Mga Kontribusyon na Nagpapaogma sa Puso nin Dios

AN ESTORYA bakong makawiwili. Inagaw ni Reyna Atalia an trono nin Juda paagi sa pakana asin paggadan. Salang naghohona na ginaradan na an gabos na lehitimong paramana, ginibo niang reyna an saiyang sadiri. An saro pang babae, si prinsesa Jehoseba, na namoot na marhay ki Jehova asin sa saiyang Ley, may kosog nin boot na itinago an sarong aki nin hade, an omboy na si Joas. Si Jehoseba asin an saiyang agom, an Halangkaw na Saserdoteng si Joiada, itinago an paramana sa laog nin anom na taon sa saindang kuarto sa templo.​—2 Hade 11:1-3.

Kan pitong taon na an edad ni Joas, andam na an Halangkaw na Saserdoteng si Joiada na ponan an saiyang plano na haleon an man-aagaw na reyna sa saiyang trono na nakua nia sa maraot na paagi. Ilinuwas nia an aking lalaki hale sa pagkatago asin kinoronahan ini bilang lehitimong paramana kan kahadean. Dangan an maraot na si Reyna Atalia ginuyod paluwas sa templo kan mga guardia sa palasyo asin ginadan, na ikinaginhawa asin ikinagayagaya kan banwaan. Paagi sa saindang mga aksion, si Joiada asin Jehoseba nakakontribwir nin dakula sa pagbabalik sa dati kan tunay na pagsamba sa daga nin Juda. Alagad an mas mahalaga, nakakontribwir sinda sa pagpapadagos kan makahadeng linya ni David, na masagkod sa Mesiyas.​—2 Hade 11:4-21.

An bagong patukawon na hade igwa man nin ikokontribwir na mapaogma sa puso nin Dios. An harong ni Jehova kaipuhan nanggad na hirahayon. An daing kontrol na ambisyon ni Atalia na magin solamenteng namamahala sa Juda nagin dahelan na bako sanang mapabayaan an templo kundi salakaton man iyan. Kaya nagin determinado si Joas na itogdok liwat asin ibalik sa dati an templo. Daing pag-atraso, nagpaluwas sia nin pagboot na magtipon nin kinakaipuhan na pondo para sa rehabilitasyon kan harong ni Jehova. Sinabi nia: “An gabos na kuarta para sa banal na mga dolot na dinadara sa harong ni Jehova, an kuarta na itinatasar sa balang saro, an kuarta para sa mga kalag segun sa halaga nin indibiduwal, an gabos na kuarta na gikan sa puso nin balang saro na darahon sa harong ni Jehova, kuanon kan mga saserdote, kan balang saro hale sa saiyang kamidbid; asin hirahayon man ninda an mga gatak sa harong saen man may manompongan na gatak.”​—2 Hade 12:​4, 5.

An banwaan gikan sa boot na nagkontribwir. Minsan siring, an mga saserdote bakong bilog na puso sa pag-otob kan saindang paninimbagan na hirahayon an templo. Huli kaini, nagdesisyon an hade na personal na asikasohon an bagay na iyan asin nagboot na an gabos na kontribusyon direktang ibugtak sa sarong espesyal na kahon. Si Joiada an pinapamahala nia, asin an salaysay nagsasabi: “Si Joiada na saserdote nagkua ngonyan nin sarong kahon asin linabotan an takop kaiyan asin itinaed iyan sa altar sa toong parte kun palaog an saro sa harong ni Jehova, asin duman ibubugtak kan mga saserdote, kan mga parabantay sa tata, an gabos na kuarta na ilinalaog sa harong ni Jehova. Asin nangyari na kun maheling ninda na dakol na an kuarta sa kahon, minasakat an sekretaryo kan hade asin an halangkaw na saserdote, asin pinapatos ninda iyan asin binibilang an kuarta na nakua sa harong ni Jehova. Asin itinao ninda an kuartang nabilang sa kamot kan mga naggigibo kan  trabaho na mga ninombrahan sa harong ni Jehova. Dangan ibinabayad ninda iyan sa mga nagtatrabaho sa kahoy asin sa mga paratogdok na nagtatrabaho sa harong ni Jehova, asin sa mga mason asin sa mga panday sa gapo, asin tanganing ibakal nin mga tablon asin mga linabrang gapo para sa paghirahay kan mga gatak sa harong ni Jehova asin para sa gabos na ginagastos sa harong tanganing hirahayon iyan.”​—2 Hade 12:9-12.

Bilog na puso an paghimate kan banwaan. An harong nin pagsamba ki Jehova ikinabalik sa dati kaya an pagsamba sa saiya puede nang magpadagos sa paaging may dignidad. Sa siring, an gabos na pondong ikinontribwir ginamit nin tama. Sinegurado iyan ni Hadeng Joas!

