristiano, an mga naghihingakong aki kan Kahadean alagad dai nagpapaheling nin tunay na bunga! An mapagsaginsagin na mga Kristianong ini na naghihingakong mga parasunod ni Cristo sa katunayan kabtang kan “banhi” ni Satanas na Diablo.—Gen. 3:15.
6. Kasuarin nagpoon na maglataw an mga doot, asin sa anong paagi “nagtotorog” an mga tawo kan panahon na iyan?
6 Kasuarin naglataw an arog-doot na mga Kristianong ini? “Mantang nagtotorog an mga tawo,” an sabi ni Jesus. (Mat. 13:25) Kasuarin ini? An simbag makukua niato sa mga tataramon ni apostol Pablo sa kamagurangan sa Efeso: “Aram ko na pakahale ko an mapang-aping mga lobo malaog dian sa tahaw nindo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:29, 30) Dangan sinadol nia an kamagurangan na idto na magdanay na puka sa espirituwal. Pagkatapos na an mga apostol, na nagserbing “pang-olang” sa apostasiya, magpoon nang magtorog sa kagadanan, dakol na Kristiano an nagtorog sa espirituwal. (Basahon an 2 Tesalonica 2:3, 6-8.) Iyan an panahon na nagpoon an dakulang apostasiya.
7. Nagin mga doot daw an nagkapira sa mga trigo? Ipaliwanag.
7 Dai sinabi ni Jesus na an trigo magigin mga doot kundi na an mga doot isinabwag sa tahaw kan trigo. Kaya an ilustrasyon na ini dai naglaladawan sa tunay na mga Kristiano na minasuhay sa katotoohan. Imbes, nanonongod iyan sa tuyong paghihingoa ni Satanas na raoton an Kristianong kongregasyon paagi sa pagpalaog nia dian nin maraot na mga tawo. Kan gurang na an huring apostol na si Juan, an apostasiyang ini nagin risang-risa.—2 Ped. 2:1-3; 1 Juan 2:18.
‘Pabayaeng Tumubo an mga Iyan na Magkaibanan Sagkod sa Pag-ani’
8, 9. (a) Taano ta madaling masabotan kan mga naghihinanyog ki Jesus an mga instruksion kan Kagurangnan sa saiyang mga oripon? (b) Sa kaotoban kaiyan, paano an trigo asin mga doot magkaibang nagtalubo?
8 An mga oripon kan Kagurangnan inimpormaran sia kan problema asin nagsabi: “Kun siring, boot mo daw na kami magduman asin tiponon an mga [doot]?” (Mat. 13:27, 28) An saiyang simbag garo baga nakakangalas. Sinabihan nia sinda na pabayaan na tumubong magkaibanan an trigo asin mga doot sagkod sa kapanahonan nin pag-ani. Madaling masabotan kan mga disipulo ni Jesus an pagboot na iyan. Aram ninda kun gurano kasakit maheling an pagkakalaen kan trigo asin kan doot na darnel. Aram man kan mga may eksperyensia sa agrikultura na an gamot kan mabarahibong darnel sa parate nakapurupot sa gamot kan trigo. * Bako nanggad makangangalas na ininstruksionan sinda kan Kagurangnan na maghalat!
9 Sa kaagid na paagi, sa laog nin mga siglo, an manlaenlaen na sekta nin Kakristianohan nagkaigwa nin abundang bunga na doot—enot sa mga iglesiang Katoliko Romano saka Ortodokso asin kan huri, sa dakol na grupong Protestante na nagralataw. Sa ibong na lado, an nagkapirang banhi kan tunay na trigo isinabwag man sa bilog na kinaban. An kagharong sa ilustrasyon mapasensiang naghalat durante kan halawig na panahon nin pagtalubo sagkod na umabot an medyo mas halipot na panahon nin pag-ani.
An Haloy Nang Hinahalat na Panahon nin Pag-ani
10, 11. (a) Noarin an panahon nin pag-ani? (b) Paano dinadara sa tambobong ni Jehova an simbolikong trigo?
10 Sinabi sa sato ni Jesus: “An pag-ani sarong pagtatapos nin sarong sistema nin mga bagay, asin an mga paraani mga anghel.” (Mat. 13:39) Durante kan huring mga aldaw kan maraot na sistemang ini nin mga bagay, sarong pagbulagbulag an nangyayari— an mga aki kan Kahadean kaipuhan na tiponon asin ibulag sa mga arog-doot. Mapadapit digdi, si apostol Pedro nagsabi sa sato: “Nagdatong na an itinalaan na panahon na an paghokom magpoon sa harong nin Dios. Ngonyan kun iyan magpoon nguna sa sato, ano an mangyayari sa mga bakong makinuyog sa maogmang bareta nin Dios?”—1 Ped. 4:17.
