Magpatalubo nin Kadayupotan ki Jehova

“RUMANI kamo sa Dios, asin sia marani sa saindo,” an isinurat ni disipulo Santiago. (Santiago 4:8) Asin si salmista David nag-awit: “An pakikidayupot ki Jehova para sa mga natatakot sa saiya.” (Salmo 25:14) Malinaw nanggad, boot ni Jehova Dios na kita magkaigwa nin dayupot na relasyon sa saiya. Pero, bakong gabos na nagsasamba sa Dios asin nagkukuyog sa saiyang mga ley talagang nakamamateng dayupot sa saiya.

Kumusta man kamo? Igwa daw kamo nin dayupot na personal na relasyon sa Dios? Daing duda, gusto nindong magin mas dayupot sa saiya. Paano kita makapatatalubo nin kadayupotan sa Dios? Ano an magigin kahulogan kaini para sa sato? An ikatolong kapitulo kan libro sa Biblia na Talinhaga nagtatao nin simbag.

Magpaheling nin Mamomoton na Kabootan Asin Pagkasinsero

Pinonan ni Hadeng Salomon kan suanoy na Israel an ikatolong kapitulo kan Talinhaga paagi sa mga tataramon: “Aki ko, dai mo paglingawan an sakong ley, asin kuyogon logod kan saimong puso an sakong mga togon, huli ta idadagdag sa saimo an lawig nin mga aldaw asin mga taon nin buhay patin katoninongan.” (Talinhaga 3:​1, 2) Huling si Salomon nagsurat paagi sa pasabong nin Dios, an konsehong ini na garo sa ama talagang hale ki Jehova Dios asin para sa sato. Hinahatolan kita digdi na kuyogon an mga pagirumdom nin Dios​—an saiyang mga ley, o katokdoan, asin an saiyang mga togon​—na nasusurat sa Biblia. Kun gigibohon ta ini, “idadagdag [sa sato] an lawig nin mga aldaw asin mga taon nin buhay patin katoninongan.” Iyo, maski ngonyan puede niatong makamtan an matoninong na buhay asin malikayan an mga okupasyon na nagsasapeligro sa sato sa amay na kagadanan na parateng nangyayari sa mga paragibo nin maraot. Saro pa, mapapasato an paglaom na buhay na daing sagkod sa sarong matoninong na bagong kinaban.​​—Talinhaga 1:​24-​31; 2:​21, 22.

Sa pagpadagos, si Salomon nagsasabi: “Dai ka logod bayaan nin mamomoton na kabootan asin nin pagkasinsero. Ibogkos mo iyan sa saimong liog. Isurat mo iyan sa tabla kan saimong puso, asin sa siring makakua nin pag-oyon asin marahay na pakarorop sa pagheling nin Dios asin nin daganon na tawo.”​—Talinhaga 3:​3, 4.

An orihinal na termino para sa “mamomoton na kabootan” pasarosalidang trinadusir na “maimbod na pagkamoot” asin nangangahulogan nin pagkafiel, pagkasararo, asin kaimbodan. Determinado daw kita na magdanay na dayupot ki Jehova ano man an mangyari? Nagpapaheling daw kita nin mamomoton na kabootan sa satong relasyon sa mga kapagtubod? Kita daw naghihingoang magdanay na dayupot sa sainda? Sa aroaldaw na pakikiiba sa sainda, pinapagdadanay daw niato na ‘an ley nin mamomoton na kabootan nasa satong dila’ dawa sa masakit na mga kamugtakan?​—Talinhaga 31:26.

Huling abunda sa mamomoton na kabootan, si Jehova “andam na magpatawad.” (Salmo 86:5) Kun kita nagsolsol na sa satong nakaaging mga kasalan asin ngonyan naglalakaw na nin tanos, kita nakaseseguro na “an mga panahon nin kaginhawahan” madatong hale ki Jehova. (Gibo 3:19) Bako daw na maninigo niatong arogon an satong Dios paagi sa pagpatawad sa iba kan saindang mga kalapasan?​​—Mateo 6:​14, 15.

Si Jehova an “Dios nin katotoohan,” asin boot niang maheling an “pagkasinsero” sa mga gustong magin dayupot sa saiya. (Salmo 31:5) Malalaoman daw niato na magin satong Katood si Jehova kun duwang klase an satong pamumuhay​—iba an paggawe kun nasa kaibanan nin mga Kristiano asin iba naman kun dai ninda naheheling​—arog kan “mga  tawong putikon” na itinatago an klase nin pagkatawo ninda? (Salmo 26:4) Kanigoan na kamangmangan iyan, ta “an gabos na bagay huba asin bukas sa mga mata” ni Jehova!​—Hebreo 4:13.

