Pagkinabang sa Mamomoton na Kabootan ni Jehova

“Siisay an madonong? Sia . . . magpapaheling na sia may pagmangno sa mga mamomoton na kabootan ni Jehova.”​—SALMO 107:43.

1. Kasuarin enot na ginamit sa Biblia an pananaram na “mamomoton na kabootan,” asin anong mga hapot mapadapit sa kualidad na ini an eestudyaran niato?

 KAIDTONG mga 4,000 na taon na an nakaagi, an sobrino ni Abraham na si Lot nagsabi dapit ki Jehova: “Ibinabantog mo an kadakulaan kan saimong mamomoton na kabootan.” (Genesis 19:19) Ini an kaenot-enoteng paglataw sa Biblia kan pananaram na “mamomoton na kabootan.” Si Jacob, Noemi, David, asin iba pang lingkod nin Dios nagtaram man dapit sa kualidad na ini ni Jehova. (Genesis 32:10; Rut 1:8; 2 Samuel 2:6) Sa katunayan, an mga terminong “mamomoton na kabootan” asin “mga mamomoton na kabootan” minalataw nin mga 250 beses sa Ingles na New World Translation of the Holy Scriptures. Alagad ano an mamomoton na kabootan ni Jehova? Kiisay iyan ipinaheling kan nakaaging panahon? Asin paano kita nakikinabang dian ngonyan?

2. Taano ta depisil na marhay na tawan nin kahulogan an termino sa Hebreo na trinadusir na “mamomoton na kabootan,” asin ano an saro pang angay na traduksion kaiyan?

² Sa Kasuratan, an “mamomoton na kabootan” traduksion nin sarong termino sa Hebreo na pano nin kahulogan kaya an kadaklan na lenguahe mayo nin sasarong tataramon na eksaktong nagpapahayag kan bilog na kahulogan kaiyan. Sa siring, an mga traduksion na arog kan “pagkamoot,” “pagkaherak,” asin “pagigin fiel” dai nagtatao kan bilog na kahulogan kaiyan. Minsan siring, an mas mahiwas na traduksion na “mamomoton na kabootan” “bakong harayo sa bilog na kahulogan kan tataramon na iyan,” an sabi kan Theological Wordbook of the Old Testament. An Ingles na New World Translation of the Holy Scriptures​​—With References angay na itinatao an “maimbod na pagkamoot” bilang saro pang traduksion kan termino sa Hebreo na trinadusir na “mamomoton na kabootan.”​—Exodo 15:13; Salmo 5:7; nota sa ibaba.

Laen sa Pagkamoot Asin Kaimbodan

3. Ano an kalaenan kan mamomoton na kabootan asin kan pagkamoot?

³ An mamomoton na kabootan, o maimbod na pagkamoot, konektadong marhay sa mga kualidad na pagkamoot asin kaimbodan. Pero, iyan laen sa mga iyan sa importanteng mga paagi. Estudyare kun paano magkalaen an mamomoton na kabootan asin pagkamoot. An pagkamoot puedeng iaplikar sa mga bagay asin ideya. An Biblia nagtataram manongod sa ‘pagkamoot sa arak asin lana’ asin ‘pagkamoot sa kadonongan.’ (Talinhaga 21:17; 29:3) Alagad an mamomoton na kabootan konektado sa mga tawo, bakong sa mga ideya o mga bagay na daing buhay. Halimbawa, mga tawo an kalabot kan sabihon kan Exodo 20:6 na si Jehova “nagsasagibo nin mamomoton na kabootan sa ikasangribong kapag-arakian.”

