“Pinanigoan Kaiyan an Pangangaipo kan Sakong Puso”

“NAGPAPASALAMAT ako sa saindo gikan sa kairairaromi kan sakong puso huli sa magayon na regalong Rumani ki Jehova. Pinanigoan kaiyan an pangangaipo kan sakong puso​—an pangangaipong makamate na ako namomotan asin minamahal ni Jehova. Mas harani na akong marhay ki Jehova asin sa saiyang mahal na Aki ngonyan. Gusto kong iestorya sa gabos an manongod sa librong ini asin tawan nin kopya an gabos kong namomotan.” Iyan an nagin saboot nin saro sa Mga Saksi ni Jehova manongod sa bagong 320-pahinas na librong ilinuwas sa “Maigot na mga Parabalangibog kan Kahadean” na Pandistritong mga Kombension na ginibo durante kan 2002/03. Siyasaton niato an nagkapirang kabtang kan bagong librong ini asin kun taano ta ipinublikar iyan.

Nagkapirang Kabtang kan Bagong Libro

Ano an laog kan bagong librong ini? An gabos na impormasyon na iinatubang sa duwang artikulong pag-aadalan sa luwas na ini​—asin dakol pa! An libro igwa nin 31 kapitulo, na an kada saro mga kapareho kalaba nin sarong artikulong pag-aadalan sa Torrengbantayan. Pakatapos kan introduksion asin kan enot na tolong kapitulo, an libro binarangabanga sa apat na kabtang, saro para sa lambang saro kan pangenot na mga kualidad ni Jehova. An kada kabtang minapoon paagi sa sarong sumaryo kan kualidad na iyan. An minasunod na pirang kapitulo nagpapaliwanag kun paano ipinapahayag ni Jehova an kualidad na iyan. An kada kabtang igwa nin sarong kapitulo manongod ki Jesus. Taano? Bueno, si Jesus nagsabi: “Sia na nakaheling sa sako nakaheling man sa Ama.” (Juan 14:9) Sarong sangkap na ladawan ni Jehova, si Jesus nagtatao sa sato nin buhay na marhay na mga halimbawa kan mga kualidad nin Dios na ginigibo. An kada kabtang nagtatapos paagi sa sarong kapitulo na nagtotokdo sa sato kun paano aarogon si Jehova sa pagpaheling kan kualidad na pinag-oolayan. Sa pagtokar kan mga kualidad ni Jehova, an bagong librong ini nagkokotar sa lambang libro sa Biblia.

An librong Rumani ki Jehova igwa man nin nagkapirang espesyal na kabtang. Poon sa kapitulo 2, an kada kapitulo igwa nin kahon na may titulong “Mga Hapot Para sa Paghorophorop.” An mga teksto asin hapot dai plinano bilang repaso kan kapitulo. Imbes, intension kaiyan na tabangan kamong gamiton an Biblia sa hararom na paghorophorop kan tema. Irinerekomendar na basahon nindo nin maingat an lambang teksto sa Kasuratan. Dangan pensaron an hapot asin pagmaigotan na personal na iaplikar. An siring na paghorophorop puedeng magpahiro sa saindong puso, na tinatabangan kamo na orog pang rumani ki Jehova.​—Salmo 19:14.

An mga drowing sa librong Rumani ki Jehova maingat na siniyasat asin inandam tanganing makapagtokdo asin makamotibar. Desisieteng kapitulo an igwa nin magagayon, bilog na pahinang retrato nin mga tanawon sa Biblia.

Taano ta Ipinublikar?

Taano ta ipinublikar an librong Rumani ki Jehova? An pangenot na katuyohan kan bagong publikasyon na ini tabangan kita na orog na mamidbid si Jehova tanganing mapatalubo niato an mas makosog na personal na relasyon sa satong Dios.

May naiisip daw kamo na puedeng makinabang sa librong Rumani ki Jehova, tibaad sarong inaadalan sa Biblia o inaktibo pa nganing Kristianong tugang na lalaki o babae? Kumusta man kamo​—pinonan na daw nindong basahon an bagong libro na ini? Kun dai pa, taano ta dai mag-iskedyul nin panahon na pumoon sa pinakamadaling panahon na mapupuede? Tawan nin panahon na pensaron an binabasa nindo. Logod na an bagong publikasyon na ini makatabang sa saindo na orog pang rumani ki Jehova Dios, tanganing ibalangibog nindo an maogmang bareta kan saiyang Kahadean na may orog na kagayagayahan asin kaigotan!