• Pinili nin Diyos. “Ako mismo an nagpatukaw sa sakuyang hadi. . . . Itatao ko an mga nasyon bilang saimong mana asin an bilog na daga bilang saimong pagsadiri.”—Salmo 2:6, 8.

• Tagapagmana ni Hading David. “Sarong aki an namundag sa satuya, sarong aking lalaki an itinao sa satuya. . . . An paghiwas kan saiyang pamamahala asin an katuninungan dai magkakaigwa nin katapusan, sa trono ni David asin sa saiyang kahadian tanganing maestablisar iyan nin marigon.”—Isaias 9:6, 7.

• Namundag sa Betlehem. “O Betlehem . . . , hali sa saimo maluwas para sa sako an magigin tagapamahala sa Israel . . . An saiyang kadakulaan makakaabot sa kapuro-puruhi kan daga.”—Mikas 5:2, 4.

• Isinikwal kan mga tawo asin ginadan. “Hinamak siya, asin ibinilang mi siyang daing halaga. . . . Tinusok siya huli sa samong paglapas; pinasakitan siyang marhay huli sa samong mga pagkakasala.”—Isaias 53:3, 5.

• Binuhay hali sa mga gadan asin pinamuraway. “Dai mo ako papabayaan na nasa Lubungan. Dai mo tutugutan na mahiling kan saro na maimbod sa saimo an kalot. . . . May kaugmahan sa may tuo mo sagkod lamang.”—Salmo 16:10, 11.

Sa bilog na kasaysayan nin tawo, saro sanang persona an angay na pinapanungdan kan deskripsiyon na pinakakuwalipikadong Tagapamahala; iyan iyo si Jesu-Cristo. Sa katunayan, sarong anghel an nagsabi ki Maria, na ina ni Jesus: “Itatao sa saiya kan Diyos . . . an trono ni David na saiyang ama, . . . asin dai magkakaigwa nin katapusan an saiyang Kahadian.”—Lucas 1:31-33.

Si Jesus dai nuarin man nagin tagapamahala sa daga. Imbes, mamamahala siya sa katawuhan hali sa langit bilang Hadi kan Kahadian nin Diyos. Taano ta siya an pinakakuwalipikadong Tagapamahala? Pag-isipan kun ano an ginibo ni Jesus kan yaon siya digdi sa daga.

•   Nagmalasakit si Jesus sa mga tawo. Tinabangan ni Jesus an mga lalaki asin babayi, hoben asin gurang, ano man an saindang pinaghalian o estado sa buhay. (Mateo 9:36; Marcos 10:16) Kan makimahirak an sarong may leproso: “Kun gugustuhon mo sana, mapapalinig mo ako,” nahirak na marhay si Jesus asin pinaumayan ini.—Marcos 1:40-42.

• Tinukduan kita ni Jesus kun paano mapapaugma an Diyos. Nagsabi siya: “Dai kamo makakapaglingkod bilang uripon nin Diyos asin nin Kayamanan.” Sinabi man niya na dapat tang trataron an iba arog kan gusto tang magin pagtratar ninda sa satuya—sarong prinsipyo na inapod na Golden Rule. Saro pa, ipinahiling niya na an Diyos interesado bako sana sa kun ano an ginigibo niyato kundi pati sa kun ano an satong iniisip asin namamatian. Kaya para mapaugma an Diyos, dapat tang kontrulon an mga pagmawot kan satong puso. (Mateo 5:28; 6:24; 7:12) Idinuon ni Jesus na para magin tunay kitang maugma, dapat tang aramon kun ano an gusto nin Diyos na gibuhon ta dangan gibuhon ta iyan.—Lucas 11:28.

• Itinukdo ni Jesus kun ano an buot sabihon kan mamutan an iba. Nagkaigwa nin dakulang epekto sa mga nagdadangog an mga sinabi asin ginibo ni Jesus kaya nataros kaiyan an saindang puso. “Napangalas na marhay an mga tawo sa saiyang paagi nin pagtukdo huli ta nagtutukdo siya sa sainda bilang sarong tawo na igwa nin awtoridad.” (Mateo 7:28, 29) Itinukdo niya sa sainda: “Kamutan an saindong mga kaiwal.” Ipinamibi pa ngani niya an nagkapirang responsable sa kagadanan niya: “Ama, patawada sinda, ta dai ninda aram an ginigibo ninda.”—Mateo 5:44; Lucas 23:34.

Si Jesus, na matinabang asin mabuot, iyo an pinakakuwalipikado na magin sarong mahusay na Tagapamahala sa kinaban. Pero kasuarin siya nagpuon na mamahala?