Ngonyan, an naheheling na organisasyon ni Jehova maingat na binabantayan na an gabos na pondong idinonar ginagamit nin tama tanganing paoswagon an pagsamba ki Jehova, asin an tunay na mga Kristiano naghimate na arog kan suanoy na mga Israelita​—nin bilog na puso. Tibaad kabilang kamo sa mga nagkontribwir sa pagpaoswag kan intereses kan Kahadean durante kan nakaaging taon nin paglilingkod. Tawan niato nin atension an nagkapira sa mga paagi na ginagamit an saindong mga kontribusyon.

PAGPUBLIKAR

Sa bilog na kinaban, an minasunod na mga publikasyon inimprenta tangani na pag-adalan asin idistribwir:

• Mga libro: 47,490,247

• Mga bukleta: 6,834,740

• Mga brosyur: 167,854,462

• Mga kalendaryo: 5,405,955

• Mga magasin: 1,179,266,348

• Mga pulyeto: 440,995,740

• Mga Video: 3,168,611

Ginigibo an pag-imprenta sa Amerika del Norte, Sentral, asin del Sur, Aprika, Asia, Europa, asin sa mga islang nasyon sa Pasipiko​—may total na 19 nasyon.

“Katelyn May an ngaran ko. Walong taon na ako. Igwa ako nin $28, asin gusto kong itao iyan sa saindo tanganing makatabang sa pagbayad sa mga imprentahan. An saindong sadit na tugang, Katelyn.”

“Nagmiting an samong pamilya manongod sa bagong mga imprentahan. An samong mga aki, na 11 asin 9 anyos an edad, nagdesisyon na magkontribwir hale sa saindang natipon. Naoogma kaming ipadara an saindang kontribusyon kaiba kan samo.”

 PAGTOGDOK

An minasunod nagkapira sa mga proyekto nin pagtogdok na ginibo tanganing suportaran an mga aktibidad kan Mga Saksi ni Jehova:

• Mga Kingdom Hall sa mga kadagaan na limitado an mga rekurso: 2,180

• Mga Assembly Hall: 15

• Mga Sangang Opisina: 10

• Internasyonal na mga boluntaryo na nasa bilog na panahon na paglilingkod: 2,342

“Kaining nakaaging katapusan kan semana ginibo niamo an enot na pagtiripon sa samong bagong Kingdom Hall. Ogmahon kaming magkaigwa nin angay na lugar sa pag-omaw sa satong Ama, si Jehova Dios. Nagpapasalamat kami ki Jehova asin sa saindo huli sa pagtao nin atension sa samong mga pangangaipo paagi sa pagtogdok nin mas dakol pang Kingdom Hall. Tunay nanggad, an samong Kingdom Hall talagang kapakipakinabang sa pagtaraed.”​—Chile.

“Inaapresyar na marhay kan mga tugang an tabang na itinatao kan organisasyon ni Jehova. Sagkod ngonyan, padagos niamong pinag-oorolayan an manongod sa marahayon na panahon na ginamit niamo kaiba an grupo sa pagtogdok.”​—Moldova.

“Dai pa sana nahahaloy sinelebrar niamong mag-agom an samong ika-35 anibersaryo nin kasal. Pinag-isipan niamo kun ano an ireregalo sa lambang saro para sa okasyon na iyan, asin nagdesisyon kami na magtao ki Jehova asin sa saiyang organisasyon, huli ta kun mayo an tabang ninda, posibleng dai kami nagin mapanggana sa samong pag-agoman. Gusto niamo na gamiton an kalakip na kuarta na makakatabang sa pagtogdok nin sarong Kingdom Hall sa saro sa tikapong mga nasyon.”

“Nakaresibi ako nin mana kasuarin pa sana, asin mantang dikit sana an ‘gusto’ ko asin mas dikit pa ngani an ‘pangangaipo’ ko, gusto kong itao an kuartang kalakip tanganing makatabang sa pagtogdok nin mga Kingdom Hall, na kaipuhan na marhay sa dakol na nasyon.”

 PAG-AYUDA SA PANAHON NIN KALAMIDAD

Sa huring mga aldaw na ini, sa parate nagkakaigwa nin mga kalamidad na daing patanid. An dakol na Saksi ni Jehova nagtatao nin ekstrang kontribusyon tanganing matabangan an saindang mga tugang sa mga lugar na naapektaran. Bilang pagirumdom, an mga kontribusyon para sa ayuda sa kalamidad inaasikaso bilang kabtang kan pambilog na kinaban na gibohon. An minasunod nagkapira sa mga lugar na an mga Saksi ni Jehova nagtabang sa mga biktima nin kalamidad:

• Aprika

• Asia

• Mga Isla sa Pasipiko

• Rehion nin Caribe

“Gusto ming mag-agom na pasalamatan kamong marhay sa pagpadara nin ayudang mga suplay para sa nagin danyos durante kan mga bagyo. Nasalidahan mi nin bagong atop an samong harong. Talagang inaapresyar niamo na tolos-tolos kamong naghiro.”