An mamomoton na kabootan asin pagkasinsero dapat na pahalagahan nin siring sa daing kaagid sa halagang kuintas na ‘nakabogkos sa satong liog,’ ta tinatabangan kita kaiyan na ‘makakua nin pag-oyon sa pagheling nin Dios asin nin daganon na tawo.’ Dai sana niato kaipuhan na ipaheling sa luwas an mga kualidad na ini kundi iukit man iyan ‘sa tabla kan satong puso,’ na ginigibo iyan na panlaog na kabtang kan satong personalidad.

Pataluboon an Lubos na Tiwala ki Jehova

An madonong na hade nagpapadagos: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”​—Talinhaga 3:​5, 6.

Tunay nanggad na si Jehova maninigo sa satong biyong pagtitiwala. Bilang an Kaglalang, sia “makosog sa kapangyarihan” asin iyo an Gikanan nin “dinamikong kosog.” (Isaias 40:​26, 29) Kaya niang hamanon an gabos niang katuyohan. Tara, an saiya mismong ngaran literal na nangangahulogan “Saiyang Pinapangyayaring Magin,” asin pinakokosog kaiyan an satong kompiansa sa saiyang kakayahan na otobon an saiyang ipinanuga! An bagay na “dai mangyayaring magputik an Dios” minagibo sa saiya na iyo an mismong personipikasyon nin katotoohan. (Hebreo 6:18) An saiyang nangingibabaw na kualidad iyo an pagkamoot. (1 Juan 4:8) Sia “matanos sa gabos niang dalan asin maimbod sa gabos niang gibo.” (Salmo 145:17) Kun dai kita puedeng magtiwala sa Dios, kiisay kita puedeng magtiwala? Siempre, tanganing mapatalubo an tiwala sa saiya, kaipuhan niatong ‘namitan asin helingon na si Jehova marahay’ paagi sa pag-aplikar kan nanonodan niato sa Biblia sa satong personal na buhay asin paagi sa pagpensar sa marahay na ibinubunga kaini.​—Salmo 34:8.

Paano niato ‘magigirumdom si Jehova sa gabos niatong dalan’? An pinasabngan na salmista nagsasabi: “Hohorophoropon ko nanggad an gabos mong gibo, asin tatawan ko nin atension an saimong mga ginibo.” (Salmo 77:12) Huling dai naheheling an Dios, an paghorophorop sa saiyang dakulang mga gibo asin sa saiyang mga pagtratar sa saiyang banwaan mahalagang marhay sa pagkultibar nin kadayupotan sa saiya.

An pamibi saro man na importanteng paagi nin paggirumdom ki Jehova. Si Hadeng David padagos na nag-arang ki Jehova “sa bilog na aldaw.” (Salmo 86:3) Si David parateng namimibi sa bilog na banggi, arog kan sia magdulag sa kaawagan. (Salmo 63:​6, 7) “Padagos kamong mamibi sa gabos na panahon sa espiritu,” an sadol ni apostol Pablo. (Efeso 6:18) Gurano kaparate kita namimibi? Ikinaoogma daw niato an pagkaigwa nin personal na odok sa pusong pakikikomunikar sa Dios? Kun napapaatubang sa masakit na mga situwasyon, naghahagad daw kita sa saiya nin tabang? Mapagngayongayo daw niatong hinahagad an saiyang paggiya bago gumibo nin importanteng mga desisyon? Paagi sa satong sinserong mga pamibi ki Jehova kita napapamahal sa saiya. Asin igwa kita kan asegurasyon na saiyang hihinanyogon an satong pamibi asin ‘itatanos an satong mga dana.’

Kanigoan na kamangmangan an ‘manarig sa satong sadiring pakasabot’ o sa prominenteng mga tawo sa kinaban mantang puede kitang lubos na magkompiar ki Jehova! “Dai ka magpakadonong sa saimong sadiring mga mata,” an sabi ni Salomon. Sa kabaliktaran, sia nagsasadol: “Matakot ka ki Jehova asin rumayo ka sa maraot. Iyan magin logod bolong sa saimong pusod asin kaginhawahan sa saimong mga tolang.” (Talinhaga 3:​7, 8) An tamang pagkatakot na mapaanggot an Dios an maninigong maggiya sa gabos niatong gawe-gawe, pag-isip, asin emosyon. An siring na reberensial na pagkatakot inoolang kita sa paggibo nin maraot saka nakapagpapaomay asin nakarerepresko sa espirituwal.

