“An Saindang Tingog Nakalakop sa Bilog na Daga”

“Gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.”​—MATEO 28:19.

1, 2. (a) Ano an isinugo ni Jesus sa mga disipulo nia? (b) Taano ta kadakol an nahaman kan mga Kristiano kan enot na siglo?

KAN madali na siang sumakat sa langit, may isinugo si Jesus sa saiyang mga disipulo. Sinabi nia sa sainda: “Gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.” (Mateo 28:19) Abaa kadakulang trabaho idto!

² Isip-isipa nanggad! Kan Pentecostes 33 C.E., mga 120 disipulo an binoboan nin banal na espiritu asin nagpoon na otobon an sugo na iyan paagi sa pagsabi sa iba na si Jesus an haloy nang linalaoman na Mesiyas, na paagi sa saiya makakamtan an kaligtasan. (Gibo 2:1-36) Paano maaabot kan sadit na grupong iyan an “mga tawo kan gabos na nasyon”? Kun sa tawo imposible iyan, alagad “sa Dios an gabos na bagay posible.” (Mateo 19:26) Nasa enot na mga Kristiano an pagsuportar kan banal na espiritu ni Jehova, asin may pakamate sinda nin pag-apura. (Zacarias 4:6; 2 Timoteo 4:2) Huli kaini, sa laog nin pira sanang dekada, nasabi ni apostol Pablo na an maogmang bareta ipinahahayag na “sa gabos na linalang sa sirong nin langit.”​—Colosas 1:23.

3. Ano an nakatahob sa dalisay na Kristianong “trigo”?

³ Sa kadaklan na kabtang kan enot na siglo, an tunay na pagsamba padagos na naglakop. Minsan siring, ihinula ni Jesus na madatong an panahon na si Satanas masabwag nin “mga doot” asin an tunay na Kristianong “trigo” matatahoban sa laog nin dakol na siglo sagkod sa panahon nin pag-ani. Pagkagadan kan mga apostol, nagkatotoo iyan.​—Mateo 13:24-39.

Marikas na Pag-oswag Ngonyan

4, 5. Magpoon kan 1919, anong gibohon an pinonan kan linahidan na mga Kristiano, asin taano ta sarong dakulang angat idto?

⁴ Kan 1919, panahon na tanganing an dalisay na Kristianong trigo isuway sa mga doot. Aram kaidto kan linahidan na mga Kristiano na aplikado pa man giraray an dakulang sugo ni Jesus. Marigon an pagtubod ninda na sinda nabubuhay sa “huring mga aldaw” asin aram ninda an hula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (2 Timoteo 3:1; Mateo 24:14) Iyo, aram ninda na dakol an gigibohon.

⁵ Pero, arog kan mga disipulo kan 33 C.E., an linahidan na mga Kristianong idto napaatubang sa dakulaon na angat. Pipirang ribo sana sinda na yaon sa pipira sanang nasyon. Paano daw ninda ikahuhulit kaidto an maogmang bareta “sa bilog na ineerokan na daga”? Girumdomon, an populasyon kan daga na tibaad 300 milyones kan panahon kan mga Cesar duminakol sagkod na magin haros 2 bilyones pakatapos kan enot na guerra mundial. Asin durante kan ika-20 siglo, iyan padagos na madakol nin marikas.

6. Sagkod saen na ikinapalakop an maogmang bareta kan mga taon nin 1930?

⁶ Minsan siring, pinonan kan linahidan na mga lingkod ni Jehova, arog kan mga tugang ninda kan enot na siglo, an ipinagigibo sa sainda na may  bilog na pagtubod ki Jehova, asin nasa sainda an saiyang espiritu. Kaidtong kabangaan kan mga taon nin 1930, mga 56,000 na paraebanghelyo an nagpahayag kan katotoohan sa Biblia sa 115 kadagaan. Dakol na an nahaman kaidto, alagad dakolon pa an natatada.

7. (a) Anong bagong angat an inatubang kan linahidan na mga Kristiano? (b) Sa suporta kan “ibang karnero,” sagkod saen na nakaabot an pagtipon sagkod sa presente?

