Kamo daw “Mayaman sa Dios”?

SA DAKOL na nakakapukaw nin isip na parabola na itinao ni Jesu-Cristo, igwa nin saro na manongod sa mayaman na kagsadiri nin daga. Sa paghihingoa na maseguro an pagkaigwa nin tiwasay na ngapit para sa sadiri nia, an kagsadiri nin daga naggibo nin mga plano na magtogdok nin mas darakulang tambobong. Pero, sa ilustrasyon ni Jesus, an tawong iyan inapod na “bakong makatanosan.” (Lucas 12:16-21) Nagkapirang traduksion kan Biblia an naggamit pa ngani kan terminong “lolong.” Taano ta hinusgaran sia nin siring kaiyan kagabat?

Minalataw na dai kaiba an Dios sa mga plano kan mayaman na tawong ini; ni tinawan nia nin ano man na kaomawan an Dios sa pagigin mabunga kan daga nia. (Mateo 5:45) Imbes, sia nanagsag: “Kalag, dakol ka nang marahay na bagay na naririmpos para sa dakol na taon; magpaginhawa ka na sana, magkakan ka, uminom ka, magpasiramsiram ka.” Iyo, iniimahinar nia na an bunga kan saiyang mga paghihingoa magigin sarong “kuta.”​—Talinhaga 18:11.

Sa pagpatanid tumang sa siring kaiyan kaabhaw na aktitud, an disipulong si Santiago nagsurat: “Madia, ngonyan, kamo na nagsasabi: ‘Ngonyan o sa aga kami maduman sa siring na siudad asin maontok duman nin sangtaon, asin magnenegosyo kami patin maggaganansia,’ mantang dai nindo aram kun ano an magigin buhay nindo sa aga. Huli ta kamo sarong alopoop na minatunga sa kadikit na panahon dangan nawawara sana.”​—Santiago 4:​13, 14.

Bilang kaotoban kan mga tataramon na iyan, an mayaman na tawo sa parabola ni Jesus sinabihan: “Ika na bakong makatanosan, ngonyan na banggi hahagadon ninda sa saimo an saimong kalag. Kun siring, siisay an magkakamit kan mga bagay na saimong tinipon?” Arog nin nawawarang alopoop, an mayaman na tawo magagadan bago nia maheling an kaotoban kan saiyang mga pangarap. Nasasabotan daw niato an leksion kaiyan? Sinabi ni Jesus: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.” Kamo daw “mayaman sa Dios”?