Karangahan Para sa mga Nagsasakit nin Makuri

KAN an fiel na mga lalaki asin babae kaidto nag-aagi nin makuring sakit, odok sindang namibi sa Dios para sa paggiya. Pero, naggibo man sinda nin inisyatiba na pagianon an makuring sakit, siring baga kan pagigin mapamaagi tanganing dulagan an mga nan-aapi. Halimbawa, an pagsarig ki Jehova na inibanan nin personal na paghihingoa nagpangyaring matagalan ni David an saiyang kasakitan. Kumusta man kita ngonyan?

Kun nakaeeksperyensia nin makuring sakit, posibleng marhay na naggigibo kamo nin inisyatiba na resolberan an saindong problema. Halimbawa, kun kamo mawaran nin trabaho, bako daw na naghihingoa kamo na makakua nin sarong angay na trabaho na makasusuportar sa saindo asin sa saindong pamilya? (1 Timoteo 5:8) O kun kamo may kamatean sa pisikal, bako daw na naghahanap kamo nin igong medikal na tabang? Interesante nanggad na rinekonoser ni Jesus, na may gikan sa Dios na kapangyarihan na paomayan an gabos na klase nin helang, na ‘an naghehelang nangangaipo nin parabolong.’ (Mateo 9:12) Pero, tibaad dai pirmeng mahahale an saindong kasakitan; tibaad minsan paano kaipuhan nindong padagos na tagalan iyan.

Taano ta dai iyan ipakipag-olay ki Jehova Dios sa pamibi? Halimbawa, kun naghahanap nin trabaho, an mapagngayongayong pagsarig sa Dios makatatabang sa sato na labanan an ano man na sugot na akoon an trabaho na kontra sa mga prinsipyo sa Biblia. Lilikayan ta man na ‘malagalag parayo sa pagtubod’ huli sa kahanaban o pagkamoot sa kuarta. (1 Timoteo 6:10) Tunay nanggad, kun naggigibo nin importanteng mga desisyon mapadapit sa trabaho o pamilya o problema sa salud, puede niatong sunodon an sadol ni David: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.”​—Salmo 55:22.

An odok sa pusong pamibi makatatabang man sa sato na mapagdanay na timbang an satong kaisipan tangani na dai kita madaog kan satong makuring sakit. Bilang sarong tunay na Kristiano, si apostol Pablo nagsurat: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” Sa anong paagi kita mararanga nin sinserong pamibi? “An katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”  (Filipos 4:​6, 7) An katoninongan nin Dios “minalampas sa gabos na kaisipan.” Kun siring, puede kitang parigonon kaiyan kun kita nagagabatan sa nakapupurisaw na mga emosyon. Iyan an ‘mag-iingat kan satong puso asin kan satong mga pag-isip,’ sa siring tinatabangan kitang likayan an pabiglabigla asin bakong madonong na reaksion, na puedeng makadagdag sa satong makuring sakit.

An pamibi puede nganing magkaigwa nin dakulang epekto sa kaluluwasan nin sarong situwasyon. Kan si apostol Pablo napreso sa Roma, mapakumbaba niang hinagad sa mga kapwa Kristiano na ipamibi sia. Taano ta hinagad ini ni Pablo? “Pinakasasadol ko kamo na mas nangorognang gibohon ini,” an isinurat nia sainda, “tanganing ako ikabalik sa saindo sa mas madaling panahon.” (Hebreo 13:19) Sa ibang pagtaram, aram ni Pablo na an pagkadangog ni Jehova sa daing ontok na mga pamibi kan saiyang mga kapagtubod an tibaad magdeterminar sa kun noarin sia bubutasan.​—Filemon 22.

Mababago daw nin pamibi an resulta kan satong makuring sakit? Puede. Pero, maninigong marealisar niato na tibaad dai simbagon ni Jehova Dios an satong mga pamibi sa paagi na gusto niato. Si Pablo namibi nin nagkapirang beses manongod sa saiyang “tonok sa laman,” na tibaad sarong pisikal na problema. Minsan siring, imbes na haleon an makuring sakit, sinabi nin Dios ki Pablo: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.”​—2 Corinto 12:7-9.

Kaya, kun siring, tibaad dai tolos-tolos mawara an satong makuring sakit. Minsan siring, magkakaoportunidad kita na patunayan an satong pagsarig sa satong langitnon na Ama. (Santiago 1:2-4) Makasesegurado kamo na dawa pa dai haleon ni Jehova Dios an makuring sakit, puede siang “[gumibo] nin luluwasan tanganing iyan matagalan [niato].” (1 Corinto 10:13) Mahalagang mangnohon na si Jehova inaapod na “an Dios nin gabos na karangahan, na minaranga sa sato sa gabos niatong kahorasaan.” (2 Corinto 1:​3, 4) Puedeng itao sa sato nin Dios an kaipuhan niato tanganing makatagal, asin igwa kita nin paglaom na buhay na daing katapusan.

An Tataramon nin Dios, an Biblia, nanunuga na “papahidon [ni Jehova] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:​3, 4) An sarong kinaban daw na mayo nin makuring sakit haros masakit paniwalaan? Tibaad iyo kun kamo natuod nang mabuhay na may kasakitan. Minsan siring, an katalingkasan sa pagkatakot asin kalamidad iyo an ipinanuga nin Dios, asin an saiyang katuyohan mangyayari nanggad.​—Isaias 55:​10, 11.

[Mga Ritrato sa pahina 9]

Hale sa pagkadesesperar pasiring sa pakaginhawa