1, 2. (a) Iistorya an ilustrasyon ni Jesus dapit sa kagsadiri kan ubasan. (b) Paano ipinahiling sa ilustrasyon an kuwalidad nin pagigin matinao asin daing kapantay na kabuutan?

SARONG kagsadiri nin ubasan an nagpasiring sa saudan nin amay na aga tanganing maghanap nin mga matrabaho sa saiyang ubasan. Nakahanap siya nin mga trabahador, nagkauyon sinda sa tangdan, asin nagtrabaho na an mga ini. Pero, kaipuhan pa niya nin dagdag na trabahador. Kaya sa bilog na aldaw, nagkapirang beses siyang nagbalik sa saudan asin naghanap nin iba pa. Inalukan niya nin pararehong tangdan an gabos na trabahador, dawa idtong mga nakua niya kan papatapos na an hapon. Kan banggi na, tinipon niya an mga trabahador tanganing itao sa kada saro sa sainda an pararehong tangdan, baga man dakul o saro sanang oras sinda nagtrabaho. Kan marisa iyan kan mga pinakainot na nagtrabaho, nagreklamo an mga ini. Sinabi sa sainda kan kagsadiri kan ubasan: ‘Bakong nag-uyon ka sa tangdan na sarong denario? Dai daw ako makakapagbuot kan buot kong gibuhon sa sadiri kong kuwarta? O nauuri ka ta ako matinao?’—Mat. 20:1-15, BPV. ^[1]

² Ipinapagirumdom sa sato kan ilustrasyon na ini ni Jesus an saro sa mga kuwalidad ni Jehova na parating sinasambit sa Bibliya—an saiyang daing kapantay na kabuutan. ^[2] (Basahon an 2 Corinto 6:1.) Garo baga  dai maninigong mag-ako nin bilog na tangdan an mga nagtrabaho nin saro sanang oras, pero pinahilingan sinda nin ekstraordinaryong kabuutan kan kagsadiri kan ubasan. Mapadapit sa termino para sa “daing kapantay na kabuutan,” na itrinadusir sa dakul na bersiyon nin Bibliya bilang “biyaya,” sarong iskolar an nagsurat: “An kabilugan na panginot na ideya kan termino iyo an dapit sa sarong daing bayad asin dai na kutana maninigong regalo, sarong bagay na itinatao sa saro bako huli ta pinagpagalan niya iyan o maninigo niyang akuon iyan.”

3, 4. Taano ta nagpahiling si Jehova nin daing kapantay na kabuutan sa gabos na tawo, asin paano niya ipinahiling iyan?

³ Sinasabi sa sato kan Bibliya na an daing kapantay na kabuutan nin Diyos sarong ‘daing bayad na regalo.’ (Efe. 3:7, NW) Taano ta itinatao ni Jehova an “daing bayad na regalong” ini asin paano? Kun perpekto tang nasusunod an gabos na kahagadan ni Jehova, maninigo kitang mag-ako kan kabuutan niya. Pero, an totoo, dai ta iyan nagigibo. Kaya, isinurat ni Hading Solomon: “Sa kinaban, mayo nanggad nin sarong matanos na tawo na danay na naggigibo nin karahayan sa gabos na panahon asin dai nanggad nagkakasala.” (Par. 7:20, BPV) Sinabi man ni apostol Pablo: ‘An gabos nagkasala asin dai nakaabot sa kamurawayan nin Diyos,’ asin “an kabayadan nin kasalan iyo an kagadanan.” (Roma 3:23; Roma 6:23a, BPV) Iyan an maninigo sa sato.

