An Paghanap nin Tawo sa Buhay na Daing Katapusan

POON kan kaenot-enoteng mga panahon, an katawohan nagmawot na mabuhay sagkod lamang. Alagad, an kamawotan na iyan dai pa naootob—mayo nin nakanompong nin paagi tanganing haleon an kagadanan. Pero, kasuarin pa sana, pinakosog giraray kan pagsiyasat sa medisina an paglaom na tibaad talagang magigin posible an sarong pambihirang pagpalawig kan buhay nin tawo. Estudyare kun ano an ginigibo sa manlaenlaen na langtad nin sientipikong pag-adal.

An mga biologo nagsasagibo nin eksperimento may labot sa enzima na telomerase sa pagprobar na palawigon an kabilangan nin pagbago giraray kan mga selula. Aram kan mga sientista na an gurang asin raot nang mga selula nahahale asin nasasalidahan nin mga bagong selula. Sa katunayan, haros bilog na hawak an nababago giraray nin nagkapirang beses sa panahon na an tawo nabubuhay. Kun an proseso nin pagbago giraray mapapalawig, sa teoriya kan mga parasiyasat, “puedeng bagohon kan hawak nin tawo an sadiri kaiyan sa laog nin halawigon na panahon—dawa daing sagkod.”

An therapeutic cloning, sarong kontrobersial na langtad nin pagsiyasat, puedeng magtao daa sa mga pasyente nin bago asin magkabagay nanggad na mga katoy, bato, o puso para sa operasyon nin pagbalyo kan organo. An siring na mga organo irereprodusir na ginagamit an sadiring mga selula kan pasyente.

An mga parasiyasat sa nanotechnology naniniwala na maabot an panahon na an mga doktor may ilalaog sa mga agihan nin dugo na mga robot na kapareho kasadit nin selula tanganing hanapon asin gadanon an mga selula nin kanser asin nakakadanyar na bakterya. An nagkapira naniniwala na pag-abot nin panahon an langtad na ini nin siensia, kaiba an mga gene therapy, magpapangyari sa hawak nin tawo na susteniran an sadiri kaiyan nin daing sagkod.

An mga parasuportar sa cryonics ineeladong marhay an hawak nin mga nagadan. An ideya iyo na preserbaron iyan sagkod na madiskobre na kan mga doktor an bolong sa mga helang, baliktadon an mga epekto nin paggurang, asin ibalik liwat an buhay sagkod salud kan mga nagadan. An American Journal of Geriatric Psychiatry inaapod an ideyang ini bilang “an katimbang sa presenteng panahon kan paggibo nin momiya kan suanoy na mga Egipcio.”

Ipinapaheling kan daing ontok na paghanap nin tawo sa inmortalidad kun gurano kadepisil na akoon an ideya na may katapusan an saiyang pag-eksister. Talaga daw na posible para sa katawohan na magkaigwa nin buhay na daing katapusan? Ano daw an sinasabi kan Biblia manongod sa temang ini? An masunod na artikulo matao kan mga simbag.