Napapasuway Alagad Dai Nalilingawan

SINADOL ni apostol Pablo an mga kapwa Kristiano: “Gumibo kita kan marahay sa gabos, alagad nangorogna sa mga may relasyon sa sato sa pagtubod.” (Gal. 6:10) Ngonyan, sinusunod pa man giraray niato an ipinasabong na instruksion na iyan asin naghahanap kita nin mga paagi na gumibo nin marahay sa satong mga kapagtubod. Kabilang sa mga nangangaipo asin maninigong tawan nin mamomoton na atension kan Kristianong kongregasyon iyo an namomotan na gurang nang mga tugang niato na nakaistar sa mga klinika sa pag-ataman sa mga gurang asin may helang (nursing home).

Totoo, sa nagkapirang nasyon, pinagkatodan na nin mga pamilya na asikasohon sa harong an gurang nang mga magurang. Minsan siring, sa ibang mga nasyon, dakol na gurang an parateng nakadepende sa pag-ataman sa sainda nin sarong klinika. Paano man an gurang nang mga Kristiano na nakaistar sa mga klinikang iyan? Anong mga problema an napapaatubang sa sainda? Paano ninda iyan nakakayanan kun mayo sindang suporta nin mga kapamilya? Paano makakatabang sa sainda an Kristianong kongregasyon? Asin sa anong mga paagi kita nakikinabang kun regular niato sindang dinadalaw?

Mga Problema sa mga Klinika sa Pag-ataman sa mga Gurang

Kun an gurang nang mga Kristiano minabalyo sa sarong klinika sa pag-ataman sa mga gurang, an klinikang iyan tibaad yaon sa teritoryo nin sarong kongregasyon na bako sindang midbid kan mga Saksi. Bilang resulta, tibaad dai sinda parateng madadalaw kan mga Saksi duman. Dugang pa, sa klinika, posibleng marhay na napapalibotan sinda nin mga tawo na laen an mga paniniwala. Huli kaiyan, tibaad magkaproblema an satong gurang nang mga kapwa Saksi.

 Halimbawa, sa nagkapirang lugar, inaareglo nin mga klinika sa pag-ataman sa mga gurang na magkaigwa nin relihiosong mga serbisyo sa pasilidad na iyan. Nagkomento an sarong nag-aataman sa mga gurang: “Nagkapirang gurang nang Saksi na dai kayang magkomunikar nin malinaw asin nasa mga silyang de rueda an dinara sa mga seremonya sa simbahan, na dai sinda kinokonsulta kun ano an gusto ninda.” Dugang pa, parateng ginagamit nin mga tawohan sa mga klinika an mga kumpleanyo, Pasko, o Pasko nin Pagkabuhay tanganing barobagohon an rutina kan mga residente. Inalok man an nagkapirang Saksi sa mga klinikang iyan nin kakanon na dai itotogot kan saindang konsensia na kakanon iyan. (Gibo 15:29) Kun regular niatong dinadalaw an satong gurang nang mga tugang, matatabangan niato sinda na atubangon an siring na mga problema.

Suporta Hale sa Kongregasyon

Listo an enot na mga Kristiano sa saindang paninimbagan sa mga gurang kun an mga ini mayo nin pamilya na masuportar sa sainda. (1 Tim. 5:9) Kaagid kaiyan, an Kristianong mga paraataman ngonyan listo na siertohon na dai napapabayaan an mga gurang na nakaistar sa siring na mga klinika sa saindang lugar. * Si Robert, sarong magurang sa kongregasyon, nagsabi: “Marahay kun personal na dalawon nin Kristianong mga paraataman an mga gurang tanganing maheling an kamugtakan nin buhay kan mga ini asin mamibi kaiba kan mga ini. Dakula an magigibo kan kongregasyon sa pag-asikaso sa saindang mga pangangaipo.” Kun  nagtatagama kita nin panahon na dalawon an mga gurang, ipinapaheling niato na nasasabotan niato kun gurano kahalaga sa pagheling ni Jehova na asikasohon an mga nagkakaipo nin tabang.​—Sant. 1:27.

Kun kaipuhan, gikan sa boot na inaareglar kan kamagurangan na magtao nin praktikal na tabang sa saindang mga tugang na nasa lokal na mga klinika sa pag-ataman sa mga gurang. Nagkomento si Robert kun ano an tibaad sarong pangangaipo, “Maninigo niatong dagkahon an gurang nang mga tugang na mag-atender sa Kristianong mga pagtiripon kun kaya ninda.” Minsan siring, para sa mga dai na makakabiahe pasiring sa Kingdom Hall, puedeng gumibo nin ibang mga areglo an kamagurangan. Si Jacqueline, na mga 85 anyos asin may osteoartritis, naghihinanyog sa mga pagtiripon paagi sa telepono. Sia nagsabi: “Dakula an pakinabang ko sa pagdangog sa mga pagtiripon mantang aktuwal na ginigibo iyan. Dai ko iyan papalampason ano man an mangyari!”

