Ikaogma an Buhay na May Pagkatakot ki Jehova
Ikaogma an Buhay na May Pagkatakot ki Jehova
“Matakot ki Jehova, kamong mga banal nia, huli ta dai nagkukulang an mga natatakot sa saiya.”—SALMO 34:9.
1, 2. (a) Sa anong magkakalaen na paagi minamansay kan Kakristianohan an pagkatakot sa Dios? (b) Anong mga hapot an sisiyasaton niato ngonyan?
AN MGA parahulit sa Kakristianohan na nagtotokdo nin pagkatakot sa Dios parateng ginigibo iyan basado sa bakong sono sa Kasuratan na katokdoan na daing sagkod na pinapadusahan nin Dios an mga parakasala sa kalayo sa impierno. An siring na doktrina sarongat sa itinotokdo kan Biblia manongod ki Jehova bilang Dios nin pagkamoot asin hustisya. (Genesis 3:19; Deuteronomio 32:4; Roma 6:23; 1 Juan 4:8) An ibang ministro nin Kakristianohan kabaliktaran man an pamamaagi. Nungka nindang sinasambit an manongod sa pagkatakot sa Dios. Imbes, itinotokdo ninda na an Dios nangongonsinte asin inaako an haros gabos ano man an klase kan saiyang pamumuhay. Iyan dai man itinotokdo kan Biblia.—Galacia 5:19-21.
2 An totoo, ineenkaminar kita kan Biblia na matakot sa Dios. (Kapahayagan 14:7) An katotoohan na iyan nagbabangon nin mga hapot. Taano ta gusto nin sarong mamomoton na Dios na matakot kita sa saiya? Anong klase nin pagkatakot an hinahagad nin Dios? Paano kita makikinabang sa pagkatakot sa Dios? Eestudyaran niato an mga hapot na ini mantang ipinagpapadagos niato an satong pag-oolay kan ika-34 Salmo.
Kun Taano ta Dapat na Matakot sa Dios
3. (a) Paano nindo minamansay an pagboot na matakot sa Dios? (b) Taano ta maogma an mga natatakot ki Jehova?
3 Bilang Kaglalang asin Soberanong Namamahala sa uniberso, si Jehova maninigo nanggad na katakotan. (1 Pedro 2:17) Minsan siring, an pagkatakot na iyan bakong grabeng takot sa sarong maringis na dios. Iyan reberensial na may pagkangirhat na paggalang sa kun siisay si Jehova. Iyan man an pagkatakot na mapaanggot sia. An diosnon na pagkatakot noble asin nakakaparahay sa kamugtakan, dai nagtatao nin makuring kamondoan o nakakasindak. Boot ni Jehova, an “maogmang Dios,” na magin maogma sa buhay an saiyang mga linalang na tawo. (1 Timoteo 1:11) Minsan siring, tanganing mangyari iyan, kaipuhan na mamuhay kita kaoyon kan mga kahagadan nin Dios. Para sa dakol, nangangahulogan iyan nin pagbabago sa estilo nin pamumuhay. An gabos na naggigibo kan kinakaipuhan na pagbabago naeeksperyensiahan an pagigin totoo kan mga tataramon kan salmistang si David: “Namitan nindo asin helingon nindo na si Jehova marahay, O banwaan; maogma an pusog na lalaki na nagpapaili sa saiya. Matakot ki Jehova, kamong mga banal nia, huli ta dai nagkukulang an mga natatakot sa saiya.” (Salmo 34:8, 9) Huling igwa sinda nin marahay na relasyon sa Dios, an gabos na natatakot ki Jehova dai magkukulang nin ano man na may nagdadanay na halaga.
4. Anong garantiya an itinao ni David sagkod ni Jesus?
4 Mangnoha na mantang aplikado iyan kaidtong saiyang panahon, tinawan ni David nin dignidad an saiyang mga tawohan paagi sa pag-apod sa sainda na “mga banal.” Kabtang sinda kan banal na nasyon nin Dios. Isinasapeligro man ninda an saindang buhay sa pagsunod ki David. Minsan ngani nagdudulag sinda ki Hadeng Saul, kompiado si David na padagos na itatao ni Jehova an pangenot na mga pangangaipo ninda. Si David nagsurat: “An may bunday na ogbon na leon mismo natitikapo asin nagugutom; alagad kun dapit sa mga naghahanap ki Jehova, dai sinda magkukulang nin ano man na marahay.” (Salmo 34:10) Itinao ni Jesus an kaparehong garantiya sa saiyang mga parasunod.—Mateo 6:33.
