Tinotokdoan Kita ni Jehova Kun Paano Bibilangon an Satong mga Aldaw

“Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.”​—SALMO 90:12.

1. Taano ta angay na hagadon ki Jehova na tokdoan kita kun paano ‘bibilangon an satong mga aldaw’?

SI Jehova Dios an satong Kaglalang asin Paratao nin Buhay. (Salmo 36:9; Kapahayagan 4:11) Kun siring mayo nang ibang nasa mas marahay na kamugtakan na magtokdo sa sato kun paano gagamiton an satong mga taon nin buhay sa madonong na paagi. Angay nanggad, kun siring, an salmista nakimaherak sa Dios: “Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.” (Salmo 90:12) An ika-90 Salmo, na dian ta manonompongan an pagngayongayo na iyan, maninigo nanggad niatong maingat na estudyaran. Pero enot, magkaigwa kita nin halipot na sumaryo kan ipinasabong nin Dios na awit na ini.

2. (a) Siisay an sinasabing kompositor kan Salmo 90, asin kasuarin iyan tibaad isinurat? (b) Paano maninigong makaapektar sa satong pagmansay sa buhay an ika-90 Salmo?

² An nota sa itaas kan Salmo 90 inaapod iyan na “awit ni Moises, an tawo kan tunay na Dios.” Huling idinodoon kan salmong ini an pagigin halipot kan buhay nin tawo, posibleng marhay na ini isinurat pakatapos na kaldahon an mga Israelita sa pagkaoripon sa Egipto asin durante kan 40 taon na pagbaklay ninda sa kaawagan, kan an rinibong nagadan tuminapos sa sarong daing pagtubod na kapag-arakian. (Bilang 32:9-13) Sa paano man, ipinaheheling kan Salmo 90 na an buhay nin bakong sangkap na mga tawo halipot. Malinaw nanggad, kun siring, maninigo tang gamiton sa madonong na paagi an satong mahalagang marhay na mga aldaw.

3. Ano an pinakalaog kan Salmo 90?

³ Sa Salmo 90, an bersikulo 1 sagkod 6 ipinamimidbid si Jehova bilang satong daing sagkod na erokan. An bersikulo 7 sagkod 12 nagpapaheling kun ano an kaipuhan ta tanganing magamit an satong marikas umaging mga taon nin buhay sa paagi na makawiwili sa saiya. Asin siring kan ipinahayag sa bersikulo 13 sagkod 17, odok niatong minamawot na mag-ako kan mamomoton na kabootan asin bendisyon ni Jehova. Siempre, dai sinasabi nin patienot kan salmong ini an satong indibiduwal na  mga eksperyensia bilang mga lingkod ni Jehova. Minsan siring, maninigo niatong personal na isapuso an mapagngayongayong mga sentimiento kaiyan. Kun siring maingat na siyasaton niato an Salmo 90 paagi sa mata kan mga dusay sa Dios.

Si Jehova—An Satong “Tunay na Erokan”

4-6. Paano si Jehova sarong “tunay na erokan” para sa sato?

⁴ An salmista minapoon paagi sa mga tataramon na: “O Jehova, ika nagin tunay na erokan niamo sa sunod-sunod na kapag-arakian. Bago pa man namundag an mga bukid, o paluwason mo na garo may kolog sa pangangaki an daga asin an mabungang kinaban, poon pa ngani sa panahon na daing talaan sagkod sa panahon na daing talaan ika iyo an Dios [o, an Banal na Saro].”​—Salmo 90:​1, 2, nota sa ibaba.

⁵ Para sa sato an “Dios na daing katapusan,” si Jehova, sarong “tunay na erokan”​—sarong espirituwal na pailihan. (Roma 16:26) Nakamamate kitang tiwasay, huli ta yaon sia pirme tanganing tumabang sa sato bilang an “Paradangog nin pamibi.” (Salmo 65:2) Huling itinatao ta sa satong langitnon na Ama an satong mga kahaditan paagi sa saiyang namomotan na marhay na Aki, ‘an katoninongan nin Dios na minalampas sa gabos na kaisipan iniingatan an satong puso asin pag-isip.’​—Filipos 4:​6, 7; Mateo 6:9; Juan 14:​6, 14.

