Gusto daw Nindong Mabuhay Sagkod Lamang?

“DAI ako natatakot magadan,” an sabi nin sarong may edad nang babae sa Hapon. “Alagad napupurisaw ako ta mababayaan ko an mga burak na ini.” Nasabotan kan sarong Kristianang ministro na nagdadalaw sa saiyang harong an komentong iyan, huli ta an babae may magayon na hardin. Dakol na nagsasabing dai sinda natatakot magadan an talagang ikinakaogma an mga ngangalasan nin paglalang asin tibaad talagang hinihimuyawot na mabuhay sagkod lamang.

Mabubuhay sagkod lamang? Dakol an dai lamang iintindihon an siring na ideya. May mga masabi pa ngani na dai sinda interesadong mabuhay sagkod lamang. Taano ta may mga nagsasaboot nin arog kaiyan?

 Buhay na Daing Katapusan​—Nakakalangkag?

May mga nagsasaboot na magigin nakakalangkag an mabuhay sagkod lamang. Tibaad sambiton ninda an nakakasumong buhay nin dakol na retirado na mayo nang ginibo kundi tumukaw na sana asin tumuruhok sa telebisyon. Kun iyan an saboot nindo, isipon an sinabi ni Robert Jastrow kan hapoton sia kun baga an buhay na daing katapusan magigin bendisyon o maldisyon. Si Jastrow suminimbag: “Iyan magigin bendisyon sa mga gustong makaaram asin may daing katapusan na pagmawot na makanood. Nakakaranga nanggad para sainda na isipon na puede sindang makakua nin kaaraman sagkod lamang. Alagad para sa iba na nagsasaboot na nanodan na ninda an gabos na dapat nindang manodan asin na sirado an isip, iyan magigin nakakatakot na marhay na maldisyon. Dai ninda aram kun paano ninda gagamiton an saindang panahon.”

Madepende sa saindong aktitud kun baga magigin nakakalangkag o dai an buhay na daing katapusan. Kun kamo “gustong makaaram asin may daing katapusan na pagmawot na makanood,” isip-isipon kun ano an puede nindong magibo sa langtad nin arte, musika, arkitektura, paghardin, o ano man na mahalagang okupasyon na pinagkakainteresan nindo. An buhay na daing sagkod digdi sa daga matao nin marahayon na mga oportunidad tanganing paoswagon an saindong potensial sa manlaenlaen na langtad.

Huling puedeng ipaheling asin maeksperyensiahan an pagkamoot sagkod lamang magigin nakakakontento nanggad an buhay na daing sagkod. Linalang kita na may kakayahan na magpaheling nin pagkamoot, asin kita minatalubo kun namamatean niato na kita namomotan. An paghinirasan nin tunay na pagkamoot nagbubunga nin hararom na satispaksion na dai nawawara sa pag-agi nin panahon. An mabuhay sagkod lamang nag-aalok nin daing katapusan na oportunidad na makultibar an pagkamoot bako sanang para sa mga kapwa tawo kundi nangorogna sa Dios. “Kun an siisay man namomoot sa Dios,” an sabi ni apostol Pablo, “an sarong ini midbid nia.” (1 Corinto 8:3) Kanigoan kamakangangalas na oportunidad​—na mamidbid an Soberano kan uniberso asin mamidbid man nia! Apuera kaini, mayo nin katapusan an pag-adal manongod sa satong mamomoton na Kaglalang. Kun siring, paano magigin nakakalangkag asin dai nakakaogma an buhay na daing katapusan?

An Buhay​—Temporaryo Asin Mahalagang Marhay

May mga nagsasaboot na an kahalipotan nin buhay an nagpapangyaring magin mahalagang marhay iyan. Tibaad ikomparar ninda an buhay sa bulawan, na limitado sana an kadakolan. Kun an bulawan makukua sa gabos na lugar, an sabi ninda, an halaga kaiyan maiinaan. Minsan siring, an bulawan magigin magayon pa man giraray. Daing duwa-duwa na totoo man iyan kun manongod sa buhay.

Puede niatong ikomparar an pagkamit nin buhay na daing sagkod sa pagkaigwa nin abundang aire. An mga marinero na nasa submarinong igwa  nin diperensia ibibilang na espesyalmenteng mahalaga an aire. Pagkatapos na isalbar sinda, sa paghona daw nindo daing pag-apresyar na mareklamo sinda manongod sa pagkaigwa giraray nin abundang aire? Seguradong dai!

Kapareho kan mga marinerong iyan, puede kitang isalbar alagad may orog na posibilidad na magkamit kita nin buhay na daing katapusan. “An ibinabayad nin kasalan kagadanan,” an isinurat ni apostol Pablo, “alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.” (Roma 6:23) Paagi sa atang na pantubos ni Jesus, hahaleon nin Dios an pagkabakong sangkap nin tawo asin an kagadanan patin itatao nia sa makinuyog na katawohan an regalo na buhay na daing katapusan. Maninigong magpasalamat nanggad kita para sa mamomoton na areglong iyan!

Kumusta an mga Namomotan Nindo?

Tibaad may mga indibiduwal na nag-iisip: ‘Kumusta an mga namomotan ko? An buhay na daing sagkod sa daga dai magigin makahulogan sa sako kun dai ko sinda kaiba.’ Tibaad ilinaog na nindo sa isip an kaaraman manongod sa Biblia asin nanodan an manongod sa posibilidad na magkamit nin buhay na daing katapusan sa paraiso digdi sa daga. (Lucas 23:43; Juan 3:16; 17:3) Naturalmente, gusto nindong yaon duman an saindong kapamilya, iba pang mahal sa buhay, asin mahal na mga katood, na nagkakamit kan iyo man sanang kagayagayahan na linalaoman nindong maeksperyensiahan sa ipinanuga nin Dios na bagong kinaban nin katanosan.​—2 Pedro 3:13.

