An mga Anghel—Mga “Espiritu Para sa Paglingkod sa Publiko”
An mga Anghel—Mga “Espiritu Para sa Paglingkod sa Publiko”
“Bako daw na sinda gabos espiritu para sa paglingkod sa publiko, na isinugo tanganing maglingkod sa mga magmamana nin kaligtasan?”—HEB. 1:14.
1. Paano nakakaranga sa sato an Mateo 18:10 asin Hebreo 1:14?
PINATANIDAN ni Jesu-Cristo an siisay man na tibaad makapasingkog sa mga parasunod nia: “Siertohon nindo na dai nindo minemenos an saro sa mga saradit na ini; huli ta sinasabi ko sa saindo na an saindang mga anghel sa langit danay na nagheheling sa lalawgon kan sakong Ama na yaon sa langit.” (Mat. 18:10) Manongod sa matanos na mga anghel, si apostol Pablo nagsurat: “Bako daw na sinda gabos espiritu para sa paglingkod sa publiko, na isinugo tanganing maglingkod sa mga magmamana nin kaligtasan?” (Heb. 1:14) An mga tataramon na iyan nakakarangang garantiya na ginagamit nin Dios an langitnon na mga linalang na ini sa pagtabang sa mga tawo. Ano an sinasabi sa sato kan Biblia manongod sa mga anghel? Paano ninda kita tinatabangan? Ano an manonodan niato sa mga halimbawa ninda?
2, 3. Ano an nagkapirang trabaho kan langitnon na espiritung mga linalang?
2 May minilyon na maimbod na anghel sa langit. Gabos sinda “makakamhan sa kapangyarihan, na nag-ootob kan saiyang tataramon.” (Sal. 103:20; basahon an Kapahayagan 5:11.) An espiritung mga aking ini nin Dios may personalidad, mga kualidad nin Dios, asin sadiring kabotan. Marahayon an pagkaorganisar sa sainda asin igwa nin haralangkaw na katongdan sa areglo nin Dios, na an arkanghel iyo si Miguel (an ngaran ni Jesus sa langit). (Dan. 10:13; Jud. 9) An “panganay sa gabos na linalang” na ini iyo “an Tataramon” nin Dios o an Saiyang Representante sa Pagtaram, asin ginamit sia ni Jehova sa paggibo kan gabos na iba pang bagay.—Col. 1:15-17; Juan 1:1-3.
3 Mas hababa sa arkanghel an mga serafin, na nagpapahayag kan kabanalan ni Jehova asin nagtatabang na mapagdanay na malinig sa espirituwal an banwaan nia. Yaon man an mga kerubin, na naglilingkod bilang mga parasuportar sa saiyang kamahalan. (Gen. 3:24; Isa. 6:1-3, 6, 7) An ibang anghel, o mga mensahero, may manlaenlaen na trabaho sa paggibo kan kabotan nin Dios.—Heb. 12:22, 23.
4. Ano an reaksion kan mga anghel sa paglalang kan daga, asin ano kutana an nagin kahulogan sa mga tawo kan tamang paggamit nin sadiring kabotan?
4 An gabos na anghel naggayagaya kan ‘linalalang an daga’ asin may dakulang kaogmahan na ginibo an asignasyon sa sainda mantang an daing kaagid na garo mutya na ini sa espasyo ginigibong istaran nin katawohan. (Job 38:4, 7) Linalang ni Jehova an tawo na “mas hababa nin kadikit kisa sa mga anghel” alagad oyon sa Saiyang “ladawan,” sa siring ikinakapabanaag kan mga tawo an halangkawon na mga kualidad kan Kaglalang. (Heb. 2:7; Gen. 1:26) Paagi sa tamang paggamit kan balaog na sadiring kabotan, si Adan asin si Eva saka an saindang mga aki puede kutanang magkamit nin buhay sa paraisong istaran bilang kabtang kan unibersal na pamilya ni Jehova na kompuesto nin madonong na mga linalang.
5, 6. Anong rebelyon an nangyari sa langit, asin ano an ginibo nin Dios?
