Paglakaw sa Dana nin Nag-oorog na Liwanag
Paglakaw sa Dana nin Nag-oorog na Liwanag
“An dana kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.”—TALINHAGA 4:18.
1, 2. Ano an naeksperyensiahan kan banwaan nin Dios bilang resulta kan nag-orog na espirituwal na liwanag hale ki Jehova?
SIISAY pa an mas marahay na makakapagladawan sa epekto kan minasirang na saldang sa kadikloman kan banggi kisa sa mismong Gikanan nin liwanag, si Jehova Dios? (Salmo 36:9) ‘Kun pogolan kan liwanag sa kaagahan an mga poro kan daga,’ an sabi nin Dios, ‘an daga nagbabago siring sa dalipay sa irarom nin pantatak, asin an mga bagay minapuesto sa saindang lugar siring sa gubing.’ (Job 38:12-14) Huli sa nag-oorog na liwanag hale sa saldang, naheheling an korte kan itsura kan daga asin nagigin mas malinaw, kun paanong an malomhok na dalipay nagbabago pagnatatakan nin selyo hale sa emblema sa sarong pantatak.
2 Si Jehova iyo man an Gikanan nin espirituwal na liwanag. (Salmo 43:3) Mantang an kinaban nagdadanay sa grabeng kadikloman, an tunay na Dios padagos sa pagpasirang nin liwanag sa saiyang banwaan. Na may anong resulta? An Biblia minasimbag: “An dana kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.” (Talinhaga 4:18) Paagi sa nag-oorog na liwanag hale ki Jehova, padagos na liniliwanagan an dana kan saiyang banwaan. Pinapakarhay sinda kaiyan sa organisasyonal, doktrinal, asin moral na paagi.
An Pagkamit nin Kaliwanagan Nagbubunga nin Organisasyonal na mga Pagpakarhay
3. Ano an ipinanuga sa Isaias 60:17?
3 Paagi ki propeta Isaias, si Jehova naghula: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat.” (Isaias 60:17) Kun paanong an pagsalida sa hababang klaseng materyal nin halangkaw na klaseng materyal nagpaparisa nin pagpakarhay, naeksperyensiahan kan Mga Saksi ni Jehova na ruminahay an saindang organisasyonal na mga areglo durante kan “pagtatapos kan sistema nin mga bagay,” o “huring mga aldaw.”—Mateo 24:3; 2 Timoteo 3:1.
4. Anong areglo an ipinaotob kan 1919, asin paano iyan nagin kapakipakinabang?
4 Sa enot na kabtang kan huring mga aldaw, an mga kongregasyon kan Mga Estudyante sa Biblia, na apod kaidto sa Mga Saksi ni Jehova, ineelehir sa demokratikong paagi an saindang kamagurangan asin mga diakono. Minsan siring, an nagkapirang kamagurangan mayo kan tunay na espiritu nin pag-ebanghelyo. An nagkapira bako sanang magabat an boot na magpartisipar sa paghuhulit kundi dinesganar man an iba sa pakikikabtang dian. Kaya kan 1919 iinintrodusir an sarong bagong katongdan sa lambang kongregasyon—an katongdan nin direktor sa paglilingkod. An direktor sa paglilingkod dai ineelehir kan kongregasyon kundi ninonombrahan sa saiyang katongdan sa teokratikong paagi kan sangang opisina kan banwaan nin Dios. Kaiba sa mga paninimbagan kan ninombrahan na direktor an pag-organisar kan paghuhulit, pag-asignar nin mga teritoryo, asin pagdagka sa pakikikabtang sa ministeryo sa langtad. Durante kan suminunod na mga taon, dakulaon na pagdagka an itinao sa paghuhulit kan Kahadean.
5. Anong pagpakarhay an nangyari kan dekada nin 1920?
5 An gabos sa kongregasyon orog pang napakosog kan sadol na “Ipaisi, ipaisi, ipaisi, an Hade asin an saiyang kahadean,” na itinao kan 1922 sa kombension kan Mga Estudyante sa Biblia sa Cedar Point, Ohio, E.U.A. Kan 1927 inorganisar an paglilingkod sa langtad sagkod sa punto na ibinilang an Domingo na pinakaangay na aldaw para sa pakikikabtang sa paghuhulit sa harong-harong. Taano ta an aldaw na iyan? Huling an Domingo iyo an aldaw na an kadaklan na tawo mayong laog sa trabaho. Ipinapaheling kan Mga Saksi ni Jehova ngonyan an kaparehong espiritu paagi sa paghihingoang dumalaw sa mga tawo sa mga panahon na posibleng marhay na nasa harong sinda, siring kan sa mga katapusan kan semana asin sa mga banggi.