5. (a) Anong klaseng mga tawo an dakol na parasunod ni Jesus? (b) Anong konseho an itinao ni Jesus manongod sa pagkatakot?
5 An dakol sa mga naghinanyog ki Jesus daing sukat asin hamak na klase nin mga Judio. Huli kaini, “naherak [si Jesus] sa sainda, huli ta sinda naanitan asin nagkaralagalag siring sa mga karnero na mayong pastor.” (Mateo 9:36) An siring daw na mga hamak magkakaigwa kan kosog nin boot na sumunod ki Jesus? Tanganing magibo iyan, kaipuhan nindang kultibaron an pagkatakot ki Jehova, bakong sa mga tawo. Si Jesus nagsabi: “Dai kamo matakot sa mga minagadan sa hawak asin pakatapos kaini mayo na nin nagigibo. Kundi isasabi ko sa saindo kun siisay an dapat na katakotan: Matakot kamo sa saiya na pakatapos mangadan may autoridad na mag-apon sa Gehenna. Iyo, sinasabi ko sa saindo, matakot kamo sa Sarong ini. An limang dignos ipinapabakal nin duwang sentimos na kadikit an halaga, bako daw? Alagad mayo ni saro sa sainda na nalilingawan nin Dios. Alagad an mismong buhok kan saindong payo bilang gabos. Dai kamo matakot; orog kamong mahalaga kisa dakol na dignos.”—Lucas 12:4-7.
6. (a) Anong mga tataramon ni Jesus an nagpakosog sa mga Kristiano? (b) Taano ta si Jesus an pinakamarahay na halimbawa sa pagpaheling nin diosnon na takot?
6 Kun an mga natatakot ki Jehova ginigipit kan saindang mga kaiwal na umontok sa paglilingkod sa Dios, tibaad magirumdoman ninda an konseho ni Jesus: “An gabos na nagtutugang kasaro ko sa atubangan nin mga tawo, itutuga man kan Aki nin tawo an pakisumaro sa saiya sa atubangan kan mga anghel nin Dios. Alagad sia na nagpapainda sa sako sa atubangan nin mga tawo papaindahan sa atubangan kan mga anghel nin Dios.” (Lucas 12:8, 9) An mga tataramon na iyan nagpakosog sa mga Kristiano, nangorogna sa mga nasyon na prohibido an tunay na pagsamba. An mga siring mapagmansay na nagpapadagos sa pag-omaw ki Jehova sa Kristianong mga pagtiripon asin sa saindang pampublikong ministeryo. (Gibo 5:29) Si Jesus nagtao kan pinakamarahay na halimbawa sa pagpaheling nin “diosnon na takot.” (Hebreo 5:7) Nagtataram dapit sa saiya, an propetikong Tataramon naghula: “Sa saiya matogdon an espiritu ni Jehova, an espiritu . . . nin takot ki Jehova; asin maoogma sia sa pagkatakot ki Jehova.” (Isaias 11:2, 3) Huli kaini, si Jesus lubos na kualipikado na itokdo sa sato an mga pakinabang nin diosnon na takot.
7. (a) Paano an mga Kristiano garo man sana naghihimate sa imbitasyon na kaagid kan ipinaabot ni David? (b) Paano maaarog nin mga magurang an marahay na halimbawa ni David?
7 An gabos na nagsusunod sa halimbawa ni Jesus asin nagkukuyog sa saiyang mga katokdoan garo man sana naghihimate sa imbitasyon na kaagid kan imbitasyon na ipinaabot ni David: “Madia kamo, mga aki, hinanyoga ako nindo; an pagkatakot ki Jehova iyo an itotokdo ko sa saindo.” (Salmo 34:11) Natural ki David na apodon an saiyang mga tawohan bilang “mga aki” huling iginagalang ninda sia bilang saindang namomoon. Sa saiyang kabtang, nagtao si David nin espirituwal na tabang sa saiyang mga parasunod tangani sindang magkasararo asin magkamit kan pabor nin Dios. Marahayon nanggad na halimbawa iyan para sa Kristianong mga magurang! Tinawan sinda ni Jehova nin autoridad mapadapit sa saindang mga aking lalaki asin babae na “padagos na padakulaon sinda sa disiplina asin pagtatanos nin isip ni Jehova.” (Efeso 6:4) Paagi sa aroaldaw na pakikipag-olay nin espirituwal na mga bagay sa saindang mga aki asin sa pagkondukta sa sainda nin regular na pag-adal sa Biblia, tinatabangan nin mga magurang an saindang mga aki na ikaogma an buhay na may pagkatakot ki Jehova.—Deuteronomio 6:6, 7.