⁴ Pero, huli sa pagkamuot ni Jehova sa makasalan na katawuhan, ipinahiling niya an daing kaagid na gibo nin daing kapantay na kabuutan. Isinugo niya sa daga an nakakalabi sa gabos na regalo niya—an saiyang ‘bugtong na Aki’—tanganing magadan para sa sato. (Juan 3:16) Isinurat ni Pablo na si Jesus “nakokoronahan ngunyan nin kamurawayan asin onra dahil sa pagsakit niya sagkod sa kagadanan. Paagi sa daing kapantay na kabuutan nin Diyos nag-agi siya nin kagadanan alang-alang sa gabos.” (Heb. 2:9, NW) Iyo, ‘an regalo nin Diyos iyo an buhay na mayong katapusan [paagi] ki Cristo Jesus na satong Kagurangnan.’—Roma 6:23b, BPV.

5, 6. Ano an magigin resulta kun an nagdodominar sa sato iyo an (a) kasalan? (b) daing kapantay na kabuutan?

⁵ Paano namana kan mga tawo an kasalan asin kagadanan na nagpapasakit sa sato gabos? An Bibliya nagpapaliwanag: “Dahil sa pagkakasala kan sarong tawo [si Adan] an kagadanan naghadi” sa mga gikan ni Adan. (Roma 5:12, 14, 17, NW) Pero, marahay na sana ta mapipili tang dai na paghadian o dominaron nin kasalan. Paano iyan posibleng mangyari? Paagi sa pagtubod sa atang na pantubos ni Cristo, ipinapasairarom ta an satong sadiri sa daing kapantay na kabuutan ni Jehova. An Bibliya nagsasabi: “Sa pag-urog nin kasalan, mas nag-urog man an daing kapantay na kabuutan. Sa anong katuyuhan? Tanganing kun paanong an kasalan naghadi kaiba an kagadanan, maghadi man sa matanos na paagi an daing kapantay na kabuutan, na magiya pasiring sa buhay na daing katapusan paagi ki Jesu-Cristo.”—Roma 5:20, 21, NW.

⁶ Dawa ngani nagkakasala pa man giraray kita, dai niyato dapat pabayaan na sanang dominaron nin kasalan an satong buhay. Kaya kun madaog kita nin kasalan, maghagad nin tawad ki Jehova. Nagpatanid si Pablo sa mga Kristiyano: “An kasalan dai dapat magdominar sa saindo, dahil mayo kamo sa irarom nin katugunan kundi nasa irarom nin daing kapantay na kabuutan.” (Roma 6:14, NW) Kun siring, napapasairarom kita sa daing kapantay na kabuutan. Na may anong resulta? Ipinaliwanag ni Pablo: “An daing kapantay na kabuutan nin Diyos . . . sinasanay kita . . . na isikwal an bakong diyosnon na paggawi saka kinabanon na mga pagmawot asin na mamuhay na tultol an isip asin matanos saka may debosyon sa Diyos sa tahaw kan presenteng sistemang ini nin mga bagay.”—Tito 2:11, 12, NW.

7, 8. Ano an buot sabihon na “ipinapahiling sa lain-lain na paagi” an daing kapantay na kabuutan ni Jehova? (Hilingon an mga ritrato sa kapinunan kan artikulo.)

⁷ Si apostol Pedro nagsurat: “Ano man an lebel kan mga kakayahan na itinao sa kada saro sa sato, gamiton niyato iyan sa paglilingkod sa lambang saro bilang mahusay na mga katiwala kan daing kapantay  na kabuutan nin Diyos na ipinapahiling sa lain-lain na paagi.” (1 Ped. 4:10, NW) Ano an buot sabihon kaiyan? Ano man na klase nin pagbalo an tibaad atubangon niyato sa buhay, tatabangan kita ni Jehova na mapangganahan iyan. (1 Ped. 1:6) Sa lambang inaatubang tang pagbalo, pirming may ipapahiling an Diyos na kapahayagan nin kabuutan sa sato.

⁸ Iyo, ipinapahiling ni Jehova sa lain-lain na paagi an saiyang daing kapantay na kabuutan. Si apostol Juan nagsurat: “Dahil pano siya nin daing kapantay na kabuutan, gabos kita padagos na nag-aako kaiyan hali sa saiya.” (Juan 1:16, NW) Huli sa lain-lain na paagi nin pagpahiling ni Jehova kan saiyang kabuutan, dakul na bendisyon an inaako ta. Ano an nagkapira sa mga iyan?