⁷ Dangan, an mas hararom na pakasabot sa kun siisay an “dakulang kadaklan” na nasambitan sa Kapahayagan 7:9 nag-atubang nin sarong bagong angat asin nanuga man nin tabang sa mahihigos na Kristianong idto. Sarong daing kabilangan na kadaklan nin “ibang karnero,” mga may pagtubod na igwang daganon na paglaom, an kinaipuhan na tiponon “hale sa gabos na nasyon asin tribo asin banwaan patin tataramon.” (Juan 10:16) An mga ini ‘matao ki Jehova nin sagradong paglilingkod aldaw asin banggi.’ (Kapahayagan 7:15) Nangangahulogan iyan na matabang sinda sa paghuhulit asin pagtotokdo. (Isaias 61:5) Bilang resulta, an linahidan na mga Kristiano naogmang marhay kaidto na maheling na an kabilang sa mga paraebanghelyo duminakol nin manampulong ribo dangan nin minilyon. Kan taon 2003, sarong bagong pinakahalangkaw na kabilangan na 6,429,351 an nakikabtang sa paghuhulit​—na an dakulang mayoriya sa sainda kabilang sa dakulang kadaklan. * An linahidan na mga Kristiano nagpapasalamat sa tabang na ini, asin an ibang karnero nagpapasalamat sa pribilehio na suportaran an linahidan na mga tugang ninda.​—Mateo 25:34-40.

8. Ano an reaksion kan Mga Saksi ni Jehova sa grabeng pangigipit na nangyari durante kan ikaduwang guerra mundial?

⁸ Kan lumataw giraray an grupong trigo, si Satanas naggibo nin makuring pakikilaban tumang dian. (Kapahayagan 12:17) Ano an reaksion nia kan an dakulang kadaklan magpoon na lumataw? May grabeng kadahasan! Puede daw niatong pagdudahan na sia an nasa likod kan lakop sa kinaban na pag-atake sa tunay na pagsamba na nangyari durante kan ikaduwang guerra mundial? Sa man-ibong-ibong na lado kan ralaban, an mga Kristiano napasa irarom nin grabeng pangigipit. Dakol na mahal na tugang na lalaki asin babae an nag-agi nin grabeng mga pagbalo, na an nagkapira nagadan dahel sa saindang pagtubod. Pero, inarog ninda an mga tataramon kan salmista: “Kasaro nin Dios ako mag-oomaw sa saiyang tataramon. Sa Dios ako nanarig; dai ako matatakot. Ano an magigibo nin laman sa sako?” (Salmo 56:4; Mateo 10:28) An linahidan na mga Kristiano asin an ibang karnero, na pinakosog kan espiritu ni Jehova, iribang nanindogan nin marigon. (2 Corinto 4:7) Bilang resulta, “an tataramon nin Dios padagos na nagtalubo.” (Gibo 6:7) Kan 1939, kan pumutok an guerra, 72,475 fiel na Kristiano an nagreport na nakikikabtang sa paghuhulit. Minsan siring, ihinayag kan bakong kompletong report para sa 1945, an taon na natapos an guerra, na 156,299 aktibong Saksi an nagpapalakop kaidto kan maogmang bareta. Kadaogan nanggad para ki Satanas!

9. Anong bagong mga paadalan an iinanunsiar durante kan Guerra Mundial II?

⁹ Malinaw nanggad, an karibarawan kan ikaduwang guerra mundial dai nagin dahelan na magduda an mga lingkod ni Jehova na mahahaman an paghuhulit. Sa katunayan, kan 1943, kan nasa kasagsagan an guerra, duwang bagong paadalan an iinanunsiar. An saro, na inaapod ngonyan na Teokratikong Paadalan sa Pagmiministro, gigibohon sa gabos na kongregasyon tanganing sanayon an indibiduwal na mga Saksi na maghulit asin gumibo nin mga disipulo. An saro pa, an Paadalan sa Biblia kan Watchtower sa Gilead, para sa pagsasanay nin mga misyonero na iyong mapaoswag kan paghuhulit sa ibang nasyon. Iyo, kan matapos sa  katapustapusi an guerra, an tunay na mga Kristiano andam na para sa orog pang aktibidad.

