Gurano Kakosog an Saindong Pagtubod?
Gurano Kakosog an Saindong Pagtubod?
“Paagi sa saindong pagtubod na kamo nagtitindog.”—2 CORINTO 1:24.
1, 2. Taano ta dapat na kita may pagtubod, asin paano iyan puedeng magin mas makosog?
ARAM kan mga lingkod ni Jehova na sinda dapat na may pagtubod. An totoo, ‘kun dai nin pagtubod imposible na mapanigoan nin marhay an Dios.’ (Hebreo 11:6) Kun siring, madonong na kita mamibi na logod tawan nin banal na espiritu asin nin pagtubod, na kabtang kan kawiliwiling bunga kaiyan. (Lucas 11:13; Galacia 5:22, 23) An pag-arog sa pagtubod kan mga kapagtubod puede man na makapakosog kan kualidad na ini na yaon sato.—2 Timoteo 1:5; Hebreo 13:7.
2 Magigin mas makosog an satong pagtubod kun mapadagos kita sa paglakaw sa dalan na sinasabi kan Tataramon nin Dios para sa gabos na Kristiano. Nadadagdagan an pagtubod bunga nin aroaldaw na pagbasa sa Biblia asin mahigos na pag-adal sa Kasuratan sa tabang kan mga publikasyon na itinatao paagi sa “fiel na mayordomo.” (Lucas 12:42-44; Josue 1:7, 8) Naparirigon an boot niato kan pagtubod nin lambang saro paagi sa satong regular na pagigin presente sa Kristianong mga pagtiripon, asamblea, asin kombension. (Roma 1:11, 12; Hebreo 10:24, 25) Asin napakokosog an satong pagtubod kun kita nakikipag-olay sa iba sa ministeryo.—Salmo 145:10-13; Roma 10:11-15.
3. Kun dapit sa pagtubod, anong tabang an nakukua niato sa mamomoton na Kristianong kamagurangan?
3 Paagi sa pagtao nin hatol asin pamparigon sa boot na sono sa Kasuratan, tinatabangan kita kan mamomoton na Kristianong kamagurangan na pakosogon an satong pagtubod. Yaon sa sainda an kaisipan na arog kan ki apostol Pablo, na nagsabi sa mga taga Corinto: “Kami mga kapwa trabahador para sa saindong kagayagayahan, huli ta paagi sa saindong pagtubod na kamo nagtitindog.” (2 Corinto 1:23, 24) An saro pang traduksion nagsasabi: “Tinatabangan niamo kamo tanganing paogmahon kamo, huli ta makosog an saindong pagtubod.” (Contemporary English Version) An mga matanos nabubuhay huli sa pagtubod. Siempre mayo nin ibang puedeng magtubod para sa sato o gibohon kitang maimbod na nagdadanay na may integridad. Sa bagay na ini, ‘dapat niatong pasanon an satong sadiring pasan.’—Galacia 3:11; 6:5.
4. Paano makakatabang an mga pagkasaysay sa Kasuratan manongod sa fiel na mga lingkod nin Dios na pakosogon an satong pagtubod?
4 An Kasuratan kadakol nin estorya kan mga nagkaigwa nin pagtubod. Tibaad aram ta na an dakol sa marahayon na ginibo ninda, alagad kumusta man an pagtubod na ipinaheling ninda sa aroaldaw, tibaad sa bilog na halawig na buhay? An paghorophorop ngonyan kun paano ninda ipinaheling an kualidad na ini sa mga kamugtakan na kaagid kan mismong kamugtakan niato puedeng makatabang na mapakosog an satong pagtubod.
An Pagtubod Nagtatao Sato nin Kosog nin Boot
5. Ano an ebidensia sa Kasuratan na pinakokosog kita kan pagtubod na ipahayag an tataramon nin Dios na may kosog nin boot?
