Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Helingon kun masisimbag nindo an minasunod na mga hapot:

• Taano ta importanteng marhay na papagdanayon niato an satong integridad bilang Kristiano?

An pagpapadanay niato kan satong integridad nakakatabang sa sato na manindogan para sa soberaniya ni Jehova huli sa pagkamoot asin patunayan na putikon si Satanas. An satong integridad nagtatao man nin basehan para sa paghokom sa sato nin Dios asin, kun siring, mahalagang marhay sa satong paglaom sa ngapit.—12/15, pahina 4-6.

• Ano an nagkapirang titulo na nagpapaheling kan papel ni Jesus sa katuyohan nin Dios?

An bugtong na Aki. An Tataramon. An Amen. An Parapangoltanan kan bagong tipan. An Halangkaw na Saserdote. An ipinanugang Banhi.—12/15, pahina 15.

• Ano an ipinaparisa kan bagay na sinabihan ni Elias an saiyang katabang na magheling pasiring sa dagat mientras na namimibi an propeta na logod mag-oran? (1 Ha. 18:43-45)

Ipinaheling ni Elias na may kaaraman sia dapit sa siklo nin tubig. An mga panganoron na napoporma sa ibabaw kan dagat mapasiring sa ibabaw kan daga asin dian iyan magigin oran.—Ene.-Mar., pahina 15-16.

• Paano niato madudugangan an kagayagayahan niato sa satong ministeryo?

Puede niatong andamon an satong puso, na nagkokonsentrar sa kun gurano nanggad an ikakatabang niato sa iba. Puede kitang maghulit na may katuyohan na makapoon nin mga pag-adal sa Biblia. Kun mapaatubang kita sa mga tawo na indiperente, puede niatong ibagay an satong paagi nin pagdolok tanganing mapukaw an interes kan mga tawo sa satong teritoryo.—1/15, pahina 8-10.

• An lepra daw na nasambitan sa Biblia iyo man an helang na inaapod ngonyan na lepra?

Kan mga panahon kan Biblia, igwa na talaga kan impeksion na hale sa bakterya asin inaapod na lepra. (Lev. 13:4, 5) Nasambitan man sa Biblia an lepra na naglataw sa mga gubing asin harong. An “lepra” na iyan tibaad sarong klase nin alamag. (Lev. 13:47-52)—2/1-E, pahina 19.

• An mga katokdoan sa Biblia maninigong magkaigwa nin anong epekto sa saboot asin mga kaugalean nin Kristiano mapadapit sa mga pagpatente sa gadan asin lobong?

Minsan ngani tibaad magmondo an sarong Kristiano huli sa nagadan na namomotan, aram nia na an mga gadan daing pakaaram. Dawa kun tatsaran sia kan mga daing pagtubod, linilikayan nia an mga kostumbreng konektado sa paniniwala na an mga gadan kayang impluwensiahan an mga nabubuhay. Tanganing malikayan an mga problema, isinusurat kan nagkapirang Kristiano an saindang mga instruksion dapit sa mga areglo kan pagpatente sa gadan asin lobong.—2/15, pahina 29-31.

• Segun sa Salmo 1:1, ano an tolong bagay na dapat niatong likayan tanganing magin maogma kita?

Nasambitan sa teksto ‘an hatol kan mga maraot,’ ‘an dalan nin mga parakasala’ asin ‘an tukawan nin mga paraolog-olog.’ Iyo, tanganing magin maogma, kaipuhan niatong rayoan an mga nag-oolog-olog o nagbabaliwala sa mga ley nin Dios. Imbes, kita maninigo na naoogmang marhay sa ley ni Jehova.—3/1-E, pahina 17.

• Mga nawarang libro daw kan Biblia an “libro ni Jasar” asin an “libro kan mga Pakikiguerra ni Jehova”? (Jos. 10:13; Bil. 21:14)

Bako. Iyan garo baga dai ipinasabong na mga dokumentong yaon na kan mga panahon kan Biblia asin nasambitan kan mga kagsurat sa Biblia.—3/15, pahina 32.

• Anong dakulang pagbabago an ginibo sa sarong modernong traduksion kan Biblia sa Latin?

Kan 1979, inaprobaran ni Papa Juan Paulo II an Nova Vulgata, sarong bagong traduksion sa Latin. An enot na edisyon igwa kan banal na ngaran, na Iahveh, sa nagkapirang teksto. (Ex. 3:15; 6:3) Minsan siring, kan ipinublikar an ikaduwang opisyal na edisyon kan 1986, Dominus [Kagurangnan] an ilinaag imbes na Iahveh.—Abr.-Hun., pahina 22.