Itao ki Jehova an Saindong Pinakamarahay

Sa ano pang ibang paagi kita makadadayupot sa Dios? “Tawan nin onra si Jehova paagi sa saimong mahahalagang bagay asin paagi sa enot na mga bunga kan saimong inani,” an instruksion kan hade. (Talinhaga 3:9) An pagtao nin onra ki Jehova nangangahulogan nin pagpaheling sa saiya nin halangkaw na pagpahalaga asin pagpamuraway sa saiya sa publiko paagi sa pakikikabtang asin pagsuportar sa pagbalangibog sa publiko kan saiyang ngaran. An mahahalagang bagay na ginagamit ta sa pagtao nin onra ki Jehova iyo an satong panahon, satong mga talento, satong kosog, asin satong materyal na mga rogaring. Ini dapat an enot na mga bunga​—an satong pinakamarahay nanggad. Bako daw na maninigong ipabanaag kan paagi nin paggamit niato kan satong personal na mga kayamanan an satong desisyon na ‘padagos na hanapon  nguna an kahadean asin an katanosan nin Dios’?​—Mateo 6:33.

Binabalosan an pagtao nin onra ki Jehova paagi sa satong mahahalagang bagay. “Dangan an saimong mga tambobong mapapano nin abunda,” an asegurasyon ni Salomon, “asin an saimong mga tangke kan pugaan maglilipwas sa bagong arak.” (Talinhaga 3:10) Minsan ngani an espirituwal na prosperidad mismo dai nagreresulta sa materyal na prosperidad, an buka an palad na paggamit kan satong mga kayamanan tanganing tawan nin onra si Jehova nagbubunga nin nagsosopay na mga bendisyon. An paggibo kan kabotan nin Dios nagin nagsusustenir na “kakanon” para ki Jesus. (Juan 4:34) Siring man, an pagkaigwa nin kabtang sa paghuhulit asin paggibo nin mga disipulo na nagpapamuraway ki Jehova nagigin pagkakan niato. Kun magpapadagos kita sa gibohon na iyan, an satong espirituwal na mga tambobong mapapano nin abunda. An satong kagayagayahan​—na isinisimbolo kan bagong arak​—maglilipwas.

Bako daw na kita nag-aasa man ki Jehova asin namimibi sa saiya para sa igong materyal na kakanon sa kada aldaw? (Mateo 6:11) An gabos na yaon sa sato, sa katunayan, nakamtan niato hale sa satong mamomoton na langitnon na Ama. Ibububo ni Jehova an dugang pang bendisyon kun sagkod saen niato ginagamit an satong mahahalagang bagay sa kaomawan nia.​​—1 Corinto 4:7.

Maogmang Akoon an Disiplina ni Jehova

Ipinaliliwanag an halaga nin disiplina sa pagkamit nin kadayupotan ki Jehova, an hade nin Israel nagsasadol sa sato: “An disiplina ni Jehova, O aki ko, dai mo ipagsikwal; asin dai mo ikasurang nin makuri an saiyang pagsagwe, huli ta an namomotan ni Jehova saiyang sinasagwe, kun paanong an sarong ama nagsasagwe sa aki na saiyang ikinaoogma.”​—Talinhaga 3:​11, 12.

Minsan siring, para sa sato an disiplina tibaad bakong pasil na akoon. “Mayong disiplina na sa presente garo nakagagayagaya, kundi nakamomondo,” an isinurat ni apostol Pablo, “pero pagkatapos duman sa mga napatood kaiyan iyan nagbubunga nin matoninong na bunga, arin na baga, an katanosan.” (Hebreo 12:11) An pagsagwe asin disiplina kinakaipuhan na kabtang kan pagpatood na nagpapadayupot sa sato sa Dios. An pagtatanos gikan ki Jehova​—baga man inaako niato iyan hale sa mga magurang, paagi sa Kristianong kongregasyon, o paagi sa paghorophorop sa Kasuratan durante kan satong personal na pag-adal​—sarong kapahayagan kan saiyang pagkamoot sa sato. Madonong na akoon ta iyan na may kaogmahan.

 Pangaptan nin Higot an Kadonongan Asin Pakamansay

Sunod, idinodoon ni Salomon an importansia nin kadonongan asin pakamansay sa pagpatalubo nin dayupot na relasyon sa Dios. Sia nagpapahayag: “Maogma an tawo na nakanompong nin kadonongan, asin an tawo na nagkakamit nin pakamansay, huli ta an pagkaigwa kaiyan bilang pakinabang mas marahay kisa pagkaigwa nin pirak bilang pakinabang asin an pagkaigwa kaiyan bilang bunga kisa bulawan mismo. . . . Iyan kahoy nin buhay para sa mga nangangapot kaiyan, asin an mga higot na nangangapot kaiyan aapodon na maogma.”​—Talinhaga 3:​13-18.

Ipinagigirumdom sa sato an pagpaheling nin kadonongan asin pakamansay sa makangangalas na mga gibo nin paglalang ni Jehova, an hade nagsasabi: “Pinasikad ni Jehova an daga sa kadonongan. Pinakapusog nia an kalangitan sa pagmansay. . . . Aki ko, dai logod iyan makasiblag sa saimong mga mata. Ingatan mo an praktikal na kadonongan asin kakayahan nin pag-iisip, asin ta sinda magigin buhay sa saimong kalag asin kawilihan sa saimong halunan.”​—Talinhaga 3:​19-22.