5 Pinakokosog kita kan pagtubod na ipahayag an tataramon nin Dios na may kosog nin boot. May kosog nin boot na ihinula ni Enoc an paghokom nin Dios. “Uya!” sabi nia, “si Jehova nagdatong na kaibanan an saiyang manampulong ribong banal, tanganing maghokom tumang sa gabos, asin tanganing silotan an gabos na maraot may labot sa gabos nindang maraot na gibo na saindang ginibo sa maraot na paagi, asin may labot sa gabos na nakakukubhan na bagay na itinaram kan maraot na mga parakasala tumang sa saiya.” (Judas 14, 15) Kan madangog an mga tataramon na iyan, an daing Dios na mga kaiwal ni Enoc segurado na gusto siang gadanon. Pero, pusoan siang nagtaram na may pagtubod, asin “kinua sia” nin Dios paagi sa pagpatorog sa saiya sa kagadanan, na minalataw na dai ipinamate sa saiya an kolog kaiyan. (Genesis 5:24; Hebreo 11:5) Dai niato naeeksperyensiahan an siring na mga milagro, alagad sinisimbag ni Jehova an satong mga pamibi tanganing ikapahayag niato an saiyang tataramon na may pagtubod asin kosog nin boot.—Gibo 4:24-31.
6. Paano nakatabang ki Noe an pagtubod asin kosog nin boot na tao nin Dios?
6 Huli sa pagtubod si Noe “nagtogdok nin dahong para sa pagligtas kan saiyang kasararo sa harong.” (Hebreo 11:7; Genesis 6:13-22) Si Noe “parahulit [man] nin katanosan” na may kosog nin boot na ipinahayag an mga patanid nin Dios sa mga katemporanyo nia. (2 Pedro 2:5) Siertong tinuya ninda an saiyang mensahe manongod sa sarong maabot na Delubyo, kun paanong may mga nagtutuya man kun pinatutunayan niato sa Kasuratan na an presenteng sistema nin mga bagay madali nang laglagon. (2 Pedro 3:3-12) Minsan siring, arog ki Enoc asin Noe, kaya niatong ipaabot an siring na mensahe dahel kan satong pagtubod asin kosog nin boot na tao nin Dios.
Ginigibo Kitang Mapasensia kan Pagtubod
7. Paano ipinaheling ni Abraham asin nin iba pa an pagtubod asin pasensia?
7 Kaipuhan niato an pagtubod asin pasensia, lalo na mantang hinahalat niato an katapusan kan maraot na sistemang ini. Kabilang sa mga ‘magmamana sa mga panuga paagi sa pagtubod asin pasensia’ an matatakton sa Dios na patriarkang si Abraham. (Hebreo 6:11, 12) Huli sa pagtubod binayaan nia an siudad nin Ur, pati an gabos na bentaha dian, asin nagin dayo sa ibang daga na ipinanuga saiya nin Dios. Si Isaac asin Jacob mga paramana kan iyo man sanang panuga na iyan. Minsan siring, “sa pagtubod ini gabos nagkagaradan, minsan ngani dai ninda nakamtan an kaotoban kan mga panuga.” Huli sa pagtubod sinda ‘nagmawot nin orog karahay na lugar, an boot sabihon, sarong langitnon.’ Huli kaiyan, an Dios ‘nag-andam nin sarong siudad para sa sainda.’ (Hebreo 11:8-16) Iyo, si Abraham, Isaac, asin Jacob—asin an diosnon na agom ninda—mapasensiang naghalat sa langitnon na Kahadean nin Dios, na sa pagsakop kaiyan sinda bubuhayon liwat digdi sa daga.
8. Si Abraham, Isaac, asin Jacob nagpaheling nin pasensia asin pagtubod sa ibong nin ano?
8 Si Abraham, Isaac, asin Jacob dai nawaran nin pagtubod. An Dagang Panuga dai napasainda, asin dai ninda naheling na an gabos na nasyon nagbebendisyon kan saindang sadiri paagi sa banhi ni Abraham. (Genesis 15:5-7; 22:15-18) Minsan ngani an ‘siudad na itinogdok nin Dios’ magkakatotoo sana pakalihis nin dakol na siglo, an mga lalaking ini padagos na nagpaheling nin pagtubod asin pasensia sa bilog na buhay ninda. Sierto nanggad na iyan man an maninigo na gibohon niato ngonyan na an Mesiyanikong Kahadean saro nang tunay na bagay sa langit.—Salmo 42:5, 11; 43:5.
