Itinukdo ni Jesus sa mga tawo na makipagkatuninungan sa lambang saro. Pero sa sarong pagkakataon, sinabi niya sa saiyang mga apostol: “Dai kamo mag-isip na nag-abot ako tanganing magdara nin katuninungan sa daga; nag-abot ako tanganing magdara, bako nin katuninungan, kundi nin espada. Huli ta nag-abot ako tanganing magdara nin pagkabaranga—an aking lalaki tumang sa saiyang ama, asin an aking babayi tumang sa saiyang ina, saka an manugang na babayi tumang sa saiyang panugangan na babayi.” (Mat. 10:34, 35) Ano an buot sabihon ni Jesus?

Dai ni Jesus gusto na pagsuruwayon an mga magkakapamilya, pero aram niya na an saiyang mga katukduan puwedeng magdara nin pagkabaranga sa ibang mga pamilya. Kaya, kaipuhan masabutan kan mga gustong magin disipulo ni Cristo asin mabawtismuhan na kun minsan bakong gabos na kapamilya ninda mauugma sa saindang desisyon. Kun mapaatubang sinda sa pagkontra nin bakong kapagtubod na agom o iba pang kapamilya, puwedeng magin dipisil sainda na magdanay na maimbod sa mga katukduan ni Cristo.

Dinadagka kan Bibliya an mga Kristiyano na “makipagkatuninungan sa gabos na tawo.” (Roma 12:18) Pero an mga katukduan ni Jesus puwedeng magin arog sa “espada” sa ibang mga pamilya. Nangyayari ini pag inako kan sarong miyembro kan pamilya an mga katukduan ni Jesus mantang an iba kontra sa mga iyan. Sa arog kaiyan na sitwasyon, an mga kapamilya—idtong mga kairiba sa harong—nagigin “mga kaiwal” kan saro na nag-aadal kan katotoohan.—Mat. 10:36

An mga disipulo ni Jesus na yaon sa pamilya na bako gabos kapagtubod kun minsan puwedeng mapaatubang sa mga sitwasyon na puwedeng makabalo kan saindang pagkamuot ki Jehova saka ki Jesus. Halimbawa, an bakong kapagtubod na mga kapamilya puwedeng piriton sinda na magselebrar nin sarong relihiyosong kapiyestahan. Pag napaatubang sa pagbalo, siisay an papaugmahon ninda? Sinabi ni Jesus: “An siisay man na mas namumutan an saiyang ama o ina kisa sako bakong maninigo sa sako.” (Mat. 10:37) Siyempre, dai man sinasabi ni Jesus na para magin maninigo sa saiya, dapat na dai na kamutan kan saiyang mga disipulo an saindang mga magurang. Imbes, idinuon niya kun ano an dapat na pinakaimportante sa saindang buhay. Kun an satong bakong kapagtubod na mga kapamilya kontrahon an satong pagsamba ki Jehova, padagos ta sindang mamumutan, pero aram ta na dapat tang inuton an satong pagkamuot sa Diyos.

Daing duda, an pagkontra nin mga kapamilya puwedeng magin makulugon. Pero dapat man na tandaan kan mga disipulo ni Jesus an mga sinabi niya: “An siisay man na dai mag-ako kan saiyang hariging pasakitan asin dai magsunod sa sako bakong maninigo sa sako.” (Mat. 10:38) Sa ibang pagtaram, minamansay kan mga Kristiyano an pagkontra nin mga kapamilya bilang parte kan mga kasakitan na andam na tagalan kan mga disipulo ni Cristo. Kasabay kaiyan, naglalaom sinda na an saindang marahay na paggawi makakapahiro sa saindang bakong kapagtubod na mga kapamilya na magbago asin pag-adalan an Bibliya.—1 Ped. 3:1, 2.