Labanan an Satanikong Propaganda

‘DAI kamo magpadaya. Dai kamo tatabangan kan saindong Dios. Sumuko na kamo ta kun dai, maraot an mangyayari sa saindo!’ Ini an pinakapunto kan mensahe na sinabi ni Rabsaces, sarong sugo ni Hadeng Senaquerib kan Asiria, sa mga nag-eerok sa Jerusalem. An daga nin Juda sinakyada kan mga hukbo kan hade. An mga tataramon kan sugo plinanong marhay tanganing paluyahon an boot kan mga taga Jerusalem asin pasukoon sinda huli sa grabeng takot.—2 Ha. 18:28-35.

An mga Asirio midbid na madahas asin maringis. Tinatakot ninda an saindang mga kaiwal paagi sa pagpalakop sa makangingiring detalye kun paano ninda daing herak na trinatar an saindang mga bihag. Segun sa historyador na si Philip Taylor, an saindang “pamamaagi iyo an pananakot na may kaibang propaganda, na an intension iyo na papagdanayon na kontrolado an saindang mga sakop asin takoton an potensial na mga kaiwal paagi sa detalyadong propaganda patin brutal na pagmanipular kan isip.” An propaganda sarong mapuersang armas. “Inaatake [kaiyan] an isip,” an sabi ni Taylor.

An tunay na mga Kristiano “nakikipaggumolan, bakong tumang sa dugo asin laman, kundi tumang sa . . . marigsok na mga puersang espiritu,” an boot sabihon, tumang sa espiritung mga linalang na nagrebelde sa Dios. (Efe. 6:12) An pangenot sa sainda iyo si Satanas na Diablo. Ginagamit man nia an pananakot na inibanan nin propaganda.

Hinihingako ni Satanas na kaya niang raoton an integridad kan lambang saro sa sato. Kan panahon kan patriarkang si Job, sinabi nia ki Jehova Dios: “An gabos na sadiri nin tawo itatao nia para sa saiyang kalag.” Sa ibang pagtaram, gipiton mo nanggad an tawo, asin pag-abot nin panahon mararaot an saiyang integridad sa Dios. (Job 2:4) Tama daw si Satanas? Gabos daw kita may sagkodan an integridad, na kun lumampas na dian babayaan niato an satong mga prinsipyo tanganing magdanay na buhay? Gusto ni Satanas na arog kaiyan an isipon niato. Huli kaini, naggagamit sia nin mapandayang propaganda tanganing itanom sa satong isip an ideyang iyan. Siyasaton niato an nagkapira sa mga pamamaaging iyan asin estudyaran kun paano niato sia malalabanan.

An Saindang “Pundasyon Nasa Kabokabo”

Ginamit ni Satanas si Elifaz, saro sa tolong nagbisitang kaibaiba ni Job, tanganing mag-argumento na an mga tawo maluyahon na gayo. Sa pag-apod sa mga tawo bilang “mga nag-eerok sa mga harong na laboy,” sinabi nia ki Job: “An [saindang] pundasyon nasa kabokabo! An saro rinoronot sinda nin mas madali kisa sa layuglayog. Poon aga sagkod banggi sinda pinipiripidaso; sinda nawawara sagkod lamang na mayo nin siisay man na nagsasapuso kaiyan.”—Job 4:19, 20.

Sa iba pang kabtang kan Kasuratan, ibinaing kita sa “mga lalagan na gibo sa dalipay”—mga koron na mapapasaon. (2 Cor. 4:7) Kita maluya huli sa minanang kasalan asin pagkabakong sangkap. (Roma 5:12) Kun kita sana, madali kitang mabiktima kan mga pagsalakay ni Satanas. Alagad bilang mga Kristiano, may makukuanan kita nin tabang. Sa ibong kan satong mga kaluyahan, kita mahalagang marhay sa pagheling ni Jehova. (Isa. 43:4) Dugang pa, si Jehova nagtatao nin banal na espiritu sa mga naghahagad sa saiya. (Luc. 11:13) An saiyang espiritu puedeng magtao sa sato nin “puersa na labi sa ordinaryo,” na nagpapangyari na maatubang niato an ano man na kasakitan na hale ki Satanas. (2 Cor. 4:7; Fil. 4:13) Kun kita “marigon sa pagtubod” na maninindogan tumang sa Diablo, papakosogon kita nin Dios. (1 Pedro 5:8-10) Huli kaini, dai kita kaipuhan na matakot ki Satanas na Diablo.