An Pagtubod Nagtatao Sato kan Pinakahalangkaw na mga Pasohan
9. Ano an epekto kan pagtubod sa mga pasohan asin obheto?
9 Nungkang inarog kan fiel na mga patriarka an hababaon na klaseng estilo nin pamumuhay kan mga Cananeo, huli ta igwa sinda nin mas halangkaw nanggad na mga pasohan asin obheto. An pagtubod nagtatao man sato nin espirituwal na mga pasohan na nagpapangyari sato na labanan an magin kabtang kan kinaban na namumugtak sa kapangyarihan kan maraot, si Satanas na Diablo.—1 Juan 2:15-17; 5:19.
10. Paano niato naaaraman na pinagmaigotan ni Jose na aboton an sarong pasohan na mas halangkaw nanggad kisa kinabanon na pagkaprominente?
10 Sa paggiya nin Dios, an aki ni Jacob na si Jose nagserbing administrador nin kakanon sa Egipto, alagad bakong pasohan nia na magin bantog na tawo sa kinaban na ini. May pagtubod sa kaotoban kan mga panuga ni Jehova, an 110 anyos na si Jose nagsabi sa saiyang mga tugang: “Ako magagadan na; alagad daing duwa-duwa na ririsahon kamo nin Dios, asin sierto na dadarahon nia kamo paluwas sa dagang ini pasiring sa daga na ipinanuga nia ki Abraham, Isaac asin Jacob.” Ipinakiolay ni Jose na sia ilobong sa dagang panuga. Kan magadan, sia inembalsamar asin ihinutad sa sarong lungon sa Egipto. Alagad kan kaldahon an mga Israelita sa pagkaoripon sa Egipto, ipinadara ni propeta Moises an mga tolang ni Jose tanganing ilobong sa Dagang Panuga. (Genesis 50:22-26; Exodo 13:19) An pagtubod na arog kan ki Jose maninigong magpahiro sato na pagmaigotan na aboton an mga pasohan na mas halangkaw nanggad kisa kinabanon na pagkaprominente.—1 Corinto 7:29-31.
11. Sa anong paagi pinatunayan ni Moises na igwa sia nin espirituwal na mga pasohan?
11 ‘Pinagmarahay pa ni Moises na maapi kaibanan kan banwaan nin Dios kisa magkamit kan dai nagdadanay na pag-ogma sa kasalan’ bilang sarong edukadong marhay na miembro kan pamilya kan hade sa Egipto. (Hebreo 11:23-26; Gibo 7:20-22) Dahel kaini dai sia nagkamit nin kinabanon na prestihio asin tibaad engrandeng lobong sa sarong maadornong lungon sa sarong bantog na lugar sa Egipto. Alagad ano an halaga kaiyan kun ikokomparar sa pribilehio na magin “lalaki kan tunay na Dios,” parapangoltanan kan tipan nin Ley, propeta ni Jehova, asin kagsurat kan Biblia? (Esdras 3:2) An prestihiosong sekular na pag-asenso daw an minamawot nindo, o an pagtubod daw nagtao sa saindo nin mas halangkaw pa nanggad na espirituwal na mga pasohan?
An Pagtubod Nagbubunga nin Nakakokontentong Buhay
12. Ano an nagin epekto kan pagtubod sa buhay ni Rahab?
12 An pagtubod nagtatao sa mga tawo bako sanang kan pinakahalangkaw na mga pasohan kundi patin nakakokontentong buhay. Si Rahab nin Jerico siertong dai nakamate nin kahulogan sa saiyang buhay bilang patotot. Pero, nagbago nanggad iyan kan sia magtubod! Sia “ipinahayag na matanos paagi sa mga gibo [nin pagtubod], matapos na saiyang istimaron an mga mensahero [na Israelita] asin pinalakaw nia sinda sa ibang dalan,” kaya nakadulag sinda sa mga kalaban nindang Cananeo. (Santiago 2:24-26) Minimidbid si Jehova bilang tunay na Dios, si Rahab nagpaheling man nin pagtubod paagi sa pagbaya sa saiyang buhay na pagpapatotot. (Josue 2:9-11; Hebreo 11:30, 31) Naagom sia nin sarong lingkod ni Jehova, bako nin daing pagtubod na Cananeo. (Deuteronomio 7:3, 4; 1 Corinto 7:39) Si Rahab nagkaigwa kan dakulang pribilehio na magin apoon kan Mesiyas. (1 Cronica 2:3-15; Rut 4:20-22; Mateo 1:5, 6) Arog kan iba pa, na an nagkapira binayaan an inmoral na buhay, maako sia nin saro pang balos—pagkabuhay liwat sa sarong paraisong daga.