6. Kan 1931, anong resolusyon an inaprobaran, asin paano naapektaran kaiyan an pagbalangibog kan Kahadean?
6 Sarong dakulang pag-engganyar sa pagbalangibog kan Kahadean an itinao kan Domingong hapon, Hulyo 26, 1931, kan aprobaran an sarong resolusyon, enot sa sarong kombension sa Columbus, Ohio, E.U.A., asin pakatapos kaiyan sa bilog na kinaban. Sa sarong kabtang, an resolusyon nagsabi: “Kami mga lingkod ni Jehova Dios na isinugo na otobon an sarong gibohon sa saiyang ngaran, asin, bilang pagkuyog sa saiyang togon, na ipaabot an patotoo ni Jesu-Cristo, asin ipaaram sa mga tawo na si Jehova iyo an tunay asin Makakamhan sa Gabos na Dios; kun siring magayagaya niamong inaako asin kinukua an ngaran na itinaram kan Kagurangnan na Dios, asin kamawotan niamo na mamidbid bilang asin apodon sa ngaran na, arin na baga, mga saksi ni Jehova.” (Isaias 43:10) Malinaw nanggad na sinabi kan bagong ngaran na iyan an pangenot na aktibidad kan gabos na nagdadara kan ngaran na iyan! Iyo, si Jehova may itinaong gibohon na dapat pakikabtangan kan gabos niang lingkod. Tunay nanggad na sa kabilogan entusiastiko an nagin simbag!
7. Anong pagbabago an pinonan kan 1932, asin taano?
7 Dakol na magurang sa kongregasyon an mapakumbabang nagdusay kan saindang sadiri sa paghuhulit. Pero sa nagkapirang lugar, makosog na kinontra kan elehidong kamagurangan an ideya na an gabos sa kongregasyon maninigong magpartisipar sa pampublikong ministeryo. Minsan siring, may dugang pang mga pagpakarhay na madali nang mangyari kaidto. Kan 1932, paagi sa The Watchtower naresibi kan mga kongregasyon an instruksion na ipondo na an pag-elehir nin kamagurangan asin mga diakono. Imbes, maelehir sinda nin sarong komite sa paglilingkod na kompuesto nin espirituwal na mga lalaki na nagpapartisipar sa pampublikong paghuhulit. Sa siring, ipinaniwala an pangangataman sa mga aktibong nakikikabtang sa ministeryo, asin nagpadagos an gibohon.
An Nag-orog na Liwanag Nangangahulogan nin Dugang Pang mga Pagpakarhay
8. Anong pagpakarhay an nangyari kan 1938?
8 An liwanag “paorog nang paorog na nagliliwanag.” Kan 1938 biyo nang hinale an mga pag-elehir. An gabos na lingkod sa kongregasyon kaipuhan na nombrahan sa teokratikong paagi sa irarom kan pangangataman kan “maimbod asin mapagmansay na oripon.” (Mateo 24:45-47) An pagbabago tolos na inako kan haros gabos na kongregasyon kan Mga Saksi ni Jehova, asin an pagpapatotoo padagos na nagbunga.
9. Kan 1972, anong areglo an iinintrodusir, asin taano ta iyan sarong pagrahay?
9 Poon kan Oktubre 1, 1972, saro pang pagbabago sa pangangataman sa kongregasyon an ipinaotob. An areglo sa pangangataman nin sarong grupo nin kamagurangan iinintrodusir sa mga kongregasyon kan Mga Saksi ni Jehova sa bilog na kinaban, na suminalida sa pangangataman nin saro sanang lingkod, o paraataman, sa kongregasyon. An bagong areglong ini nagin dakulaon na pagparigon sa boot para sa maygurang na mga lalaki na makualipikar na mangenot sa kongregasyon. (1 Timoteo 3:1-7) Bilang resulta, mas dakol na tugang na lalaki an nagkaigwa nin kabatidan sa pag-asikaso sa mga paninimbagan sa kongregasyon. Nakatabang na marhay sinda sa pagpastor sa dakol na bagohan na nag-ako kan katotoohan sa Biblia!
