Sarong Dios o Sarong Tawo?

“AKO iyo an liwanag kan kinaban. An minasunod sako dai nanggad maglalakaw sa kadikloman, kundi magkakaigwa kan liwanag nin buhay.” (Juan 8:12) An mga tataramon na ini sinabi ni Jesu-Cristo. Nagsurat an sarong may inadalan na tawo kan enot na siglo manongod sa saiya: “Maingat na natatago sa saiya an gabos na kayamanan nin kadonongan asin nin kaaraman.” (Colosas 2:3) Dugang pa, an Biblia nagsasabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An tamang kaaraman manongod ki Jesus kaipuhan tanganing mapanigoan an satong espirituwal na pangangaipo.

An mga tawo sa bilog na daga nakadangog na manongod ki Jesu-Cristo. An saiyang impluwensia sa kasaysayan nin katawohan dai mapapagdudahan. Sa katunayan, an ginagamit na kalendaryo sa kadaklan na parte kan kinaban basado sa hinohona na taon kan saiyang pagkamundag. “An apod nin dakol na tawo sa mga petsa bago an taon na iyan B.C., o before Christ (bago si Cristo),” an paliwanag kan The World Book Encyclopedia. “Ginagamit ninda an A.D., o anno Domini (sa taon kan satong Kagurangnan), para sa mga petsa pakalihis kan taon na iyan.”

Pero, may nagkokorontrahan na ideya kun siisay si Jesus. Para sa nagkapira, sia saro sanang pambihirang tawo na nagkaigwa nin pambihirang rekord sa kasaysayan. Pero an iba sinasamba sia bilang an Makakamhan sa Gabos na Dios. May mga paratokdong Hindu na iinagid si Jesu-Cristo sa Hindung dios na si Krisna, na sinasabi nin dakol na sarong dios na nagpakangtawo. Si Jesus daw saro sanang tawo, o sia daw saro na maninigong sambahon? Siisay man nanggad sia? Hale sia saen? Arog sia sa ano? Asin haen na sia ngonyan? Arog kan masasabotan niato sa masunod na artikulo, an libro na dakol an sinasabi manongod ki Jesus nagtatao nin totoong mga simbag sa mga hapot na ini.