An Kagayonan kan mga Linalang ni Jehova

“Kanigoan Kadakol kan Saimong mga Gibo, O Jehova!”

BAGA man nag-iistar kita sa probinsia o sa siudad, nasa itaas nin kabukidan o nasa ibaba sa may gilid nin dagat, napapalibotan kita nin nakakapukaw nin may pagkangirhat na paggalang na kagayonan kan mga linalang. Angay nanggad, itinatampok kan 2004 Calendar of Jehovah’s Witnesses an tanawon kan makangangalas na mga gibo ni Jehova Dios.

An mapag-apresyar na mga tawo pirmeng interesado sa mga gibo nin Dios. Halimbawa, isip-isipa si Salomon, na an kadonongan “orog na dakula kisa kadonongan kan gabos na taga Subangan.” An Biblia nagsasabi: “Sia nagtataram dapit sa mga kahoy, poon sa sedro na yaon sa Lebanon sagkod sa hisopo na nagtutubo sa lanob; asin sia nagtataram dapit sa mga hayop asin dapit sa naglalayog na mga linalang asin dapit sa nagkakanap na mga bagay patin dapit sa mga sira.” (1 Hade 4:​30, 33) An ama ni Salomon, si Hadeng David, parateng naghohorophorop sa mga obra maestra nin Dios. Sia napahirong kumagsing sa saiyang Kaggibo: “Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.”​—Salmo 104:24. *

Maninigo man niatong obserbaran asin pag-adalan an mga linalang. Halimbawa, puede nanggad niatong ‘itingag an satong mga mata’ asin ihapot: “Siisay an naglalang kan mga bagay na ini?” Tara, si Jehova Dios, na igwa nin “abundansia nin dinamikong enerhiya” asin totoong “makosog an kapangyarihan”!​—Isaias 40:26.

Paano daw maninigong makaapekto sa sato an paghorophorop sa mga paglalang ni Jehova? Kisuerra sa tolong paagi. Puede kaiyan na (1) ipagirumdom sa sato na pakamahalon an satong buhay, (2) pahiroon kita na tabangan an iba na makanood sa mga linalang, asin (3) itulod kitang midbidon asin pasalamatan nin biyo an satong Kaglalang.

An satong buhay bilang mga tawo, na mas nakakalabi nanggad sa “daing isip na mga hayop,” nagpapangyari sa sato na obserbaran asin pahalagahan an ngangalasan nin paglalang. (2 Pedro 2:12) Naheheling kan satong mga mata an magayonon na tanawon. Nadadangog kan satong mga talinga an magayon pagdangogon na mga huni nin mga gamgam. Asin igwa kita nin kakayahan na magirumdoman an kawiliwiling mga panahon asin lugar. Minsan ngani bakong sangkap an satong buhay sa presente, tunay nanggad na kapakipakinabang an buhay!

Puedeng ikaogma kan mga magurang an natural na interes kan saindang mga aki sa mga linalang. Gustohon nanggad kan mga aki na makakua nin mga buskay sa baybayon, hapiyapon an sarong hayop, magsakat sa kahoy! Gugustohon kan mga magurang na tabangan an saindang mga aki na maheling an koneksion kan linalang asin Kaglalang. An may pagkangirhat na paggalang kan mga aki para sa mga linalang ni Jehova puedeng magdanay sainda sa bilog nindang buhay.​—Salmo 111:​2, 10.

Magigin labi-labi kahalipot kan satong pananaw kun hahangaan niato an linalang alagad dai niato mimidbidon an Kaglalang. Tinatabangan kita kan hula ni Isaias na horophoropon an mismong puntong ini kan magsabi iyan: “Ano dai mo naaraman  o dai mo nadangog? Si Jehova, an Kaglalang kan mga kaporoporohi kan daga, Dios sagkod sa panahon na daing talaan. Dai sia nanluluya o napapagal. Dai marorop an saiyang pakasabot.”​—Isaias 40:28.

Iyo, an mga gibo ni Jehova nagtatao nin ebidensia kan saiyang daing kapantay na kadonongan, kan saiyang daing kaparehong kapangyarihan, asin kan saiyang hararom na pagkamoot sa sato. Kun naheheling niato an kagayonan sa palibot niato asin namamansayan an mga kualidad kan Saro na naggibo kaiyan gabos, logod na mapahiro kita na arogon an mga tataramon ni David: “Mayo ni saro . . . na arog sa saimo, O Jehova, ni igwa man nin mga gibo na arog kan sa saimo.”​—Salmo 86:8.

Makakasierto kita na an makinuyog na mga tawo padagos na maaakit sa mga paglalang ni Jehova. Sa bilog na panahon na daing sagkod, magkakaigwa kita nin daing katapusan na mga oportunidad na makanood nin orog pa manongod ki Jehova. (Eclesiastes 3:11) Asin mantang orog kitang nakakanood manongod sa saiya, orog na mamomotan niato an satong Kaglalang.

[Nota sa Ibaba]

[Kahon sa pahina 9]

Pag-omaw Para sa Kaglalang

Minimidbid nin dakol na sientistang may apresasyon an kabtang nin Dios sa paglalang. An minasunod iyo an pira sanang halimbawa:

“An kahalagahan asin kagayagayahan kan siensia na pinag-aadalan ko hale sa paminsanminsan na mga pagkadiskobre nin sarong bagay na bago asin sabihon sa sakong sadiri, ‘Arog palan kaiyan an pagkagibo nin Dios dian.’ An sakong pasohan iyo na masabotan ko an sadit na kabtang kan plano nin Dios.”​—Henry Schaefer, propesor sa kimika.

“Kun mapadapit sa dahelan nin paghiwas kan Uniberso, an parabasa na an matao kan sadiri niang konklusyon, alagad an satong pakasabot kan dahelan na iyan kulang kun mayo Sia [an Dios].”​—Edward Milne, Britanong kosmologo.

“Aram niato na an naturalesa ilinaladawan kan pinakahalangkaw sa gabos na posibleng matematika huli ta linalang iyan nin Dios.”​—Alexander Polyakov, Rusong matematiko.

“Sa samong pag-adal sa natural na mga bagay kinokonsiderar mi an mga kaisipan kan Kaglalang, na inaaram an saiyang mga ideya, tinatawan nin kahulogan an sarong sistema na sadiri Nia asin bako mi.”​—Louis Agassiz, Amerikanong biologo.

[Ritrato sa pahina 8, 9]

Mga “gentoo penguin,” sa Antartika Peninsula

[Ritrato sa pahina 9]

An Grand Teton National Park, Wyoming, E.U.A.

[Credit Line]

Jack Hoehn/Index Stock Photography