4. Ano an kalaenan kan mamomoton na kabootan asin kan kaimbodan?

⁴ An termino sa Hebreo na trinadusir na “mamomoton na kabootan” mas mahiwas man an kahulogan kisa tataramon na “kaimbodan.” Sa nagkapirang lenguahe, an “kaimbodan” parateng ginagamit para sa aktitud na maninigo na ipaheling nin sarong mas hababa sa mas halangkaw sa saiya. Alagad siring kan sabi nin sarong parasiyasat, base sa Biblikong punto de vista, an mamomoton na kabootan “nanonongod nin mas parate sa mismong ibong na lado nin relasyon: an makapangyarihan maimbod sa maluya o nangangaipo o nagsasarig.” Si Hadeng David kun siring puedeng makimaherak ki Jehova: “Pasiranga an saimong lalauogon sa saimong lingkod. Iligtas mo ako sa saimong mamomoton na kabootan.” (Salmo 31:16) Si Jehova, an makapangyarihan, pinakikiolayan na magpaheling nin mamomoton na kabootan, o maimbod na pagkamoot, sa nangangaipo, si David. Huling an nangangaipo mayo nin  autoridad sa makapangyarihan, an mamomoton na kabootan sa siring na kamugtakan ipinaheheling nin gikan sa boot, bakong sa kapiritan.

5. (a) Anong mga karakteristiko kan mamomoton na kabootan nin Dios an lataw sa saiyang Tataramon? (b) Anong mga kapahayagan kan mamomoton na kabootan ni Jehova an eestudyaran niato?

⁵ “Siisay an madonong?” an hapot kan salmista. “Sia . . . magpapaheling na sia may pagmangno sa mga mamomoton na kabootan ni Jehova.” (Salmo 107:43) An mamomoton na kabootan ni Jehova puedeng magbunga nin pagkaligtas asin pagdadanay na buhay. (Salmo 6:4; 119:​88, 159) Iyan proteksion asin sarong bagay na nagpapaginhawa sa mga problema. (Salmo 31:​16, 21; 40:11; 143:12) Huli sa kualidad na ini, posible an pagkapaomay sa kasalan. (Salmo 25:7) Paagi sa pagrepaso sa nagkapirang estorya sa Kasuratan asin pagheling sa ibang teksto sa Biblia, maheheling niato na an mamomoton na kabootan ni Jehova (1) ipinahahayag paagi sa espesipikong mga gibo asin (2) naeeksperyensiahan kan saiyang fiel na mga lingkod.

Pagliligtas—Sarong Kapahayagan nin Mamomoton na Kabootan

6, 7. (a) Paano ibinantog ni Jehova an kadakulaan kan saiyang mamomoton na kabootan sa nangyari ki Lot? (b) Kasuarin sinambit ni Lot an mamomoton na kabootan ni Jehova?

⁶ An pinakamarahay gayod na paagi na maaraman kun sagkod saen an sakop kan mamomoton na kabootan ni Jehova iyo na siyasaton an mga pagkasaysay sa Kasuratan na may koneksion sa kualidad na ini. Sa Genesis 14:1-16, maheheling ta na si Lot, an sobrino ni Abraham, binihag kan kalaban na mga hukbo. Alagad isinalbar ni Abraham si Lot. An buhay ni Lot nameligro liwat kan magdesisyon si Jehova na laglagon an maraot na siudad nin Sodoma, kun saen nag-eerok si Lot asin an saiyang pamilya.​—Genesis 18:20-22; 19:​12, 13.

⁷ Bago linaglag an Sodoma, inalalayan kan mga anghel ni Jehova si Lot asin an saiyang pamilya paluwas sa siudad. Kan panahon na idto, si Lot nagsabi: “An saimong lingkod nakanompong nin pabor sa saimong pagheling kaya ibinabantog mo an kadakulaan kan saimong mamomoton na kabootan, na ginibo mo sa sako tanganing ingatan na buhay an sakong kalag.” (Genesis 19:​16, 19) Paagi sa mga tataramon na ini rinekonoser ni Lot na si Jehova nagpaheling nin pambihirang mamomoton na kabootan paagi sa pagsalbar sa saiya. Sa pangyayaring ini, an mamomoton na kabootan nin Dios ipinahayag paagi sa pagliligtas asin pagpapadanay na buhay.​—2 Pedro 2:7.