9. Paano kita nakikinabang sa daing kapantay na kabuutan ni Jehova, asin paano niyato maipapahiling an pagpasalamat ta para diyan?

⁹ Napapatawad kita sa satong mga kasalan. Huli sa daing kapantay na kabuutan ni Jehova, napapatawad an satong mga kasalan basta magsulsol kita asin padagos na maghinguwang labanan an satong makasalan na mga tendensiya. (Basahon an 1 Juan 1:8, 9.) Nagpapasalamat nanggad kita sa pagkahirak nin Diyos kaya napapahiro kitang pamurawayon siya. Sinabi ni Pablo sa saiyang surat sa mga kapwa niya linahidan na Kristiyano: “Ilinigtas . . . kita [ni Jehova] sa kapangyarihan kan kadikluman asin ibinalyo kita sa kahadian kan saiyang namumutan na Aki, na huli sa sarong iyan napatalingkas kita paagi sa pantubos, na nangangahulugan nin kapatawadan kan satuyang mga kasalan.” (Col. 1:13, 14, NW) Huling napapatawad an mga kasalan niyato, nagigin posible para sa sato na mag-ako nin dakul na iba pang marahayon na bendisyon.

10. Huli sa daing kapantay na kabuutan nin Diyos, igwa kita nin anong pribilehiyo?

¹⁰ Nagkakaigwa kita nin matuninong na relasyon sa Diyos. Huli sa pagigin makasalan niyato, mga kaiwal kita nin Diyos puon kan kita mamundag. Pero, sinabi ni Pablo: “Kaidtong mga kaiwal pa kita, nangyari an pakipag-ulian niyato sa Diyos paagi sa kagadanan kan saiyang Aki.” (Roma 5:10, NW) Huli sa pakipag-ulian na ini, nagin posible sa sato na makipagkatuninungan ki Jehova asin magin katuod niya. Ikinonektar ni Pablo an pribilehiyong ini sa daing kapantay na kabuutan ni Jehova, kan sabihon niya: “Ngunyan na ipinahayag na kitang matanos dahil sa pagtubod, magdanay kita [an linahidan na mga tugang ni Cristo] sa pakipagkatuninungan sa Diyos paagi sa satuyang Kagurangnan na Jesu-Cristo, na huli sa pagtubod niyato sa saiya nabuksan an dalan para mag-ako kita kan daing kapantay na kabuutan na ini na ngunyan naeeksperyensiyahan na niyato.” (Roma 5:1, 2, NW) Dakulang pribilehiyo nanggad ini!

11. Paano an mga linahidan dinadara sa katanusan an ‘ibang mga karnero’?

¹¹ Nagigin matanos kita sa atubangan nin Diyos. Kita gabos bako talagang matanos. Pero ihinula kan propetang si Daniel na sa panahon kan katapusan, idtong “mga may pakasabot,” an linahidan na mga natatada, ‘dadarahon an dakul pasiring sa katanusan.’ (Basahon an Daniel 12:3. *) Paagi sa saindang paghuhulit asin pagtutukdo, dinara ninda an minilyon na ‘ibang mga karnero’ sa matanos na kamugtakan sa atubangan ni Jehova. (Juan 10:16) Pero, nagin posible sana ini dahil sa daing kapantay na kabuutan ni Jehova. Ipinaliwanag ni Pablo: “Sarong regalong daing bayad an siring na pagpahayag sa sainda na matanos, na saiyang itinatao dahil sa . . . daing kapantay na kabuutan [nin Diyos] paagi sa nagpapatalingkas na pantubos na ibinayad ni Cristo Jesus.”—Roma 3:23, 24, NW.

