1-3. (a) Anong nakakatakot na pangyayari an naeksperyensiyahan kan mga disipulo sa Dagat nin Galilea, asin ano an ginibo ni Jesus? (b) Taano ta tama sanang sabihon ni apostol Pablo na “si Cristo an kapangyarihan nin Diyos”?

 NAGKATARAKOT an mga disipulo. Naglalayag sinda pasiring sa ibong na kampi kan Dagat nin Galilea kan bigla sindang abutan nin sarong subasko. Daing duda na may nahiling na sindang mga subasko sa danaw na ini—huling an nagkapira sa sainda eksperyensiyadong mga parasira. a (Mateo 4:18, 19) Pero saro ining “makusugon na alipuros,” asin huli kaiyan biglang nagin maalon na marhay an dagat. May pagkatarantang hininguwa kan mga disipulo na maniobrahon an bangka, alagad ta makusugon talaga an subasko. An nag-aalimbukay na mga alon “daing pundo sa pagsalpok sa bangka,” kaya nalalaugan na iyan nin tubig. Sa ibong kan pagkariribok, si Jesus nanok na nagtuturog sa may hurihan na parte kan bangka, na pagal-pagal pakatapos nin sarong aldaw na pagtutukdo sa dakul na tawo. Huling namemeligro an saindang buhay, pinukaw siya kan mga disipulo, na nakikimahirak: “Kagurangnan, iligtas mo kami, magagadan na kami!”—Marcos 4:35-38; Mateo 8:23-25.

² Dai natakot si Jesus. May kumpiyansang sinaway niya an  duros asin an dagat: “Pundo! Magtuninong ka!” Tulos-tulos na suminunod an duros asin an dagat—puminundo an makusugon na duros, nagtuninong an mga alon, asin “biyong kuminalma an palibot.” Grabeng takot an namatian kan mga disipulo. “Siisay man nanggad ini?” an sabi ninda sa lambang saro. Anong klase man nanggad na tawo an makakasaway sa duros asin dagat na garo pagsaway sa sarong dai makontrol na aki?—Marcos 4:39-41; Mateo 8:26, 27.

³ Pero bakong ordinaryong tawo si Jesus. An kapangyarihan ni Jehova nahiling sa saiya sa ekstraordinaryong mga paagi. An pinasabngan na si apostol Pablo tama sanang magsabi: “Si Cristo an kapangyarihan nin Diyos.” (1 Corinto 1:24) Sa anong mga paagi nagin risang-risa ki Jesus an kapangyarihan nin Diyos? Asin ano an puwedeng magin epekto sa buhay ta kan paggamit ni Jesus nin kapangyarihan?

4, 5. (a) Anong kapangyarihan asin awtoridad an itinao ni Jehova sa saiyang bugtong na Aki? (b) Ano an itinao sa Aking ini para maisagibo an mga katuyuhan kan saiyang Ama sa paglalang?

⁴ Isip-isipon an kapangyarihan na igwa si Jesus bago siya nagin tawo. Ginamit ni Jehova an saiya mismong “daing sagkod na kapangyarihan” kan lalangon niya an saiyang bugtong na Aki, na namidbid bilang si Jesu-Cristo. (Roma 1:20; Colosas 1:15) Pakatapos kaiyan, tinawan ni Jehova nin dakulaon na kapangyarihan asin awtoridad an Aking ini; tinawan Niya ini nin asignasyon na isagibo an Saiyang mga katuyuhan sa paglalang. Manungod sa Aki, sinasabi kan Bibliya: “An gabos na bagay nag-eksister paagi sa saiya, asin mayo ni sarong bagay na nag-eksister na bakong paagi sa saiya.”—Juan 1:3.