10. Paano naheling an kaigotan kan banwaan ni Jehova durante kan 2003?

¹⁰ Asin abaa kamakangangalas na trabaho an nahaman ninda! Huling sinanay sa Teokratikong Paadalan sa Pagmiministro, an gabos​—hoben asin gurang, mga magurang asin aki, pati an mga maluya an hawak​—nakikabtang asin padagos na nakikikabtang sa pag-otob kan dakulang sugo ni Jesus. (Salmo 148:​12, 13; Joel 2:​28, 29) Kan taon 2003, sa promedyo kada bulan, 825,185 an nagpaheling kan saindang pakamate nin pag-apura paagi sa pakikikabtang, nin temporaryo o dagos-dagos, sa paglilingkod bilang payunir. Kan taon man na iyan, an Mga Saksi ni Jehova naggamit nin 1,234,796,477 oras sa pagsabi sa iba kan maogmang bareta kan Kahadean. Sierto nanggad na si Jehova naoogma sa kaigotan kan saiyang banwaan!

Sa mga Langtad sa Ibang Nasyon

11, 12. Anong mga halimbawa an nagpapaheling kan marahayon na rekord kan mga misyonero?

¹¹ Sa nag-aging mga taon, an mga naggradwar sa Gilead asin, mas bago pa sana, an mga naggradwar sa Paadalan sa Ministeryal na Pagsasanay, nakagibo nin sarong kahangahangang rekord. Halimbawa, sa Brazil mayo pang 400 an parahayag kan umabot an enot na mga misyonero kan 1945. An mga ini asin an mga misyonerong nagsurunod sa sainda mahigos na naghulit kaiba kan saindang maigot na mga tugang na Braziliano, asin abundang binendisyonan ni Jehova an saindang mga paghihingoa. Nakapupukaw nanggad sa boot para sa siisay man na nakakagirumdom sa enot na mga panahon na idto na maheling na an Brazil nagreport nin bagong pinakahalangkaw na kabilangan na 607,362 kan 2003!

¹² Isipon nindo an Hapon. Bago kan ikaduwang guerra mundial, igwa nin mga sanggatos na parahulit kan Kahadean sa nasyon na iyan. Durante kan guerra, nagdikit an kabilangan ninda huli sa maringis na paglamag, asin kan matapos an guerra, pipira sanang Saksi an buhay pa kaidto sa espirituwal asin pisikal. (Talinhaga 14:32) An nagkapirang idto na pambihirang nagdanay na may integridad siertong naogmang marhay kan 1949 na akoon an enot na 13 misyonero na sinanay sa Gilead, asin an mga misyonero madaling napamahal sa saindang entusiastiko asin mapag-istimar na mga tugang na Hapon. Pakalihis nin labing 50 taon, kan taon 2003, an Hapon nagreport nin pinakahalangkaw na kabilangan na 217,508 parahayag! Tunay nanggad na mayaman na binendisyonan ni Jehova an saiyang banwaan sa nasyon na iyan. Igwa nin kaparehong mga report hale sa dakol na iba pang nasyon. An mga nasa kamugtakan na maghulit sa mga teritoryo sa ibang nasyon talagang nakakontribwir sa paglakop kan maogmang bareta, kaya kan 2003 iyan nadangog sa 235 nasyon, isla, asin teritoryo sa bilog na kinaban. Iyo, an dakulang kadaklan nagruruluwas hale sa “gabos na nasyon.”

“Hale sa Gabos na . . . Tribo Asin Banwaan Patin Tataramon”

13, 14. Sa anong paagi ipinaheling ni Jehova an kahalagahan nin paghuhulit kan maogmang bareta sa “gabos na . . . tataramon”?

¹³ An enot na ibinaretang milagro pakatapos na lahidan nin banal na espiritu an mga disipulo kan Pentecostes 33 C.E. iyo an pagtaram ninda nin ibang tataramon sa nagkatiripon na mga kadaklan. An gabos na nakadangog sa sainda puedeng internasyonal na tataramon an ginagamit, tibaad Griego. Huling “reberenteng mga lalaki,” posibleng marhay na nasabotan man ninda an Hebreong mga seremonya sa templo. Alagad talagang nakua an saindang atension kan madangog ninda an maogmang bareta sa lenguahe na nanodan ninda sa pagkaniaki.​—Gibo 2:​5, 7-12.

