An Pamanggihan nin Kagurangnan May Dakulang Kahulogan Para Saindo

IGWA daw nin dakula asin nagdadanay na kahulogan para saindo an Pamanggihan nin Kagurangnan? Tanganing maaraman iyan, aramon nguna niato an kahulogan na itinao mismo ni Jesu-Cristo sa espesyal na okasyon na ini.

Kan banggi nin Nisan 14, 33 C.E., nakipagtipon si Jesus sa 12 niang apostol sa sarong kuarto sa itaas sa Jerusalem tanganing iselebrar an taonan na Paskua. Pagkakakan ninda kan pamanggihan nin Paskua, naghale sa kuarto an traydor na si Judas tanganing pasaloiban si Jesus. (Juan 13:21, 26-30) Sa nawalat na 11 apostol, inintrodusir ni Jesus an “pamanggihan nin Kagurangnan.” (1 Corinto 11:20) Inaapod man iyan na Memorial, huli ta ipinagboot ni Jesus sa saiyang mga parasunod: “Gibohon nindo ini sa paggirumdom sa sako.” Ini sana an okasyon na ipinagboot sa mga Kristiano na iselebrar.—1 Corinto 11:24, The Jerusalem Bible.

Segun sa diksionaryong Webster’s, an girumdoman sarong bagay na nakatatabang na “padagos na magirumdoman” o “danay na nagpapagirumdom.” Sa dakol na lugar, an mga tawo nagpapatindog nin monumento o nagtatalaan nin espesyal na aldaw tanganing iselebrar, o girumdomon, an sarong tawo o sarong bagay na mahalaga. Sa bagay na ini inestablisar ni Jesus an sarong nagpapagirumdom na pamanggihan—sarong pamanggihan na mapagirumdom, na matabang sa mga disipulo nia na padagos na magirumdoman an makahulogan na marhay na mga pangyayari kan importanteng aldaw na idto. Para sa maarabot pang mga kapag-arakian, an nagpapagirumdom na pamanggihan na ini an mapagirumdom sa mga nagseselebrar kan hararom na kahulogan kan ginibo ni Jesus kan bangging iyan, partikularmente kan mga emblema na ginamit nia. Anong mga simbolo, o emblema, an ginamit ni Jesus, asin ano an kahulogan kaiyan? Siyasaton niato an pagkasaysay sa Biblia kun ano an nangyari kan bangging iyan kan 33 C.E.

Sagradong mga Simbolismo

“Sia nagkua nin tinapay, nagpasalamat, binaraak iyan, asin itinao iyan sa sainda, na an sabi: ‘Ini nangangahulogan kan sakong hawak na itatao para sa saindo. Padagos na gibohon nindo ini sa paggirumdom sa sako.’”—Lucas 22:19.

Kan kinua ni Jesus an tinapay asin nagsabing, “ini nangangahulogan kan sakong hawak,” ipinaririsa nia na an tinapay na daing lebadura nagrerepresentar sa, o sarong simbolo kan, saiya mismong daing kasalan na hawak na laman, na itinao nia “manongod sa buhay kan kinaban.” (Juan 6:51)  Maski ngani an nagkapirang traduksion nin Biblia nagsasabing “ini [Griego, es·tinʹ] an sakong hawak,” an Thayer’s Greek-English Lexicon of the New Testament nagsasabi na an berbong ini sa parate an boot sabihon “nangangahulogan.” Ipinahahayag kaiyan an ideya nin nagrerepresentar, o nagsisimbolisar.—Mateo 26:26, nota sa ibaba.

Totoo man iyan sa kopa nin arak. Si Jesus nagsabi: “An kopang ini nangangahulogan kan bagong tipan paagi sa sakong dugo, na papaboloson para sa saindo.”—Lucas 22:20.

Sa pagkasaysay ni Mateo, si Jesus nagsabi mapadapit sa kopa: “Ini nangangahulogan kan sakong ‘dugo kan tipan,’ na papaboloson manongod sa dakol para sa kapatawadan nin mga kasalan.” (Mateo 26:28) Ginamit ni Jesus an arak sa kopa bilang representasyon, o simbolo, kan saiya mismong dugo. An saiyang pinabolos na dugo an magigin basehan kan “bagong tipan” para sa linahidan nin espiritung mga disipulo, na mamamahala bilang mga hade asin saserdote kaiba nia sa langit.—Jeremias 31:31-33; Juan 14:2, 3; 2 Corinto 5:5; Kapahayagan 1:5, 6; 5:9, 10; 20:4, 6.