10. Anong areglo an inimplementar kan 1976?
10 An mga miembro kan Namamahalang Grupo inorganisar sa anom na komite, asin poon kan Enero 1, 1976, an gabos na aktibidad kan organisasyon asin kan mga kongregasyon sa bilog na daga napasairarom kan pagdirehir kan mga komiteng ini. Nagin bendisyon nanggad na an gabos na aspekto kan pan-Kahadean na gibohon dinirehiran nin ‘dakol na parahatol’!—Talinhaga 15:22; 24:6.
11. Anong pagpakarhay an iinintrodusir kan 1992, asin taano?
11 Kan taon 1992, nagkaigwa nin dugang pang pagpakarhay, na ikakakomparar sa nangyari pakatapos na an mga Israelita asin iba pa magbalik hale sa pagkadistiero sa Babilonya. Kan panahon na idto, bakong igo an kabilangan kan mga Levita na mag-aasikaso sa paglilingkod sa templo. Kaya an bakong Israelitang mga Netineo tinawan nin dakol na gibohon sa pagtabang sa mga Levita. Sono dian, tanganing matabangan an grupong maimbod asin mapagmansay na oripon sa pag-asikaso sa nagdadakol na gibohon kaiyan sa daga, kan 1992 nag-ako nin dugang pang mga paninimbagan sa paglilingkod an nagkapira sa “ibang karnero.” Ninombrahan sinda bilang mga katabang sa mga komite kan Namamahalang Grupo.—Juan 10:16.
12. Paano ninombrahan ni Jehova an katoninongan bilang satong mga paraataman?
12 Ano an nagin resulta kan gabos na ini? “Nonombrahan ko an katoninongan bilang saimong mga paraataman asin an katanosan bilang saimong mga paratao nin trabaho,” an sabi ni Jehova. (Isaias 60:17) Igwa nin “katoninongan” sa tahaw kan mga lingkod ni Jehova ngonyan, asin an pagkamoot sa “katanosan” an nagin saindang “paratao nin trabaho”—an puersa na nagtutulod sa sainda na paglingkodan an Dios. Organisado sindang marhay na gibohon an paghuhulit kan Kahadean asin paggibo nin disipulo.—Mateo 24:14; 28:19, 20.
Liniliwanagan ni Jehova an Dana sa Doktrinal na Paagi
13. Kan dekada nin 1920, paano liniwanagan ni Jehova sa doktrinal na paagi an dana kan saiyang banwaan?
13 Progresibo man na liniliwanagan ni Jehova sa doktrinal na paagi an dana kan saiyang banwaan. An Kapahayagan 12:1-9 nagtatao nin halimbawa. An pagkasaysay nagsasambit nin tolong simbolikong karakter—“sarong babae” na bados asin nangaki, sarong “dragon,” asin “sarong aking lalaki.” Aram daw nindo kun siisay an irinerepresentar kan lambang karakter na ini? Ipinamidbid sinda sa sarong artikulo na may temang “Birth of the Nation” (sa Bicol, “Pagkamundag kan Nasyon”), na nagluwas sa isyu kan The Watch Tower na Marso 1, 1925. An artikulong iyan nagtao sa banwaan nin Dios nin mas malinaw na pakasabot kan mga hula manongod sa pagkamundag kan Kahadean, pakarorop na naglinaw na igwa nin duwang magkalaen na organisasyon—ki Jehova asin ki Satanas. Dangan kan 1927/28, nasabotan kan banwaan nin Dios na an pagselebrar nin Pasko asin kumpleanyo bakong sono sa Kasuratan, asin ipinondo ninda an pagselebrar kaiyan.
