Paghali sa Jerico, pa-Betania na si Jesus. Dipisil na pagbaklay ini huling kaipuhan na tumukad nin mga 20 kilometros. An Jerico mas hababa nin mga 250 metros sa kapantayan kan dagat, asin an Betania mas halangkaw nin mga 610 metros sa kapantayan kan dagat. Si Lazaro saka an duwa niyang tugang na babayi nakaistar sa sadit na baryo nin Betania, na mga tulong kilometro an rayo sa Jerusalem asin nasa sirangan na bakilid kan Bukid nin mga Olibo.

Dakul nang Judio an nag-arabot sa Jerusalem para sa Paskuwa. Amay sindang nag-abot “tanganing maglinig kan saindang sadiri sa seremonyal na paagi” enkaso may nadutan sindang sarong gadan o may nagibong ibang bagay na nagpaati sa sainda. (Juan 11:55; Bilang 9:6-10) An nagkapira sa mga ini na amay na nag-abot nagtiripon sa templo. Nag-uurulay-ulay sinda kun baga maduman si Jesus sa Paskuwa.—Juan 11:56.

May dakulang kontrobersiya mapadapit ki Jesus. May mga lider nin relihiyon na gusto siyang dakupon para ipagadan. Sa katunayan, nagtao sinda nin pagbuot na kun may siisay man na makaaram kun hain si Jesus, dapat niya ining ipaisi sa sainda, “tanganing madakop ninda siya.” (Juan 11:57) Hininguwa na kan mga lider na ini na gadanon si Jesus pakatapos niyang buhayon si Lazaro. (Juan 11:49-53) Natural sana na magduda an iba kun baga mapahiling pa si Jesus sa publiko.

Nag-abot si Jesus sa Betania nin Biyernes, “anom na aldaw bago an Paskuwa.” (Juan 12:1) Mapuon an bagong aldaw (Sabbath, Nisan 8) pakasulnop kan saldang. Kaya, natapos niya an pagbaklay bago umabot an Sabbath. Dai siya puwedeng magbaklay haling Jerico sa aldaw nin Sabbath—puon sa pagsulnop kan saldang nin Biyernes sagkod sa pagsulnop kan saldang nin Sabado—huling an siring na pagbaklay ipinagbabawal kan katugunan nin mga Judio. Posibleng nagduman si Jesus sa harong ni Lazaro, arog kan ginibo niya kaidto.

Si Simon, na nakaistar man sa Betania, inimbitaran si Jesus saka an mga kairiba kaini, pati na si Lazaro, para sa sarong pamanggihan kan Sabado. Inaapod si Simon na “dating may leproso” dahil posibleng saro siya sa mga dating may leproso na pinaumayan ni Jesus. Huling mahigos si Marta, nagseserbi siya sa mga bisita. Nagpahiling si Maria nin espesyal na atensiyon ki Jesus, na sa pagkakataon na ini, nagin dahilan para magkaigwa nin diriskusyunan.

Nagbukas si Maria nin sadit na lalagan na alabastro, na may laog na mga “kabangang litro nin pahamot na lana, purong nardo.” (Juan 12:3) Mamahalon na marhay ini huling an kantidad kaiyan (300 na denario) katumbas nin mga sarong taon na bayad sa sarong trabahador! Ibinubo ni Maria an lana sa payo saka sa mga bitis ni Jesus dangan pinunasan niya an mga bitis kaini kan saiyang buhok. An mahamot na parong nakalakop sa bilog na harong.

Naanggot an mga disipulo asin naghapot: “Ano ta sinayang sana an pahamot na lanang ini?” (Marcos 14:4) Nagkontra si Judas Iscariote sa ginibo ni Maria asin nagsabi: “Taano ta dai na lang ipinabakal an pahamot na lanang ini sa kantidad na 300 na denario asin itinao iyan sa mga pobre?” (Juan 12:5)  Dai man talaga nagmamalasakit si Judas sa mga pobre. Hinahabunan niya kaya an kahon nin kuwarta na kapot niya para sa mga disipulo.

Sinurog ni Jesus si Maria asin nagsabi: “Taano ta arog kamo kaiyan sa babayi? Naggibo siya nin marahay sa sako. Huli ta an mga pobre pirmi nindong kaibanan, pero ako dai. Kan ibubo niya sa hawak ko an pahamot na lanang ini, ginibo niya iyan tanganing andamon ako para sa lubong. Sinisigurado ko sa saindo, sain man sa bilog na kinaban ihulit an maugmang baretang ini, an ginibo kan babaying ini isasaysay man bilang pagrumdom sa saiya.”—Mateo 26:10-13.

Labi nang sarong aldaw na nasa Betania si Jesus, asin dakul na an nakakaaram na yaon siya duman. Dakul na Judio an nag-arabot sa harong ni Simon bako sanang para mahiling si Jesus kundi para mahiling man si Lazaro, “na ibinangon [ni Jesus] hali sa mga gadan.” (Juan 12:9) An panginot na mga saserdote nagkurumplutan ngunyan na gadanon si Jesus saka si Lazaro. Iniisip kan mga lider na ini nin relihiyon na an pagkabuhay liwat ni Lazaro an dahilan kun taano ta dakul an nagtuturubod ki Jesus. Marauton talaga an mga lider na ini nin relihiyon!