Bareta kan mga Parabalangibog kan Kahadean

“Sala an Idinayal Mong Numero”

SA Johannesburg, Aprika del Sur, si Leslie asin Caroline nagsasarosalida sa paghuhulit paagi sa telepono sa mga tawong nag-iistar sa sarong komunidad nin mga retirado na guardiadong marhay. Pira sana an nanompongan ninda na nasa harong asin kakadikit kan may interes sa saindang Kristianong mensahe, kaya naparigon an boot ni Caroline kan nagsimbag an sarong babae.

“Iyo tabi ini si Mrs. B​​—?” an hapot ni Caroline.

“Ay, bako,” sabi nin sarong makikatood na boses, “Ako si Mrs. G​​—. Sala an idinayal mong numero.”

Narisa an init sa saiyang boses, si Caroline nagsabi: “Bueno, togotan mo tabi akong ipaliwanag an gusto kong sabihon ki Mrs. B​​—.” Dangan pinonan niang ipakipag-olay an manongod sa mga bendisyon kan madatong na Kahadean nin Dios. Pakatapos na magibo an mga areglo na ihatod an brosyur na Ano an Kahagadan sa Sato nin Dios?, si Mrs. G​​— naghapot: “Kulibat palan, ano an relihion nindo?”

“Kami mga Saksi ni Jehova,” an simbag ni Caroline.

“Ay, dai, habo ko kan relihion na iyan! Seguro dai na kita kaipuhan na maghelingan.”

“Alagad Mrs. G​​—,” an pakiolay ni Caroline, “sa nakaaging 20 minutos, ikinahiras ko sa saindo an pinakamakangangalas na paglaom, na itinotokdo hale sa Biblia kun ano an madali nang gibohon kan Kahadean nin Dios para sa katawohan. Naogma kamong marhay na madangog an mga bagay na ini​​—emosyonal pa ngani​​—asin dakol pang gustong manodan. Ano talaga an aram nindo manongod sa Mga Saksi ni Jehova? Kun kamo may helang, mapasiring daw kamo sa sarong mekaniko? Taano ta dai nindo ako togotan na sabihon sa saindo kun ano an tinutubod kan Mga Saksi ni Jehova?”

Pakalihis nin kadikit na pagsilensio sia nagsimbag: “Sa paghona ko tama ka. Mas marahay na dumigdi ka. Alagad gusto kong maintindihan mo na nungka mo akong makokombertir!”

“Mrs. G​​—, nungka ko kamong makokombertir dawa kun gusto ko,” an simbag ni Caroline. “Si Jehova sana an makagigibo kaiyan.”

An pagdalaw tanganing ihatod an brosyur nagin mapanggana, asin si Mrs. G​​— (si Betty) nag-oyon sa saro pang pagsongko. Kan magbalik si Caroline, sinabi ni Betty na sinabi nia sa kairiba niang mga babae sa komedor na sia makikipag-olay sa mga Saksi ni Jehova. “Taano ta ginibo mo iyan?” an hapot ninda, na iminumustra an saindang mga kamot sa pagkontra. “An mga tawong iyan dai ngani nagtutubod ki Jesus!”

Tolos na ipinagirumdom ni Caroline ki Betty an pinakamayor na punto kan nakaagi nindang napag-olayan manongod sa Kahadean nin Dios.

“Siisay an magigin Hade?” an hapot ni Caroline.

“Tara, si Jesus,” an simbag ni Betty.

“Siempre,” an sabi ni Caroline. Dangan ipinaliwanag nia na an Mga Saksi ni Jehova nagtutubod na si Jesus Aki nin Dios, alagad bako siang kapantay nin Dios na kabtang nin sarong Trinidad.​—Marcos 13:32; Lucas 22:42; Juan 14:28.

Pakalihis nin pira pang mga pagdalaw, narisa na minsan ngani sia igwa nin positibo, maogmang aktitud, si Betty maluya an salud. Sa katunayan, sia igwa nin kanser asin natatakot na magadan. “Kutana nadangog ko na an mga bagay na ini kan nakaaging mga taon asin magkapareho na kita nin pagtubod,” an pagtuga nia. Rinanga sia ni Caroline paagi sa pagpaheling sa saiya nin mga teksto na ilinaladawan an kagadanan bilang sarong nanok na pagtorog na dian an saro puedeng bumangon sa pagkabuhay liwat. (Juan 11:​11, 25) Nakaparigon ining marhay sa boot ni Betty, na ngonyan regular na sa pag-adal sa Biblia. An saiyang nagluluyang salud sana an nakakaolang sa saiya na mag-atender sa mga pagtiripon sa Kingdom Hall.

Sabi ni Caroline: “Risa kong marhay na ginigiyahan kan mga anghel an gibohon na ini. ‘Sala an pagkadayal ko sa numero’ ni Betty, asin isip-isipa na sana, sia 89 anyos!”​—Kapahayagan 14:6.