Si Jehova May Pagmakolog sa Ordinaryong mga Tawo

KAIPUHAN daw na kita magin ekstraordinaryo o marahayon sa sarong bagay tangani na mariparo nin Dios? Si Abraham Lincoln, an ika-16 na presidente kan Estados Unidos, kinotar na nagsabi: “Mas gusto nin Kagurangnan an komun na mga tawo. Iyan an dahelan na kadakol kan ginibo nia na siring.” Dakol an nagsasaboot na sinda ordinaryong tawo na mayo nin ano man na espesyal na kualidad. An pagigin ordinaryo puedeng magtao nin ideya na pagigin “dukha, mas hababa.” Kaagid kaiyan, an terminong “komun” puedeng mag-indikar nin “kadaihan nin pribilehio o espesyal na posisyon,” “dai pakaabot sa ordinaryong mga pamantayan,” o pagigin “segunda klase” pa ngani. Anong klaseng mga tawo an mas gusto nindong makaibaiba? Mga tawong arogante, asertado, mapalangkaw? Bako daw na mas gugustohon nindong makaibaiba an mga tawong makikatood, mapakumbaba, daing pagsaginsagin na nagpapaheling nin sinsero, mamomoton na interes sa iba?

Huling komun sa kinaban ngonyan an pagdaogdaog asin an pag-olog-olog, nasasakitan an nagkapira na maniwala na may personal na interes sa sainda an Dios. “Naggikan ako sa sarong pamilya na haros daing pagkamoot na ipinaheheling. Ako minemenos, inoolog-olog, asin ginigibong ngingisihan. Kaya, hoben pa nagkaigwa na ako nin saboot na ako daing halaga,” an isinurat nin sarong parabasa kan magasin na ini. “Dara-dara ko pa an masakit bagohon na mga saboot sa sakong nakaagi na nagpapadesganar sa sako kun ako nakaeeksperyensia nin kalamidad.” Pero, may mga dahelan na maniwala na an Dios may personal na interes sa ordinaryong mga tawo.

An Interes nin Dios sa Komun na mga Tawo

“Si Jehova dakula asin maninigo nanggad na omawon, asin an saiyang kadakulaan dai sukat nanggayod marorop,” an isinurat ni Hadeng David. (Salmo 145:3) Minsan siring, dai kaini napopogolan si Jehova na pagmakolgan kita sa mamomoton asin may pagkaludok na paagi. (1 Pedro 5:7) Halimbawa, an salmista nagsabi: “Si Jehova harani sa mga laglag an puso; asin an mga nasasakitan an espiritu saiyang iliniligtas.”—Salmo 34:18.

An mga bagay na nakakakua nin atension sa kinaban, siring baga kan pisikal na kagayonan, prestihio, o kayamanan, bakong iyo an ibinibilang nin Dios na mahalaga. Ipinaheling kan Ley nin Dios sa Israel an saiyang may pagkaludok na interes sa mga tawong dukha, ilo, balo, asin taga ibang daga. Sinabihan nin Dios an mga Israelita, na pinagringisan mismo kaidto sa Egipto: “Dai mo pagmaltratohon an nakikihimanwa o apihon sia . . . Dai nindo pagpasakitan nin makuri an siisay man na babaeng balo o aking lalaki na ilo sa ama. Kun sia pasasakitan nindo nin makuri, dangan kun mag-agrangay sia sa sako, totoong dadangogon ko an saiyang kinurahaw.” (Exodo 22:21-24) Dugang pa, ipinahayag ni propeta Isaias an saiyang kompiansa sa pagmakolog nin Dios sa mga hamak: “Ika nagin kuta para sa hamak, kuta para sa dukha sa saiyang kasakitan, pailihan sa bagyong maoranon, limpoy sa init, kun an ratsada kan mga maringis siring sa bagyong maoranon na minatama sa lanob.”​—Isaias 25:4.

Sa bilog niang ministeryo, si Jesu-Cristo, na iyo “an eksaktong representasyon” nin Dios, nagin halimbawa sa saiyang mga disipulo sa pagpaheling nin tunay na interes sa komun na mga tawo. (Hebreo 1:3) Kan maheling an mga kadaklan na “naanitan asin nagkakaralagalag siring sa mga karnero na mayong pastor,” si Jesus “naherak . . . sa sainda.”—Mateo 9:36.