11 Dai nahaloy pakapoon kan huring mga aldaw, o kan “pagtatapos nin sarong sistema nin mga bagay,” nagpoon an paghokom sa mga naghihingakong tunay na Kristiano—kun baga sinda talagang “mga aki kan kahadean” o “mga aki kan saro na marigsok.” Buminagsak “nguna” an Dakulang Babilonya, “dangan” an mga aki kan Kahadean tinipon sa pagpoon kan pag-ani. (Mat. 13:30) Alagad paano dinadara ngonyan sa tambobong ni Jehova an simbolikong trigo? An mga inaning ini magsalang dinadara sa ibinalik sa dati na Kristianong kongregasyon, na dian inooyonan asin pinoprotehiran sinda nin Dios, o mag-aako kan saindang langitnon na balos.
12. Gurano kahaloy magpapadagos an pag-ani?
12 Gurano kahaloy an paghokom? Inapod ni Jesus an pag-ani bilang sarong “kapanahonan,” kaya iyan nagpapadagos sa laog nin sarong peryodo nin panahon. (Kap. 14:15, 16) An paghokom sa lambang miembro kan mga linahidan nagpapadagos sa bilog na panahon kan katapusan. Magpapadagos iyan sagkod na akoon na ninda an pangultimong tatak.—Kap. 7:1-4.
13. Sa anong paagi na nakakapasingkog an mga doot, asin paano sinda naggigibo nin katampalasanan?
13 Sairisay an hahaleon sa Kahadean, asin paano sinda nakakapasingkog asin naggigibo nin katampalasanan? (Mat. 13:41) Sa laog nin mga siglo, dinadaya kan arog-doot na klero nin Kakristianohan an minilyon na tawo. Ginigibo ninda ini paagi sa naglalapastangan sa Dios na mga katokdoan, mga “bagay na nakakapasingkog,” arog baga kan doktrina na daing sagkod na pagpadusa sa nagkakalayong impierno saka kan nakakaribaraw asin misteryosong Trinidad. Dakol na namomoon sa relihion an nagpaheling nin maraot na halimbawa sa mga aripompon ninda paagi sa saindang garo pagsambay na pakikikatood sa kinaban na ini asin sa nagkapirang pangyayari paagi sa saindang hayag na imoral na paggawe. (Sant. 4:4) Saro pa, lalong nagigin mapagkonsinte an Kakristianohan sa imoralidad kan mga miembro kaiyan. (Basahon an Judas 4.) Sa ibong kan gabos na ini, padagos sindang nagsasaginsagin na banal asin diosnon. Maogma nanggad an mga aki kan Kahadean na makasiblag sa siring na arog-doot na mga impluwensia asin maraot na mga katokdoan na nakakapasingkog!
14. Sa anong paagi na an mga arog-doot nagtatangis asin nagraragot an mga ngipon?
14 Sa anong paagi na an mga arog-doot nagtatangis asin nagraragot an mga ngipon? (Mat. 13:42) Grabe an pagsakit kan “mga aki kan saro na marigsok” huling ibinubuyagyag kan “mga aki kan kahadean” na an mga arog-doot na ini nakakahilo sa espirituwal. Ipinagmomondo man ninda an nagluluyang suporta sa sainda kan mga miembro kan saindang iglesia, saka an pagkawara ninda nin kontrol sa mga ini.—Basahon an Isaias 65:13, 14.
15. Ano an boot sabihon kan pagsulo sa mga arog-doot sa kalayo?
15 Ano an boot sabihon kan pagtipon sa mga doot asin pagsulo kaiyan sa kalayo? (Mat. 13:40) Nanonongod ini sa ultimong kaaabtan kan mga doot. An simbolikong pag-apon kaini sa nagkakalayong horno nagpaparisa na pasiring an mga ini sa daing sagkod na pagkalaglag. (Kap. 20:14; 21:8) An palsipikado asin arog-doot na mga Kristiano, an mga impostor, popohoon durante kan “dakulang kahorasaan.”—Mat. 24:21.
Sinda “Masirang na Siring Kaliwanag kan Saldang”
16, 17. Ano an ihinula ni Malaquias mapadapit sa templo nin Dios, asin paano ini nagpoon na maotob?
16 Sa anong panahon na an mga arog-trigo ‘nagsisirang na siring kaliwanag kan saldang’? (Mat. 13:43) Mapadapit sa paglinig sa templo nin Dios, si Malaquias naghula: “‘Biglang maabot sa Saiyang templo an tunay na Kagurangnan, na saindong pighahanap, asin an mensahero kan tipan na nawiwilihan nindo. Uya! Sia maabot nanggad,’ an sabi ni Jehova nin mga hukbo. ‘Alagad siisay an makakatagal sa aldaw kan saiyang pagdatong, asin siisay an makakatindog kun magpaheling sia? Huli ta sia magigin siring sa kalayo nin paradalisay asin siring sa lehia nin mga paralaba. Asin sia dapat na tumukaw bilang paradalisay asin paralinig nin pirak asin dapat na linigan an mga aking lalaki ni Levi; asin dapat na dalisayon nia sinda siring sa bulawan asin siring sa pirak, asin para ki Jehova sinda magigin nanggad banwaan na nagtatao nin dolot na regalo na may katanosan.’”—Mal. 3:1-3.