Kun an sarong gurang nang Kristiano dai makakapaghinanyog sa mga pagtiripon paagi sa telepono, puedeng iareglo nin kamagurangan na irekord an mga pagtiripon. An naghahatod kan mga rekording sa tugang na nasa klinika puedeng gamiton an oportunidad na iyan na makiestoryahan digdi sa paaging nakakaparigon sa boot. “An pagbareta sa gurang nang mga tugang mapadapit sa mga miembro kan lokal na kongregasyon nagpapamate sa sainda na sinda kabtang pa man giraray kan satong espirituwal na pamilya,” an sabi nin sarong Kristianong paraataman.

Papagdanayon an Komunikasyon

Natural sanang nakakatension asin nakakaribaraw na eksperyensia para sa dakol na gurang an pagbalyo sa sarong klinika sa pag-ataman sa mga gurang. Bilang resulta, an nagkapira may tendensiang isuway an sadiri ninda sa iba. Minsan siring, kun dinadalaw tolos niato an gurang nang mga tugang niato pakabalyo ninda asin kun ipinapahayag niato an satong padagos na suporta sa sainda, dakula an ikakatabang niato na magkaigwa giraray sinda nin panlaog na katoninongan asin kagayagayahan.​—Tal. 17:22.

Kun an gurang nang mga tugang nagigin ulianon na o dai na nakakadangog o may iba pang problema na nakakaolang sa komunikasyon, tibaad isipon nin nagkapira na an pagdalaw sa sainda mayong pakinabang. Minsan siring, an satong mga paghihingoa na padagos na dalawon sinda, gurano man kadepisil na makikomunikar sa sainda, nagpapaheling na padagos kitang ‘nangengenot sa pagtao nin onra’ sa satong mga kapagtubod. (Roma 12:10) Kun nagigin malilingawon na an gurang nang tugang, puede niato siang dagkahon na magsaysay nin mga eksperyensia nia kan enot​—dawa poon kan sia aki pa—​o sabihon sa sato kun paano sia nakaaram kan katotoohan sa Biblia. Ano an magigibo niato kun nasasakitan siang masabi an angay na mga tataramon? Pasensiosong maghinanyog, asin kun angay, magsambit nin duwa o tolong tataramon na garo baga gusto niang sabihon, o sumaryohon an saiyang mga ideya saka dagkahon sia na magpadagos. Kun sia nariribaraw o may depekto sa pagtaram asin depisil na masabotan, puede niatong pagmaigotan na saboton an boot niang sabihon paagi sa maingat na pag-atento sa tono kan saiyang boses.

Kun dai na posible an berbal na komunikasyon, puedeng gumamit nin iba pang paagi. Si Laurence, sarong payunir, regular na nagdadalaw ki Madeleine, na sarong 80 anyos na Kristianang tugang na dai na makataram. Ipinaliwanag ni Laurence kun paano sia nakikikomunikar: “Kinakapotan ko an kamot ni Madeleine mantang magkaibanan kaming namimibi. Dangan, kinakapotan nia nin medyo madoon an sakong kamot asin kinikimatkimat nia an saiyang mga mata tanganing ipaheling an saiyang pag-apresyar sa mamomoton na mga panahon na ini.” An pagkapot sa kamot kan satong gurang nang mga katood o pagkugos sa sainda nin odok sa puso puede nanggad na makaparigon na marhay liwat sa saindang boot.

Mahalaga an Saindong Presensia

An regular na pagdalaw nindo sa mga gurang tibaad magkaigwa nin epekto sa kalidad nin pag-ataman sa mga ini. Si Daniele, na mga 20 taon nang nagdadalaw sa mga kapwa Saksi sa mga klinika sa pag-ataman sa mga gurang, nagkomento, “Kun naririsa kan mga tawohan sa klinika na may regular na nagdadalaw sa sarong gurang, ini mas naaataman.” Si Robert, na kinotar sa enotan, nagsabi: “Mas posibleng marhay na an mga nag-aataman mahinanyog sa tawong regular na nagdadalaw sa sarong residente. Tibaad dai sinda magpaheling nin kaparehong paggalang sa saro na paminsanminsan sanang nagdadalaw.” Huling an mga nars parateng napapaatubang sa mga pamilyang depisil panigoan, inaapresyar ninda an mga kapahayagan nin pasasalamat hale sa mga bisita. Dugang pa, kun hihingoahon niato na magkaigwa nin marahay na relasyon sa mga nag-aataman, tibaad mas may tendensia sinda na igalang an mga pamantayan asin tinutubod kan gurang nang Saksing  pasyente na inaataman ninda.

Magkakaigwa man kita nin marahay na relasyon sa mga tawohan sa klinika paagi sa pag-alok na magtabang sa simpleng mga trabaho. Sa nagkapirang lugar, pirmeng kulang an kualipikadong mga tawohan kaya naiinaan an kalidad nin pag-ataman sa mga gurang. Si Rebecca, sarong nars, nagrekomendar: “Sibot-sibot an mga panahon nin pagkakan. Kaya tibaad marahayon na mga panahon ini na dalawon an sarong katood asin tabangan siang magkakan.” Maninigo na dai kita mag-alangan na humagad nin mga suhestion sa mga tawohan sa klinika kun paano kita makakatabang.

