Nagkakasararong Nagtotogdok Tanganing Omawon an Dios

NARIRIPARO kan mga tawo sa saro kan mga Islas Salomon an sarong bagong Kingdom Hall kan Mga Saksi ni Jehova. Sarong babae an nagsabi: “Sa samong simbahan, dakol kaming programa sa pagkolekta nin pondo. Kinakaolay niamo an samong mga miembro na magtao nin kuarta, alagad mayo pa man giraray kaming igong pondo tanganing magtogdok nin bagong simbahan. Paano kamong mga Saksi nagkakaigwa nin pondo?” An Saksing kinakaolay nia nagsimbag: “Sinasamba niamo si Jehova bilang pambilog na kinaban na pamilya. An samong kongregasyon asin an samong mga tugang sa bilog na kinaban nagdonar kan kinakaipuhan para sa bagong Kingdom Hall. Tinokdoan kami ni Jehova na magkasararo sa gabos na bagay.”

Maheheling nindo an pagkasararo sa tahaw kan mga Saksi ni Jehova sa gabos nindang aktibidad, kaiba an pagtogdok nin rinibong Kingdom Hall. Bakong bago an siring na pagkasararo sa paghaman kan mga proyektong ini. Nangyari na iyan sa tahaw kan banwaan nin Dios sa laog nin dakol na milenyo. Taano man?

Pagtogdok kan Tabernakulo

Nasa isip ni Jehova an nasyon kan Israel kan sabihon nia ki Moises labi nang 3,500 na taon an nakaagi: “Kaipuhan sindang gumibo nin santuaryo para sa sako.” (Exodo 25:8) Mapadapit sa disenyo para sa proyektong ini nin pagtogdok, nagsabi pa si Jehova: “Oyon sa gabos na ipinapaheling ko sa saimo [singular, nagpapanongod ki Moises] bilang disenyo kan tabernakulo asin disenyo kan gabos na kasangkapan kaiyan, arog kaiyan nindo [plural, nagpapanongod sa bilog na nasyon] iyan gigibohon.” (Exodo 25:9) Dangan inareglo ni Jehova an detalyadong plano para sa estruktura kan santuaryo, mga kasangkapan, asin mga dekorasyon. (Exodo 25:10–27:19) An “tabernakulo,” o tolda na ini, iyo an magigin sentro kan tunay na pagsamba sa bilog na Israel.

Dai niato aram kun pirang tawo an nagtrabaho sa proyekto, alagad an gabos na Israelita inimbitaran na suportaran iyan. Sinabihan sinda ni Moises: “Kumua kamo sa saindo nin kontribusyon para ki Jehova. An lambang gusto an puso magdara kaiyan bilang kontribusyon ki Jehova.” (Exodo 35:4-9) Ano an nagin reaksion kan mga Israelita? An Exodo 36:3 nagsasabi: “Kinua ninda ki Moises an gabos na kontribusyon na dinara kan mga aki ni Israel para sa gibohon na banal na paglilingkod tanganing gibohon iyan, asin, kun manongod sa huring nasambit, nagdara pa sinda sa saiya nin gikan sa boot na dolot kada aga.”

Dai nahaloy natambak an mga idinonar, asin padagos pang nagdadara an banwaan. An mga artesano na nagtatrabaho sa katapustapusi nagsabi ki Moises: “An banwaan nagdadara nin labing gayo sa kinakaipuhan sa paglilingkod para sa gibohon na ipinagboot ni Jehova na gibohon.” Sa siring nagboot si Moises: “Mga lalaki asin mga babae, dai na kamo maggibo nin mga bagay para sa banal na  kontribusyon.” Ano an nagin resulta? “An mga bagay nagin igo na para sa gabos na gibohon na dapat na magibo, asin nagsobra pa.”—Exodo 36:4-7.

Huli sa pagigin buka an palad kan mga Israelita, natapos an tabernakulo sa laog nin sarong taon. (Exodo 19:1; 40:1, 2) Paagi sa pagsuportar sa tunay na pagsamba, an banwaan nin Dios nagtao nin onra ki Jehova. (Talinhaga 3:9) Pag-abot nin panahon, mas dakulang proyekto nin pagtogdok an gigibohon ninda. Asin sa giraray, puedeng makikabtang an gabos na gustong tumabang, baga man sinda may mga abilidad sa pagtogdok o mayo.