5 Seguradong nabigla an banal na mga anghel kan maheling mismo ninda an pagpoon kan rebelyon sa langitnon na pamilya nin Dios. An saro sa mga kaiba ninda bako nang kontento sa pag-omaw ki Jehova kundi nagmawot man na sambahon sia. Ginibo nia an sadiri nia na Satanas (na nangangahulogan “Paratumang”) paagi sa pagkuestion sa pagigin tama kan pamamahala ni Jehova asin paagi sa pagpoon nin ambisyosong pagprobar na mag-establisar nin karibal na soberaniya. Kan si Satanas magputik, may katusohan na sinutsutan nia an enot na tawong mag-agom na umiba sa saiya sa pagrebelde sa saindang mamomoton na Kaglalang.—Gen. 3:4, 5; Juan 8:44.
6 Tolos na hinokoman ni Jehova si Satanas paagi sa pagsabi kan enot na hula sa Biblia: “Papag-iiwalon taka asin an babae saka an saimong banhi asin an saiyang banhi. Lulugadon ka nia sa payo asin lulugadon mo sia sa bool.” (Genesis 3:15) Magpapadagos an pag-iiwal sa pag-oltanan ni Satanas asin kan simbolikong “babae” nin Dios. Iyo, an langitnon na organisasyon nin maimbod na espiritung mga linalang minamansay ni Jehova bilang sarong namomotan na agom na babae asin Sia an Agom na Lalaki. An hulang ini nagin masasarigan na basehan para sa paglaom, minsan ngani an mga detalye nagdanay na “sagradong hilom” na progresibong ihahayag. Katuyohan nin Dios na saro hale sa langitnon na kabtang kan saiyang organisasyon an mapoho sa gabos na rebelde asin paagi sa saiya titiponon “an mga bagay sa kalangitan asin an mga bagay sa daga.”—Efe. 1:8-10.
7. Ano an ginibo nin nagkapirang anghel kan panahon ni Noe, asin ano an nagin resulta kaiyan sa sainda?
7 Kan panahon ni Noe, may nagkapirang anghel na nagbaya sa saindang “tamang erokan” asin nagsulot nin pisikal na hawak tanganing gibohon an makasadiring kasingawan sa daga. (Jud. 6; Gen. 6:1-4) Iinapon ni Jehova an mga rebeldeng idto sa makuring kadikloman, asin sa siring uminiba sinda ki Satanas sa pagigin “marigsok na mga puersang espiritu” asin mabangis na mga kaiwal kan mga lingkod nin Dios.—Efe. 6:11-13; 2 Ped. 2:4.
Paano Kita Tinatabangan nin mga Anghel?
8, 9. Paano ginamit ni Jehova an mga anghel sa pagtabang sa mga tawo?
8 Kabilang si Abraham, Jacob, Moises, Josue, Isaias, Daniel, Jesus, Pedro, Juan, asin Pablo sa mga pinaglingkodan nin mga anghel. Isinagibo kan matanos na mga anghel an mga paghokom nin Dios asin ipinaabot an mga hula asin instruksion, kaiba an Ley ni Moises. (2 Ha. 19:35; Dan. 10:5, 11, 14; Gibo 7:53; Kap. 1:1) Huling yaon na sato ngonyan an kompletong Tataramon nin Dios, puedeng dai na kaipuhan nin mga anghel na magpaabot nin mga mensahe nin Dios. (2 Tim. 3:16, 17) Minsan siring, dai naheheling kan mga tawo na an mga anghel sibot na marhay sa paggibo kan kabotan nin Dios asin pagsuportar sa mga lingkod nia.
9 Sinisierto sa sato kan Biblia: “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.” (Sal. 34:7; 91:11) Huli sa isyu dapit sa integridad, tinotogotan ni Jehova si Satanas na gibohon sa sato an gabos na klase nin pagbalo. (Luc. 21:16-19) Minsan siring, aram nin Dios kun igo na an lawig kan tinatagalan niatong pagbalo tanganing mapatunayan an satong integridad sa saiya. (Basahon an 1 Corinto 10:13.) An mga anghel pirmeng listong tumabang oyon sa kabotan nin Dios. Ilinigtas ninda si Sadrac, Mesac, Abednego, Daniel, asin Pedro alagad dai inolang an mga kaiwal sa paggadan ki Esteban asin Santiago. (Dan. 3:17, 18, 28; 6:22; Gibo 7:59, 60; 12:1-3, 7, 11) Magkalaen an mga kamugtakan asin isyu. Kaagid kaiyan, ginadan an nagkapira sa satong mga tugang sa kampo de konsentrasyon nin Nazi, pero sinierto ni Jehova na makaligtas an kadaklan sa sainda.