Mangnohon man kun anong klaseng mga tawo an pinili ni Jesus bilang mga apostol nia​—mga tawong sinasabi na “daing inadalan asin ordinaryo.” (Gibo 4:13) Pagkagadan ni Jesus, pinonan na agdahon  kan mga parasunod nia an gabos na klase nin mga tawo na maghinanyog sa Tataramon nin Dios. Nagsurat si apostol Pablo na an siisay man na “dai nin pagtubod o tawong ordinaryo” puedeng lumaog sa Kristianong kongregasyon asin magin saro na may pagtubod. (1 Corinto 14:24, 25) Imbes na pilion idto sanang mga hinahangaan segun sa kinabanon na mga pamantayan, pinili nin Dios an dakol na simple, ordinaryong mga tawo tanganing maglingkod sa saiya. “Naheling nindo an saiyang pagkaapod sa saindo, mga tugang,” an sabi ni apostol Pablo, “na bakong dakol na madonong sa laman an inapod, bakong dakol na makapangyarihan, bakong dakol na mahal na tawo; kundi pinili nin Dios an mga rungaw sa kinaban, tanganing supogon nia an mga madonong; asin pinili nin Dios an mga maluya sa kinaban, tanganing supogon nia an mga makosog; asin pinili nin Dios an hamak na mga bagay sa kinaban asin an mga bagay na minemenos, an mga bagay na dai pa, tanganing mapara nia an mga bagay na iyo na, tanganing dai nin laman na makapaghambog sa atubangan nin Dios.”—1 Corinto 1:26-29.

Ngonyan, an Dios talagang interesado man sa sato. Kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Kun an Dios namoot na gayo sa katawohan na isinugo nia an saiyang Aki sa daga tanganing magadan para sa sato, mayo kita nin dahelan na magsaboot na kita dai namomotan o daing halaga. (Juan 3:16) Ipinaheling ni Jesu-Cristo sa saiyang mga parasunod an halaga nin pagtratar dawa sa pinakasadit sa saiyang espirituwal na mga tugang na garo baga ginigibo ini ki Jesus personalmente. Sinabi nia: “Huli ta ginibo nindo iyan sa saro sa pinakasadangoton kaining sakong mga tugang, ginibo nindo iyan sa sako.” (Mateo 25:40) Ano man an pagheling sa sato kan kinaban, kun kita namomoot sa katotoohan, kita espesyal sa pagheling nin Dios.

Iyan an saboot ni Francisco, * sarong aking lalaki na taga Brazil na ilo sa ama, pakatapos na mapatalubo an personal na relasyon sa Dios. Nagpaliwanag sia: “An pakamidbid ki Jehova asin sa saiyang organisasyon nakatabang sa sako na pangganahan an sakong namamatean na takot sagkod kahaditan asin pagkamasusupgon. Nanodan ko na si Jehova may personal na interes sa balang saro sa sato.” Para ki Francisco, si Jehova nagin sarong tunay na Ama.

Pagmakolog sa mga Hoben

Si Jehova may tunay na interes sa mga hoben bako sanang bilang sarong grupo kundi bilang mga indibiduwal. Siempre, baga man kita hoben o gurang, dai niato noarin man gustong sumobra an pagheling niato sa satong sadiri. Pero, tibaad igwa kita nin mga talento asin kualidad na puedeng gamiton nin Dios sa ngapit. Aram ni Jehova kun anong pag-oswag asin pagsasanay an kaipuhan niato tanganing lubos niatong magamit an satong potensial. Halimbawa, mangnoha an pagkasaysay sa 1 Samuel kapitulo 16. Huling para ki propeta Samuel may ibang kandidato sa pagkahade kan Israel na garo baga mas kualipikado, ipinaliwanag ni Jehova an Saiyang mga dahelan sa pagpili ki David, an pinakanguhod na aki ni Jese, bilang an magigin hade sa Israel: “Dai ka magheling sa saiyang lalauogon asin sa langkaw kan tindog nia, huli ta hinaboan ko sia [an matuang tugang ni David]. Huli ta an pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod  ki Jehova, hineheling nia kun ano an puso.”—1 Samuel 16:7.