⁵ Masakiton para sa sato na masabutan kun gurano kadakula kan asignasyon na iyan. Isip-isipa an kapangyarihan na kaipuhan para malalang an minilyon na makapangyarihan  na anghel, an uniberso na may binilyon na galaksiya, asin an daga na may dakulon na manlain-lain na nabubuhay. Tanganing magibo an mga trabahong iyan, itinao sa bugtong na Aki an pinakamakapangyarihan na puwersa sa uniberso—an banal na espiritu nin Diyos. An Aking ini nakamati nin dakulang kaugmahan sa pagigin Ekspertong Trabahador, na ginamit ni Jehova sa paglalang kan gabos na iba pang bagay.—Talinhaga 8:22-31.

6. Pagkatapos na magadan asin buhayon liwat si Jesus, anong kapangyarihan asin awtoridad an itinao sa saiya?

⁶ Puwede daw na mag-ako nin urog pang kapangyarihan asin awtoridad an bugtong na Aki? Pagkatapos na magadan si Jesus asin buhayon liwat, sinabi niya: “An gabos na awtoridad sa langit asin sa daga itinao na sa sako.” (Mateo 28:18) Iyo, tinawan si Jesus kan kakayahan asin kan deretso na mamahala sa bilog na uniberso. Bilang “Hadi nin mga hadi asin Kagurangnan nin mga kagurangnan,” inawtorisaran siyang paraon “an gabos na gobyerno asin gabos na awtoridad saka kapangyarihan”—nahihiling asin dai nahihiling—na tumang sa saiyang Ama. (Kapahayagan 19:16; 1 Corinto 15:24-26) “Mayong itinada an Diyos na dai ipinasairarom” ki Jesus—an buot sabihon, si Jehova sana an dai napasairarom sa kapangyarihan niya.—Hebreo 2:8; 1 Corinto 15:27.

7. Taano ta makakasigurado kita na nungkang aabusuhon ni Jesus an kapangyarihan na itinao ni Jehova sa saiya?

⁷ Dapat daw na mahadit kita na tibaad abusuhon ni Jesus an saiyang kapangyarihan? Dai nanggad! Talagang namumutan ni Jesus an saiyang Ama asin nungka siyang magibo nin ano man na ikakaanggot niya. (Juan 8:29; 14:31) Aram na marhay ni Jesus na nungkang inaabuso ni Jehova an saiyang kapangyarihan bilang Makakamhan sa Gabos. Nahiling mismo ni Jesus na si Jehova naghahanap nin mga oportunidad “tanganing ipahiling an saiyang kusog alang-alang sa mga bilog an puso para sa saiya.” (2 Cronica 16:9) Sa katunayan, namumutan man ni Jesus an katawuhan  arog kan pagkamuot kan saiyang Ama, kaya makakapagtiwala kita na pirming gagamiton ni Jesus an saiyang kapangyarihan para gumibo nin marahay. (Juan 13:1) Napatunayan na iyan ni Jesus huli sa marahay na rekord na nagibo niya. Isip-isipon ta an kapangyarihan na igwa siya kaidto kan yaon siya digdi sa daga asin kun paano siya napahiro para gamiton iyan.

8. Pagkatapos siyang lahidan, tinawan si Jesus nin kapangyarihan na gibuhon an ano, asin paano niya ginamit an saiyang kapangyarihan?

⁸ Minalataw na mayong ginibong milagro si Jesus kan siya aki pa asin nagdadakula sa Nazaret. Pero nabago iyan pakatapos na mabawtismuhan siya kan 29 C.E., kan siya mga 30 anyos. (Lucas 3:21-23) Sinasabi sa sato kan Bibliya: “Siya linahidan nin Diyos nin banal na espiritu saka tinawan nin kapangyarihan, asin naglibot siya sa bilog na kadagaan na naggigibo nin marahay saka nagpapaumay sa gabos na pinapasakitan kan Diyablo.” (Gibo 10:38) “Naggigibo nin marahay”—bako daw na ipinaparisa kaiyan na ginamit ni Jesus sa tama an saiyang kapangyarihan? Pagkatapos siyang lahidan, nagin siyang “sarong propeta na may makapangyarihan na mga gibo asin mapuwersang mga tataramon.”—Lucas 24:19.