Kun Paano Isasagibo an Diosnon na Pagkatakot
8, 9. (a) Taano ta nakakaakit na marhay an estilo nin pamumuhay na may pagkatakot sa Dios? (b) Ano an kalabot sa pagprotehir sa satong dila?
8 Siring sa nasabi na, dai hinahale kan pagkatakot ki Jehova an satong kagayagayahan. Si David naghapot: “Siisay an tawo na ikinakaogmang marhay an buhay, na namomoot sa igong mga aldaw tanganing makaheling nin marahay?” (Salmo 34:12) Malinaw nanggad, an pagkatakot ki Jehova iyo an liabe sa pagkamit nin halawig na buhay asin pakaheling nin marahay. Minsan siring, pasil sanang maghingakong, “Natatakot ako sa Dios.” Iba nang orolay an pagpatunay kaiyan paagi sa satong gawe-gawe. Huli kaini, ipinagpapadagos ni David an pagpaliwanag kun paano niato ikakapaheling an diosnon na pagkatakot.
9 “Protehiran mo an saimong dila tumang sa maraot, asin an saimong mga ngabil tumang sa pagtaram nin panloloko.” (Salmo 34:13) Pinasabngan si apostol Pedro na kotaron an kabtang na ini kan Salmo 34 pagkatapos niang hatolan an mga Kristiano na trataron an lambang saro na may kapadangatan na sa magturugang. (1 Pedro 3:8-12) An pagprotehir sa satong dila sa maraot nangangahulogan na lilikayan niato an pagpalakop nin nakakadanyar na tsismis. Imbes, pirme niatong pagmamaigotan na magin nakakaparigon kun nakikipag-olay kita sa iba. Dugang pa, pagmamaigotan niatong magin makosog an boot asin magtaram nin katotoohan.—Efeso 4:25, 29, 31; Santiago 5:16.
10. (a) Ipaliwanag kun ano an kahulogan kan pagrayo sa maraot. (b) Ano an kalabot sa paggibo nin marahay?
10 “Humarayo ka sa maraot, asin gumibo ka kan marahay; hanapa an katoninongan, asin sundon iyan.” (Salmo 34:14) Rinarayoan niato an mga bagay na kinokondenar nin Dios, siring kan seksuwal na inmoralidad, pornograpiya, paghabon, espiritismo, kadahasan, pagbuburat, asin pag-abuso sa droga. Sinasayumahan man niato an aling-alingan na nagtatampok kan siring na makababaldeng mga bagay. (Efeso 5:10-12) Imbes, ginagamit niato an satong panahon tanganing gibohon an marahay. An pinakamarahay na magigibo niato iyo an regular na makikabtang sa paghuhulit kan Kahadean asin paggibo nin disipulo, na tinatabangan an iba na magkamit nin kaligtasan. (Mateo 24:14; 28:19, 20) Kaiba man sa paggibo nin marahay an pag-andam asin pag-atender sa Kristianong mga pagtiripon, pagtao nin kontribusyon sa pambilog na kinaban na gibohon, pag-asikaso sa satong Kingdom Hall, asin pagigin andam na tumabang sa mga pangangaipo kan daing sukat na mga Kristiano.
11. (a) Paano iinaplikar ni David an saiyang ihinulit manongod sa katoninongan? (b) Ano an magigibo nindo tanganing ‘sundon an katoninongan’ sa kongregasyon?
11 Nagtao si David nin marahay na halimbawa sa pagmamaigot na sundon an katoninongan. Duwang beses siang nagkaigwa nin oportunidad na gadanon si Saul. Sa duwang okasyon na iyan, naglikay sia sa kadahasan asin kan huri magalang na nakipag-olay sa hade, na naglalaom na ikabalik an katoninongan. (1 Samuel 24:8-11; 26:17-20) Ano an puedeng gibohon ngonyan kun may situwasyon na nagsasapeligrong makaraot sa katoninongan kan kongregasyon? Maninigo niatong ‘hanapon an katoninongan, asin sundon iyan.’ Sa siring, kun namamatean niato na may tension an relasyon niato sa satong kapagtubod, kinukuyog niato an konseho ni Jesus: “Makipagkatoninongan ka nguna sa saimong tugang.” Dangan nagpapadagos kita sa ibang aspekto nin tunay na pagsamba.—Mateo 5:23, 24; Efeso 4:26.
An Pagkatakot sa Dios Nagbubunga nin Abundang Balos
12, 13. (a) Anong mga pakinabang sa presente an nakakamtan kan mga natatakot sa Dios? (b) Anong dakulang balos an kakamtan sa dai na mahahaloy kan maimbod na mga parasamba?
