“Dapat na Kuyogon Niamo an Dios Bilang Namamahala Imbes na mga Tawo”

Ilinigtas Paagi sa “Mahal na Marhay na Dugo”

AN KADARUDAKULAING akto nin pagkamoot ni Jehova iyo an pagsugo sa saiyang bugtong na Aki na idolot bilang pantubos an sangkap na buhay kaini bilang tawo. Bilang makasalan na mga tawo, kaipuhan niatong marhay an arog kaiyan na pagliligtas, mantang mayo nin bakong sangkap na tawo na “sa ano man na paagi makakabalukat minsan sa tugang, ni makakatao sa Dios nin pantubos para sa saiya . . . tanganing sia mabuhay pa sagkod lamang.” (Salmo 49:6-9) Nagpapasalamat nanggad kita na “itinao [nin Dios] an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan”!—Juan 3:16.

Paanong an pantubos nagtatao nin pagliligtas? Estudyaran niato an apat na paagi na nagkakamit kita nin katalingkasan bilang resulta kan dakulaon na aktong ini nin pagkamoot sa kabtang ni Jehova Dios.

Pagkabutas Paagi sa Pantubos

Enot, an atang ni Jesus puedeng magligtas sa sato sa minanang kasalan. Gabos kita namundag sa kasalan. Iyo, kita makasalan dawa bago pa kita maglapas sa ley ni Jehova. Taano man? An Roma 5:12 nagsasabi: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan.” Bilang mga aki kan makasalan na si Adan, minana niato an saiyang pagkabakong sangkap. Minsan siring, an pagbayad kan pantubos nagpapangyaring magin posible na kita makatalingkas sa pamomogol kan minanang kasalan. (Roma 5:16) Si Jesus ‘nagnamit nin kagadanan para sa lambang tawo,’ na tinios an mga epekto kan kasalan para sa mga aki ni Adan.—Hebreo 2:9; 2 Corinto 5:21; 1 Pedro 2:24.

Ikaduwa, an pantubos puedeng makapatalingkas sa sato sa nakakagadan na mga epekto nin kasalan. “An ibinabayad nin kasalan kagadanan.” (Roma 6:23) An penalidad sa kasalan iyo an kagadanan. Paagi sa saiyang kagadanan bilang atang, ginibong posible kan Aki nin Dios an buhay na daing sagkod para sa makinuyog na katawohan. Tunay nanggad, “an nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay.”—Juan 3:36.

Mangnoha na kita puedeng maligtas sa mga epekto nin kasalan solamente kun kita matubod sa Aki nin Dios. Kalabot digdi an paggibo nin mga pagbabago sa satong buhay asin pag-oyon kaiyan sa kabotan nin Dios. Kaipuhan na isikwal niato an ano man na tibaad salang ginigibo niato asin humiro kita tanganing gibohon an nakakapaogma sa Dios. Si apostol Pedro nagsabi na kaipuhan niatong ‘magsorolsol asin magbakle tanganing an satong mga kasalan mapara.’—Gibo 3:19.

Ikatolo, an atang na itinao ni Jesus nagpapatalingkas sa sato sa pagkaribok nin konsensia. An gabos na nagdudusay ki Jehova asin nagigin bautisadong mga disipulo kan saiyang Aki nakakaeksperyensia nin karangahan. (Mateo 11:28-30) Sa ibong kan satong pagkabakong sangkap, nakakanompong kita nin hararom na kagayagayahan sa paglilingkod sa Dios na may malinig na konsensia. (1 Timoteo 3:9; 1 Pedro 3:21) Paagi sa pagtuga kan satong mga kasalan asin pagbaya sa mga iyan, pinapahelingan kita nin pagkaherak asin pinapaginhawa kita sa pagkapurisaw nin konsensia.—Talinhaga 28:13.

Nagtatao nin Tabang Asin Paglaom

Ultimo, paagi sa pagtubod sa pantubos, naliligtas kita sa takot mapadapit sa satong kamugtakan sa atubangan nin Dios. Nagsurat si apostol Juan: “Kun an siisay man makaginibo nin kasalan, igwa kita nin paratabang sa Ama, si Jesu-Cristo.” (1 Juan 2:1) Mapadapit sa kabtang ni Jesus bilang paratabang, si apostol Pablo nagsurat: “Sia man lubos na  makakapagligtas duman sa mga minadolok sa Dios paagi sa saiya, huli ta sia danay na buhay tanganing makimaherak para sa sainda.” (Hebreo 7:25) Sagkod na igwa kita nin ano man na mantsa nin kasalan, kakaipuhanon niato an paglilingkod kan Halangkaw na Saserdoteng si Jesu-Cristo tanganing tabangan kita na magkaigwa nin tamang relasyon sa Dios. Paano naghiro si Jesus bilang halangkaw na saserdote para sa sato?

Kuarentang aldaw pagkatapos na buhayon sia liwat kan 33 C.E., si Jesus suminakat sa langit, kun saen iprinesentar nia sa Dios an halaga kan saiyang “mahal na marhay na dugo.” Bilang resulta, dai na mahahaloy bubutasan ni Jesus an makinuyog na katawohan sa kasalan asin kagadanan. * (1 Pedro 1:18, 19) Kun siring, bako daw na minaoyon kamo na si Jesu-Cristo maninigo sa satong pagkamoot asin pagkuyog?

Saro pa, si Jehova Dios maninigo sa satong pagkamoot asin pagkuyog. May pagkamoot na ginibo niang posible an satong “pagkabutas paagi sa pantubos.” (1 Corinto 1:30) Utang niato sa saiya bako sanang an buhay niato ngonyan kundi pati an ano man na oportunidad niato na magkamit nin buhay na daing katapusan. Kun siring, yaon sa sato an gabos na dahelan na ‘kuyogon an Dios bilang namamahala imbes na mga tawo.’—Gibo 5:29.

[Nota sa Ibaba]

[Kahon/Mga Ritrato sa pahina 9]

ARAM DAW NINDO?

• Si Jesus suminakat sa langit hale sa Bukid nin mga Olibo.—Gibo 1:9, 12.

• An maimbod na mga apostol sana ni Jesus an nakaheling kan saiyang pagsakat.—Gibo 1:2, 11-13.