9-11. (a) Sain parati ginibo ni Jesus an saiyang pagtutukdo, asin anong kadipisilan an inatubang niya? (b) Taano ta napangalas na marhay an dakul na tawo sa paagi ni Jesus nin pagtutukdo?

⁹ Paano si Jesus nagin makapangyarihan sa tataramon? Parati siyang nagtutukdo sa luwas—sa mga gilid nin danaw asin mga gilid nin bulod saka sa mga tinampo asin saudan. (Marcos 6:53-56; Lucas 5:1-3; 13:26) An saiyang mga paradangog madali sanang makakahali kun dai sinda interesado sa saiyang mga tataramon. Kan panahon na idto mayo pa nin imprentadong mga libro, kaya an mga mapag-apresyar na mga paradangog kaipuhan na isaisip asin isapuso an saiyang  mga tataramon. Kaya an pagtutukdo ni Jesus kinaipuhan na biyong nakakakua nin atensiyon, madaling masabutan, asin madaling tandaan. Pero an mga iyan dai nagin problema para ki Jesus. Halimbawa, isip-isipa an saiyang Sermon sa Bukid.

¹⁰ Sarong aga sa kapinunan nin 31 C.E., dakul na tawo an nagtiripon sa sarong gilid nin bulod harani sa Dagat nin Galilea. May mga hali sa Judea asin Jerusalem, na 100 sagkod 110 kilometros an rayo. An iba man hali sa mga baybayon nin Tiro asin Sidon, sa norte. Dakul na may hilang an nagrani ki Jesus tanganing madutan siya, asin pinaumayan niya sinda gabos. Kan mayo na nin maski saro na may grabeng hilang sa tahaw ninda, nagpuon siyang magtukdo. (Lucas 6:17-19) Paghaloy-haloy, kan matapos na siya sa pagtaram, nagngalas sinda sa saindang nadangog. Taano?

¹¹ Pakalihis nin mga taon, an saro na nakadangog kan sermon na idto nagsurat: “Napangalas na marhay an mga tawo sa saiyang paagi nin pagtukdo, huli ta nagtutukdo siya sa sainda bilang sarong tawo na igwa nin awtoridad.” (Mateo 7:28, 29) Si Jesus nagtaram sa paagi na namamatian ninda an kapangyarihan. Nagtaram siya bilang representante nin Diyos asin ibinasar niya an saiyang katukduan sa Tataramon nin Diyos. (Juan 7:16) An mga sinasabi ni Jesus malinaw, an saiyang mga sadol nakakakumbinsir, asin an saiyang mga argumento dai mapapahimutikan. Natumbok kan mga tataramon niya an tunay na mga isyu saka naabot an puso kan mga nagdadangog sa saiya. Tinukduan niya sinda kun paano magigin maugma, kun paano mamimibi, kun paano hahanapon an Kahadian nin Diyos, asin kun paano makakapagtugdok para sa sarong magayon na puturo. (Mateo 5:3–7:27) Napahiro kan mga tataramon niya an puso kan mga nagugutom sa katotoohan asin katanusan. An mga tawong idto andam na “talikdan” an saindang sadiri asin bayaan an  gabos na bagay tanganing magsunod sa saiya. (Mateo 16:24; Lucas 5:10, 11) Sarong patotoo nanggad iyan kan kapangyarihan kan mga tataramon ni Jesus!

12, 13. Sa anong paagi na si Jesus “may makapangyarihan na mga gibo,” asin may anong pagkakalain-lain an saiyang mga milagro?