 An Tawo “Nag-iinom sa Kabikoan”

“Ano an mortal na tawo tanganing sia magin malinig, o an siisay man na ipinangaki nin sarong babae tanganing sia magin nasa tama?” an hapot ni Elifaz. Dangan sia suminimbag, na nagsasabi: “Uya! Sa saiyang mga banal dai [an Dios] naniniwala, asin an mismong kalangitan bako talagang malinig sa saiyang mga mata. Gurano pa daw kun an saro makauuyam nin makuri asin maraot, sarong tawo na nag-iinom sa kabikoan na garo sana tubig!” (Job 15:14-16) Sinasabi ni Elifaz ki Job na dai ibinibilang ni Jehova na matanos an siisay man na tawo. Inaaprobetsaran man kan Diablo an negatibong kaisipan. Gusto nia na kita maghadit sa nakaaging mga sala, magin sobra kamapagkritika sa sadiri, asin mag-isip na dai na kita mababalukat. Gusto man nia na isipon niato na halangkawon an inaasahan sa sato ni Jehova asin na menoson niato an Saiyang pagkaherak, pagpapatawad, asin suporta.

Siempre, kita gabos “nagkasala asin nagkulang sa kamurawayan nin Dios.” Mayo nin bakong sangkap na tawo na makakaabot sa sangkap na mga pamantayan ni Jehova. (Roma 3:23; 7:21-23) Minsan siring, dai iyan nangangahulogan na mayo kitang halaga sa saiya. Aram ni Jehova na “an orihinal na halas, an inaapod na Diablo asin Satanas,” iyo an nag-aaprobetsar sa pagigin makasalan niato. (Kap. 12:9, 10) Huling aram nin Dios na “kita kabokabo,” sia makonsiderasyon asin dai ‘nagpaparahanap nin sala’ sa sato.—Sal. 103:8, 9, 14.

Kun babayaan niato an maraot na dalan asin madolok ki Jehova na may kapakumbabaan asin pagsolsol, “sia bulaos na magpapatawad.” (Isa. 55:7; Sal. 51:17) Minsan ngani an satong mga kasalan “magin garo eskarlata, iyan papapution na garo niebe,” an sabi kan Biblia. (Isa. 1:18) Kun siring, magin determinado kita na nungkang sumuko sa paghihingoang gibohon an kabotan nin Dios.

Huling kita makasalan, dai kutana kita noarin man puedeng ibilang na matanos sa atubangan nin Dios. An pagkasangkap asin an oportunidad na buhay na daing katapusan nawara ni Adan asin Eva bako sanang para sa sainda kundi para sa sato gabos. (Roma 6:23) Minsan siring, huli sa dakulang pagkamoot ni Jehova sa katawohan, guminibo sia nin probisyon tanganing mapatawad an satong mga kasalan kun kita magtubod sa atang na pantubos kan saiyang Aki, si Jesu-Cristo. (Mat. 20:28; Juan 3:16) Iyan makangangalas nanggad na kapahayagan kan “dai na kutana maninigong kabootan” nin Dios! (Tito 2:11) Mababalukat kita! Kun siring, taano ta totogotan niato si Satanas na papag-isipon kita na dai na kita mababalukat?

“Dotdota Pati an Saiyang Tolang Asin an Saiyang Laman”

Naghingako si Satanas na isusuko ni Job an saiyang pagtubod kun mawawara an saiyang marahay na salud. Sa pag-angat ki Jehova, an Diablo nagsabi: “Dotdota pati an saiyang tolang asin an saiyang laman patin helinga kun baga dai ka nia sumpaon nin atubangan.” (Job 2:5) Daing duda na maoogma an Kaiwal nin Dios kun ikakapamate nia sa sato na kita daing serbi huli sa satong pisikal na mga diperensia.

