Namumutan na Nagbabasa:

Namamati mo daw na amigo mo an Diyos? Para sa dakul, imposibleng marhay iyan. An pagmati kan iba harayuon na marhay sa sainda an Diyos; an iba man naghuhuna na bako sindang mahalaga sa Diyos. Minsan siring, mamumuton na dinadagka kita kan Bibliya: “Rumani kamo sa Diyos, asin marani siya sa saindo.” (Santiago 4:8) May pag-asigurar man na sinasabi niya sa saiyang mga parasamba: “Ako, si Jehova na saimong Diyos, an nagkakapot sa tuo mong kamot, an Saro na nagsasabi sa saimo, ‘Dai ka matakot. Tatabangan taka.’”—Isaias 41:13.

Ano an puwede tang gibuhon para magin dayupot na amigo nin Diyos? Sa ano man na pakikipag-amigo ta, dapat na nakabasar iyan sa pakamidbid sa tawong iyan, na hinahangaan asin pinapahalagahan an saiyang pambihirang mga karakteristiko. Kaya mahalagang marhay na pag-adalan ta an mga kuwalidad asin pamamaagi nin Diyos na ihinahayag sa Bibliya. An paghurop-hurop kun paano ipinapahiling ni Jehova an lambang kuwalidad niya, an pakaaram kun paano iyan eksaktong inaarog ni Jesu-Cristo, asin an pagkaigwa nin pakasabot kun paano ta man maipapahiling an arog kaiyan na mga kuwalidad matabang sa sato na urog na magin harani sa Diyos. Maaaraman ta na si Jehova iyo an may deretso asin pinakaangay na magin Soberano kan uniberso. Asin maaaraman ta man na siya an Ama na kaipuhan niyato gabos. Siya makapangyarihan, makatanusan, madunong, asin mamumuton; nungka niyang papabayaan an saiyang maimbod na mga aki.

Lugod na makatabang sa saimo an librong ini na urog pang magin harani sa Diyos na Jehova asin magkaigwa nin pakikipag-amigo na magdadanay, tanganing mabuhay ka na nag-uumaw sa saiya sagkod lamang.