⁶ Igwa kita nin espirituwal na katiwasayan huli ta, sa piguratibong pagtaram, si Jehova sarong “tunay na erokan” para sa sato. Sia nagtatao man nin ‘panlaog na mga kuarto’​—na posibleng konektadong marhay sa mga kongregasyon kan saiyang banwaan​—bilang espirituwal na lugar nin proteksion, kun saen an mamomoton na mga pastor dakula an ikinokontribwir sa satong pakamate nin katiwasayan. (Isaias 26:20; 32:​1, 2; Gibo 20:​28, 29) Dugang pa, an nagkapira sa sato kabilang sa mga pamilya na igwa nin halawig na kasaysayan nin paglilingkod sa Dios asin personal na naeksperyensiahan an saiyang pagigin ‘tunay na erokan sa sunod-sunod na kapag-arakian.’

7. Sa anong sentido na an mga bukid “namundag” asin an daga pinaluwas na garo may “kolog sa pangangaki”?

⁷ Si Jehova nag-eeksister na bago pa man “namundag” an mga bukid o paluwason an daga na garo may “kolog sa pangangaki.” Kun hehelingon sa punto de vista nin tawo, an paggibo kan dagang ini pati kan gabos na kabtang, kimika, asin komplikadong mga mekanismo kaiyan nagkakaipo nin dakulaon na paghihingoa. Asin sa pagsabing an mga bukid “namundag” asin an daga pinaluwas na garo may “kolog sa pangangaki,” an salmista nagpapaheling nin dakulang paggalang sa kadakolan nin trabahong kalabot kan lalangon ni Jehova an mga bagay na ini. Bako daw na maninigo man kitang magkaigwa nin kaparehong paggalang asin apresasyon sa ginibo kan Kaglalang?

Si Jehova Pirmeng Yaon Tanganing Tumabang sa Sato

8. Ano an boot sabihon kan mga tataramon na si Jehova Dios ‘poon sa panahon na daing talaan sagkod sa panahon na daing talaan’?

⁸ “Poon pa ngani sa panahon na daing talaan sagkod sa panahon na daing talaan ika iyo an Dios,” an inawit kan salmista. An “panahon na daing talaan” puedeng manongod sa mga bagay na igwa nin katapusan alagad dai isinabi nin eksakto an lawig kaiyan. (Exodo 31:​16, 17; Hebreo 9:15) Pero sa Salmo 90:2 asin sa iba pang kabtang kan Hebreong Kasuratan, an “panahon na daing talaan” nangangahulogan nin “daing sagkod.” (Eclesiastes 1:4) Dai masabotan kan satong isip kun paano nagin posible na an Dios kaidto pa danay na nag-eeksister. Pero, si Jehova mayo nin kapinonan asin dai magkakaigwa nin katapusan. (Habacuc 1:12) Sia danay na magigin buhay asin andam na tumabang sa sato.

9. Sa ano ipinapareho kan salmista an sangribong taon na pag-eksister nin tawo?

⁹ Pinasabngan an salmista na ipareho an sangribong taon na pag-eksister nin tawo sa halipot na marhay na panahon sa eksperyensia kan Kaglalang na daing sagkod. Kinakaolay an Dios, sia nagsurat: “Pinababalik mo an magagadanon na tawo sa ronot na bagay, asin nagsasabi ka: ‘Pangagbalik kamo, mga aki nin mga tawo.’ Huli ta an sangribong taon sa saimong mga mata garo sana an kasuodma na nag-agi na, asin garo sana pagbantay sa banggi.”​—Salmo 90:​3, 4.