An kadonongan asin pakamansay diosnon na mga kualidad. Bako sanang kaipuhan niatong pataluboon iyan kundi pangaptan man nin higot iyan paagi sa nungkang pagpabaya sa satong mahigos na pag-adal sa Kasuratan asin pag-aplikar kan satong nanonodan. “Sa siring ika maglalakaw sa katiwasayan sa saimong dalan,” an pagpadagos ni Salomon, “asin pati an saimong bitis dai masisingkog sa ano man.” Idinugang nia: “Kun ika maghigda dai ka matatakot; asin ika nanggad mahigda, asin an saimong pagtorog magigin masiram.”​—Talinhaga 3:​23, 24.

Iyo, puede kitang lumakaw na tiwasay asin matorog na may katoninongan nin isip mantang hinahalat niato an garo sa parahabon na pagdatong kan aldaw nin “biglang pagkalaglag” kan maraot na kinaban ni Satanas. (1 Tesalonica 5:​2, 3; 1 Juan 5:19) Dawa durante kan madali nang dakulang kahorasaan, puede kitang magkaigwa kan asegurasyon na ini: “Dai ka kaipuhan na matakot sa ano man na makatatakot na bagay na biglang maabot, ni sa bagyo sa mga maraot, huli ta iyan maabot. Huli ta si Jehova mismo garo baga magigin saimong kompiansa, asin sierto na iingatan nia an saimong bitis na dai mabihag.”​—Talinhaga 3:​25, 26 ; Mateo 24:21.

Gumibo nin Marahay

“Dai ipanguri an marahay sa mga nanonongdan kaiyan,” an sadol ni Salomon, “kun nasa kapangyarihan kan saimong kamot na gibohon iyan.” (Talinhaga 3:27) Kalabot sa paggibo nin marahay sa iba an buka an palad na paggamit kan satong mga kayamanan para sa sainda, asin dakol an aspekto kaini. Alagad bako daw na an pagtabang sa iba na magkamit nin dayupot na relasyon sa tunay na Dios iyo an pinakamarahay nanggad na bagay na magigibo ta para sa sainda durante kaining “panahon kan katapusan”? (Daniel 12:4) Kun siring, ini na an mga aldaw tanganing ipaheling an kaigotan sa paghuhulit kan Kahadean asin paggibo nin mga disipulo.​​—Mateo 28:​19, 20.

Ilinista man kan madonong na hade an nagkapirang gibo na dapat isikwal, na nagsasabi: “Dai mo pagsabihan an saimong kapwa: ‘Lakaw, asin magbalik ka asin ta nuodma taka na tatawan,’ kun igwa man sana dian sa saimo. Dai ka magpakana nin ano man na maraot tumang sa saimong kapwa, kun sia nag-eerok na may katiwasayan sa kaibanan mo. Dai ka makipag-iwal sa sarong tawo na mayo nin dahelan, kun mayo siang ginibong maraot sa saimo. Dai ka mauri sa tawo nin kadahasan, ni pilion an arin man sa saiyang mga dalan.”​—Talinhaga 3:​28-31.

Sa pagsumaryo kan rason sa saiyang hatol, si Salomon nagsasabi: “Huli ta an biko makauuyam nin makuri ki Jehova, alagad ta Sia dayupot sa mga matanos. An sumpa ni Jehova nasa harong kan maraot, alagad an harong kan mga matanos saiyang binebendisyonan. Kun manongod sa mga paraolog-olog, sia mismo an mag-oolog-olog; alagad sa mga mahoyo sia magpapaheling nin pabor. Onra an masasadirihan nin mga madonong, alagad an mga mangmang nag-oomaw sa kasopganan.”​—Talinhaga 3:​32-35.

Tanganing kamtan ta an kadayupotan ki Jehova, dai kita dapat magpakana nin tuso asin nakadadanyar na mga bagay. (Talinhaga 6:​16-19) Solamente kun gigibohon ta an tama sa pagheling nin Dios kakamtan ta an saiyang pabor asin bendisyon. Puede man kitang mag-ako nin dai hinahagad na onra kun naoobserbaran nin iba na kita minagawe kaoyon kan kadonongan nin Dios. Kun siring isikwal niato an tusong mga paagi kan maraot asin madahas na kinaban na ini. Tunay nanggad, sundon niato an tanos na dalan asin pataluboon an kadayupotan ki Jehova!

[Mga Ritrato sa pahina 25]

“Tawan nin onra si Jehova paagi sa saimong mahahalagang bagay”