Alagad paano daw kun an saindong mga katood asin mahal sa buhay dai nagpapaheling nin interes na mabuhay sagkod lamang sa sarong paraisong daga? Dai pagtogotan na makadesganar iyan sa saindo. Padagos na ilaog sa isip an tamang kaaraman na sono sa Kasuratan, asin humiro kaoyon kaiyan. Si apostol Pablo nagsurat: “Paano ka makakasierto, Kristianang agom, na dai mo ikakaligtas an saimong agom na lalaki? O paano ka makakasierto, Kristianong agom, na dai mo ikakaligtas an saimong agom na babae?” (1 Corinto 7:​16, Today’s English Version) An mga tawo puedeng magbago. Halimbawa, an sarong lalaki na dati nagkokontra sa Kristianismo nagbago asin sa huri nagin magurang sa Kristianong kongregasyon. Sia nagsabi: “Nagpapasalamat akong marhay na an sakong mahal na pamilya may kaimbodan na nagdanay sa mga prinsipyo kan Biblia sa ibong nin gabos na pagkontra ko.”

An Dios interesadong marhay sa buhay nindo asin kan sa saindong mga mahal sa buhay. Tunay nanggad, “si Jehova . . . dai [nagmamawot] na an siisay man malaglag kundi mawot nia na an gabos makapagsolsol.” (2 Pedro 3:9) Gusto ni Jehova Dios na mabuhay kamo asin an saindong mga mahal sa buhay sagkod lamang. An saiyang pagkamoot orog na dakula kisa kan sa bakong sangkap na mga tawo. (Isaias 49:15) Kaya taano ta dai nindo kultibaron an sarong marahay na relasyon sa Dios? Sa siring tibaad matabangan nindo an saindong mga mahal sa buhay na gibohon man iyan. Dawa kun mayo pa sinda ngonyan nin paglaom na mabuhay sagkod lamang, an saindang aktitud puedeng magbago kun maheling ninda kamo na minagaweng kaoyon kan tamang kaaraman sa Biblia.

Kumusta man an saindong mga mahal sa buhay na nagkagaradan na? Para sa minilyon na nagadan, an Biblia may itinataong makangangalas na paglaom na pagkabuhay liwat​—pagkapukaw hale sa kagadanan asin pag-istar sa Paraiso digdi sa daga. Si Jesu-Cristo nanuga: “An oras maabot na an gabos na nasa mga lolobngan na girumdoman . . . maruluwas.” (Juan 5:​28, 29) Dawa an mga nagadan na dai nakamidbid sa Dios bubuhayon giraray, huli ta an Biblia nagsasabi: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Kanigoan kadakulang kaogmahan na akoon an siring na mga binuhay liwat!

Buhay na Daing Sagkod​—Sarong Magayagayang Paglaom

Kun kamo nakakamate nin kaogmahan asin pagkakontento ngonyan sa ibong kan gabos na problema sa kinaban na ini, seguradong ikakaogma nindo an buhay na daing sagkod sa sarong paraisong daga. Minsan siring, kan sabihon kan saro sa Mga Saksi ni Jehova an mga bendisyon na ibubunga kan buhay na daing katapusan, an sarong babae nagsabi: “Habo kong mabuhay sagkod lamang. Tama na sako an buhay na ini na 70 o 80 taon.” Hinapot sia kan sarong Kristianong magurang sa kongregasyon na nanongod na yaon duman:  “Napag-isip-isip na daw nindo kun ano an mamamatean kan saindong mga aki kun kamo magadan?” Napaluha sia kan mapag-isip-isip nia an magigin kamondoan ninda kun magadan an saindang ina. “Sa kaenot-enote, narealisar ko kun gurano ako kaimot,” an pag-admitir nia, “asin nasabotan ko na an buhay na daing katapusan bakong maimot na paglaom kundi kalabot dian an pagigin buhay para sa iba.”

May mga nagsasaboot na bakong importante sa siisay man kun baga sinda mabuhay o sinda magadan. Pero, importante iyan sa satong Paratao nin Buhay, na nagsasabi: “Mantang ako nabubuhay, . . . naoogma ako, bakong sa pagkagadan kan maraot, kundi sa bagay na an sarong maraot minatalikod sa saiyang dalan asin talagang magdanay na mabuhay.” (Ezequiel 33:11) Mantang an Dios interesadong marhay dawa sa buhay kan maraot, siertong odok na nagmamakolog sia sa mga namomoot sa saiya.

Si Hadeng David kan suanoy na Israel may kompiansa sa mamomoton na pagmakolog ni Jehova. Si David nagsabi kaidto: “Enkaso bayaan ako kan sakong sadiring ama asin kan sakong sadiring ina, si Jehova mismo an maampon sa sako.” (Salmo 27:10) Posibleng marhay na nakakasierto si David sa pagkamoot sa saiya kan saiyang mga magurang. Alagad dawa kun bayaan sia kan saiyang mga magurang​—mga tawong may pinakadayupot na relasyon sa saiya​—​aram nia na dai sia babayaan nin Dios. Huli sa saiyang pagkamoot asin pagmakolog, iinaalok sa sato ni Jehova an buhay na daing katapusan asin daing katapusan na pakikikatood sa saiya. (Santiago 2:23) Bako daw na maninigo niatong akoon na may pagpasalamat an marahayon na mga regalong ini?

[Ritrato sa pahina 7]

An pagkamoot sa Dios asin sa kapwa magpapangyari na magin kapakipakinabang an mabuhay sagkod lamang