¹² Si Jesus man “may makapangyarihan na mga gibo.” (Lucas 24:19) Mababasa sa mga Ebanghelyo an labing 30 espesipikong milagro na ginibo niya—gabos paagi sa “kapangyarihan ni Jehova.” b (Lucas 5:17) Rinibong tawo an nakinabang sa mga milagro ni Jesus. Isip-isipa na sana an duwang milagro—an pagpakakan sa 5,000 na lalaki asin pagkatapos 4,000 na lalaki. Kun iiiba sa bilang an mga babayi asin mga aki, posibleng rinibo pa an makakadagdag sa bilang!—Mateo 14:13-21; 15:32-38.

¹³ Manlain-lain na milagro an ginibo ni Jesus. Igwa siya nin awtoridad sa mga demonyo; madalion niya sana sindang napalayas. (Lucas 9:37-43) Igwa siya nin kapangyarihan na gibuhon na arak an tubig. (Juan 2:1-11) Imahinara an pagngalas kan saiyang mga disipulo kan “nahiling ninda si Jesus na naglalakaw sa ibabaw kan dagat.” (Juan 6:18, 19) Igwa siya nin kapangyarihan na bulungon an gabos na klase nin hilang, arog kan mga depekto sa hawak, pabalik-balik na hilang, asin nakakagadan na hilang. (Marcos 3:1-5; Juan 4:46-54) Ginibo niya an siring na mga pagpaumay sa lain-lain na paagi. An nagkapira pinaumayan niya dawa harayo sa saiya, mantang an iba dinutan mismo ni Jesus. (Mateo 8:2, 3, 5-13) An nagkapira pinaumayan nin bigla, an iba man luway-luway.—Marcos 8:22-25; Lucas 8:43, 44.

14. Sa anong mga sitwasyon ipinahiling ni Jesus an saiyang kapangyarihan na buhayon liwat an gadan?

 ¹⁴ An pinakamakangangalas, igwa si Jesus nin kapangyarihan na buhayon liwat an gadan. Sinasambit kan Bibliya an tulong pangyayari na nagbuhay siya nin gadan; ibinalik niya an sarong 12 anyos na daragita sa mga magurang kaini, an sarong solo-solong aki sa balo kaining ina, asin an sarong namumutan na marhay na tugang na lalaki sa mga tugang kaining babayi. (Lucas 7:11-15; 8:49-56; Juan 11:38-44) Mayo nin sitwasyon na nagin masakiton para sa saiya. Binuhay niya an 12 anyos na daragita sa higdaan kaini dai nahaloy pagkagadan kaini. Binuhay niya liwat an aking lalaki kan babaying balo mantang nasa tiheras ini para sa paglubong, na daing duda na nagadan an aki sa aldaw man sanang idto. Asin binuhay niya si Lazaro hali sa lulubngan apat na aldaw pagkagadan kaini.

15, 16. Ano an ebidensiya na si Jesus bakong makasadiri sa paggamit kan saiyang kapangyarihan?

¹⁵ Naiimahinar mo daw an posibleng pag-abuso sa kapangyarihan kun an kapangyarihan ni Jesus itinao sa sarong bakong perpektong tagapamahala? Pero si Jesus daing kasalan. (1 Pedro 2:22) Dai siya nagin makasadiri, ambisyoso, asin mahanab—mga kuwalidad na nagmomotibar sa bakong perpektong mga tawo para gamiton an saindang kapangyarihan sa ikakapahamak nin iba.

¹⁶ Si Jesus bakong makasadiri sa paggamit kan saiyang kapangyarihan; nungka niyang ginamit iyan para sa personal na pakinabang. Kan siya nagugutom, nagsayuma siyang gibuhon na tinapay an mga gapo para magin pagkakan niya. (Mateo 4:1-4) An kakadikit na pagsadiri niya ebidensiya na dai niya ginamit an saiyang kapangyarihan para  magganansiya. (Mateo 8:20) May dagdag pang pruweba na an makapangyarihan niyang mga gibo bakong dahil sa makasadiring mga motibo. Pag nagmimilagro siya, ginigibo niya iyan nin may pagsasakripisyo. Pag nagpapaumay siya nin may hilang, may kapangyarihan na minaluwas sa saiya. Namatian niya an pagluwas na ini nin kapangyarihan, dawa kan saro sana an pinaumayan. (Marcos 5:25-34) Pero, pinabayaan niya na dutan siya nin dakul na tawo, asin naumayan sinda. (Lucas 6:19) Patunay nanggad kan saiyang pagigin bakong makasadiri!