An arak sa kopa nagseserbi man na pagirumdom na an pinabolos na dugo ni Jesus an magigin basehan para sa pagtao nin “kapatawadan sa mga kasalan,” na sa siring nagbubukas kan dalan para sa mga nakikikabtang na apodon sa langitnon na buhay bilang kaibang mga paramana ni Cristo. Siempre, an mga igwa kan langitnon na pag-apod na ini—na limitado an kabilangan—an iyo sanang nakikikabtang sa tinapay asin arak sa Memorial.—Lucas 12:32; Efeso 1:13, 14; Hebreo 9:22; 1 Pedro 1:3, 4.

Pero, paano an gabos na parasunod ni Jesus na dai kaiba sa bagong tipan? An mga ini an “ibang karnero” kan Kagurangnan, na naglalaom, bako na mamahala kaiba ni Cristo sa langit, kundi magkamit nin buhay na daing sagkod sa sarong paraisong daga. (Juan 10:16; Lucas 23:43; Kapahayagan 21:3, 4) Bilang “sarong dakulang kadaklan” nin fiel na mga Kristiano na “nagtatao sa [Dios] nin sagradong paglilingkod aldaw asin banggi,” naoogma sindang marhay na magin mapagpasalamat na mga nagmamasid sa Pamanggihan nin Kagurangnan. An saindang mga tataramon asin gawe-gawe garo man sana nagsasabi: “Utang niato an kaligtasan sa satong Dios, na nagtutukaw sa trono, asin sa Kordero.”—Kapahayagan 7:9, 10, 14, 15.

Gurano Kaparate?

“Padagos na gibohon nindo ini sa paggirumdom sa sako.” —Lucas 22:19.

Gurano kaparate maninigong selebraron an Memorial tanganing padagos na magirumdoman an kagadanan ni Cristo? Dai espesipikong sinabi ni Jesus. Minsan siring, huling an Pamanggihan nin Kagurangnan inestablisar nia kan Nisan 14, an banggi kan Paskua, na sineselebrar kan mga Israelita taon-taon, malinaw na boot ni Jesus na an Memorial selebraron sa kaparehong paagi. Mantang taon-taon sineselebrar kan mga Israelita an pagkakalda ninda sa kaoripnan sa Egipto, taon-taon man na sineselebrar kan mga Kristiano an pagkakalda ninda sa kaoripnan sa kasalan asin kagadanan.—Exodo 12:11, 17; Roma 5:20, 21.

An ideya nin taonan na selebrasyon tanganing girumdomon an sarong mahalagang pangyayari bako nanggad na pambihira. Estudyare, halimbawa, kun noarin sineselebrar nin sarong mag-agom an anibersaryo kan saindang kasal o kun noarin sineselebrar nin sarong nasyon an importanteng pangyayari sa kasaysayan kaiyan. Sa parate an pagselebrar ginigibo sarong beses kada taon sa anibersaryo kan pangyayaring iyan. Interesante nanggad, sa laog nin nagkapirang siglo pagkagadan ni Cristo, dakol na naghihingakong Kristiano an inapod na Quartodecimanos, na nangangahulogan “Mga Gusto sa Ikakatorse,” huli ta sineselebrar ninda an kagadanan ni Jesus nin sarong beses kada taon, kun Nisan 14.

 Simple Pero Hararom an Kahulogan

Ipinaliwanag ni apostol Pablo na an pagselebrar kan Pamanggihan nin Kagurangnan mapangyari sa mga disipulo ni Jesus na ‘padagos na ibalangibog an pagkagadan kan Kagurangnan.’ (1 Corinto 11:26) Huli kaini, an pagselebrar na ini nakapokus sa nagin importanteng papel ni Jesus, paagi sa saiyang kagadanan, sa pag-otob kan katuyohan nin Dios.