17 Sa presenteng mga panahon, minalataw na an hulang ini nagpoon na maotob kan 1918 kan inspeksionon ni Jehova, kaiba kan “mensahero kan tipan” na si Jesu-Cristo, an espirituwal na templo. Sinabi sa sato ni Malaquias an mangyayari kun an paglinig na ini makompleto na: “Maheheling nanggad giraray nindo an kalaenan kan matanos asin maraot, kan naglilingkod sa Dios asin kan dai naglilingkod sa saiya.” (Mal. 3:18) An biglang pagdakol kan aktibidad nin napakosog liwat na tunay na mga Kristiano nagpaparisa na an panahon na iyan an kapinonan kan panahon nin pag-ani.
18. Ano an ihinula ni Daniel na mangyayari sa satong panahon?
18 Si propeta Daniel nagtaram dapit sa satong panahon kan ihula nia: “An mga igwa nin pakarorop masirang na siring sa kaliwanagan kan kahiwasan; asin idtong mga nagdadara sa dakol pasiring sa katanosan, siring sa mga bitoon sagkod sa panahon na daing talaan, sagkod lamang pa ngani.” (Dan. 12:3) Sairisay an mga ini na nagsisirang na maliwanagon? Iyo, mayong iba kundi an linahidan na mga Kristiano, an tunay na trigo na sinambit ni Jesus sa saiyang ilustrasyon dapit sa trigo asin mga doot! An ‘paghale’ sa arog-doot asin palsipikadong mga Kristiano malinaw na naheheling kan padagos na nagdadakol na dakulang kadaklan nin mga arog-karnero. Sa pakikiasosyar sa natatada kan espirituwal na Israel, an mga ini na may paglaom na magin mga sakop kan Kahadean nagpapasirang man kan saindang liwanag sa madiklom na kinaban na ini.—Zac. 8:23; Mat. 5:14-16; Fil. 2:15.
19, 20. Ano an maogmang hinahalat kan “mga aki kan kahadean,” asin ano an pag-oolayan niato sa sunod na artikulo?
19 Ngonyan, maogmang hinahalat kan “mga aki kan kahadean” an saindang mamuraway asin langitnon na balos. (Roma 8:18, 19; 1 Cor. 15:53; Fil. 1:21-24) Pero, sagkod na dai pa minaabot an panahon na iyan, dapat sindang magdanay na maimbod, na padagos na nagsisirang na maliwanag asin malinaw na napapalaen sa “mga aki kan saro na marigsok.” (Mat. 13:38; Kap. 2:10) Puede nanggad niatong ikaogma na nagkapribilehio kitang maheling sa satong panahon an mga resulta kan simbolikong ‘paghale’ na ini sa mga doot!
20 Alagad ano an relasyon kan mga aking ini kan Kahadean sa padakol nang padakol na dakulang kadaklan kan mga igwa nin paglaom na mabuhay sagkod lamang digdi sa daga bilang mga sakop kan Kahadean? Sisimbagon kan sunod na artikulo an hapot na ini.
[Mga Nota sa Ibaba]
^ par. 1 Para sa detalyadong paliwanag kan mga ilustrasyon na ini, helingon An Torrengbantayan na Hulyo 15, 2008, pahina 12-21.
^ par. 4 Sa parabolang ini, an pagsabwag dai nagrerepresentar sa paghuhulit asin paggibo nin mga disipulo, na iyo an paagi tanganing makalaog sa kongregasyon an mga bagohan na magigin linahidan na mga Kristiano. Mapadapit sa marahay na banhi na isinabwag sa oma, si Jesus nagsabi: “An mga ini iyo an [bakong “an magigin”] mga aki kan kahadean.” An pagsabwag nanonongod sa paglahid sa mga aking ini kan Kahadean sa bilog na kinaban.
^ par. 8 An gamot kan mabarahibong darnel nakapurupot na gayo sa gamot kan trigo kaya an paggabot kaiyan bago an pag-ani puedeng magresulta sa pagkawara kan trigo.—Helingon an Insight on the Scriptures, Volume 1, pahina 1178.
Nagigirumdoman daw Nindo?
Sa ilustrasyon ni Jesus dapit sa trigo asin mga doot, sa ano o kiisay nanonongod an mga kabtang na ini kan ilustrasyon?
• An marahay na banhi
• An tawong nagsabwag kan banhi
• An pagsabwag kan banhi
• An kaiwal
• An mga doot
• An kapanahonan nin pag-ani
• An tambobong
• An pagtangis asin an pagragot kan mga ngipon
• An nagkakalayong horno
[Mga Hapot Para sa Pag-adal]
[Mga Ritrato sa pahina 20]
An Pentecostes 33 C.E. iyo an kapinonan kan pagsabwag kan marahay na banhi
[Ritrato sa pahina 23]
An simbolikong trigo dinadara ngonyan sa tambobong ni Jehova
[Credit Line]
Pictorial Archive (Near Eastern History) Est.