Pagpapatotoo sa Sadan

KAN nasa siudad nin Atenas, si apostol Pablo aroaldaw na nagduduman sa sadan tanganing maghulit kan maogmang bareta manongod ki Jesus. (Gibo 17:17) Pinili ni Pablo an sadan huli ta iyan an sentro nin buhay kan mga taga Atenas.

Pakalihis nin haros 2,000 na taon, an banwaan ni Jehova nagpapalakop pa man giraray sa sadan kan mensahe kan Kahadean nin Dios. Taano? Huli ta dakol na tawo an manonompongan dian. Ngonyan, an sadan tibaad sarong shopping center o mall. Pagkatapos na makakua an nagkapirang Saksi nin permiso sa manedyer o sa kagsadiri, nagbugtak sinda nin lamesa o puesto tanganing mag-display nin mga literatura sa Biblia.

Halimbawa, sa sarong shopping mall sa New Jersey, E.U.A., inareglar an sarong nakakaakit na display nin mga literatura dapit sa temang “Pagpapadanay nin Marahay na mga Pamantayan sa Pamilya​—Paano?” An resulta? Sa sarong aldaw, nakapasakamot sinda nin 153 na libro sa anom na lenguahe.

An sarong babae na duminolok sa may puesto kan literatura naghinanyog na marhay sa paliwanag na itinao kan saro sa mga Saksi. Nag-oyon an babae na mahalaga na yaon an Dios sa satong buhay asin sa satong pamilya. Nakakua sia kan minasunod na mga publikasyon: Makanood sa Dakulang Paratokdo, An Sekreto sa Kaogmahan nin Pamilya, asin Questions Young People Ask​—Answers That Work.

Kan amay na hapon, sarong lalaki an uminagi sa may display nin mga literatura kan palaog sia sa kataed na tindahan. Napaturohok an mga mata nia sa librong Young People Ask. An tugang na babae na nagtitindog sa may puesto nariparo na garo interesado an lalaki. Hinapot nia ini, “May nagustohan po kamong libro?” Nagtango ini asin itinokdo an librong Young People Ask. Itinao sa saiya kan tugang an libro, na kinukua na nia kutana.  Sinabi kan lalaki na igwa siang tolong aki. Sa pagpapadagos kan saindang pag-oolay, nasambitan nia na nakikipag-olay sia sa saiyang mga aki sarong beses kada semana. Tinedyer na an saiyang duwang pinakamatuang aki. Mantang binubuklat nia an libro, sinabi nia na pasil na marhay na magagamit nia an libro sa nagkapira sa saindang pag-orolay bilang pamilya. Ipinaheling man sa saiya kan parahayag an librong An Sekreto sa Kaogmahan nin Pamilya, na sinisierto sa saiya na makakakua sia asin an saiyang agom nin nakakatabang na marhay na mga sadol dapit sa pagdedesisyon sa pamilya. An lalaki nagpasalamat sa suhestion, nagdonar, asin nag-ako kan alok na may magdalaw sa sainda.

Ano an namatean kan mga Saksi sa saindang sarong aldaw na pagpapatotoo sa mall? “Personalmente kong ikinaogma an paaging ini nin paghuhulit,” an sabi nin sarong tugang na babae. “Marahayon nanggad na eksperyensia idto para sa sako!” An saro pang tugang na babae nagsabi: “Sinasabi ni Jehova na an maogmang bareta ihuhulit sagkod sa kaporoporohi kan daga. Ngonyan, sa Parasmus, New Jersey, an maogmang baretang ini nakapahiro sa mga tawo na manlaenlaen an lenguahe. Marahayon sa pagmate na magin kabtang kan areglong ini. Naogma an gabos na nakikabtang dian. Kan matapos na an aldaw, mayo sa samo na gustong maghale.”

Puede daw nindong pahiwason an saindong mga paagi nin paghuhulit kan maogmang bareta? An satong pangenot na paagi iyo an pagharongharong. (Gibo 20:20) Minsan siring, puede daw nindong probaran na magpatotoo sa sadan o sa mall?