13. Paano nagkasala si David may labot ki Bat-seba, alagad anong aktitud an ipinaheling nia?
13 Pakatapos na bayaan an saiyang makasalan na buhay, minalataw na pinapagdanay ni Rahab an tanos na pamumuhay. Minsan siring, may mga haloy nang nagdusay sa Dios na nagkasala nin magabat. Si Hadeng David nagsambay ki Bat-seba, ipinagadan an agom kaini sa ralaban, asin kinua ini bilang saiyang agom. (2 Samuel 11:1-27) Nagsosolsol na may hararom na pagkamondo, nakimaherak si David ki Jehova: “An saimong banal na espiritu O dai mo paghaleon sa sakuya.” Dai nawara ki David an espiritu nin Dios. May pagtubod sia na dai duduhagion ni Jehova, huli sa saiyang pagkaherak, “an pusong laglag asin ronot” dahel sa kasalan. (Salmo 51:11, 17; 103:10-14) Huli sa saindang pagtubod, si David asin Bat-seba nagkamit nin nakakokontentong balos na mapabilang sa mga apoon kan Mesiyas.—1 Cronica 3:5; Mateo 1:6, 16; Lucas 3:23, 31.
An Pagtubod Pinakokosog nin Asegurasyon
14. Anong mga asegurasyon an inako ni Gedeon, asin ano an puedeng magin epekto sa pagtubod niato kan pagkasaysay na ini?
14 Minsan ngani kita naglalakaw sa pagtubod, kun minsan tibaad kaipuhan niato an asegurasyon kan tabang nin Dios. Totoo iyan ki Hokom Gedeon, saro sa mga “huli sa pagtubod nakadaog sa mga kahadean sa ralaban.” (Hebreo 11:32, 33) Kan sakyadahon kan mga Midianita asin kan mga kaalyado ninda an Israel, si Gedeon napano kan espiritu nin Dios. Sa pagmawot nin asegurasyon na nasa kampi nia si Jehova, nagproponer sia nin mga pagbalo kun saen magdamlag na iwawalat sa ginikan an sarong balukag na lana. Sa enot na pagbalo, an balukag sana an nagkaigwa nin ambon, mantang an daga mara. Nabaliktad an situwasyon sa ikaduwang pagbalo. Napakosog kan mga asegurasyon na ini, an mapagmaan na si Gedeon naghirong may pagtubod asin dinaog an mga kalaban kan Israel. (Hokom 6:33-40; 7:19-25) Kun kita mahagad nin asegurasyon kun napapaatubang sa sarong desisyon, dai iyan nangangahulogan na nagkukulang kita nin pagtubod. An totoo nagpapaheling kita nin pagtubod paagi sa pagkonsulta sa Biblia asin Kristianong mga publikasyon patin paagi sa pamimibi para sa paggiya kan banal na espiritu kun naggigibo nin mga desisyon.—Roma 8:26, 27.
15. Paano kita puedeng matabangan kan paghorophorop sa pagtubod ni Barac?
15 An pagtubod ni Hokom Barac napakosog nin asegurasyon paagi sa pagparigon sa boot. Pinarigon sia ni propetisa Debora na gumibo nin inisyatiba sa pagpatalingkas sa mga Israelita sa pan-aapi kan Cananeong si Hadeng Jabin. May pagtubod asin asegurasyon kan pagsuportar nin Dios, pinangenotan ni Barac sa ralaban an 10,000 na lalaking kulang sa kakayahan asin dinaog an orog pa nanggad kadakulang mga hukbo ni Jabin na pinangengenotan ni Sisara. Isinelebrar an kapangganahan na iyan sa nakapupukaw sa boot na awit ni Debora asin Barac. (Hokom 4:1–5:31) Pinarigon ni Debora an boot ni Barac na humiro bilang poon kan Israel na nombrado nin Dios, asin saro sia sa mga lingkod ni Jehova na huli sa pagtubod “dinaog an mga hukbo nin mga taga ibang daga.” (Hebreo 11:34) An paghorophorop kun paano binendisyonan nin Dios si Barac huli sa paghirong may pagtubod puede man na magpahiro sa sato kun kita medyo nag-aalangan na gibohon an sarong depisil na asignasyon sa paglilingkod ki Jehova.