10. Paano ‘pinababalik nin Dios sa ronot na bagay’ an tawo?

¹⁰ An tawo nagagadan, asin ‘pinababalik sia nin Dios sa ronot na bagay.’ An boot sabihon, an tawo minabalik sa “kabokabo,” bilang ronot, o pulbos, na daga. Garo man sana sinasabi ni Jehova: ‘Bumalik ka sa kabokabo kan daga na hale dian ginibo ka.’ (Genesis 2:7; 3:19) Aplikado ini sa gabos​—makosog o maluya, mayaman o dukha​—ta mayo nin bakong  sangkap na tawo na ‘sa ano man na paagi makababalukat minsan sa tugang, ni makatatao sa Dios nin pantubos para sa saiya, tanganing sia mabuhay sagkod lamang.’ (Salmo 49:6-9) Alagad kanigoan an pasalamat niato na ‘itinao nin Dios an saiyang Aking bugtong, tanganing an lambang naggigibo nin pagtubod sa saiya magkaigwa nin buhay na daing katapusan’!​—Juan 3:16; Roma 6:23.

11. Taano ta masasabi niato na an halawig na panahon sa sato halipot na marhay sa Dios?

¹¹ Sa punto de vista ni Jehova, maski an 969 anyos na si Matusalem nabuhay na mayo pang sarong aldaw. (Genesis 5:27) Sa Dios an sangribong taon garo sana kasuodma​—peryodo nin 24 oras​—kun iyan nakaagi na. Sinasabi man kan salmista na sa Dios an sangribong taon siring sa apat na oras na pagbantay sa banggi nin sarong bantay sa kampo. (Hokom 7:19) Malinaw nanggad, kun siring, an halawig na panahon sa sato halipot na marhay sa Dios na daing sagkod, si Jehova.

12. Paano “pinara” nin Dios an mga tawo?

¹² Bakong arog kan daing sagkod na pag-eksister nin Dios, an presenteng buhay nin tawo tunay nanggad na halipot. Sabi kan salmista: “Pinara mo sinda; sinda nagigin siring sana sa pagtorog; sa aga sinda siring sana sa berdeng doot na nagliliwat. Sa aga iyan namumurak asin nagliliwat; sa banggi iyan naluluyos asin naaalang nanggad.” (Salmo 90:​5, 6) Naheling ni Moises an rinibong Israelita na nagadan sa kaawagan, “pinara” nin Dios na garo sa baha. An kabtang na ini kan salmo trinadusir na: “Pinara mo an mga tawo sa pagtorog sa kagadanan.” (New International Version) Sa ibong na kampi, an lawig nin buhay nin bakong sangkap na mga tawo “siring sana sa pagtorog” na halipot an lawig​—siring sa saro sanang bangging pagkalipat.

13. Paano kita ‘siring sana sa berdeng doot,’ asin paano ini maninigo na makaapektar sa satong pag-iisip?

¹³ Kita ‘siring sana sa berdeng doot na namumurak sa aga’ alagad naluluyos sa banggi huli sa makosogon na init kan saldang. Iyo, an satong buhay naagi sana kapareho kan doot na naluluyos sa sarong aldaw. Kun siring, dai niato pagsayangon an mahalagang marhay na kayamanan na ini. Imbes, maninigo tang hagadon an paggiya nin Dios sa kun paano niato dapat gamiton an natatada pa niatong mga taon sa sistemang ini nin mga bagay.

Tinatabangan Kita ni Jehova na ‘Bilangon an Satong mga Aldaw’

14, 15. An Salmo 90:7-9 nagkaigwa nin anong kaotoban sa mga Israelita?

¹⁴ Kun dapit sa Dios, sinasabi pa kan salmista: “Huli ta sa kaanggotan mo natapos kami, asin huli sa kabangisan mo napurisaw kami. Ibinugtak mo an mga sala niamo sa mismong atubangan mo, an tinatago niamong mga bagay sa atubangan kan saimong maliwanag na lalauogon. Huli ta an gabos ming aldaw nakaabot sa pagtatapos kaiyan huli sa saimong kabangisan; tinapos niamo an samong mga taon na garo hinghing.”​—Salmo 90:7-9.