Haros limang taon pagkatapos na itogdok an tabernakulo, pinonan kan Israel an pagtogdok nin templo sa Jerusalem. (1 Hade 6:1) Ini magigin sarong kahangahanga, permanenteng estruktura na gibo sa mga gapo asin kahoy. (1 Hade 5:17, 18) Itinao ni Jehova ki David “paagi sa pagpasabong” an arkitektural na mga plano para sa templo. (1 Cronica 28:11-19) Alagad pinili nia an aki ni David na si Salomon na iyo an mangenot sa pagtogdok. (1 Cronica 22:6-10) Bilog na puso an nagin pagsuportar ni David sa proyekto. Nagtipon sia nin mga gapo, panalgan, asin iba pang materyales asin ikinontribwir an dakulang kantidad kan saiya mismong bulawan asin plata. Inenkaminar man nia an mga kapwa nia Israelita na magin buka an palad, na hinahapot sinda: “Siisay an nagpepresentar na panoon an saiyang kamot ngonyan nin balaog para ki Jehova?” Ano an nagin reaksion kan banwaan?—1 Cronica 29:1-5.

Kan panahon na ponan ni Salomon an pagtogdok kan templo, rinibong tonelada nin bulawan asin plata an yaon sa saiya. Sobrang marhay an tanso asin batbat na mayo nang paagi tanganing timbangon an mga metal na idto. (1 Cronica 22:14-16) Sa tabang ni Jehova asin suporta kan bilog na Israel, natapos an proyekto sa laog sana nin pito may kabangang taon.—1 Hade 6:1, 37, 38.

“Harong kan Tunay na Dios”

An tabernakulo sagkod an templo inapod na “harong kan tunay na Dios.” (Hokom 18:31; 2 Cronica 24:7) Dai noarin man kinaipuhan ni Jehova an sarong pailihan na harong. (Isaias 66:1) Ipinatogdok nia an mga estrukturang idto sa kapakinabangan kan mga tawo. Sa katunayan, sa inagurasyon kan templo, si Salomon naghapot: “An Dios daw talagang mag-eerok sa ibabaw kan daga? Uya! An kalangitan, iyo, an langit kan kalangitan, mismo dai ka kayang pagkaigoon; kun siring, gurano pa daw an harong na ini na sakuyang itinogdok!”—1 Hade 8:27.

 Si Jehova nagsabi paagi sa saiyang propetang si Isaias: “An sadiri kong harong aapodon na harong nin pamibi para sa gabos na banwaan.” (Isaias 56:7) An mga atang asin pamibi na idinodolot sa templo, saka an mga seremonya na ginigibo duman, nagtaong lugar sa diosnon na mga tawo—Judio asin bakong Judio—na makarani sa tunay na Dios. Nakamtan ninda an pakikikatood asin proteksion ni Jehova paagi sa pagsamba sa saiyang harong. Idinodoon an katotoohan na ini kan pamibi ni Salomon sa dedikasyon kan templo. Mababasa nindo an saiyang nakakapukaw sa boot na mga kapahayagan sa Dios sa 1 Hade 8:22-53 asin 2 Cronica 6:12-42.

An suanoy na harong na iyan kan tunay na Dios haloy nang nawara, alagad an Tataramon nin Dios nagtotokdo sa panahon na an mga tawo kan gabos na nasyon magkakatiripon tanganing sambahon si Jehova sa mas dakulang espirituwal na templo. (Isaias 2:2) An sarong sangkap na atang kan bugtong na Aki nin Dios, na ipinanganino kan mga atang na hayop na idinolot sa templo, iyo an paagi nin pagdolok ki Jehova. (Juan 14:6; Hebreo 7:27; 9:12) An mga Saksi ni Jehova nagsasamba na ngonyan sa Dios sa nakakalabing paagi na iyan, asin tinatabangan ninda an dakol pang iba na gibohon man iyan.

Mga Proyekto nin Pagtogdok sa Modernong Panahon

Sa bilog na kinaban, pinaglilingkodan kan mga Saksi ni Jehova an tunay na Dios. Sinda minabilog nin sarong “makosog na nasyon,” na an populasyon padagos na nagdadakol. (Isaias 60:22) An mayor na tiriponan kan Mga Saksi ni Jehova iyo an Kingdom Hall. * Rinibo kan mga edipisyong ini an ginagamit, asin rinibo pa an kaipuhan.