An Pagtubod Nagpapaoswag sa Katoninongan
16. Anong marahayon na halimbawa an ipinaheling ni Abraham sa pagmamaigot na makipagkatoninongan ki Lot?
16 Kun paanong tinatabangan kita kan pagtubod na gibohon an depisil na mga asignasyon sa paglilingkod sa Dios, pinaooswag man kaiyan an katoninongan asin katrangkilohan. Pinapili kan gurang nang si Abraham an saiyang mas nguhod na sobrinong si Lot kan pinakamarahay na pasabsaban kan an saindang mga paraataman nin hayop mag-iriwal asin kinaipuhan na sindang magsuway. (Genesis 13:7-12) Siertong may pagtubod na namibi si Abraham na logod tabangan nin Dios sa pagresolber kan problemang ini. Imbes na enoton an saiyang sadiring kapakanan, hinusay nia an situwasyon sa matoninong na paagi. Kun makadiskutiran niato an satong tugang na Kristiano, mamibi kitang may pagtubod asin ‘hanapon an katoninongan,’ na isinasaisip an halimbawa nin mamomoton na konsiderasyon ni Abraham.—1 Pedro 3:10-12.
17. Taano ta masasabi niato na nahusay sa matoninong na paagi an garo baga pagkarinayoan nin boot may labot ki Pablo, Bernabe, asin Marcos?
17 Horophoropa kun paano an may pagtubod na pag-aplikar kan Kristianong mga prinsipyo puedeng makatabang sato na mapaoswag an katoninongan. Kan mapoon na si Pablo sa saiyang ikaduwang pagbiahe sa pagmimisyonero, uminoyon si Bernabe sa planong songkoon liwat ninda an mga kongregasyon sa Chipre asin Asia Minor. Minsan siring, gusto ni Bernabe na iiba an saiyang pinsan na si Marcos. Kontra si Pablo huli ta binayaan sinda kaidto ni Marcos sa Panfilia. Nangyari “an grabeng pagputok nin kaanggotan,” asin an pagdiskutiran na ini nagin dahelan nin pagsuwayan. Iiniba ni Bernabe si Marcos sa Chipre, mantang pinili ni Pablo si Silas bilang saiyang kaibaiba asin “nag-agi sa Siria asin Cilicia, na pinakokosog an mga kongregasyon.” (Gibo 15:36-41) Pag-abot nin panahon, nahusay an garo baga pagkarinayoan nin boot, huli ta si Marcos kaibanan na ni Pablo sa Roma, asin an apostol nagtaram nin paborable manongod sa saiya. (Colosas 4:10; Filemon 23, 24) Kan si Pablo bilanggo sa Roma kan mga 65 C.E., sinabihan nia si Timoteo: “Kuanon mo si Marcos asin ipag-iba mo, huli ta sia magagamit ko sa paglilingkod.” (2 Timoteo 4:11) Minalataw na iiniba ni Pablo sa saiyang mga pamibi na may pagtubod an manongod sa saiyang relasyon ki Bernabe asin Marcos, asin nagbunga ini nin katrangkilohan na konektado sa “katoninongan nin Dios.”—Filipos 4:6, 7.
18. Ano an posibleng marhay na nangyari sa kaso ni Euodias asin Sintique?
18 Siempre, huling bakong sangkap, “kita gabos nasisingkog nin dakol na beses.” (Santiago 3:2) May naglataw na mga dai pagkasinabotan sa pag-oltanan nin duwang Kristiana, na manongod sa sainda nagsurat si Pablo: “Si Euodias sinasadol ko asin si Sintique sinasadol ko na magkasaro sa pag-iisip dian sa Kagurangnan. . . . Danay mong tabangan an mga babaeng ini na nagpagal sa kaibanan ko sa maogmang bareta.” (Filipos 4:1-3) Posibleng marhay na hinusay nin matoninong kan diosnon na mga babaeng ini an problema ninda paagi sa pag-aplikar kan hatol na arog kan nakasurat sa Mateo 5:23, 24. An may pagtubod na pag-aplikar kan mga prinsipyo sa Kasuratan dakula an magigibo tanganing mapaoswag an katoninongan ngonyan.