¹⁴ Ngonyan man, dakol na lenguahe an ginagamit sa paghuhulit. An dakulang kadaklan ihinula  na maluwas bako sanang hale sa mga nasyon kundi patin sa mga “tribo asin banwaan patin tataramon.” Kaoyon kaini, si Jehova naghula paagi ki Zacarias: “An sampulong tawo hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: ‘Maiba kami sa saindo, huli ta nabaretaan niamo na an Dios yaon dian sa saindo.’” (Zacarias 8:23) Minsan ngani an Mga Saksi ni Jehova mayo na kan balaog na pagtaram nin ibang tataramon, aram ninda an kahalagahan nin pagtotokdo sa mga lenguahe kan mga tawo.

15, 16. Paano inako kan mga misyonero asin kan iba pa an angat nin paghuhulit sa lokal na mga lenguahe?

¹⁵ Totoo, igwa ngonyan nin pira sanang lenguahe na kadakol an naggagamit, arog kan Ingles, Pranses, asin Kastila. Minsan siring, an mga naghale sa saindang dagang tinuboan tanganing maglingkod sa ibang nasyon naghihingoang manodan an lokal na mga lenguahe tangani na magin mas pasil na ikapaabot an maogmang bareta sa mga “may tamang tendensia sa buhay na daing katapusan.” (Gibo 13:48) Puedeng depisil iyan. Kan an mga tugang sa nasyon nin Tuvalu sa Timog Pasipiko mangaipo nin mga publikasyon sa sadiri nindang tataramon, inako kan saro sa mga misyonero an angat. Huling mayo nin magagamit na diksionaryo, pinonan niang gumibo nin glosaryo nin mga terminong Tuvaluano. Pag-abot nin panahon, an librong Puwede Kamong Mabuhay Sagkod Lamang sa Paraiso Digdi sa Daga * ipinublikar sa lenguaheng Tuvaluano. Kan mag-abot sa Curaçao an mga misyonero, mayo nin babasahon sa Biblia asin mayo nin diksionaryo sa lokal na lenguahe, an Papiamento. Dakol man an dai pagkaoroyon sa kun paano maninigong isurat an lenguahe. Pero, mayo pang duwang taon pagkaabot kan enot na mga misyonero, an enot na Kristianong pulyeto sa Biblia ipinublikar sa tataramon na iyan. Ngonyan, an Papiamento saro sa 133 na lenguahe na An Torrengbantayan ipinupublikar kasabay kan Ingles.

¹⁶ Sa Namibia an enot na mga misyonero mayo nin nakukuang lokal na Saksi tanganing tumabang sa sainda sa pagtradusir. Dugang pa, an sarong lokal na lenguahe, an Nama, mayo nin mga termino para sa mga ideya na komun na ginagamit niato, arog kan “sangkap.” An sarong misyonero nagbareta: “Sa pagtradusir ginamit ko sa pangenot an mga maestra na nag-aadal sa Biblia. Huling dikit an aram ninda sa katotoohan, kinaipuhan kong ibanan sinda sa pagtradusir tanganing seguradohon na tama an lambang sentence.” Minsan siring, an pulyetong Life in a New World sa kahurihurihi itrinadusir sa apat na lenguahe sa Namibia. Ngonyan, An Torrengbantayan ipinupublikar nin regular sa Kwanyama asin Ndonga.

17, 18. Anong mga angat an inaasikaso sa Mejico asin iba pang nasyon?

¹⁷ Sa Mejico, Kastila an pangenot na lenguahe. Minsan siring, bago nag-abot an mga Kastila, dakol  na lenguahe an ginagamit duman, asin dakol an ginagamit pa sagkod ngonyan. Huli kaini, an mga babasahon kan Mga Saksi ni Jehova pinoprodusir ngonyan sa pitong lenguaheng Mejicano asin siring man sa Mejicanong Pagtaram sa Senyas. An Satong Ministeryo sa Kahadean sa lenguaheng Maya iyo an enot na petsadong publikasyon sa sarong lenguahe na Amerikanong Indian. Sa katunayan, may nagkapirang ribong Maya, Aztec, asin iba pa na kabilang sa 572,530 parahayag kan Kahadean sa Mejico.