An mga Saksi ni Jehova ‘gikan sa boot na ipinepresentar an saindang sadiri’ tanganing itogdok an kinakaipuhan na mga Kingdom Hall. (Salmo 110:3) Minsan siring, parate na mayo kan kinakaipuhan na mga abilidad sa pagtogdok an mga Saksi sa lokal, asin sa nagkapirang rehion na nahehelingan nin darudakulang pag-oswag grabe an kadukhaan. Kan 1999 pinonan kan Namamahalang Grupo kan Mga Saksi ni Jehova an sarong programa nin pagtogdok nin mga Kingdom Hall tanganing makatabang na mapangganahan an mga olang na iyan. Paagi sa programang ini, an mga Saksi na eksperto sa mga trabahong pagtotogdok nagbiahe sa hararayong lugar tanganing sanayon an saindang mga tugang na lalaki asin babae na magtogdok nin mga Kingdom Hall. Ipinagpadagos kan sinanay na mga trabahador na idto an gibohon na pagtogdok sa rehion na iyan. Ano an nagin resulta kan espesyal na paghihingoang ini?

Pag-abot kan Pebrero 2006, an mga Saksi sa kadagaan na limitado an kuarta napatogdokan nin labing 13,000 na bagong Kingdom Hall. Basaha an mga komento kan nagkapira na naggagamit na nin bagong mga Kingdom Hall.

“An kongregasyon igwa nin 160 promedyong kabilangan nin mga nag-aatender. Sa primerong pagtiripon pagkatapos na itogdok an bagong Kingdom Hall, uminabot sa 200 an kabilangan nin nag-aatender. Ngonyan, pakalihis nin anom na bulan, igwa sindang 230 kabilangan nin mga nag-aatender. Risang-risa an bendisyon ni Jehova sa pagtogdok kan simple sana pero kapakipakinabang na mga edipisyong ini.”—Sarong paraataman sa sirkito sa Ecuador.

“Sa laog nin dakol na taon hinahapot kami nin mga tawo, ‘Noarin man lamang daw kamo magkakaigwa nin Kingdom Hall na kapareho kan naheheling niamo sa saindong mga publikasyon?’ Salamat ki Jehova, sa katapustapusi nagkaigwa kami nin presentableng lugar nin pagsamba. Dati ginigibo niamo an mga pagtiripon sa tindahan nin sarong tugang, na may promedyong kabilangan nin nag-aatender na 30. Sa enot na pagtiripon sa bagong Kingdom Hall, 110 an nag-atender.”—Sarong kongregasyon sa Uganda.

 “Duwang regular payunir na tugang na babae an nagbareta na orog na nakakagayagaya an maghulit sa teritoryo poon kan itogdok an Kingdom Hall. Mas andam an mga tawo na maghinanyog sa ministeryong pagharongharong saka sa impormal na mga kamugtakan. An mga tugang na babaeng ini may 17 inaadalan sa Biblia ngonyan, asin dakol sa mga inaadalan na ini sa Biblia an nag-aatender sa mga pagtiripon.”—Sangang opisina sa Islas Salomon.

“Sarong pastor na nag-iistar sa kaharani an nagsabi na an bagong Kingdom Hall nakadagdag sa pagigin kagalanggalang kan bilog na komunidad asin ipinag-oorgolyo iyan kan mga taga duman. Dakol na nag-aaragi an nagkokomento dapit sa gayon kan tiriponan. Nagtatao ini sa mga tugang nin marahay na mga oportunidad tanganing magpatotoo. Padakol nang padakol na tawo an gustong makaaram manongod sa satong pambilog na kinaban na kasararoan nin magturugang. An dakol na dai nakakaatender sa mga pagtiripon sa laog nin dakol na taon namotibar na makiasosyar giraray nin regular.”—Sangang opisina sa Myanmar.

“Sarong tugang na babae an nag-imbitar sa sarong interesadong lalaki na magduman sa lugar nin konstruksion sa saindang komunidad. An lalaki nagsabi kan huri: ‘Paghona ko dai ako papalaogon kan mga trabahador. Nasorpresa ako ta maboot akong tinaratara kan mga Saksi. An mga lalaki asin babae mahigos na nagtatrabaho, na dai nagsasayang nin panahon. May pagkaoroyon asin maogmang espiritu.’ Nag-ako nin pag-adal sa Biblia an lalaki asin nagpoon na mag-atender sa mga pagtiripon. Nagsabi sia kan huri: ‘Nagbago an sakong kaisipan. Dai ko na babayaan an Dios ngonyan na nanompongan ko na sia.’”—Sangang opisina sa Colombia.