17. Paano ipinahiling ni Jesus na responsable siya sa paggamit kan saiyang kapangyarihan?

¹⁷ Responsable si Jesus sa paggamit kan saiyang kapangyarihan. Nungka niyang ginamit an saiyang kapangyarihan para sana magpasikat o makakua nin atensiyon. (Mateo 4:5-7) Nagsayuma siyang gumibo nin mga tanda tangani sanang paniguan an pag-usyoso ni Herodes na may salang motibo. (Lucas 23:8, 9) Imbes na ipamareta an saiyang kapangyarihan, parating pinagbubutan ni Jesus an mga pinaumayan niya na dai iyan pagsabihon sa kiisay man. (Marcos 5:43; 7:36) Habo niyang magkongklusyon an mga tawo manungod sa saiya basado sa nakakabiglang mga bareta.—Mateo 12:15-19.

18-20. (a) Ano an nakapahiro ki Jesus sa paggamit niya kan saiyang kapangyarihan? (b) Ano an masasabi mo manungod sa paagi nin pagpaumay ni Jesus sa sarong bungog?

¹⁸ An makapangyarihan na tawong ini, si Jesus, lain na marhay sa mga tagapamahalang ginamit an saindang kapangyarihan na dai lamang iniintindi an mga pangangaipo asin pagsakit nin iba. Si Jesus may pagmakulog sa mga tawo. An mahiling sanang nagsasakit sinda nin grabe nakakaapektar nang marhay sa saiya kaya napapahiro siyang paginhawahon sinda sa saindang pagsakit. (Mateo 14:14) Makonsiderasyon siya sa saindang mga pagmati asin pangangaipo, asin an mamumuton na pagmakulog na ini  igwa nin epekto sa paggamit niya kan saiyang kapangyarihan. An sarong nakakapukaw sa buot na halimbawa yaon sa Marcos 7:31-37.

¹⁹ Sa pangyayaring ini, nanumpungan si Jesus nin dakulon na tawo asin dinara sa saiya an dakul na may hilang, asin pinaumayan niya sinda gabos. (Mateo 15:29, 30) Pero tinawan ni Jesus nin espesyal na atensiyon an sarong lalaki para pahilingan nin espesyal na konsiderasyon. An lalaking iyan bungog asin haros dai makataram. Posibleng narisa ni Jesus na ninenerbiyos o nasusupog an lalaki. Sa makonsiderasyon na paagi, irinayo ni Jesus an lalaki sa dakul na tawo. Dangan nagsenyas si Jesus tanganing ipasabot sa lalaki kun ano an gigibuhon niya. “Dinutan niya kan saiyang mga muro an mga talinga kan lalaki, asin pagkatapos maglutab, dinutan niya an dila kaini.” c (Marcos 7:33) Dangan, nagtangad si Jesus sa langit asin naghangos nin hararom. Paagi sa mga aksiyon na iyan garo man sana sinasabi sa lalaki, ‘Ining gigibuhon ko sa saimo huli ini sa kapangyarihan nin Diyos.’ Sa katapos-tapusi, sinabi ni Jesus: “Mabuksan ka.” (Marcos 7:34) Sa pagkakataon na iyan, nakabalik an pagdangog kan lalaki, asin nakataram na siya nin normal.

²⁰ Nakakapukaw nanggad sa buot na isip-isipon na dawa pag ginagamit ni Jesus an kapangyarihan na itinao nin Diyos para paumayan an mga nagsasakit nin grabe, maduminamay niyang kinokonsiderar an saindang pagmati! Bako daw na nakakapakusog sa buot na maaraman na an ibinugtak ni Jehova na mamahala sa Mesiyanikong Kahadian sarong mapagmakulog asin makonsiderasyon na Tagapamahala?

