Bareta kan mga Parabalangibog kan Kahadean

“Nadadangog” Ninda an Mensahe kan Kahadean sa Brazil

TANGANING ikabalangibog an maogmang bareta kan Kahadean sa komunidad nin mga Bungog, inako kan dakol na Saksi ni Jehova sa Brazil an angat na manodan an Pagtaram sa Senyas sa Brazil. An saindang paghihingoa nagbubunga nin marahayon na mga resulta, arog kan ipinaheheling kan minasunod na mga eksperyensia.

Si Eva, * sarong babaeng bungog na taga São Paulo, nagpoon na makanood nin pagtaram sa senyas pakatapos na sia asin an tolo niang aki magbalyo sa harong kan kasaroan niang bungog na lalaki. Sa sarong galeriya, nakamidbid ni Eva asin kan saiyang kasaroan an sarong grupo nin bungog na mga Saksi asin inimbitaran sinda sa sarong pagtiripon sa Kingdom Hall. Inako ninda an imbitasyon, sa paghona na iyan sarong sosyal na okasyon.

Huli sa limitadong kaaraman nia sa pagtaram sa senyas, kakadikit an nasabotan ni Eva sa pagtiripon. Pagkatapos, may mga Saksing nag-imbitar saiya sa saindang harong tanganing magmeryenda. Ginagamit an mga retrato sa brosyur na Enjoy Life on Earth Forever!, ipinaliwanag ninda an panuga nin Dios na sarong daganon na paraiso sa ngapit. Nagustohan ni Eva an saiyang nanodan asin nagpoon na umatender nin regular sa mga pagtiripon.

Dai nahaloy pakatapos kaiyan, binayaan ni Eva an saiyang kasaroan tanganing mamuhay kaoyon kan mga pamantayan sa Biblia. Sa ibong nin madahas na pagtumang kan saiyang pamilya, padagos siang nag-oswag sa espirituwal asin nabautismohan kan 1995. Pakalihis nin anom na bulan, nagpalista si Eva bilang sarong payunir, o pambilog na panahon na parabalangibog kan Kahadean. Poon kaidto may natabangan na siang apat na bungog na magdusay asin magpabautismo.

Si Carlos namundag na bungog. Poon sa pagkaniaki naimbuelto na sia sa droga, inmoralidad, asin paghabon. Huling hinuma kan mga miembro nin karibal na gang, duminulag sia pasiring sa São Paulo asin nakiistar ki João sa laog nin kadikit na panahon. Si João kapareho ni Carlos na bungog asin namumuhay sa kasumbikalan.

Pakalihis nin pirang taon, nanodan ni Carlos an mensahe kan Kahadean, na nagpahiro saiya na linigon an saiyang buhay asin legalisaron an saiyang pag-agom. Pakatapos na maabot an mga kahagadan sa Kasuratan, si Carlos nabautismohan bilang simbolo kan saiyang pagdusay ki Jehova. Mientras tanto, dai aram ni Carlos na si João natokdoan man kan maogmang bareta, asin sia man guminibo nin dakulang mga pagbabago sa saiyang buhay. Kan maaraman na dai inooyonan ni Jehova an paggamit nin mga imahen, iinapon ni João an saiyang koleksion nin “mga santo.” Pakatapos na bayaan an dati niang estilo nin pamumuhay, si João nabautismohan man.

Labi-labi nanggad an kagayagayahan ni Carlos asin João kan sinda nagkanuparan sa sarong Kingdom Hall asin naheling an mga pagbabago na ginibo kan lambang saro! Pareho na sinda ngonyan na responsableng mga payo nin pamilya asin naglilingkod bilang maigot na mga parabalangibog kan Kahadean.

Sa Brazil, igwa na sa presente nin 30 kongregasyon sa pagtaram sa senyas asin 154 grupo, na may labing 2,500 na parahayag, na sa sainda mga 1,500 an bungog. Sa “Mga Paratokdo kan Tataramon nin Dios” na Pandistritong mga Kombension para sa mga bungog kan 2001 sa Brazil, labing 3,000 an nag-atender, asin 36 an nabautismohan. Paagi sa bendisyon ni Jehova, logod na dakol pang bungog an mag-ako kan mensahe kan Kahadean.

[Nota sa Ibaba]