¹⁵ An daing pagtubod na mga Israelita ‘natapos huli sa kaanggotan nin Dios.’ Sinda ‘napurisaw huli sa saiyang kabangisan,’ o ‘nasindak sa saiyang gurobgutob.’ (New International Version) An nagkapira “nagkagaradan sa kaawagan” bilang resulta nin mga paghokom nin Dios. (1 Corinto 10:5) ‘Ibinugtak ni Jehova an mga sala ninda sa mismong atubangan nia.’ Pinapanimbag nia sinda sa saindang hayag na salang ginibo, alagad maski an ‘tinatagong mga bagay’ ninda, o tinatagong mga kasalan, nasa ‘atubangan kan saiyang maliwanag na lalauogon.’ (Talinhaga 15:3) Bilang mga punteriya kan kabangisan nin Dios, an daing pagsolsol na mga Israelita ‘tinapos an saindang mga taon na garo sana hinghing.’ An totoo, an sato mismong halipot na buhay garo hinangos na naagi sa satong mga ngabil na garo sana hinghing.

16. Kun may mga naggigibo nin kasalan sa hilom, ano an maninigo nindang gibohon?

¹⁶ Kun an siisay man sa sato maggigibo nin kasalan  sa hilom, tibaad ikatatago niato an siring na gawe-gawe sa mga kapwa tawo sa laog nin kadikit na panahon. Alagad an satong tinatagong salang gibo mapapasa ‘atubangan kan maliwanag na lalauogon ni Jehova,’ asin an satong gawe-gawe makadadanyar sa satong relasyon sa saiya. Tanganing magin dayupot giraray ki Jehova, kaipuhan niatong mamibi para sa saiyang kapatawadan, bayaan an satong mga kalapasan, asin may pagpasalamat na akoon an espirituwal na tabang nin Kristianong kamagurangan. (Talinhaga 28:13; Santiago 5:​14, 15) Orog karahay nanggad iyan kisa tibaad ‘taposon an satong mga taon na garo hinghing,’ na namemeligro an satong paglaom na buhay na daing katapusan!

17. Anong lawig nin buhay an normal sa kadaklan na tawo, asin an satong mga taon pano nin ano?

¹⁷ Mapadapit sa lawig nin buhay nin bakong sangkap na mga tawo, an salmista nagsasabi: “An mga aldaw nin samong mga taon pitong polong taon; asin kun huli sa espesyal na kakosogan iyan walong polong taon, alagad an saindang pagdadanay nasa kasakitan asin makolog na mga bagay; huli ta iyan kaipuhan na marikas na umagi, asin kami minalupad.” (Salmo 90:10) An lawig nin buhay na 70 taon normal na sa kadaklan na tawo, asin sa edad na 85, sinambit ni Caleb an saiyang pambihirang kakosogan. Igwa nin mga eksepsion, arog ki Aaron (123), Moises (120), asin Josue (110). (Bilang 33:39; Deuteronomio 34:7; Josue 14:​6, 10, 11; 24:29) Alagad dapit sa daing pagtubod na kapag-arakian na nagluwas sa Egipto, an mga nakarehistro poon 20 anyos asin pataas nagadan sa laog nin 40 taon. (Bilang 14:29-34) Ngonyan, sa dakol na nasyon an pankagabsan na lawig nin buhay nin tawo yaon pa man giraray sa lawig na isinabi kan salmista. An satong mga taon pano nin “kasakitan asin makolog na mga bagay.” Marikas iyan na naagi, ‘asin kita minalupad.’​—Job 14:​1, 2.

18, 19. (a) Ano an boot sabihon kan ‘bilangon an satong mga aldaw sa paagi na magkamit kita nin puso na may kadonongan’? (b) An paggamit niato nin kadonongan magpapahiro sa sato na gibohon an ano?

¹⁸ An salmista sunod na nag-aawit: “Siisay an nakaaaram kan puersa kan saimong kaanggotan asin kan saimong nagpuputok na kaanggotan segun sa pagkatakot sa saimo? Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.” (Salmo 90:​11, 12) Mayo ni saro sa sato an lubos na nakaaaram kan puersa kan kaanggotan nin Dios o kun sagkod saen an nagpuputok na kaanggotan nia, asin maninigo na magpakosog ini kan satong reberensial na pagkatakot ki Jehova. An totoo, maninigo iyan na magmotibar sa sato na hagadon sa saiya ‘kun paano niato bibilangon an satong mga aldaw sa paagi na magkamit kita nin puso na may kadonongan.’

