Puede daw na Itanos an Sarong Hokom?

SI Sladjana, saro sa Mga Saksi ni Jehova sa Croatia, nakaiskedyul na umatubang sa korte may koneksion sa nagkapirang pinansial na bagay. Nag-atubang sia sa sarong hokom sa tamang oras. Minsan siring, huring nag-abot an ibong na lado kan kaso. Galaga si Sladjana na magpatotoo, kaya mantang an gabos naghahalat, sia nagkaigwa nin kosog nin boot na makipag-olay sa hokom.

“Ginoo, aram daw nindo na sa dai na mahahaloy mayo na nin mga hokom asin korte digdi sa daga?” an hapot nia. Siempre, an boot niang sabihon iyo an mga hokom na midbid niato ngonyan.

Huling nasorpresa, hineling sana sia kan hokom, na mayong sinabing ano man. Tiempo man na nagpoon na an mga pagbista. Kan matapos sinda asin si Sladjana nagtindog tanganing pirmahan an sarong dokumento, an hokom huminukro asin pahinghing na hinapot sia: “Segurado ka sa sinabi mo pa sana sako, na sa dai na mahahaloy mayo na nin mga hokom asin korte digdi sa daga?”

“Iyo po, Ginoo. Segurado nanggad ako!” an simbag ni Sladjana.

“Ano an ebidensia mo kaiyan?” an hapot kan hokom.

“Iyan manonompongan sa Biblia,” an simbag ni Sladjana.

Sinabi kan hokom na gusto niang mabasa an siring na ebidensia, alagad mayo sia nin Biblia. Kaya nagboluntaryo si Sladjana na ikua sia nin Biblia. An hokom dinalaw kan mga Saksi, tinawan sia nin Biblia, asin inenkaminar sia na magkaigwa nin semanal na pag-adal sa Biblia. Inako kan hokom an alok asin dai nahaloy nagin saro sa Mga Saksi ni Jehova.

Sa propetikong paagi, an Salmo 2:10 nagsasabi: “Ngonyan, O mga hade, gumamit kamo nin pakarorop; pabayae nindo na kamo itanos, O mga hokom kan daga.” Nakakaogma nanggad kun an siring na mga tawo mapakumbabang inaako an mamomoton na paggiya ni Jehova!

[Ritrato sa pahina 32]

Si Sladjana kaiba an hokom