10. Apuera sa tabang nin mga anghel, anong tabang an puedeng maako niato?
10 Dai itinotokdo kan Kasuratan na an kada tawo sa daga igwa nin anghel de la guardia. Namimibi kita na may pagsarig na ‘minsan ano an satong hagadon segun sa saiyang kabotan, dinadangog kita nin Dios.’ (1 Juan 5:14) Siempre, si Jehova puedeng magsugo nin anghel tanganing magtabang sa sato, alagad an tabang puedeng umabot sa ibang paagi. An mga kapwa Kristiano puedeng pahiroon na magtao nin tabang asin karangahan. An Dios puedeng magtao sa sato nin kadonongan asin panglaog na kosog na kaipuhan tanganing makayang tioson an “sarong tunok sa laman” na nagpapasakit sa sato na garo baga kita tinatampal nin “sarong anghel ni Satanas.”—2 Cor. 12:7-10; 1 Tes. 5:14.
Arogon si Jesus
11. Paano ginamit an mga anghel sa pagtabang ki Jesus, asin ano an nagibo nia paagi sa pagdadanay na maimbod sa Dios?
11 Isip-isipa kun paano ginamit ni Jehova an mga anghel sa kamugtakan ni Jesus. Ipinaisi ninda an saiyang pagkamundag asin pagkabuhay liwat saka nagtabang sa saiya kan sia nasa daga kaidto. Puede kutanang olangon kan mga anghel an pag-arestar asin maringis na paggadan sa saiya. Imbes, isinugo an sarong anghel tanganing pakosogon sia. (Mat. 28:5, 6; Luc. 2:8-11; 22:43) Kaoyon kan katuyohan ni Jehova, si Jesus nagadan bilang atang asin nagin prueba na kayang mapagdanay nin sarong sangkap na tawo an integridad sa Dios sa ibong nin grabeng pagbalo. Sa siring, binuhay liwat ni Jehova si Jesus sa langitnon na buhay bilang imortal, na itinao sa saiya an “gabos na autoridad” asin ipinasakop sa saiya an mga anghel. (Mat. 28:18; Gibo 2:32; 1 Ped. 3:22) Huli kaini, si Jesus an nagin pangenot na kabtang kan “banhi” kan simbolikong “babae” nin Dios.—Gen. 3:15; Gal. 3:16.
12. Sa anong paagi niato maaarog an timbang na halimbawa ni Jesus?
12 Aram ni Jesus na sala na baloon nia si Jehova, na umasa na ililigtas sia nin mga anghel kun sia mahiro na daing ingat. (Basahon an Mateo 4:5-7.) Kaya arogon niato an halimbawa ni Jesus paagi sa pamumuhay na may “toltol na isip,” na dai basta isinasapeligro an satong sadiri, pero may kompiansang inaatubang an persekusyon.—Tito 2:12.
Kun Ano an Manonodan Niato sa Maimbod na mga Anghel
13. Ano an manonodan niato sa halimbawa kan matanos na mga anghel na nasambitan sa 2 Pedro 2:9-11?
13 Sa pagsagwe sa mga “nagtataram na may panglilibak” sa linahidan na mga lingkod ni Jehova, sinambit ni apostol Pedro an marahayon na halimbawa kan matanos na mga anghel. Minsan ngani igwa sinda nin dakulang kapangyarihan, mapakumbabang linilikayan kan mga anghel na magin mapaghusgar “huli sa paggalang ki Jehova.” (Basahon an 2 Pedro 2:9-11.) Likayan man niato an salang paghusgar, igalang an mga pinaniwalaan nin pangangataman sa kongregasyon, asin ipabaya an mga bagay-bagay sa kamot ni Jehova, an Supremong Hokom.—Roma 12:18, 19; Heb. 13:17.
14. Ano an mga halimbawa nin mapakumbabang paglilingkod kan mga anghel?
14 An mga anghel ni Jehova nagtatao sa sato nin marahayon na mga halimbawa nin mapakumbabang paglilingkod. May mga anghel na nagsayumang sabihon sa mga tawo an saindang ngaran. (Gen. 32:29; Hok. 13:17, 18) Minsan ngani may minilyon na espiritung linalang sa langit, an ihinahayag kan Biblia iyo sana an ngaran ni Miguel asin Gabriel. Mapoprotehiran kita kaini na dai magtao nin dai maninigong onra sa mga anghel. (Luc. 1:26; Kap. 12:7) Kan si apostol Juan maghuruhod sa pagsamba sa atubangan nin sarong anghel, sia sinadol: “Mag-ingat ka! Dai mo iyan paggibohon! Ako kapwa oripon mo sana asin kan saimong mga tugang.” (Kap. 22:8, 9) An satong pagsamba, kaiba an satong mga pamibi, maninigo na sa Dios sana.—Basahon an Mateo 4:8-10.