Paagi sa pagigin fiel nia sagkod sa kagadanan, ibinindikar ni Jesu-Cristo si Jehova Dios bilang madonong asin mamomoton na Kaglalang patin matanos na Soberano. Sarongat sa mga paghihingako ni Satanas asin bakong arog ki Adan, pinatunayan ni Jesus na posibleng magdanay na fiel an tawo sa Dios, dawa sa irarom nin labi-labing pangigipit.—Job 2:4, 5.

An Pamanggihan nin Kagurangnan nagpapadanay man nin mapagpasalamat na paggirumdom sa mapagsakripisyong pagkamoot ni Jesus. Sa ibong nin grabeng mga pagbalo, si Jesus nagdanay sa sangkap na pagigin makinuyog sa saiyang Ama. Sa siring, nahimo niang itao an saiya mismong sangkap na buhay bilang tawo tanganing matahoban an dakulaon na danyos kan kasalan ni Adan. Arog kan paliwanag mismo ni Jesus, sia nagdigdi ‘tanganing itao an saiyang kalag bilang pantubos na karibay nin dakol.’ (Mateo 20:28) Bilang resulta, an gabos na nagtutubod ki Jesus puedeng patawadon sa saindang mga kasalan asin magkamit nin buhay na daing katapusan kaoyon kan orihinal na katuyohan ni Jehova para sa katawohan.—Roma 5:6, 8, 12, 18, 19; 6:23; 1 Timoteo 2:5, 6. *

An gabos na ini nagtatampok man kan abundang karahayan asin dai na kutana maninigong kabootan ni Jehova sa pagtao nin probisyon para sa kaligtasan nin katawohan. An Biblia nagsasabi: “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya. An pagkamoot sa bagay na ini, bakong huli ta kita namoot sa Dios, kundi na sia namoot sa sato asin isinugo an saiyang Aki bilang pampagian nin boot na atang para sa satong mga kasalan.”—1 Juan 4:9, 10.

Iyo, kanigoan karahay na selebrasyon an Memorial! Simple asin praktikal nanggad na selebraron sa bilog na kinaban sa irarom nin magkaralaenlaen na sirkunstansia, pero simboliko nanggad tanganing magdanay na makahulogan na pagirumdom sa laog nin halawig na panahon.

An Kahulogan Kaiyan Para Saindo

An kagadanan bilang atang kan satong Kagurangnan na Jesu-Cristo ginibo na may dakulaon na  pagsasakripisyo sa saiya sagkod sa saiyang Ama, si Jehova. Bilang sangkap na tawo, si Jesus dai napaatubang sa minanang kagadanan na arog niato gabos. (Roma 5:12; Hebreo 7:26) Puede kutana siang mabuhay sagkod lamang. An saiyang buhay dai kutana puedeng kuanon, maski nin puersahan, kun dai nia itotogot iyan. Sia nagsabi: “Mayo nin siisay man na uminagaw [kan buhay ko] sa sako, kundi itinatao ko iyan sa sadiri kong boot.”​—Juan 10:18.

Pero, gikan sa boot na itinao ni Jesus bilang atang an saiyang sangkap na buhay bilang tawo tanganing “paagi sa saiyang kagadanan mapara nia an saro na igwa kan kapangyarihan na magtao nin kagadanan, an boot sabihon, an Diablo; asin tanganing matawan nia nin katalingkasan an gabos na huli sa pagkatakot sa kagadanan napairarom sa kaoripnan sa bilog nindang pagkabuhay.” (Hebreo 2:​14, 15) An mapagsakripisyong pagkamoot ni Cristo narisa pa nin orog sa paagi nin kagadanan na itinogot niang agihan nia. Aram niang marhay kun paano sia madusa asin magagadan.​—Mateo 17:22; 20:17-19.

