An Paghanap nin Marahay na Pamomoon

“Humale ka na, sinasabi ko, tapos na kami saimo. Sa ngaran nin Dios, humale ka na!”​—Oliver Cromwell; kinotar ni Leopold Amery, miembro kan Parlamentong Britano.

An Guerra Mundial II mapanlaglag na nagpapadagos sa laog na nin walong bulan, asin garo baga madadaog an Britania asin an mga kaalyado nia. Para ki Leopold Amery asin sa iba pang nasa gobyerno, kaipuhan an pagbabago sa pamomoon. Kun siring, kan Mayo 7, 1940, sa Parlamento, kinotar ni Mr. Amery an mga tataramon na nasa enotan ki Primer Ministro Neville Chamberlain. Pakalihis nin tolong aldaw, nagdemitir si Mr. Chamberlain, asin sinalidahan sia ni Winston Churchill.

AN PAMOMOON sarong pundamental na pangangaipo nin katawohan, alagad bakong kun siisay na sana an puedeng mamoon. Dawa sa sarong pamilya, kaipuhan na an ama may kakayahan na mangenot tanganing magin maogma an saiyang agom asin mga aki. Imahinara nanggad, kun siring, kun ano an hinahagad sa sarong namomoon sa nasyon o sa kinaban! Bakong makangangalas na depisil nanggad na makanompong nin marahay na mga namomoon.

Bilang resulta, sa laog nin rinibong taon, nangyari an dai mabilang na koronasyon, rebolusyon, kudeta, nombramiento, eleksion, pag-asesinar, asin pagbabago sa rehimen. An mga hade, primer ministro, prinsipe, presidente, sekretaryo-heneral, asin diktador nagkakaigwa nin asin nawawara sa poder. An dai linalaoman na mga pagbabago hinale dawa an makapangyarihan na mga namamahala. (Helingon an kahon na “Biglang Nawara sa Poder,” sa pahina 5.) Pero, dai pa man giraray manompongan an may kakayahan asin nagdadanay na pamomoon.

“Makontento na Sana Kita”​—O May Iba Pa?

Kun siring, bakong makangangalas na dakol an nawaran na nin paglaom kun mapadapit sa pakanompong nin marahay na mga namomoon. Sa nagkapirang nasyon, an pagkaindiperente asin kadaihan nin paglaom kan mga tawo nangorognang nagigin risang-risa sa panahon nin eleksion. Si Geoff Hill, sarong peryodista sa Aprika, nagsabi: “An pagkaindiperente o dai pagboto lakop kun an mga tawo daing maginibo tanganing bagohon an kasakitan ninda sa buhay. . . . Sa Aprika, kun an mga tawo dai nagboboto, dai iyan pirmeng nangangahulogan na kontento sinda. Mas parate, iyan pag-agrangay para sa tabang kan mga nagsasaboot na mayo nin siisay man na nagdadangog sa sainda.” Kaagid kaiyan, nagsurat an sarong kolumnista sa peryodiko sa Estados Unidos  mapadapit sa nagdadangadang na eleksion: “Kutana may biyong kualipikado na magkandidato.” Idinugang nia: “Mayo man nin arog kaiyan na kandidato. Nungka. Makontento na sana kita.”

Totoo daw na an katawohan mayo na nin pagpipilian kundi “makontento na sana” sa bakong sangkap na mga namomoon? An katunayan daw na dai nakaya kan mga namomoon na tawo na panigoan an mga pangangaipo kan mga sakop ninda nagpapatunay na dai na kita noarin man magkakaigwa nin marahay na pamomoon? Dai. Makukua an pinakahalangkaw na klase nin pamomoon. Totokaron kan masunod na artikulo kun siisay an pinakamarahay na namomoon para sa katawohan asin kun paano puedeng makinabang sa pamomoon nia an minilyon na tawo hale sa gabos na pinaghalean​—kaiba kamo.

[Mga Ritrato sa pahina 3]

Sa walang itaas: Neville Chamberlain

Sa toong itaas: Leopold Amery

Sa ibaba: Winston Churchill

[Credit Lines]

Chamberlain: Rinetrato ni Jimmy Sime/Central Press/Getty Images; Amery: Rinetrato ni Kurt Hutton/Picture Post/Getty Images; Churchill: The Trustees of the Imperial War Museum (MH 26392)