15. Paano nagtatao sa sato nin halimbawa sa pagpapasensia an mga anghel?
15 An mga anghel halimbawa man sa pagpapasensia. Minsan ngani sinda interesadong marhay na maaraman an sagradong mga hilom nin Dios, dai ninda aram an gabos kaiyan. “Sa mismong mga bagay na ini an mga anghel nagmamawot na makaaninaw,” an sabi kan Biblia. (1 Ped. 1:12) Kaya, ano an ginigibo ninda? Mapasensia sindang naghahalat sagkod sa itinalaan na panahon nin Dios na ‘ipaaram paagi sa kongregasyon an saiyang manlaenlaen na kadonongan.’—Efe. 3:10, 11.
16. Ano an epekto sa mga anghel kan satong gawe-gawe?
16 An mga Kristiano na nag-aagi nin pagbalo garo ‘sarong panteatrong dadalanon para sa mga anghel.’ (1 Cor. 4:9) May dakulang satispaksion na minamasdan kan mga anghel an satong maimbod na mga gibo asin naggagayagaya pa ngani sinda kun may nagkasala na nagsosolsol. (Luc. 15:10) Naheheling kan mga anghel an diosnon na gawe-gawe nin mga Kristiana. Ipinapaheling kan Biblia na “an babae maninigong may tanda nin pagpasakop sa saiyang payo huli sa mga anghel.” (1 Cor. 11:3, 10) Iyo, naoogma an mga anghel na maheling an mga Kristiana asin an gabos na iba pang lingkod nin Dios sa daga na nagsusunod sa teokratikong areglo asin pagkapayo. An siring na pagkuyog angay na pagirumdom para sa langitnon na mga aking ini nin Dios.
Aktibong Sinusuportaran nin mga Anghel an Paghuhulit
17, 18. Taano ta masasabi niato na sinusuportaran nin mga anghel an satong paghuhulit?
17 An mga anghel kalabot man sa nagkapira sa pambihirang mga bagay na nangyayari sa “aldaw kan Kagurangnan.” Kaiba digdi an pagkamundag kan Kahadean kan 1914 asin an pag-apon ni “Miguel asin [kan] saiyang mga anghel” ki Satanas asin sa saiyang mga demonyo hale sa langit. (Kap. 1:10; 11:15; 12:5-9) Naheling ni apostol Juan an sarong “anghel na naglalayog sa kaitaasan, asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga.” An anghel nagsabi: “Matakot kamo sa Dios asin pamurawayon nindo sia, huli ta nag-abot na an oras kan saiyang paghokom, kaya sambahon nindo an Saro na naggibo kan langit asin daga asin dagat patin mga burabod nin tubig.” (Kap. 14:6, 7) Sa siring, sinisierto sa mga lingkod ni Jehova na sinda susuportaran nin mga anghel mantang naghuhulit sinda kan maogmang bareta kan naestablisar nang Kahadean sa ibong kan maisog na pagtumang kan Diablo.—Kap. 12:13, 17.
18 Ngonyan, dai kita ginigiyahan nin mga anghel pasiring sa mga tawong sadiosan an puso paagi sa pakikipag-olay sa sato siring kan pakipag-olay nin sarong anghel ki Felipe asin paggiya sa saiya pasiring sa kapon na Etiope. (Gibo 8:26-29) Minsan siring, dakol na eksperyensia sa presenteng panahon an nagtatao nin prueba na minsan ngani dai niato naheheling an mga anghel, sinusuportaran ninda an satong paghuhulit kan Kahadean asin ginigiyahan kita pasiring sa mga tawong “may tamang inklinasyon sa buhay na daing katapusan.” * (Gibo 13:48) Mahalaga nanggad na regular na makikabtang sa ministeryo tanganing magibo niato an satong kabtang sa paghanap sa mga nagmamawot na ‘magsamba sa Ama sa espiritu asin katotoohan’!—Juan 4:23, 24.