“Connor an ngaran ko, asin 11 anyos an edad ko. Kan maheling ko an nangyari kan tumama an tsunami, gusto kong tumabang. Naglalaom ako na makakatabang ini sa sakong mga tugang.”

 ESPESYAL NA BILOG NA PANAHON NA MGA NAGLILINGKOD

Dakol na Kristiano an naglilingkod nin bilog na panahon sa gibohon na pag-eebanghelyo o sa mga erokan na Bethel. An nagkapirang bilog na panahon na boluntaryo suportado nin boluntaryong mga kontribusyon. Kabilang sa mga ini an minasunod:

• Mga misyonero: 2,635

• Mga nagbibiaheng paraataman: 5,325

• Mga Bethelite: 20,092

“Huling dai pa ako puedeng maglingkod sa Bethel ngonyan [singko anyos na aking lalaki], gusto kong ipadara an kontribusyon na ini kaiba an dakulang pagkamoot. Pagdakula ko, maduman ako sa Bethel tanganing mahigos na magtrabaho.”

Pagpalakop nin Edukasyon sa Biblia

Isinugo ni Jesu-Cristo an saiyang mga parasunod na ‘gumibo nin mga disipulo sa mga tawo kan gabos na nasyon.’ (Mateo 28:19) Bilang pagkuyog sa saiyang mga tataramon, an Mga Saksi ni Jehova sibot na ihinuhulit asin itinotokdo an mensahe kan Biblia sa 235 kadagaan. Sinda nagpupublikar asin nagdidistribwir nin literatura sa 413 lenguahe.

Tunay nanggad, an pinakamahalagang kontribusyon na puedeng ikatao nin sarong Kristiano tanganing matabangan an mas dakol na tawo na manodan an manongod sa Dios asin sa Saiyang mga katuyohan iyo an saiyang panahon. Itinao kan Mga Saksi ni Jehova an dakol nanggad na panahon asin kosog tanganing tabangan an saindang kapwa. Sinda man buka an palad na nagkontribwir sa pinansial na paagi, asin an gabos nindang kontribusyon, sa manlaenlaen na paagi, nakatabang na ikapahayag an ngaran asin mga katuyohan ni Jehova sa bilog na daga. Padagos logod na bendisyonan ni Jehova an mga paghihingoang ini na tabangan an iba na orog pang makanood manongod sa saiya. (Talinhaga 19:17) An siring na pagigin andam nakakatabang tanganing mapaogma an puso ni Jehova!​—Hebreo 13:​15, 16.

[Kahon sa pahina 28-30]

Mga Paaging Pinili nin Iba sa Pagtao

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work​—Matthew 24:14.”

Kada bulan, ipinapadara kan mga kongregasyon an kantidad na ini sa opisina kan Mga Saksi ni Jehova na naglilingkod sa saindang nasyon. An boluntad na mga donasyon na kuarta puede man na direktang ipadara sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang opisina kan Mga Saksi ni Jehova na naglilingkod sa saindong nasyon. An mga tseke na ipinapadara sa adres na nasa enotan maninigong bayadan sa “Watch Tower.” An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA IPINAGKATIWALANG KUARTA NA KONDISYONAL NA DONASYON

Puedeng ipagkatiwala an kuarta sa Watch Tower tanganing magamit sa pambilog na kinaban na gibohon. Minsan siring, ibabalik an donasyon kun hagadon kan nagdonar. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalong kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower bilang direktang regalo.

Daga Asin Harong: An ikakapabakal na daga asin harong puedeng idonar magsalang paagi sa direktang pagregalo o, sa kaso nin residensial na rogaring, paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o garantiya sa designadong korporasyon na ginagamit kan Mga Saksi ni Jehova. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa ginaganar para sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower paagi sa sarong testamento na ginibo sa legal na paagi, o an Watch Tower puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaparisa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an inandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur tanganing magtao nin impormasyon dapit sa laen-laen na paagi nin pagtao nin regalo magsalang ngonyan o paagi sa pamana pagnagadan. Pakatapos na mabasa an brosyur asin maghapot sa sadiri nindang kinokonsulta dapit sa ley o buwis, dakol an nakatabang sa pagsuportar sa relihioso asin humanitaryo na mga aktibidad kan Mga Saksi ni Jehova sa bilog na kinaban asin ginamit sa pinakalubos na paagi an mga benepisyo ninda sa buhis mantang ginigibo iyan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Para sa dugang pang impormasyon, puede kamong makikomunikar sa Charitable Planning Office, magsalang paagi sa pagsurat o telepono, sa adres na nakalista sa ibaba o puede kamong makikomunikar sa sangang opisina kan Mga Saksi ni Jehova na naglilingkod sa saindong nasyon.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Picture Credit Line sa pahina 27]

Video na Faithful: Stalin: Retrato kan U.S. Army