Kun regular kitang nagdadalaw sa iyo man sanang pasilidad sa pag-ataman, maheheling niato kun ano an kaipuhan kan satong gurang nang tugang, asin sa pagtogot kan mga tawohan kan pasilidad, puede kitang magsadiring boot na itao an mga pangangaipong iyan. Halimbawa, tibaad puede kitang magbugtak nin nakakaogmang mga dekorasyon sa kuarto nin sarong residente arog baga nin mga retrato nin mga namomotan o drowing nin mga aki. Isinasaisip an ikakarahay kan residente, puede kitang magdara nin maimbong na pantorog o pirang bagay na arog nin lotion asin sabon. Kun an klinika may hardin, puede daw niatong darahon sa luwas an satong katood para sa preskong doros? Si Laurence, na kinotar sa enotan, nagsabi: “Inaantisipar ni Madeleine an pagdalaw ko kada semana. Kun nag-iiba ako nin mga aki, tolos-tolos siang minahuyom asin maheheling sa saiyang mga mata an kaogmahan!” An arog kaiyan na pagsadiring boot puedeng magkaigwa nin dakulang epekto sa mga nakaistar sa klinika sa pag-ataman sa mga gurang.​—Tal. 3:27.

Mga Pakinabang sa Lambang Saro

Puedeng mabalo kan regular na pagdalaw sa sarong gurang “an pagigin tunay kan [satong] pagkamoot.” (2 Cor. 8:8) Sa anong paagi? Tibaad makolog para sa sato na maheling an sarong katood na dikit-dikit na nagluluya. Inadmitir ni Laurence: “Kan primero, an nagluyang kamugtakan ni Madeleine nakaapektar na gayo sa sako kaya naghihibi ako pagkatapos nin kada pagdalaw. Alagad narealisar ko na an odok na pamibi makakatabang sa sato na mapangganahan an satong mga takot asin magin mas nakakaparigon sa boot.” Sa laog nin dakol na taon, dinadalaw ni Robert an sarong Kristianong tugang na an ngaran Larry na may Parkinson’s disease. Sinabi ni Robert: “Naapektaran na gayo si Larry kan saiyang helang kaya dai ko na nasasabotan an dawa sarong tataramon na sinasabi nia. Alagad kun magkaibanan kaming namimibi, namamate ko pa man giraray an saiyang pagtubod.”

Kun dinadalaw niato an gurang nang mga kapagtubod, bako sanang tinatabangan niato sinda kundi nakikinabang man kita. An saindang determinasyon na magdanay na dayupot ki Jehova mantang kaibanan sa istaran an mga tawong may laen na mga paniniwala nagtotokdo sa sato na magkaigwa nin pagtubod asin magpaheling nin kosog nin boot. An saindang entusiasmo na umako nin espirituwal na kakanon sa ibong nin mga depekto sa pagdangog asin pagheling nagdodoon na “an tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mat. 4:4) Huling naoogma sinda sa simpleng mga bagay, arog baga nin huyom nin aki o iribang pagkarakan, an mga gurang nagpapagirumdom sa sato na makontento sa kun ano an igwa kita. An saindang pagkamoot sa espirituwal na mga bagay makakatabang sa sato na magbugtak nin tamang mga prioridad.

Totoo, an bilog na kongregasyon nakikinabang sa suporta na itinatao niato sa mga gurang. Taano man? Mantang an mga mas maluya sa pisikal mas nakadepende sa kapadangatan na sa magturugang, tinatawan ninda an kongregasyon nin mga oportunidad na umoswag sa pagpaheling nin pagmalasakit. Kun siring, maninigong mansayon niato gabos na an pag-asikaso sa mga gurang, dawa sa halawig na mga panahon, kabtang kan paglilingkod niato sa lambang saro. (1 Ped. 4:10, 11) Kun nangengenot an kamagurangan sa aktibidad na ini, matatabangan ninda an ibang mga miembro kan kongregasyon na maheling na dai noarin man maninigong pagpabayaan an aspektong ini kan satong Kristianong aktibidad. (Ezeq. 34:15, 16) Paagi sa gikan sa boot asin mamomoton na suporta niato, inaasegurar niato giraray an satong gurang nang mga kapwa Kristiano na sinda dai nalilingawan!

[Nota sa Ibaba]

[Blurb sa pahina 28]

“Kun naririsa kan mga tawohan sa klinika na may regular na nagdadalaw sa sarong gurang, ini mas naaataman”

[Ritrato sa pahina 26]

An satong odok sa pusong mga pamibi puedeng makatabang sa gurang nang kapwa Saksi na magkaigwa giraray nin panlaog na katoninongan

[Ritrato sa pahina 26]

An satong mamomoton na mga kapahayagan nin kapadangatan mapakosog sa satong gurang nang mga kapagtubod