12. Paano konektado an pamibi sa daing kapantay na kabuutan nin Diyos?

¹² Nakakadulok kita sa trono nin Diyos paagi sa pamibi. Paagi sa daing kapantay na kabuutan ni Jehova, tinutugutan niya kitang makadulok sa saiyang trono sa langit paagi sa pamibi. Sa katunayan, inapod ni Pablo an trono ni Jehova na “trono nin daing kapantay na kabuutan” asin dinadagka niya kita na dumulok diyan “na daing pag-alangan.” (Heb. 4:16a, NW) Itinao sa sato ni Jehova an pribilehiyong ini paagi sa saiyang Aki, na “paagi sa saiya  nakakapagtaram kita na daing pag-alangan asin libre kitang nakakadulok sa Diyos na igwa nin kumpiyansa huli kan pagtubod niyato sa saiya.” (Efe. 3:12, NW) Talagang sarong marahayon na kapahayagan kan daing kapantay na kabuutan ni Jehova an pagtugot niya na libre kitang makadulok sa saiya paagi sa pamibi!

13. Paano makakatabang sa sato an daing kapantay na kabuutan “sa mga panahon na kaipuhan ta an tabang”?

¹³ Nag-aako kita nin tabang sa panahon na kaipuhan ta iyan. Dinadagka kita ni Pablo na padagos na dumulok ki Jehova sa pamibi, “tanganing mag-ako kita nin pagkahirak asin daing kapantay na kabuutan sa mga panahon na kaipuhan ta an tabang.” (Heb. 4:16b, NW) Sa ano man na panahon na nasasakitan kita huli sa mga pagbalo o problema sa buhay, puwede kitang maghagad nin tabang ki Jehova. Dawa ngani dai na kutana kita maninigong dangugon, dinadangog pa man giraray niya an mga pamibi ta, asin sa parati, sinisimbag niya iyan paagi sa satong mga kapagtubod, tanganing ‘makusog an buot na makakapagsabi kita: “Tatabangan ako [ni Jehova]; dai ako matatakot. Ano an magigibo nin tawo tumang sako?”’—Heb. 13:6, BPV.

14. Paano nakikinabang an satong puso sa daing kapantay na kabuutan ni Jehova?

¹⁴ Nag-aako kita nin karangahan para sa satong puso. An sarong dakulang bendisyon na nakakamtan niyato huli sa daing kapantay na kabuutan ni Jehova iyo an karangahan para sa napupurisaw tang puso. (Sal. 51:17) Nagsurat si apostol Pablo sa pinepersegir kaidtong mga Kristiyano sa Tesalonica: “Lugod na an satuyang Kagurangnan na Jesu-Cristo mismo asin an Diyos na satuyang Ama, na namuot sa sato saka nagtao sa sato nin daing sagkod na karangahan asin magayon na paglaom paagi sa daing kapantay na kabuutan, iyo an magranga kan saindong mga puso asin magparigon sa saindo.” (2 Tes. 2:16, 17, NW) Nakakaranga nanggad na maaraman na namumutan kita ni Jehova asin nagmamalasakit siya sa sato huli sa abunda niyang kabuutan!

15. Huli sa daing kapantay na kabuutan nin Diyos, anong paglaom an igwa kita?

¹⁵ Nagkaigwa kita nin paglaom na mabuhay nin daing katapusan. Huling kita mga parakasala, mayo kita nin paglaom kun mayo an tabang ni Jehova. (Basahon an Salmo 49:7, 8.) Pero, tinawan kita ni  Jehova nin marahayon na paglaom. Nanuga si Jesus sa saiyang mga parasunod: ‘Ini an buot kan sakong Ama, na an siisay man na [nakakamidbid] sa Aki asin nagtutubod sa saiya magkaigwa nin buhay na dai nin katapusan.’ (Juan 6:40) Iyo, an paglaom na buhay na daing sagkod sarong regalo, sarong marahayon na kapahayagan kan daing kapantay na kabuutan nin Diyos. Minidbid ni Pablo an katotoohan na iyan kan sabihon niya: “An daing kapantay na kabuutan nin Diyos nahayag na, na nagdadara nin kaligtasan sa gabos na klase nin tawo.”—Tito 2:11, NW.