Makakapagkompiar daw an mga hoben ngonyan na si Jehova nagpapaheling nin tunay na interes sa sainda? Estudyare si Ana, sarong hoben na babae na taga Brazil. Siring kan dakol na ibang mga hoben, sia napupurisaw sa pakaheling nin karatan asin inhustisya. Dangan pinonan kan saiyang ama na iiba sia asin an saiyang mga tugang na babae sa Kristianong mga pagtiripon. Pag-abot nin panahon, nagugustohan na nia an saiyang nanonodan manongod sa Tataramon nin Dios. Pinonan ni Ana na basahon an Biblia saka an Kristianong mga publikasyon asin mamibi ki Jehova Dios. Luway-luway, nagkaigwa sia nin haraning marhay na relasyon sa Dios. Ipinaliliwanag nia: “Naoogma akong magbisikleta pasiring sa sarong bulod na harani sa sakong harong na dian napagmamasdan ko an magayon na mga pagsolnop nin saldang. Namimibi ako ki Jehova asin pinasasalamatan ko sia sa saiyang kabootan asin pagigin buka an palad, na naghihingoang ipahayag kun gurano ko sia kanamomotan. An pakamidbid ki Jehova Dios asin sa saiyang mga katuyohan nagtao sa sako nin katoninongan sa isip asin katiwasayan nin boot.” Hinihingoa man daw nindo na makakua nin panahon na pensaron an mamomoton na pagmakolog ni Jehova?

Totoo, tibaad huli sa pinaghalean niato magin depisil para sa sato na magkaigwa nin haraning marhay na relasyon ki Jehova. Helinga, halimbawa, si Lidia. Kan sia magtuga nin sekreto sa saiyang ama manongod sa sarong bagay na personal na nakakaribok na marhay sa saiya, dai lamang sia inintindi kan saiyang ama, na nagsasabi: “Kalokohan.” Minsan ngani nakasasabot na gusto kan saiyang ama na lingawan nia an problema, si Lidia nagsasabi: “An pag-adal kan Biblia nagtao sa sako kan gabos kong kamawotan asin orog pa nanggad dian. Huli sa nakaaatraer na personalidad ni Jehova sia nagin pinakadayupot kong katood. Igwa na ako ngonyan nin sarong mamomoton, mapagsabot na Ama na daing pag-alangan kong mapapahayagan kan sakong mga saboot asin kan sakong pinakapribadong mga pagkatakot. Puede akong makipag-olay nin dakol na oras sa pinakaimportanteng Persona sa uniberso, na nakasisierto na hihinanyogon nia ako.” An mga teksto sa Biblia siring baga kan Filipos 4:6, 7 nakatabang sa saiya na mamatean an mamomoton na pagmakolog ni Jehova. An tekstong iyan nagsasabi: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”

Tabang na Mapanigoan an Saindong mga Pangangaipo

Ipinaheheling ni Jehova an saiyang pagmalasakit sa saiyang mga lingkod bilang mga indibiduwal saka sa saiyang pambilog na kinaban na kongregasyon. Ikapaheheling niato an satong pagkamoot sa satong langitnon na Ama paagi sa pagkaigwa nin panahon na makipag-olay sa saiya. Maninigo na dai niato noarin man bali-walaon an satong relasyon sa saiya. Dayaday na nasa isip ni David an saiyang relasyon ki Jehova. Sinabi nia: “Paaraman sa sako an saimong mga dalan, O Jehova; tokdoi ako kan saimong mga dana. Palakawa ako sa saimong katotoohan asin tokdoi ako, huli ta ika an sakuyang Dios nin kaligtasan. Sa saimo ako naglaom sa bilog na aldaw.”​—Salmo 25:​4, 5.

Tibaad bago sa saindo an ideya nin pagkaigwa nin haraning marhay na relasyon sa Dios. Ano man an problema nindo, makapagkokompiar kamo sa gabos na panahon na matatabangan kamo kan Kaharohalangkawe, kaoyon kan saiyang kabotan. (1 Juan 5:14, 15) Huli kaini, makanood na magin espesipiko sa saindong mga pamibi, na kinokonsiderar an saindong sirkunstansia asin mga pangangaipo.