An Mamomoton na Kabootan ni Jehova Asin an Saiyang Paggiya

8, 9. (a) Ano an ipinagigibo sa surugoon ni Abraham? (b) Taano ta namibi an surugoon para sa mamomoton na kabootan nin Dios, asin ano an nangyari mantang sia namimibi?

⁸ Sa Genesis kapitulo 24, mababasa niato an manongod sa saro pang kapahayagan nin mamomoton na kabootan, o maimbod na pagkamoot, nin Dios. An pagkasaysay nagsasabi na sinugo ni Abraham an saiyang surugoon na magduman sa nasyon kan mga paryente ni Abraham tanganing ihanap nin aagomon an saiyang aking si Isaac. (Bersikulo 2-4) Masakit an misyon, alagad sinierto sa surugoon na gigiyahan sia kan anghel ni Jehova. (Bersikulo 7) Sa kahurihurihi, an surugoon nakaabot sa sarong bubon sa luwas kan “siudad ni Nacor” (magsalang Haran o kaharaning lugar) na natagbong padangadang na an mga babae tanganing sumakdo nin tubig. (Bersikulo 10, 11) Kan maheling niang paparani na an mga babae, aram nia na nagdatong na an importanteng oras kan saiyang misyon. Alagad paano man nanggad daw nia mapipili an tamang babae?

⁹ Nakaaaram na kaipuhan nia an tabang nin Dios, an surugoon ni Abraham namibi: “Jehova na Dios kan sakong kagurangnan na si Abraham, papangyariha, tabi, iyan sa atubangan ko sa aldaw na ini asin gibohan mo nin mamomoton na kabootan an sakong kagurangnan na si Abraham.” (Bersikulo 12) Paano ipahahayag ni Jehova an saiyang mamomoton na kabootan? An surugoon naghagad nin espesipikong tanda na paagi kaiyan mamimidbid nia an hoben na babae na pinili nin Dios. (Bersikulo 13, 14) An sarong babae ginibo an eksaktong hinagad nia ki Jehova. Tara, garo man sana nadangog nin dai tinutuyo kan babae an pamibi nia! (Bersikulo 15-​20) Napangalas nin labi-labi, an surugoon “pinagmamasdan sia sa pagngalas.” Pero, may nagkapirang mahalagang marhay na impormasyon na kaipuhan na maaraman. An magayon na babae daw na ini saro sa mga paryente ni Abraham? Asin mayo pa daw sia nin agom? Kaya an surugoon “dai sana naggigirong tanganing maaraman kun baga pinapanggana ni Jehova o dai an saiyang lakaw.”​—Bersikulo 16, 21.

10. Taano ta nagkonklusyon an surugoon ni Abraham na si Jehova nagpahayag nin mamomoton na kabootan sa saiyang kagurangnan?

¹⁰ Dai nahaloy pakatapos kaiyan, an hoben na babae nagpamidbid na sia “an aki ni Betuel na aki ni Milca, na ipinangaki nia [sa tugang ni Abraham na si] Nacor.” (Genesis 11:26; 24:24) Sa puntong iyan narealisar kan surugoon na sinimbag ni Jehova an saiyang pamibi. Sa pagkabigla, sia nagduko asin nagsabi: “Pag-omawon si Jehova na Dios kan sakuyang kagurangnan na si Abraham, na dai nagbaya sa saiyang mamomoton na kabootan asin sa saiyang pagigin mapagtitiwalaan para sa sakuyang kagurangnan. Mantang ako paduman, giniyahan ako ni Jehova pasiring sa harong kan mga tugang kan sakong kagurangnan.” (Bersikulo 27) Paagi sa pagtao nin giya, pinahelingan nin Dios nin mamomoton na kabootan an kagurangnan kan surugoon, si Abraham.

An Mamomoton na Kabootan nin Dios Nagtatao nin Kaginhawahan Asin Proteksion

11, 12. (a) Durante nin anong mga pagbalo naeksperyensiahan ni Jose an mamomoton na kabootan ni Jehova? (b) Paano ipinahayag an mamomoton na kabootan nin Dios sa kamugtakan ni Jose?