16. Paano inabuso kan nagkapira sa inot na mga Kristiyano an daing kapantay na kabuutan nin Diyos?

¹⁶ Dakul na bendisyon an inaako niyato huli sa daing kapantay na kabuutan ni Jehova, pero dai kita dapat na magin pangahas asin isipon na baliwala na sana sa saiya kun ano man an satong magin paggawi. An nagkapira sa inot na mga Kristiyano “idinadahilan an daing kapantay na kabuutan . . . [nin] Diyos para sa daing pakundangan na paggawi.” (Jud. 4, NW) Minalataw na inisip kan bakong maimbod na mga Kristiyanong ini na puwede sindang magkasala, tutal pirmi man sindang papatawadon ni Jehova. An mas maraot pa diyan, hininguwa nindang sutsutan an ibang tugang na arugon an maraot nindang mga gibo. Siring man sa ngunyan, an siisay man na naggigibo kaiyan ‘iniinsulto an espiritu na iyo an nagin paagi tanganing ipahiling an daing kapantay na kabuutan.’—Heb. 10:29, NW.

17. Anong mapuwersang sadol an itinao ni Pedro?

¹⁷ Nadaya ni Satanas an ibang Kristiyano ngunyan paagi sa pagpaniwala sa sainda na puwede sindang magkasala huling siguradong kakahirakan man sinda saka papatawadon nin Diyos. Pero, dawa pa andam si Jehova na magpatawad sa nagsusulsol na mga nagkasala, linalauman niya na pagmamaigutan niyatong marhay na labanan an satong makasalan na mga tendensiya. Pinasabngan niya si Pedro na magsurat: “Kaya mga namumutan, mantang patiinot na nindong aram ini, magin mapagbantay kamo tanganing dai kamo mailagalag kaiba ninda paagi sa pandadaya kan mga tawong daing pigsusunod na pamantayan asin tanganing dai kamo bumagsak sa saindong pagigin marigon. Imbes, padagos nindong kamtan an daing kapantay na kabuutan kan satuyang Kagurangnan asin Paraligtas na si Jesu-Cristo.”—2 Ped. 3:17, 18, NW.

18. Huli sa daing kapantay na kabuutan ni Jehova, ano an mga responsabilidad niyato?

¹⁸ Nagpapasalamat nanggad kita sa inaako tang daing kapantay na kabuutan ni Jehova. Pero, obligasyon niyato sa saiya asin sa satong kapwa na gamiton an mga regalo sa sato para pamurawayon an Diyos asin tabangan an iba. Paano? Si Pablo nagsimbag: “Kaya, mantang tinawan kita nin mga kakayahan na nagkakalain-lain base sa daing kapantay na kabuutan na ipinahiling sa sato, . . . kun iyan paglilingkod sa iba, ipagpadagos ta an paglilingkod na iyan; o para sa nagtutukdo, ipagpadagos niya an pagtutukdo; o para sa nagpapakusog nin buot, magtao siya nin pampakusog nin buot; . . . para sa nagpapahiling nin pagkahirak, gibuhon niya iyan nin gikan sa puso.” (Roma 12:6-8, NW) Huling tinawan kita ni Jehova kan saiyang daing kapantay na kabuutan, may responsabilidad kitang magin sibot sa ministeryo, tukduan an iba dapit sa Bibliya, pakusugon an satong kapwa Kristiyano, asin patawadon an siisay man na nagkasala sa sato.

19. Anong responsabilidad niyato an sisiyasaton sa masunod na artikulo?

¹⁹ Bilang pasasalamat sa inaako niyatong dakulang pagkamuot hali ki Jehova, dapat na mapahiro kitang gibuhon an satong pinakamakakaya “na lubos na magpatotoo manungod sa maugmang bareta mapadapit sa daing kapantay na kabuutan nin Diyos.” (Gibo 20:24, NW) Sa masunod na artikulo, sisiyasaton niyato nin detalyado an dapit sa responsabilidad na ini.