 Mahalaga an Satong Pagsuportar

Mahalagang kabtang kan satong sagradong paglilingkod an pagtogdok nin mga Kingdom Hall. Talagang kaomaw-omaw an mga Saksi ni Jehova sa bilog na kinaban sa saindang paagi nin pagsuportar sa gibohon na iyan—sa pinansial asin sa iba pang paagi. Pero, maninigo niatong girumdomon na mahalaga man na marhay an ibang aspekto nin sagradong paglilingkod. Sa panapanahon, an mga Kristiano biktima nin natural na mga kalamidad asin nangangaipo kan satong tabang. An pagprodusir nin mga literatura sa Biblia igwa nin importanteng marhay na kabtang sa pagsuportar sa sagradong paglilingkod. Naheling kan kadaklan sa sato an puersa kan basado sa Bibliang magasin o libro na ikinapasakamot sa sarong tawo na tama an inklinasyon. Dugang pa, mahalagang marhay an pagsuportar sa mga misyonero asin iba pang nasa espesyal na paglilingkod nin bilog na panahon. An siring na mapagsakripisyo kan sadiri na mga Kristiano may mahalagang marhay na kabtang sa pagpahiwas kan paghuhulit sa huring mga aldaw na ini.

An mga nagtabang sa pagtogdok kan templo naggayagayang marhay. (1 Cronica 29:9) Ngonyan, an pagsuportar sa tunay na pagsamba paagi sa satong mga kontribusyon nagtatao man sa sato nin kaogmahan. (Gibo 20:35) Naeeksperyensiahan niato an kaogmahan na iyan kun ibinubugtak niato an satong mga kontribusyon sa kahon na itinagama para sa Pondo sa Kingdom Hall asin kun nagkokontribwir kita sa pambilog na kinaban na gibohon, sa siring sinusuportaran an ibang proyekto na konektado sa paghuhulit kan maogmang bareta kan Kahadean. Sa makangangalas na paagi, an mga Saksi ni Jehova ngonyan nagkakasararo sa tunay na pagsamba. Kita gabos logod na mapano nin kaogmahan na minagikan sa pagsuportar sa pagsambang iyan!

[Nota sa Ibaba]

[Kahon/Ritrato sa pahina 20, 21]

MGA PAAGING PINILI NIN IBA SA PAGTAO

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work—Matthew 24:14.”

Kada bulan, ipinapadara kan mga kongregasyon an kantidad na ini sa opisina kan Mga Saksi ni Jehova na naglilingkod sa saindang nasyon. An boluntad na mga donasyon na kuarta puede man na direktang ipadara sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang opisina kan Mga Saksi ni Jehova na naglilingkod sa saindong nasyon. An mga tseke na ipinapadara sa adres na nasa enotan maninigong bayadan sa “Watch Tower.” An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA IPINAGKATIWALANG KUARTA NA KONDISYONAL NA DONASYON

Puedeng ipagkatiwala an kuarta sa Watch Tower tanganing magamit sa pambilog na kinaban na gibohon. Minsan siring, ibabalik an donasyon kun hagadon kan nagdonar. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalong kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower bilang direktang regalo.

Daga Asin Harong: An ikakapabakal na daga asin harong puedeng idonar magsalang paagi sa direktang pagregalo o, sa kaso nin residensial na rogaring, paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o garantiya sa designadong korporasyon na ginagamit kan Mga Saksi ni Jehova. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa ginaganar para sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower paagi sa sarong testamento na ginibo sa legal na paagi, o an Watch Tower puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaparisa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an inandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur tanganing magtao nin impormasyon dapit sa laen-laen na paagi nin pagtao nin regalo magsalang ngonyan o paagi sa pamana pagnagadan. Pakatapos na mabasa an brosyur asin maghapot sa sadiri nindang kinokonsulta dapit sa ley o buhis, dakol an nakatabang sa pagsuportar sa relihioso asin humanitaryo na mga aktibidad kan Mga Saksi ni Jehova sa bilog na kinaban asin ginamit sa pinakalubos na paagi an mga benepisyo ninda sa buhis mantang ginigibo iyan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Para sa dugang pang impormasyon, puede kamong makikomunikar sa Charitable Planning Office, magsalang paagi sa pagsurat o telepono, sa adres na nakalista sa ibaba, o puede kamong makikomunikar sa sangang opisina kan Mga Saksi ni Jehova na naglilingkod sa saindong nasyon.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Ritrato sa pahina 18]

Ginigibong posible kan nagkakasararong paghihingoa niato na makatogdok nin magayon na mga Kingdom Hall sa bilog na kinaban

[Ritrato sa pahina 18]

Bagong Kingdom Hall sa Ghana