Ano an Gusto Nindong Ihapot sa Dios?

AN MGA tawo sa bilog na daga may seryosong mga hapot manongod sa buhay. Iyo man daw kamo? Dakol an naghapot sa mga paratokdo nin relihion alagad dai nakakua nin nakakokontentong simbag. An iba pribadong pinensar an mga hapot na ini. An nagkapira namibi para sa paggiya. Posible daw talagang makakua nin simbag hale sa Dios manongod sa mga bagay na nakapupurisaw sa saindo? Kabilang sa mga sinabi nin dakol na gusto nindang ihapot sa Dios an mga minasunod.

Siisay ka talaga, O Dios?

An pagmansay nin tawo sa Dios naiimpluwensiahan kan saindang kultura, kan relihion kan saindang mga magurang, asin posibleng kan sainda mismong kagustohan. An nagkapira minagamit nin ngaran para sa Dios; an iba inaapod sana siang Dios. Talaga daw na importante iyan? Saro sana daw an tunay na Dios na naghahayag kan saiyang sadiri asin kan saiyang ngaran sa sato?

Taano ta grabe an pagdusa?

Kun huli sa ragap o inmoral na pamumuhay nin saro naraot an saiyang salud o sia nagin dukha, sia tibaad magreklamo. Alagad tibaad aram man niang marhay kun taano ta nagdudusa sia.

Minsan siring, dakol na iba pa an nagdudusa nin grabe na bako man nindang sala. An nagkapira may pabalikbalik na mga helang. An iba naglalapigot sa ibong nin garo baga dai mapanggaganahan na mga disbentaha tanganing magkaigwa nin istaran asin igong pagkakan para sa saindang pamilya. Minilyon an biktima nin krimen, guerra, daing pinipiling kadahasan, natural na mga kalamidad, o inhustisya sa kamot kan mga nasa autoridad.

Natural sanang maghapot an dakol: ‘Taano ta naglakop na marhay an siring na mga kamugtakan? Taano ta itinotogot nin Dios an gabos na pagdusang ini?’

 Taano ta yaon ako digdi? Ano an katuyohan nin buhay?

An mga hapot na ini parateng minalataw huli sa pagkadesganar nin sarong tawo na an pan-aroaldaw na aktibidad dai nakatatao nin tunay na pagkakontento—asin totoo iyan sa dakol na tawo. Minilyon na iba pa an naniniwala na an buhay nin balang tawo maski paano itinalaga nin Dios. Totoo daw iyan? Kun tunay nanggad na an Dios may espesyal na katuyohan para sa saindo, daing duda na gusto nindong maaraman kun ano iyan.

Sa gabos na libro sa kinaban, igwa nin saro na malinaw na nagsasabi na iyan ipinasabong nin Dios. Siring sa lalaoman nindo sa sarong mensahe na totoong hale sa Dios para sa bilog na katawohan, an librong ini makukua sa mas dakol na marhay na lenguahe kisa arin man na iba pang libro na isinurat kasuarin man. Iyan an Banal na Biblia. Dian ihinahayag kan Kaglalang kan langit asin daga, an Dios mismo, kun siisay sia asin kun ano an ngaran nia. Aram daw nindo an ngaran na iyan? Aram daw nindo kun ano an sinasabi kan Biblia manongod sa kun anong klaseng Persona an Dios? Aram daw nindo an sinasabi kaiyan manongod sa kun ano an hinahagad nin Dios sa saindo?

 [Picture Credit Line sa pahina 2]

COVER: Chad Ehlers/Index Stock Photography

[Picture Credit Line sa pahina 3]

Bukid: Chad Ehlers/Index Stock Photography