¹⁸ Sa nakaagi pa sanang mga panahon, minilyon an nagdurulag pasiring sa ibang nasyon, o nag-imigrar sinda huli sa pinansial na dahelan. Bilang resulta, dakol na nasyon ngonyan an sa kaenot-enote nagkaigwa nin darudakulang mga langtad na iba an lenguahe. Inako kan Mga Saksi ni Jehova an angat. Halimbawa, sa Italia igwa nin mga kongregasyon asin grupo sa 22 na lenguahe apuera sa Italiano. Tanganing tabangan an mga tugang na makapaghulit sa mga tawo na iba an lenguahe, may mga klase na inorganisar kasuarin pa sana tanganing magtokdo nin 16 na lenguahe, kabale an Italianong Pagtaram sa Senyas. Sa dakol na iba pang nasyon, an Mga Saksi ni Jehova naghihingoa man na maabot an dakulang populasyon nin mga nag-imigrar. Iyo, sa tabang ni Jehova, an dakulang kadaklan tunay nanggad na nagruruluwas hale sa kadakol na lenguahe.

“Sa Bilog na Daga”

19, 20. Anong mga tataramon ni Pablo an naootob sa pambihirang paagi ngonyan? Ipaliwanag.

¹⁹ Kan enot na siglo, si apostol Pablo nagsurat: “Nagpakadangog sinda, bako daw? Tara, sa katotoohan, ‘an saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.’” (Roma 10:18) Kun totoo iyan kan enot na siglo, lalo nang totoo iyan sa satong kaaldawan! Minilyon​—na tibaad mas dakol kisa arin man na nakaaging panahon sa kasaysayan​—an nagsasarabi: “Oomawon ko si Jehova sa gabos na panahon; an pag-omaw sa saiya pirmeng yaon sa sakong ngoso.”​—Salmo 34:1.

²⁰ Dugang pa, an gibohon dai nagluluway. An mga parahayag kan Kahadean padagos na nagdadakol. Padakol nang padakol na oras an ginagamit sa paghuhulit. Minilyon na pagdalaw liwat asin ginatos na ribong pag-adal sa Biblia an pinamamayohan. Asin dakol an padagos na nagpapaheling nin interes. Kan nakaaging taon, sarong bagong pinakahalangkaw na kabilangan na 16,097,622 an nag-atender sa selebrasyon kan Memorial kan kagadanan ni Jesus. Malinaw nanggad, dakol pa an gigibohon. Logod na padagos niatong arogon an marigon na integridad kan mga tugang niato na nagtagal nin grabeng paglamag. Asin logod na ipaheling niato an kaigotan kan gabos niatong tugang na ginamit an saindang sadiri sa paglilingkod ki Jehova poon kan 1919. Logod na padagos na arogon kan gabos an koro kan salmista: “An lambang bagay na naghahangos​—mag-omaw iyan ki Jah. Omawa nindo si Jah!”​—Salmo 150:6.

[Mga Nota sa Ibaba]

Ikapaliliwanag daw Nindo?

• Anong gibohon an pinonan kan mga tugang kan 1919, asin taano idto ta sarong angat?

• Sairisay an tiniripon tanganing sumuportar sa paghuhulit?

• Anong rekord an nagibo kan mga misyonero asin kan iba pang naglilingkod sa ibang nasyon?

• Anong ebidensia an puede nindong sambiton tanganing ipaheling na binebendisyonan ni Jehova an gibohon kan saiyang banwaan ngonyan?

[Mga Hapot Para sa Pag-adal]

 [Tsart sa pahina 18-21]

REPORT KAN 2003 NA TAON NIN PAGLILINGKOD KAN MGA SAKSI NI JEHOVA SA BILOG NA KINABAN

 (Hilingon an publikasyon)

[Mga Ritrato sa pahina 14, 15]

An karibarawan kan ikaduwang guerra mundial dai nagin dahelan na magduda an mga Kristiano na ikahuhulit an maogmang bareta

[Credit Line]

Pagputok: Retrato kan U.S. Navy; an iba: Retrato kan U.S. Coast Guard

[Mga Ritrato sa pahina 16, 17]

An dakulang kadaklan maluwas hale sa gabos na tribo asin tataramon