12 “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang paghagad nin tabang.” (Salmo 34:15) An rekord kan mga pagtratar nin Dios ki David nagpapatunay na totoo an mga tataramon na iyan. Ngonyan, naeeksperyensiahan niato an hararom na kagayagayahan asin panlaog na katoninongan huling aram niato na si Jehova nagbabantay sa sato. Kompiado kita na pirme niang aasikasohon an satong mga pangangaipo, dawa kun kita nasa irarom nin grabeng sakit. Aram niato na sa dai na mahahaloy aatubangon kan gabos na tunay na parasamba an ihinulang pag-atake ni Gog kan Magog asin an “makangingirhat na aldaw ni Jehova.” (Joel 2:11, 31; Ezequiel 38:14-18, 21-23) Ano man na situwasyon an kaipuhan niatong atubangon sa panahon na iyan, magigin totoo sa sato an mga tataramon ni David: “Sinda nag-agrangay, asin nadangog mismo ni Jehova, asin sa gabos nindang kasakitan ilinigtas nia sinda.”—Salmo 34:17.
13 Abaa kanakakapukaw sa boot na maheling sa panahon na iyan na ibinabantog ni Jehova an saiyang dakulang ngaran! An satong puso mapapano nin orog na may pagkangirhat na paggalang asin reberensia kisa kasuarin man, asin an gabos na nagtutumang makakaeksperyensia nin makasusupog na katapusan. “An lalauogon ni Jehova tumang sa mga naggigibo nin maraot, tanganing taposon an pagsambit sa sainda sa mismong daga.” (Salmo 34:16) Abaa kadakulang balos na maeksperyensiahan an dakulang pagliligtas na iyan pasiring sa matanos na bagong kinaban nin Dios!
Mga Panuga na Nagtatabang sa Sato na Makatagal
14. Ano an makakatabang sa sato na magtagal sa ibong nin mga kapahamakan?
14 Mientras tanto, kaipuhan an pakatagal tanganing makapagpadagos sa pagkuyog ki Jehova sa sarong maraot asin bakong makikatood na kinaban. An diosnon na pagkatakot makakatabang na marhay mantang kinukultibar niato an pagkuyog. Huli sa delikadong mga panahon na kinabubuhayan niato, an nagkapirang lingkod ni Jehova nakakaeksperyensia nin labi-labing kasakitan na garo baga minalugad sa saindang puso asin minapasakit sa saindang espiritu. Minsan siring, lubos sindang makakasierto na kun magsasarig sinda ki Jehova, tatabangan nia sinda na makatagal. An mga tataramon ni David nagpapahayag nin tunay na karangahan: “Si Jehova harani sa mga nalugadan an puso; asin an mga nasasakitan an espiritu saiyang iliniligtas.” (Salmo 34:18) Nakakaparigon sa boot, si David nagpadagos sa pagsabi: “Dakol an kapahamakan kan matanos, alagad sa gabos na iyan iliniligtas sia ni Jehova.” (Salmo 34:19) Gurano man kadakol na kapahamakan an mag-abot sa sato, igo an kosog ni Jehova tanganing iligtas kita.
15, 16. (a) Anong kapahamakan an naaraman ni David dai nahaloy pagkatapos na komponeron nia an Salmo 34? (b) Ano an makakatabang sa sato na tagalan an mga pagbalo?
15 Dai nahaloy pagkatapos na komponeron an Salmo 34, naaraman ni David an kapahamakan na nangyari sa mga nag-iistar sa Nob, kan sinda asin an kadaklan kan mga saserdote lagdoan na ginadan ni Saul. Seguradong napurisaw siang girumdomon na an pagbisita nia sa Nob an dahelan kan grabeng kaanggotan ni Saul! (1 Samuel 22:13, 18-21) Daing duwa-duwa na nagdolok si David ki Jehova para sa tabang, asin seguradong naranga sia sa paglaom na pagkabuhay liwat sa ngapit kan “mga matanos.”—Gibo 24:15.