19, 20. Ano an kabtang nin mga anghel sa mga pangyayari na tanda kan “pagtatapos kan sistema nin mga bagay”?
19 Manongod sa satong panahon, sinabi ni Jesus na “sa pagtatapos kan sistema nin mga bagay,” “isusuway [kan mga anghel] an mga maraot sa mga matanos.” (Mat. 13:37-43, 49) May kabtang an mga anghel sa pangultimong pagtipon asin pagtatak sa mga linahidan. (Basahon an Mateo 24:31; Kap. 7:1-3) Dugang pa, kaiba ni Jesus an mga anghel kun ‘isuway na nia an mga karnero sa mga kanding.’—Mat. 25:31-33, 46.
20 “Sa pagkahayag kan Kagurangnan na Jesus hale sa langit kaiba an saiyang makapangyarihan na mga anghel,” lalaglagon an gabos na “dai nakakamidbid sa Dios asin [an] mga dai nagkukuyog kan maogmang bareta manongod sa satong Kagurangnan na Jesus.” (2 Tes. 1:6-10) Kan maheling ni Juan an iyo man sanang pangyayaring iyan sa bisyon, ilinadawan nia si Jesus asin an langitnon na mga hukbo nin mga anghel na nakasakay sa mga kabayong puti tanganing makilaban na may katanosan.—Kap. 19:11-14.
21. Ano an gigibohon ki Satanas asin sa saiyang mga demonyo kan anghel ‘na may kapot na liabe kan bûngaw asin sarong dakulang kadena’?
21 ‘Naheling man ni Juan an sarong anghel na naghihilig hale sa langit na kapot an liabe kan bûngaw asin an sarong dakulang kadena.’ Ini daing iba kundi an arkanghel na si Miguel, na iyo an magapos sa Diablo asin mahulog sa saiya sa bûngaw—asin malinaw na kaiba an mga demonyo. Sinda bubutasan sa halipot na panahon sa katapusan kan Milenyal na Paghade ni Cristo, na durante kaiyan an sangkap na katawohan maagi nin pangultimong pagbalo. Pakatapos kaiyan, lalaglagon si Satanas asin an gabos na iba pang rebelde. (Kap. 20:1-3, 7-10; 1 Juan 3:8) Mahahale na an gabos na rebelyon tumang sa Dios.
22. Paano kalabot an mga anghel sa haranihon nang mangyayari, asin ano an maninigong mamatean niato dapit sa magigin kabtang ninda?
22 Haranihon na an dakulang kaligtasan sa maraot na sistema nin mga bagay ni Satanas. An mga anghel magkakaigwa nin espesipikong kabtang sa makahulogan na mga pangyayaring ini na mabindikar sa soberaniya ni Jehova asin lubos na maotob sa saiyang katuyohan para sa daga asin sa katawohan. An matanos na mga anghel tunay nanggad na mga “espiritu para sa paglingkod sa publiko, na isinugo tanganing maglingkod sa mga magmamana nin kaligtasan.” Kun siring, magpasalamat kita ki Jehova Dios sa paagi nin paggamit nia sa mga anghel sa pagtabang sa sato na gibohon an saiyang kabotan asin magkamit nin buhay na daing katapusan.
[Nota sa Ibaba]
^ par. 18 Helingon an Jehovah’s Witnesses—Proclaimers of God’s Kingdom, pahina 549-551.
Ano an Isisimbag Nindo?
• Paano an pagkaorganisar sa langitnon na espiritung mga linalang?
• Ano an ginibo nin nagkapirang anghel kan panahon ni Noe?
• Paano ginamit nin Dios an mga anghel sa pagtabang sa sato?
• Sa anong mga aktibidad may kabtang an matanos na mga anghel sa satong panahon?
[Mga Hapot Para sa Pag-adal]
[Ritrato sa pahina 21]
An mga anghel naggagayagaya sa paggibo kan kabotan nin Dios
[Ritrato sa pahina 23]
Siring sa kamugtakan ni Daniel, an mga anghel pirmeng listong tumabang oyon sa kabotan nin Dios
[Mga Ritrato sa pahina 24]
Kosogan nindo an saindong boot, huling sinusuportaran nin mga anghel an paghuhulit kan Kahadean!
[Credit Line]
Globo: Retrato na kua kan NASA