Ipinagigirumdom man sa sato kan Memorial an kadarudakulaing kapahayagan nin pagkamoot na ginibo kasuarin man kan satong langitnon na Ama, si Jehova. Makologon nanggad sa boot nia, saro na “mamomoton na marhay sa kapadangatan asin maheherakon,” na madangog asin maheling an “makosog na mga pagtangis asin luha” ni Jesus sa hardin nin Getsemani, an maringison na pasakit, an maringis na pagpako, asin an luway-luway, makologon na kagadanan. (Santiago 5:​11, nota sa ibaba; Hebreo 5:7; Juan 3:16; 1 Juan 4:​7, 8) An pag-isip-isip sana kaiyan dawa ngonyan, dakol na siglo na an nakalihis, ikinakokolog nin boot nin dakol.

Isip-isipa na binayadan ni Jehova Dios asin ni Jesu-Cristo an arog kaiyan kadakulang halaga para sa sato na mga parakasala! (Roma 3:23) Aroaldaw, napapaatubang kita sa makolog na katunayan kan satong pagigin makasalan asin kan satong mga pagkabakong sangkap. Minsan siring, puede kitang humagad nin kapatawadan sa Dios basado sa pagtubod sa atang na pantubos ni Jesus. (1 Juan 2:1, 2) Pinagigin posible kaini na magkaigwa kita nin katalingkasan na makipag-olay sa Dios asin nin sarong malinig na konsensia. (Hebreo 4:14-16; 9:13, 14) Dugang pa, puede kitang maglaom na mabuhay sa sarong paraisong daga sa bilog na panahon na daing sagkod. (Juan 17:3; Kapahayagan 21:3, 4) Ini asin an dakol pang ibang bendisyon resulta gabos kan kadarudakulaing akto nin pagsakripisyo sa sadiri ni Jesus.

Pagpaheling nin Apresasyon sa Pamanggihan nin Kagurangnan

Daing duda na an Pamanggihan nin Kagurangnan sarong marahayon na pagpaheling nin “nakalalabing marhay na dai na kutana maninigong kabootan nin Dios.” Asin an probisyon ni Jehova Dios na atang na pantubos—na pinagin posible kan mapagsakripisyong pagkamoot ni Jesus—iyo nanggad an saiyang “dai ikaladawan na daing bayad na balaog.” (2 Corinto 9:14, 15) An kapahayagan daw na ini nin karahayan nin Dios paagi ki Jesu-Cristo dai nakapupukaw sa saindo nin hararom asin nagpapadagos na pakamate nin pagpasalamat saka pag-apresyar?

Kompiado kami na iyo. Kun siring, maogma niamo kamong iniimbitaran na makipagtipon sa Mga Saksi ni Jehova sa pagselebrar kan Memorial kan kagadanan ni Jesus. Ngonyan na taon an Memorial gigibohon sa Mierkoles, Abril 16, pagkasolnop nin saldang. Maoogma an mga Saksi ni Jehova sa saindong lugar na ipaaram sa saindo an eksaktong oras asin lugar para sa pinakamahalagang okasyon na ini.

[Nota sa Ibaba]

[Kahon/Mga Ritrato sa pahina 6]

“INI AN SAKONG HAWAK” O “INI NANGANGAHULOGAN KAN SAKONG HAWAK” ARIN?

Kan sinabi ni Jesus na, “Ako iyo an tata” asin, “Ako iyo an tunay na poon nin ubas,” mayo ni saro na nag-isip na sia literal na tata o literal na poon nin ubas. (Juan 10:7; 15:1) Siring man, kan kinotar kan The New Jerusalem Bible si Jesus na nagsasabing: “An kopang ini iyo an bagong tipan,” dai kita nag-iisip na an kopa mismo iyo an literal na bagong tipan. Kaya, kan sinabi man nia na an tinapay ‘iyo’ an saiyang hawak, daing kuestion na an tinapay nangangahulogan, o nagsisimbolisar, kan saiyang hawak. Huli kaini, an traduksion ni Charles B. Williams nagsasabi: “Ini nagrerepresentar sa sakong hawak.”—Lucas 22:19, 20.

[Ritrato sa pahina 5]

An tinapay na daing lebadura asin an arak angay na mga simbolo kan daing kasalan na hawak ni Jesus asin kan saiyang pinabolos na dugo

[Ritrato sa pahina 7]

An Memorial sarong pagirumdom kan dakulaon na pagkamoot na ipinaheling ni Jehova Dios asin ni Jesu-Cristo