14. Anong doktrinal na mga katotoohan an klinaripikar kan dekada nin 1930?
14 Kan dekada nin 1930, may dugang pang liwanag na pinasirang sa tolong doktrinal na katotoohan. Sa laog nin dakol na taon, aram kan Mga Estudyante sa Biblia na an dakulang kaburunyogan, o an “dakulang kadaklan,” na nasambitan sa Kapahayagan 7:9-17 laen man sa 144,000, na mamamahala kaiba ni Cristo bilang mga hade asin saserdote. (Kapahayagan 5:9, 10; 14:1-5) Minsan siring, nagdanay na bakong malinaw kun siisay an dakulang kaburunyogan. Kun paanong an nag-oorog na liwanag sa kaagahan nagpapangyaring maheling an korte asin kolor kan malibog na mga bagay, kan 1935 an dakulang kaburunyogan namidbid bilang an mga nakaligtas sa “dakulang kahorasaan,” na may paglaom na mabuhay sagkod lamang digdi sa daga. Paghaloyhaloy sa taon man sanang iyan nagkaigwa nin pagklaripikar na nakaapektar sa nag-eeskuelang mga aki kan mga Saksi ni Jehova sa dakol na nasyon. Mantang malaad an patriotismo sa bilog na kinaban, nasabotan kan mga Saksi na an pagsaludo sa bandera bako nanggad na pormalismo sana. Kan suminunod na taon, ipinaliwanag an saro pang doktrinal na katotoohan, na si Cristo nagadan sa harigi, bakong sa krus.—Gibo 10:39.
15. Kasuarin asin paano idinoon an kabanalan nin dugo?
15 Bilang resulta kan Guerra Mundial II, na durante kaiyan kinatodan nang ginigibo an pagbolong sa eridong mga soldados paagi sa pag-ineksion nin dugo, nagkaigwa nin orog na liwanag sa kabanalan nin dugo. An isyu kan The Watchtower na Hulyo 1, 1945 nag-enkaminar sa “gabos na parasamba ki Jehova na gustong mabuhay na daing sagkod sa saiyang bagong kinaban nin katanosan na igalang an kabanalan nin dugo asin na ioyon an saindang sadiri sa matanos na mga desisyon nin Dios may labot sa mahalagang marhay na bagay na ini.”
16. Kasuarin ilinuwas an New World Translation of the Holy Scriptures, asin ano an duwang pambihirang aspekto kaiyan?
16 Kan 1946 naheling an pangangaipo na magkaigwa nin bagong traduksion kan Biblia na ginagamit an pinakabagong kaaraman asin dai naolakitan nin mga doktrinang basado sa mga tradisyon nin Kakristianohan. An pagtrabaho sa siring na traduksion nagpoon kan Disyembre 1947. Kan 1950 ilinuwas sa Ingles an New World Translation of the Christian Greek Scriptures. An Hebreong Kasuratan sa Ingles inimprenta sa limang tomo, na sunod-sunod na ilinuwas poon kan 1953. An pangultimong tomo ilinuwas kan 1960, labi-labi sanang 12 taon pakatapos na ponan an proyekto sa pagtradusir. An kompletong New World Translation of the Holy Scriptures na nasa sarong tomo ilinuwas kan 1961. Makukua na ngonyan sa dakol na lenguahe, an traduksion na ini igwa nin nagkapirang pambihirang aspekto. Ibinabalik kaiyan an ngaran nin Dios, an Jehova. Dugang pa, an literal na traduksion kaiyan kan orihinal na kasuratan nagtao nin basehan para sa dagos-dagos na pag-oswag sa pakasabot kan katotoohan nin Dios.
17. Anong nag-orog na liwanag an pinasirang kan 1962?
17 Ginibo kan 1962 an pagklaripikar manongod sa “superyor na mga autoridad” sa Roma 13:1 asin kun sagkod saen an pagpasakop sa sainda nin sarong Kristiano. An lubos na pag-analisar sa ika-13 kapitulo kan Roma asin sa mga teksto kan Kasuratan na siring kan Tito 3:1, 2 asin 1 Pedro 2:13, 17 nagtaong linaw na an pananaram na “superyor na mga autoridad” nanonongod, bakong ki Jehova Dios asin Jesu-Cristo, kundi sa mga autoridad sa gobyerno nin tawo.
18. Ano an nagkapirang katotoohan na klinaripikar kan dekada nin 1980?
18 Kan suminunod na mga taon, an dana kan mga matanos paorog nang paorog na nagliwanag. Kan 1985 pinasirang an liwanag sa kahulogan kan ipinahayag na matanos “para sa buhay” asin pagigin matanos bilang katood nin Dios. (Roma 5:18; Santiago 2:23) Lubos na ipinaliwanag kan 1987 an kahulogan kan Kristianong Jubileo.