21, 22. (a) Ano an ipinapanganino kan mga milagro ni Jesus? (b) Huling may kontrol si Jesus sa natural na mga puwersa, ano an maaasahan niyato sa irarom kan pamamahala niya sa Kahadian?

²¹ An makapangyarihan na mga gibo ni Jesus digdi sa daga mga patanaw sana kan maabot na mas dakula pang mga bendisyon sa irarom kan saiyang pamamahala bilang hadi. Sa bagong kinaban nin Diyos, magibo pa man giraray si Jesus nin mga milagro—alagad sa bilog nang daga! Isip-isipa an nagkapira sa nakakapukaw sa buot na mga mangyayari sa maabot na panahon.

²² Ibabalik ni Jesus an perpektong kamugtakan kan ekolohiya kan daga. Girumduma na ipinahiling niya na may kontrol siya sa natural na mga puwersa paagi sa pagpakalma sa alipuros. Kun siring, sigurado na sa irarom kan pamamahala ni Cristo sa Kahadian, dai na kaipuhan na matakot an mga tawo na maapektaran pa nin mga bagyo, linog, pagtuga nin bulkan, o iba pang mga kalamidad. Mantang si Jesus an Ekspertong Trabahador, na ginamit ni Jehova sa paglalang kan daga asin kan gabos na nabubuhay na yaon diyan, lubos niyang nasasabutan an pagkagibo kan daga. Aram niya kun paano gagamiton nin tama an mga yaman kaiyan. Sa irarom kan saiyang pamamahala, an enterong dagang ini magigin Paraiso.—Lucas 23:43.

23. Bilang Hadi, paano papaniguan ni Jesus an mga pangangaipo nin katawuhan?

²³ Kumusta man kun manungod sa mga pangangaipo kan katawuhan? An kakayahan ni Jesus na pakakanon nin abunda an rinibong tawo paagi sa dikit sanang suplay nin kakanon naggagarantiya sa sato na sa pamamahala niya mayo nang magugutom. Iyo, magigin abunda na an kakanon para sa gabos; mawawara na an gutom sagkod lamang. (Salmo 72:16) Huli sa saiyang kapangyarihan na bulungon an gabos na hilang asin kamatian, an mga buta, bungog, baldado, asin pilay mauumayan na nin lubos asin permanente. (Isaias 33:24;  35:5, 6) An saiyang kakayahan na buhayon liwat an mga gadan naggagarantiya na kaiba sa kapangyarihan niya bilang Hadi sa langit an kakayahan na buhayon liwat an minilyon na tawo na ikinakaugma kan saiyang Ama na girumdumon.—Juan 5:28, 29.

24. Mantang hinuhurop-hurop niyato an kapangyarihan ni Jesus, ano an dapat na girumdumon ta, asin taano?

²⁴ Mantang hinuhurop-hurop niyato an kapangyarihan ni Jesus, girumdumon ta na inaarog kan Aking ini an saiyang Ama sa perpektong paagi. (Juan 14:9) Sa siring, an paggamit ni Jesus nin kapangyarihan nagtatao sa sato nin malinaw na ladawan kun paano ginagamit ni Jehova an kapangyarihan. Halimbawa, isip-isipa an mamumuton na paagi nin pagpaumay ni Jesus sa sarong may leproso. Huling nahirak na marhay si Jesus, dinutan niya an lalaki asin sinabi: “Gusto ko!” (Marcos 1:40-42) Paagi sa arog kaiyan na mga pagkasaysay, garo man sana sinasabi ni Jehova, ‘Arog kaiyan an paggamit ko kan sakong kapangyarihan!’ Dai ka daw napapahirong umawon an satong makakamhan sa gabos na Diyos asin magpasalamat na ginagamit niya an saiyang kapangyarihan sa siring kamamumuton na paagi?