¹⁹ An sinabi kan salmista sarong pamibi na logod tokdoan ni Jehova an saiyang banwaan kun paano gagamiton an kadonongan sa pagpahalaga asin paggamit kan saindang natatadang mga aldaw sa paagi na inooyonan nin Dios. An linalaoman na lawig nin buhay na 70 taon nag-oopresir nin paglaom na mga 25,500 na aldaw. Pero ano man an edad niato, ‘dai niato aram kun ano an magigin buhay niato sa aga, huli ta kita sarong alopoop na minatunga sa kadikit na panahon dangan nawawara sana.’ (Santiago 4:13-15) Huling ‘nangyayari sa sato gabos an panahon asin pagkanorongod,’ dai niato masabi kun gurano pa kalawig kita mabubuhay. Kun siring mamibi kita na logod tawan nin kadonongan na atubangon an mga pagbalo, trataron nin tama an iba, asin gibohon an satong pinakamakakaya sa paglilingkod ki Jehova ngonyan mismo​—ngonyan na aldaw! (Eclesiastes 9:11; Santiago 1:​5-8) Ginigiyahan kita ni Jehova paagi sa saiyang Tataramon, saiyang espiritu, asin saiyang organisasyon. (Mateo 24:45-47; 1 Corinto 2:10; 2 Timoteo 3:​16, 17) An paggamit nin kadonongan pinahihiro kita na ‘hanapon nguna an Kahadean nin Dios’ asin gamiton an satong mga aldaw sa paagi na nagtatao nin kamurawayan ki Jehova asin nagpapagayagaya sa saiyang puso. (Mateo 6:25-33; Talinhaga 27:11) Siempre, an pagsamba sa saiya nin bilog na puso dai maghahale kan gabos niatong problema alagad nagbubunga nanggad iyan nin dakulang kagayagayahan.

An Bendisyon ni Jehova Nagtatao sa Sato nin Kagayagayahan

20. (a) Sa anong paagi ‘nanganganugon’ an Dios? (b) Ano an gigibohon sa sato ni Jehova kun kita magkasala nin magabat alagad nagpapaheling nin tunay na pagsolsol?

²⁰ Kanigoan karahay kun kita makapaggagayagaya sa bilog niatong natatadang buhay! Mapadapit digdi, si Moises nakikimaherak: “Bumalik ka, O Jehova! Sagkod noarin pa iyan? Asin manganugon ka sa saimong mga lingkod. Basoga kami sa aga kan saimong mamomoton na kabootan [o, “maimbod na pagkamoot”], tangani na kami kumurahaw na may kagayagayahan asin maggayagaya sa gabos niamong aldaw.” (Salmo 90:​13, 14; nota sa ibaba) An Dios dai nasasala. Minsan siring, sia talagang ‘nanganganugon’  saka ‘minabalik’ hale sa saiyang kaanggotan asin sa pagtao nin maninigong padusa kun an saiyang patanid manongod sa paggibo kan siring na aksion nagbubunga nin pagbago nin aktitud asin paggawe kan nagsosolsol na mga parakasala. (Deuteronomio 13:17) Kaya dawa enkaso magkasala kita nin magabat alagad nagpapaheling nin tunay na pagsolsol, si Jehova ‘babasogon kita kan saiyang mamomoton na kabootan,’ asin magkakaigwa kita nin dahelan na “kumurahaw na may kagayagayahan.” (Salmo 32:1-5) Asin paagi sa pagsunod sa matanos na pamumuhay, mamamatean ta an maimbod na pagkamoot nin Dios sa sato asin kita ‘makapaggagayagaya sa gabos niatong aldaw’​—iyo, sa natatada pa niatong buhay.