19. Paano si Jehova nagtao nin orog pang espirituwal na liwanag para sa saiyang banwaan kan nakaagi pa sanang mga taon?
19 Kan 1995 an pagbulagbulag sa “mga karnero” asin “mga kanding” mas malinaw na nasabotan. Kan taon 1998 nagkaigwa nin detalyadong paliwanag sa bisyon ni Ezequiel nin templo, na iyan nasa pagkaotob na. Kan 1999 nagkaigwa nin pagklaripikar manongod sa kun noarin asin paano ‘matindog sa sarong banal na lugar an makababaldeng bagay.’ (Mateo 24:15, 16; 25:32) Asin kan 2002 orog pang namansayan an mapadapit sa kahulogan kan pagsamba sa Dios “sa espiritu asin katotoohan.”—Juan 4:24.
20. Sa anong iba pang langtad nakaeksperyensia nin mga pagpakarhay an banwaan nin Dios?
20 Apuera sa organisasyonal asin doktrinal na mga pagpakarhay, nagkaigwa nin mga pagpakarhay may koneksion sa Kristianong paggawe. Halimbawa, kan 1973 an paggamit nin tabako nasabotan bilang “ramog nin laman” asin ibinilang na magabat na paggibo nin sala. (2 Corinto 7:1) Pakalihis nin sarong dekada, klinaripikar kan isyu kan The Watchtower na Hulyo 15, 1983 an satong paninindogan sa paggamit nin mga badil. Nagkapira sana ining halimbawa kan nag-oorog na liwanag sa satong panahon.
Padagos na Maglakaw sa Dana nin Nag-oorog na Liwanag
21. Anong aktitud an makakatabang sa sato na padagos na maglakaw sa dana nin nag-oorog na liwanag?
21 “An pag-ako sa sarong pagbabago kun minaabot iyan asin pag-adaptar dian puedeng magin depisil,” an pag-admitir nin sarong haloy nang magurang sa kongregasyon. Ano an nakatabang sa saiya na akoon an dakol na pagpakarhay na naheling nia sa 48 taon niang pagigin parabalangibog kan Kahadean? Nagsimbag sia: “An pagkaigwa nin tamang aktitud iyo an pinakaliabe. An pagsayumang akoon an sarong pagpakarhay mangangahulogan na an saro mawawalat mientras na nag-aabante an organisasyon. Kun igwa nin mga pagbabago na garo baga masakit kong akoon, hinohorophorop ko an mga tataramon ni Pedro ki Jesus: ‘Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.’ Dangan hinahapot ko an sakong sadiri, ‘Saen pa ako maduman—sa kadikloman kan kinaban?’ Nakakatabang ini sa sako na mangapot nin marigon sa organisasyon nin Dios.”—Juan 6:68.
22. Paano kita nakikinabang sa paglakaw sa liwanag?
22 Tunay nanggad na an kinaban na nasa palibot niato nasa grabeng kadikloman. Mantang padagos na nagpapasirang nin liwanag si Jehova sa saiyang banwaan, padagos na nagdadakula an kalaenan sa pag-oltanan ninda asin kan mga nasa kinaban. Ano an nagigibo kan liwanag na ini para sa sato? Bueno, kun paanong an pagpailaw nin spotlight sa sarong lukab sa sarong madiklom na dalan dai naghahale kan lukab, an liwanag hale sa Tataramon nin Dios dai naghahale kan mga litag. Pero, an liwanag hale sa Dios seguradong nagtatabang sa sato na malikayan an mga iyan tanganing makapagpadagos kita sa paglakaw sa dana nin nag-oorog na liwanag. Kun siring, padagos kitang magtao nin atension sa makahulang tataramon ni Jehova, “siring sa sarong ilawan na nagliliwanag sa madiklom na lugar.”—2 Pedro 1:19.
Nagigirumdoman daw Nindo?
• Anong organisasyonal na mga pagpakarhay an ginibo ni Jehova sa saiyang banwaan?
• Anong doktrinal na mga pagpakarhay an pinangyari kan nag-orog na liwanag?
• Anong mga pagbabago an personal nindong naheling, asin ano an nakatabang sa saindo na akoon an mga iyan?
• Taano ta mawot nindo na padagos na maglakaw sa dana nin nag-oorog na liwanag?
[Mga Hapot Para sa Pag-adal]
[Mga Ritrato sa pahina 27]
An kombension kan 1922 sa Cedar Point, Ohio, nagpakosog sa Mga Estudyante sa Biblia na otobon an gibohon nin Dios
[Ritrato sa pahina 29]
An “New World Translation of the Christian Greek Scriptures” na ilinuwas kan 1950, ni N. H. Knorr
[Picture Credit Line sa pahina 26]
© 2003 BiblePlaces.com