An ilustrasyon manungod sa nawarang aki, na isinaysay pa sana ni Jesus, dapat na nakapagtukdo sa nagdadangog na mga parasingil nin buhis, mga eskriba, asin mga Fariseo na an Diyos andam na patawadon an nagsusulsol na mga parakasala. (Lucas 15:1-7, 11) Kinaulay ngunyan ni Jesus an mga disipulo. Nagtao siya nin saro pang ilustrasyon, na sa pagkakataon na ini, dapit sa sarong mayaman na naaraman na an katiwala niya sa harong guminawi nin bakong tama.

Isinaysay ni Jesus na an katiwala inakusaran nin magastuson na pagmanehar kan mga pagsadiri kan kagurangnan niya. Kaya sinabi kan kagurangnan na hahalion na niya an katiwala. “Ano an gigibuhon ko,” an inisip-isip kan katiwala, “ngunyan na hinahali ako kan sakuyang kagurangnan sa pagigin katiwala? Dai ko kayang maggudak nin daga, saka nasusupog akong makilimos.” Para mapaghandaan an mangyayari, naisip niya: “Ah! Aram ko na an gigibuhon ko, tanganing pag nahali ako sa pagigin katiwala, may mga tawong magpadagos sa sako sa harong ninda.” Inapod niya tulos an mga may utang, asin saro-saro sindang hinapot: “Pira an utang mo sa sakuyang kagurangnan?”—Lucas 16:3-5.

Suminimbag an inot: “Sanggatos na takad nin lanang oliba.” Mga 2,200 na litro iyan. An may utang tibaad nagkaigwa nin mahiwas na tanuman nin olibo o nagin negosyante nin lana. Sinabi kan katiwala sa saiya: “Kuana an saimong nasusurat na kasunduan asin tumukaw ka saka suratan mo tulos nin 50 [1,100 na litro].”—Lucas 16:6.

Hinapot kan katiwala an saro pa: “Ika man, pira an utang mo?” Nagsimbag ini: “Sanggatos na darakulang takad nin trigo.” Mga 22,000 na litro iyan nin trigo. Sinabi kan katiwala sa may utang: “Kuana an saimong nasusurat na kasunduan asin suratan mo nin 80.” Kaya binawasan niya an utang nin 20 porsiyento.—Lucas 16:7.

An katiwala pa man giraray an namamahala sa mga pagsadiri kan kagurangnan niya, kaya may awtoridad pa siyang bawasan an utang kan iba sa saiyang kagurangnan. Paagi kaini, nakikipag-amigo an katiwala sa mga makakatao sa saiya nin pabor pag nawaran na siya nin trabaho.

Dai nahaloy, naaraman ini kan kagurangnan. Dawa ngani nangahulugan iyan nin kalugihan sa saiya, napahanga siya sa katiwala asin inumaw ini huling “dawa bakong matanos, nahiling an saiyang kadunungan sa ginibo niya.” Sinabi pa ni Jesus: “An mga aki kan sistemang ini nin mga bagay mas madunong kisa sa mga aki kan liwanag kun manungod sa pagigin mapamaagi sa buhay.”—Lucas 16:8.

Dai kinokonsinte ni Jesus an ginibo kan katiwala, ni dinadagka man niya an mga tawo na mandaya sa pakikipagtransaksiyon sa negosyo. Kun siring, ano an punto niya? Dinagka niya an mga disipulo: “Gamiton nindo an bakong matanos na kayamanan para magkaigwa kamo nin mga amigo, tanganing pag an kayamanan na iyan maubos na, aakuon ninda kamo sa mga irukan na nagdadanay sagkod lamang.” (Lucas 16:9) May manunudan kita digdi dapit sa patiinot na pagplano asin paggamit nin kadunungan para makahanap nin paagi. Kaipuhan na gamiton kan mga lingkod nin Diyos, an “mga aki kan liwanag,” an materyal na mga pagsadiri ninda sa madunong na paagi, na isinasaisip an daing katapusan na puturo.

 Si Jehova Diyos sana saka an saiyang Aki an puwedeng umako sa saro para makaduman sa Kahadian sa langit o mabuhay sa Paraiso sa daga na sakop kan Kahadian na iyan. Dapat na lubos kitang makipag-amigo sa sainda paagi sa paggamit kan satong materyal na mga kayamanan para suportaran an intereses kan Kahadian. Sa siring, masisigurado an satong daing katapusan na puturo pag an bulawan, pirak, asin iba pang materyal na mga kayamanan maubos o mawara na.

Sinabi man ni Jesus na an mga maaasahan sa pag-asikaso asin paggamit nin ano man na kayamanan o materyal na mga pagsadiri maaasahan man sa pag-asikaso sa mga bagay na urog na mahalaga. “Kun siring,” an idinuon ni Jesus, “kun dai nindo ipinapahiling na maaasahan kamo sa paggamit kan bakong matanos na kayamanan, siisay an magkakatiwala sa saindo kan tunay na kayamanan [siring kan intereses kan Kahadian]?”—Lucas 16:11.

Itinutukdo ni Jesus sa mga disipulo na para akuon sinda “sa mga irukan na nagdadanay sagkod lamang,” dakul an hahagadon sa sainda. An saro dai puwedeng magin tunay na lingkod nin Diyos kun kasabay kaiyan uripon man siya nin bakong matanos na materyal na mga kayamanan. Bilang pagtatapos, sinabi niya: “Daing suruguon na puwedeng magin uripon nin duwang kagurangnan, huli ta magsalang ikakaungis niya an saro asin mamumutan an saro, o magigin maimbod siya sa saro asin hahabuan an saro. Dai kamo puwedeng magin uripon nin Diyos asin nin Kayamanan.”—Lucas 16:9, 13.