¹¹ Sunod, estudyaran niato an Genesis kapitulo 39. Iyan nakasentro sa makoapo sa tuhod ni Abraham na si Jose, na ipinabakal sa pagkaoripon  sa Egipto. Minsan siring, “si Jehova nasa ki Jose.” (Bersikulo 1, 2) Sa katunayan, maski an Egipciong kagurangnan ni Jose, si Potifar, nagkonklusyon na si Jehova nasa ki Jose. (Bersikulo 3) Minsan siring, napaatubang si Jose sa sarong magabat na marhay na pagbalo. Sia putik na sinahotan na nagprobar na lupigan an agom ni Potifar asin ibinilanggo sia. (Bersikulo 7-20) Duman “sa bilanggoan” ‘pinasakitan ninda an saiyang mga bitis paagi sa mga ramal, namugtak sa mga batbat an saiyang kalag.’​—Genesis 40:15; Salmo 105:18.

¹² Ano an nangyari durante kan partikularmenteng masakit na eksperyensiang idto? “Si Jehova idtoon ki Jose asin padagos siang tinatawan nin mamomoton na kabootan.” (Bersikulo 21a) An sarong partikular na akto nin mamomoton na kabootan pinonan nin sunod-sunod na pangyayari na kan huri nagtao nin kaginhawahan sa mga problemang inaagihan ni Jose. Pinapangyari ni Jehova na si Jose “makakua nin biyaya sa mga mata kan poon na opisyal kan harong na bilanggoan.” (Bersikulo 21b) Bilang resulta, si Jose ibinugtak kan opisyal sa sarong responsableng katongdan. (Bersikulo 22) Sunod, nakamidbid ni Jose an tawo na kan huri iinatubang sia ki Faraon, an namamahala sa Egipto. (Genesis 40:​1-4, 9-​15; 41:​9-​14) Dangan, an hade ilinangkaw si Jose sa katongdan nin pagigin ikaduwang namamahala sa Egipto, na nagresulta sa paggibo nia nin sarong nagliligtas-buhay na gibohon sa dinadamat nin taggutom na daga nin Egipto. (Genesis 41:37-55) An pagdusa ni Jose nagpoon kan sia 17 anyos asin naglawig nin labi sa doseng taon! (Genesis 37:​2, 4; 41:46) Alagad durante kan mga taon na idto nin kapurisawan asin makuring  sakit, ipinaheling ni Jehova Dios an saiyang mamomoton na kabootan ki Jose paagi sa pagprotehir sa saiya sa biyong kalamidad asin paagi sa pagpadanay sa saiyang buhay para sa sarong pribilehiadong papel sa katuyohan nin Dios.

An Mamomoton na Kabootan nin Dios Nungka na Nasusudya

13. (a) Anong mga kapahayagan kan mamomoton na kabootan ni Jehova an manonompongan sa Salmo 136? (b) Ano man nanggad an mamomoton na kabootan?

¹³ Paorootrong ipinahayag ni Jehova an saiyang mamomoton na kabootan sa mga Israelita bilang sarong nasyon. Isinasaysay kan Salmo 136 na huli sa saiyang mamomoton na kabootan, sinda saiyang ilinigtas (Bersikulo 10-​15), giniyahan (Bersikulo 16), asin prinotehiran. (Bersikulo 17-​20) Ipinaheling man nin Dios an saiyang mamomoton na kabootan sa mga indibiduwal. An saro na nagpapaheling nin mamomoton na kabootan sa kapwa ginigibo iyan paagi sa boluntad na mga gibo na an katuyohan itao an sarong importanteng pangangaipo. May labot sa mamomoton na kabootan, an sarong reperensia sa Biblia nagsasabi: “Iyan sarong akto na pinapagdadanay o pinaooswag an buhay. Iyan pag-interbenir para sa kapakanan nin saro na nag-aagi nin remalaso o kasakitan.” Sinasabi nin sarong intelektuwal na iyan “pagkamoot na isinasagibo.”

14, 15. Taano ta nakasesegurado kita na si Lot sarong inooyonan na lingkod nin Dios?