Idinoon an kahalagahan kan pagrekonoser sa satong mga pangangaipo sa pamibi ni Hadeng Salomon  kan inaguraron an templo: “Kun magkaigwa nin tiggutom sa daga, kun magkaigwa nin peste, kun magkaigwa nin ragangdang asin alamag, doron asin kuratsa; kun sinda salikopan kan saindang mga kaiwal sa daga kan saindang mga tata​—ano man na klase nin damat asin ano man na klase nin helang​—an ano man na pamibi, an ano man na kahagadan para sa pabor na tibaad gibohon nin siisay man na tawo o kan bilog mong banwaan na Israel, huli ta aram ninda kada saro an saiyang sadiring damat asin an saiyang sadiring kolog . . . Magdangog ka man logod dian sa kalangitan, . . . asin magpatawad ka asin itao sa balang saro an sono sa gabos niang dalan.” (2 Cronica 6:28-30) Tunay nanggad, kamo sana nanggad an ‘nakaaaram kan saindong damat asin kan saindong kolog.’ Kun siring, mahalagang marhay na rekonoseron an tunay nindong mga pangangaipo asin pagmawot. Kun gigibohon nindo iyan, ‘itatao sa saindo ni Jehova an mga kahagadan kan saindong puso.’​—Salmo 37:4.

Pakosogon an Saindong Relasyon ki Jehova

Naoogma si Jehova na togotan an ordinaryong mga tawo na magkamit nin haraning marhay na relasyon sa saiya. Inaasegurar kita kan Saiyang Tataramon: “‘Ako manini saindong ama, asin kamo manini sakong mga aking lalaki asin aking babae,’ sabi ni Jehova na Makakamhan sa gabos.” (2 Corinto 6:18) Tunay nanggad, gusto ni Jehova asin kan saiyang Aki na kita mapakarhay asin magkamit nin buhay na daing katapusan. Nakaparirigon nanggad sa boot na maaraman na tatabangan kita ni Jehova sa pag-otob kan satong mga paninimbagan sa pamilya, sa trabaho, asin sa Kristianong kongregasyon!

Minsan siring, kita gabos napapaatubang sa delikadong mga panahon. An maluyang salud, mga problema sa pamilya, kadikit na ginaganar, o iba pa tibaad nagtatao sa sato nin kakologan. Tibaad dai niato aram kun paano aatubangon an sarong pagbalo. An nag-oorog na pangigipit, direkta o indirektamente, pinangyayari kan maraot na parasumbong, si Satanas na Diablo, na nakikilaban sa espirituwal tumang sa banwaan nin Dios. Minsan siring, may saro na nakasasabot sa sato asin nagtatabang sa sato na papagdanayon an sarong marahay na relasyon ki Jehova. An sarong ini daing iba kundi si Jesu-Cristo sa saiyang ilinangkaw na posisyon sa kalangitan. Mababasa niato: “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog niato, alagad dai nin kasalan. Kita, kun siring, dumolok na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.”—Hebreo 4:15, 16.

Kanigoan kanakapakokosog liwat sa boot na maaraman na dai kaipuhan na kita magin bantog o mayaman tanganing kamtan an pabor nin Dios! Dawa pa kun nasa masakit na kamugtakan, magin siring sa salmista na namibi: “Ako nagsasakit nin makuri asin dukha. Si Jehova mismo kinokonsiderar ako. Ika an sakong tabang asin an Paratao nin dudulagan para sa sako.” (Salmo 31:9-14; 40:17) Makasisierto kamo na namomotan ni Jehova an mapakumbaba, ordinaryong mga tawo. Tunay nanggad, ‘puede niatong ibugtak an gabos niatong kahaditan sa saiya huli ta sia may pagmakolog sa sato.’—1 Pedro 5:7.

[Nota sa Ibaba]

[Mga Ritrato sa pahina 29]

An dakol sa mga parasunod ni Jesus daing inadalan asin ordinaryo

[Ritrato sa pahina 30]

An mga Kristiano nagmamaigot na magkaigwa nin makosog na pagtubod

[Mga Ritrato sa pahina 31]

Dai kaipuhan na kita magin prominente tanganing kamtan an pabor nin Dios