16 Ngonyan, an paglaom na pagkabuhay liwat nagpapakosog man sa sato. Aram niato na mayo nin ano man na ginigibo an satong mga kaiwal na makakapagtao sa sato nin nagdadanay na danyos. (Mateo 10:28) Ipinahayag ni David an kaparehong kombiksion sa mga tataramon na ini: “Binabantayan nia an gabos na tolang kan [matanos]; mayo ni saro sa mga iyan an nabari.” (Salmo 34:20) An bersikulong iyan nagkaigwa nin literal na kaotoban sa kamugtakan ni Jesus. Minsan ngani maringis na ginadan si Jesus, mayo ni saro sa saiyang mga tolang an ‘naronot.’ (Juan 19:36) Sa mas mahiwas na aplikasyon, an Salmo 34:20 nag-aasegurar sa sato na ano man na mga pagbalo an atubangon kan linahidan na mga Kristiano asin kan saindang kairiba na “ibang mga karnero,” nungka sindang madadanyaran nin permanente. Sa piguratibong pagtaram, an saindang mga tolang nungkang maroronot.—John 10:16.
17. Anong kapahamakan an naghahalat sa habong magsolsol na mga naoongis sa banwaan ni Jehova?
17 Para sa mga marigsok, laen man an kamugtakan. Dai na mahahaloy aanihon ninda an maraot na itinanom ninda. “Gagadanon nin kapahamakan an mismong marigsok; asin an mismong mga naoongis sa matanos ibibilang na may sala.” (Salmo 34:21) An gabos na padagos na nagtutumang sa banwaan nin Dios napapaatubang sa pinakamaraot na posibleng kapahamakan. Sa pagkahayag ni Jesu-Cristo, sinda “maagi kan hudisyal na padusa na daing katapusan na pagkalaglag.”—2 Tesalonica 1:9.
18. Sa anong sentido na an “dakulang kadaklan” nabalukat na, asin ano an maeeksperyensiahan ninda sa ngapit?
18 An salmo ni David nagtatapos paagi sa nakakapakosog liwat sa boot na mga tataramon na ini: “Binabalukat ni Jehova an kalag kan saiyang mga lingkod; asin mayo sa mga nagpapaili sa saiya an ibibilang na may sala.” (Salmo 34:22) Sa paghinanapos kan 40 taon na paghade nia, si Hadeng David nagsabi: ‘Binalukat nin Dios an kalag ko sa gabos na kapurisawan.’ (1 Hade 1:29) Arog ni David, an mga natatakot ki Jehova sa dai na mahahaloy makakasalingoy asin makakapaggayagaya sa pagkabalukat sa sainda sa ano man na pagigin may sala huli sa kasalan asin pagkaligtas sa gabos na pagbalo sa sainda. An kadaklan na linahidan na Kristiano nag-ako na kan saindang langitnon na balos. “Sarong dakulang kadaklan” hale sa gabos na nasyon an minaiba na ngonyan sa mga natatada kan mga tugang ni Jesus sa paglilingkod sa Dios asin bilang resulta nagkakamit nin malinig na kamugtakan sa atubangan ni Jehova. Ini huli ta nagtutubod sinda sa nakakabalukat na puersa kan pinabolos na dugo ni Jesus. Durante kan maabot na Sangribong Taon na Paghade ni Cristo, an lubos na mga pakinabang kan atang na pantubos iaaplikar sa sainda, na dadarahon sinda sa pagkasangkap bilang tawo.—Kapahayagan 7:9, 14, 17; 21:3-5.
19. Ano an determinadong gibohon kan mga miembro kan “dakulang kadaklan”?
19 Taano an gabos na bendisyon na ini ta ipapaabot sa “dakulang kadaklan” nin mga parasamba sa Dios? Huli ta determinado sindang padagos na matakot ki Jehova, na naglilingkod sa saiya na pano nin may pagkangirhat na paggalang asin reberensial na pagkuyog. Tunay nanggad, an pagkatakot ki Jehova nagpapagayagaya sa buhay ngonyan asin nagtatabang sa sato na “makapangapot nin marigon sa tunay na buhay”—buhay na daing katapusan sa bagong kinaban nin Dios.—1 Timoteo 6:12, 18, 19; Kapahayagan 15:3, 4.
Nagigirumdoman daw Nindo?
• Taano ta maninigo kitang matakot sa Dios, asin ano an kahulogan kan pagkatakot sa saiya?
• Ano an maninigong magin epekto kan diosnon na takot sa satong gawe-gawe?
• Anong mga balos an ibinubunga kan pagigin matatakton sa Dios?
• Anong mga panuga an nakakatabang sa sato na makatagal?
[Mga Hapot Para sa Pag-adal]
[Ritrato sa pahina 26]
An mga natatakot ki Jehova naghihiro na may pakamansay kun nasa pagprohibir
[Ritrato sa pahina 28]
An pinakamarahay na magigibo niato para sa satong kapwa iyo an pagpaabot sa sainda kan maogmang bareta kan Kahadean