An Pagtubod Nagpapangyari Sato na Makatagal
19. Anong masakit na situwasyon an dai noarin man nakaraot sa pagtubod ni Isaac asin Rebeca?
19 Paagi sa pagtubod matatagalan ta man an masakit na kamugtakan. Tibaad napupurisaw kita huli ta an sarong bautisadong miembro kan satong pamilya nakisuway sa Dios paagi sa pag-agom nin daing pagtubod. (1 Corinto 7:39) Napurisaw si Isaac asin Rebeca huli ta an aki nindang si Esau nag-agom nin maraot na mga babae. An saiyang mga agom na Hitea an ‘ginigikanan nin kapaitan nin boot’ para sa sainda—kaya ngani si Rebeca nagsabi: “Ikinasusurang ko na nin makuri an buhay kong ini huli sa mga aking babae ni Het. Kun si Jacob maagom sa mga aking babae ni Het na arog kan mga ini na hale sa mga aking babae kan daga, aanhon ko pa an buhay?” (Genesis 26:34, 35; 27:46) Pero, an masakit na situwasyon na ini dai noarin man nakaraot sa pagtubod ni Isaac asin Rebeca. Logod na papagdanayon niato an makosog na pagtubod kun magin depisil na atubangon an masakit na mga kamugtakan.
20. Ano an mga halimbawa niato nin pagtubod ki Noemi asin Rut?
20 An naggugurang nang balo na si Noemi sarong Judeana asin aram nia na an nagkapirang babae sa Juda puedeng magkaaki nin mga lalaki na magigin mga apoon kan Mesiyas. Minsan siring, huling nagadan na daing aki an saiyang mga aking lalaki asin sia lampas na sa edad nin pangangaki, sadit nanggad an posibilidad na an saiyang pamilya mapabilang pa sa magigin mga apoon kan Mesiyas. Alagad ta an saiyang balong manugang na babae na si Rut nagin agom kan may edad nang si Booz, nagkaaki sa saiya, asin nagin apoon ni Jesus, an Mesiyas! (Genesis 49:10, 33; Rut 1:3-5; 4:13-22; Mateo 1:1, 5) An pagtubod ni Noemi asin Rut nakatagal sa masakit na kamugtakan asin nagtao sainda nin kagayagayahan. Mapapasato man an dakulang kagayagayahan kun papagdadanayon niato an pagtubod sa atubangan nin masakit na kamugtakan.
21. Ano an nagigibo para sa sato kan pagtubod, asin ano an maninigong magin determinasyon niato?
21 Minsan ngani bilang indibiduwal dai niato masasabi kun ano an mangyayari sato sa aga, paagi sa pagtubod puede niatong atubangon an ano man na angat. An pagtubod ginigibo kitang makosog an boot asin mapasensia. Iyan nagtatao sato kan pinakahalangkaw na mga pasohan asin nakakokontentong buhay. An pagtubod may positibong mga epekto sa satong relasyon sa iba asin nakatatagal sa masakit na kamugtakan. Kun siring logod na kita magin “an klase na may pagtubod sa ikapagdadanay na buhay kan kalag.” (Hebreo 10:39) Sa kosog kan satong mamomoton na Dios, si Jehova, asin sa saiyang ikamumuraway, padagos kitang magin makosog sa pagtubod.
Ano an Isisimbag Nindo?
• Ano an prueba sa Kasuratan na puedeng gibohon kan pagtubod na magin makosog an satong boot?
• Taano ta masasabi niato na an pagtubod nagtatao sato nin nakakokontentong buhay?
• Paano pinaooswag nin pagtubod an katoninongan?
• Ano an prueba na pinangyayari kan pagtubod na matagalan niato an masakit na kamugtakan?
[Mga Hapot Para sa Pag-adal]
[Mga Ritrato sa pahina 16]
An pagtubod nagtao ki Noe asin Enoc kan kosog nin boot na ipahayag an mga mensahe ni Jehova
[Mga Ritrato sa pahina 17]
An pagtubod na arog kan ki Moises nagpapahiro sato na pagmaigotan na aboton an espirituwal na mga pasohan
[Mga Ritrato sa pahina 18]
An asegurasyon kan tabang nin Dios nagpakosog sa pagtubod ni Barac, Debora, asin Gedeon