‘An Pagkamoot Nindo Gabos Nagtatalubo’

DAKOL na natural na kalamidad an tuminama sa Hapon kan 2004. Kabilang sa mga ini an mga bagyo, baha, asin linog. Naapektaran na gayo kan mga iyan an buhay nin dakol, kaiba na an mga Saksi ni Jehova. (Eclesiastes 9:11) Pero, an mga kasakitan na ini nagtao nin oportunidad sa mga Saksi na ipaheling an sa magturugang na kapadangatan para sa lambang saro.​—1 Pedro 1:22.

Halimbawa, huli sa makosog na mga pag-oran kan Hulyo, naglipwas an sarong salog sa sentral na parte nin Hapon. Nadestroso kan pagbaha an labing 20 harong nin mga Saksi ni Jehova. Sa sarong Kingdom Hall, an tubig luminangkaw nin mga sarong metro poon sa salog. Tolos-tolos, nagtarabang an mga Saksi gikan sa kataraed na kongregasyon. Lininig kan ginatos na boluntaryo an mga harong na pano nin laboy. An Kingdom Hall biyong nalinigan asin nahirahay sa laog sana nin duwang semana.

Kan Oktubre 23, sarong linog na may kosog na 6.8 sa Richter scale an tuminama sa lugar man sanang iyan. Kisuerra 40 buhay an nawara, asin labing 100,000 katawo an kinaipuhan na eebakwit gikan sa saindang mga harong. Pinutol an suplay nin tubig, gas, asin elektrisidad. Minsan ngani an sentro kan linog mga 50 kilometros sana an rayo, an nahirahay na Kingdom Hall mayong danyos. Iyan ensegidang nagin temporaryong sentro nin pag-ayuda. Tolos na inaram kan Kristianong mga paraataman kun baga ligtas sa peligro an saindang mga kapagtubod asin nakaginhawa sinda kan maaraman ninda na mayo nin nakolgan o nagadan. Amay pa pagkaaga, an anom na Saksi na nagin mga biktima kan baha kan Hulyo galagang nagboluntaryo tanganing maghatod nin mga kakanon asin tubig sa apektadong lugar. Mga pirang oras pa sana pagkatapos kan linog, igwa na nin ayuda.

“Ibinilang kaidtong mga nagin biktima kan mga baha na an pag-ayuda para sa mga naapektaran kan linog sarong oportunidad tanganing ipaheling an saindang pag-apresyar sa tabang na inako mismo ninda,” an isinaysay kan sarong paraataman. “Sinda nagpagal poon sa amay na aga sagkod sa matangang banggi. Asin sa saindang mga lalauogon risang marhay an kaogmahan!”

Dai namemeligrong madanyaran kan mga baha ni mga linog an pagkaminootan na nagbobogkos sa Kristianong kasararoan kan mga Saksi ni Jehova bilang magturugang. Al kontraryo, kun an siring na mga kalamidad minatama, an mga Kristiano nakakaeksperyensia kan sinabi ni apostol Pablo sa mga kapagtubod sa Tesalonica: “An pagkamoot kan kada saro asin nindo gabos para sa iba nagtatalubo.”​—2 Tesalonica 1:3.