¹⁴ Ipinaheheling kan pagkasaysay sa Genesis na siniyasat niato na si Jehova nungkang nasusudya na magpaheling nin mamomoton na kabootan sa mga namomoot sa saiya. Si Lot, Abraham, asin Jose nabuhay sa laen-laen na kamugtakan asin napaatubang sa napapalaen na mga pagbalo. Sinda mga tawong bakong sangkap, alagad sinda inooyonan na mga lingkod ni Jehova, asin nangaipo sinda nin tabang nin Dios. Mararanga kita kan katunayan na an satong mamomoton na langitnon na Ama nagpapaheling nin mamomoton na kabootan sa siring na mga indibiduwal.

¹⁵ Si Lot may ginibong bakong madonong na mga desisyon na nagbunga nin mga kasakitan. (Genesis 13:​12, 13; 14:​11, 12) Pero, nagpaheling man sia nin kaomaw-omaw na mga kualidad. Kan an duwang anghel nin Dios mag-abot sa Sodoma, pinahelingan sinda ni Lot nin pagkamapagpasakat. (Genesis 19:1-3) Huli sa pagtubod pinatanidan nia an saiyang mga manugang na lalaki manongod sa madali nang paglaglag sa Sodoma. (Genesis 19:14) An pagheling nin Dios ki Lot manonompongan sa 2 Pedro 2:7-9, kun saen satuyang mababasa: “Ilinigtas [ni Jehova] an matanos na si Lot, na napupurisaw na gayo sa pagpangana kan mga makisuway sa ley sa malaswang gawe​​—huli ta an matanos na tawong idto huli sa saiyang naheheling asin nadadangog mantang nag-eerok sa tahaw ninda aroaldaw nagsasakit an saiyang matanos na kalag huli sa saindang mga katampalasanan​​—si Jehova tataong magligtas sa mga tawong may diosnon na debosyon hale sa pagbalo.” Iyo, si Lot tawong matanos, asin an mga tataramon na ginamit digdi nagpaparisa na sia tawong may diosnon na debosyon. Arog nia, nakakamtan niato an mamomoton na kabootan nin Dios mantang kita  nagsasagibo nin “banal na mga gawe asin gibo nin diosnon na debosyon.”​—2 Pedro 3:​11, 12.

16. Ano an paborableng sinasabi kan Biblia manongod ki Abraham asin Jose?

¹⁶ Malinaw na ipinaheheling kan pagkasaysay sa Genesis kapitulo 24 an dayupot na relasyon ni Abraham ki Jehova. An enot na bersikulo nagsasabi na “binendisyonan ni Jehova si Abraham sa gabos na bagay.” An surugoon ni Abraham inapod si Jehova na an “Dios kan sakong kagurangnan na si Abraham.” (Bersikulo 12, 27) Asin sinasabi ni disipulo Santiago na si Abraham “ipinahayag na matanos” asin “inapod na ‘katood ni Jehova.’” (Santiago 2:21-23) Totoong-totoo man iyan ki Jose. An dayupot na relasyon ni Jehova asin ni Jose idinodoon sa bilog na kapitulo 39 kan Genesis. (Bersikulo 2, 3, 21, 23) Dugang pa, mapadapit ki Jose, si disipulo Esteban nagsabi: “An Dios nasa saiya.”​—Gibo 7:9.

17. Ano an manonodan niato sa mga halimbawa ni Lot, Abraham, asin Jose?

¹⁷ An mga nag-ako kan mamomoton na kabootan nin Dios na tinokar pa sana niato mga indibiduwal na may marahay na relasyon ki Jehova Dios asin nagkaigwa nin kabtang sa katuyohan nin Dios sa nagkapirang paagi. Napaatubang sinda sa mga kaolangan na puedeng dai kutana ninda napangganahan kun sa sainda sanang sadiri. Nameligro an pagdadanay na buhay ni Lot, an pagpapadagos kan linahe ni Abraham, asin an pagsegurado kan papel ni Jose. Si Jehova sana an puedeng magtao kan mga pangangaipo kan diosnon na mga tawong ini, asin iyan nanggad an ginibo nia paagi sa pag-interbenir na may mga gibo nin mamomoton na kabootan. Tanganing maeksperyensiahan niato sagkod lamang an mamomoton na kabootan ni Jehova Dios, kita dapat man na magkaigwa nin dayupot na personal na relasyon sa saiya, asin dapat na padagos niatong gibohon an saiyang kabotan.​—Esdras 7:28; Salmo 18:50.