21. Sa mga tataramon na nakasurat sa Salmo 90:​15, 16, ano an tibaad hinahagad ni Moises?

²¹ An salmista odok na namimibi: “Pagayagayaha kami katimbang kan mga aldaw na pinapagsakit mo kami nin makuri, kan mga taon na nakaheling kami nin kapahamakan. Maheling logod kan saimo mismong mga lingkod an saimong gibo asin kan saindang mga aki an saimong kagayonan.” (Salmo 90:​15, 16) Tibaad hinahagad ni Moises sa Dios na bendisyonan an Israel nin paggayagaya na katimbang, o kapareho kalawig, kan saindang mga aldaw nin pagsakit nin makuri asin kan mga taon na sinda nag-agi nin kapahamakan. Hinagad nia na an “gibo” nin Dios na pagbendisyon sa mga Israelita maheling kan Saiyang mga lingkod asin na an Saiyang kagayonan mahayag sa saindang mga aki, o gikan. Tama man na ipamibi niato na logod tawan nin mga bendisyon an makinuyog na katawohan sa ipinanuga nin Dios na bagong kinaban.​—2 Pedro 3:13.

22. Segun sa Salmo 90:​17, ano an tamang ipamibi niato?

²² An Salmo 90 nagtatapos paagi sa pakimaherak na ini: “Mapasamuya logod an pagigin nakagagayagaya ni Jehova na samuyang Dios, asin parigonon mo logod sa samuya an gibo kan samong mga kamot. Iyo,  an gibo kan samong mga kamot, parigonon mo logod iyan.” (Salmo 90:17) An mga tataramon na ini nagpapaheling na tamang ipamibi niato na logod bendisyonan nin Dios an satong mga paghihingoa sa paglilingkod sa saiya. Bilang linahidan na mga Kristiano o kairiba ninda, an “ibang karnero,” naggagayagaya kita na “an pagigin nakagagayagaya ni Jehova” yaon sa sato. (Juan 10:16) Kanigoan an kaogmahan niato na ‘pinarigon nin Dios an gibo kan satong mga kamot’ bilang mga parabalangibog kan Kahadean asin sa iba pang mga paagi!

Padagos Niatong Bilangon an Satong mga Aldaw

23, 24. Paano kita makikinabang sa paghorophorop sa ika-90 Salmo?

²³ An paghorophorop sa ika-90 Salmo dapat na magpaorog kan satong pagdepende ki Jehova, an satong “tunay na erokan.” Paagi sa pagpensar sa mga tataramon kaiyan manongod sa kahalipotan nin buhay, maninigo na orog niatong mamatean nin odok an pangangaipo nin paggiya nin Dios sa pagbilang kan satong mga aldaw. Asin kun kita magmamaigot sa paghagad asin paggamit nin diosnon na kadonongan, seguradong mag-aako kita kan mamomoton na kabootan asin bendisyon ni Jehova.

²⁴ Padagos kitang totokdoan ni Jehova kun paano bibilangon an satong mga aldaw. Asin kun susunodon ta an saiyang instruksion, makapagpapadagos kita sa pagbilang kan satong mga aldaw sa bilog na panahon na daing sagkod. (Juan 17:3) Minsan siring, tangani na padagos na nasa isip niato an buhay na daing katapusan, si Jehova an dapat na magin pailihan niato. (Judas 20, 21) Siring kan satong maheheling sa sunod na artikulo, an bagay na ini malinaw na marhay na ipinaliliwanag sa nakapakokosog sa boot na mga tataramon kan ika-91 Salmo.

Ano an Isisimbag Nindo?

• Paano si Jehova sarong “tunay na erokan” para sa sato?

• Taano ta masasabi niato na si Jehova pirmeng andam na tumabang sa sato?

• Paano kita tinatabangan ni Jehova na ‘bilangon an satong mga aldaw’?

• Ano an makatatabang sa sato na ‘maggayagaya sa gabos niatong aldaw’?

[Mga Hapot Para sa Pag-adal]

[Ritrato sa pahina 10]

Si Jehova Dios na “bago pa man namundag an mga bukid”

[Ritrato sa pahina 12]

Sa punto de vista ni Jehova, an 969 anyos na si Matusalem nabuhay na mayo pang sarong aldaw

[Mga Ritrato sa pahina 14]

‘Pinaririgon ni Jehova an gibo kan satong mga kamot’