 Minsan siring, dai kita isinisikwal ni Jehova kun dai na niato kaya an gabos na dati niatong ginigibo sa paglilingkod sa saiya. Paano kun sarong dayupot na katood niato an kinolgan asin naerido? Mas hababa na daw an pagpapahalaga niato sa saiya huling dai na nia kaya an siring kan dati niang ginigibo para sa sato? Seguradong dai! Mamomotan asin aasikasohon pa man giraray niato sia—nangorogna kun sia naerido huli sa pagprotehir sa sato. Bako daw na iyan man an aasahan niato ki Jehova? “An Dios bakong maraot tanganing malingawan an saindong gibo asin an pagkamoot na ipinaheling nindo para sa saiyang ngaran,” an sabi kan Biblia.—Heb. 6:10.

Sinasambit kan Kasuratan an “sarong daing sukat na babaeng balo” na posibleng nagsuportar sa pagsamba sa Dios sa laog nin dakol na taon. Kan maheling sia ni Jesus na naghuhulog nin “duwang saradit na sinsilyo na kadikiton an halaga” sa sarong kaha sa templo, minansay daw ni Jesus na sia asin an saiyang kontribusyon daing halaga? Al kontraryo, inomaw nia an balo huli ta ginibo kaini an gabos na itinotogot kan saiyang kamugtakan tanganing suportaran an tunay na pagsamba.—Luc. 21:1-4.

Kun pinapagdadanay niato an satong integridad, makakasierto kita na an satong relasyon ki Jehova dai mararaot, gurano man kagrabe kan epekto sa sato kan paggurang o helang na resulta kan pagkabakong sangkap. Dai noarin man babayaan nin Dios an mga maimbod huli sana ta nalilimitaran nin kasakitan an saindang kakayahan na maglingkod sa saiya.—Sal. 71:9, 17, 18.

Akoon “an Helmet nin Kaligtasan”

Paano niato mapoprotehiran an satong sadiri sa propaganda ni Satanas? Si apostol Pablo nagsurat: “Padagos kamong magkaigwa nin puersa sa Kagurangnan asin sa kapangyarihan kan saiyang kosog. Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana kan Diablo.” An sarong kabtang kan espirituwal na pangalasag na iyan iyo “an helmet nin kaligtasan.” (Efe. 6:10, 11, 17) Kun mapadapit sa satanikong propaganda, maninigo niatong seguradohon na inako niato an helmet na iyan asin pirmeng isulog iyan. An helmet nin sarong soldados nagpoprotehir sa saiyang payo. An satong “paglaom na kaligtasan”—an kompiansa niato sa kaotoban kan mga panuga nin Dios manongod sa saiyang mamuraway na bagong kinaban—magpoprotehir sa satong isip sa mga kaputikan ni Satanas. (1 Tes. 5:8) Kaipuhan niatong papagdanayon na buhay asin makosog an paglaom na iyan paagi sa mahigos na personal na pag-adal kan Kasuratan.

Tinagalan ni Job an madahas asin maongison na mga pag-atake ni Satanas. Makosogon an pagtubod ni Job sa pagkabuhay liwat kaya dawa an huma nin kagadanan dai nagpaluya sa saiyang boot. Imbes, sinabi nia ki Jehova: “Ika maapod, asin ako mismo masimbag sa saimo. Para sa gibo kan saimong mga kamot ika magkakaigwa nin paghimuyawot.” (Job 14:15) Dawa kun si Job magadan huli sa pagpadanay kan saiyang integridad, may tiwala sia na an pagkamoot nin Dios sa maimbod na mga lingkod Nia mapahiro sa Saiya na apodon liwat sinda hale sa mga gadan.

Magkaigwa logod kita nin kaparehong kompiansa sa tunay na Dios. Kaya ni Jehova na remedyohan an ano man na puedeng ipaabot sa sato ni Satanas asin kan saiyang mga alipores. Girumdomon man na inaasegurar kita ni Pablo: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”—1 Cor. 10:13.

[Ritrato sa pahina 20]

Mahalaga ki Jehova an saindong maimbod na paglilingkod

[Ritrato sa pahina 21]

Akoon an helmet nin kaligtasan, asin pirmeng isulog iyan