Tinatawan nin Pabor an mga Lingkod nin Dios

18. Ano an sinasabi nin manlaenlaen na teksto sa Biblia manongod sa mamomoton na kabootan ni Jehova?

¹⁸ An mamomoton na kabootan ni Jehova “nakapano sa daga,” asin kanigoan an pag-apresyar niato sa kualidad na ini nin Dios! (Salmo 119:64) Bilog na puso kitang minasimbag sa koro kan salmista: “O magpasalamat logod an mga tawo ki Jehova huli sa saiyang mamomoton na kabootan asin huli sa saiyang makangangalas na mga ginibo sa mga aki nin tawo.” (Salmo 107:​8, 15, 21, 31) Naggagayagaya kita na ipinaaabot ni Jehova an saiyang mamomoton na kabootan sa saiyang inooyonan na mga lingkod​—magsalang bilang indibiduwal o bilang grupo. Sa pamibi, inapod ni propeta Daniel si Jehova bilang an “tunay na Dios, an Saro na dakula asin an Saro na makangingirhat, na nag-ootob kan tipan asin kan mamomoton na kabootan sa mga namomoot sa saiya asin sa mga nag-ootob kan saiyang mga togon.” (Daniel 9:4) Namibi si Hadeng David: “Ipagpadagos mo an saimong mamomoton na kabootan sa mga nakamimidbid sa saimo.” (Salmo 36:10) Kanigoan an pasalamat niato na si Jehova nagpapahayag nin mamomoton na kabootan sa saiyang mga lingkod!​—1 Hade 8:23; 1 Cronica 17:13.

19. Sa masunod na artikulo, eestudyaran niato an anong mga hapot?

¹⁹ Totoo nanggad, tinatawan kita nin pabor bilang banwaan ni Jehova! Apuera sa pagkinabang sa pagkamoot nin Dios na ipinaheheling sa katawohan sa pankagabsan, kita nagkakamit nin napapalaen na mga bendisyon na bunga kan mamomoton na kabootan, o maimbod na pagkamoot, kan satong langitnon na Ama. (Juan 3:16) Nangorogna sa panahon nin pangangaipo na kita nakikinabang sa mahalagang marhay na kualidad na ini ni Jehova. (Salmo 36:7) Alagad paano niato maaarog an mamomoton na kabootan ni Jehova Dios? Kita daw bilang mga indibiduwal nagpapaheling kan pambihirang kualidad na ini? An mga ini asin an konektadong mga hapot eestudyaran sa sunod na artikulo.

Nagigirumdoman daw Nindo?

• Ano an saro pang sono sa Kasuratan na traduksion kan “mamomoton na kabootan”?

• Ano an kalaenan kan mamomoton na kabootan sa pagkamoot asin kaimbodan?

• Sa anong mga paagi nagpaheling si Jehova nin mamomoton na kabootan ki Lot, Abraham, asin Jose?

• Anong kasegurohan an makukua niato sa mga kapahayagan ni Jehova nin mamomoton na kabootan kan nakaagi?

[Mga Hapot Para sa Pag-adal]

[Ritrato sa pahina 13]

Aram daw nindo kun paano an Dios nagpaheling nin mamomoton na kabootan ki Lot?

[Mga ritrato sa pahina 15]

Huli sa saiyang mamomoton na kabootan, giniyahan ni Jehova an surugoon ni Abraham

[Mga ritrato sa pahina 16]

Nagpahayag si Jehova nin mamomoton na kabootan paagi sa pagprotehir ki Jose