Sarong Libro Para sa Saindo?

“An paggibo nin dakol na libro mayo nin katapusan,” sabi ni Salomon mga 3,000 na taon na an nakaagi. (Eclesiastes 12:12) An obserbasyon na iyan angay pa man giraray ngonyan. Apuera sa pamilyar nang marhay na mga klasiko, rinibong bagong libro an iniimprenta kada taon. Mantang kadakol kan librong mapagpipilian, taano ta maninigo nindong basahon an Biblia?

DAKOL an nagbabasa nin libro magsalang tanganing mag-aling-aling o tanganing may maaraman, o tibaad para sa duwang dahelan na iyan. Puede man iyan na magin totoo manongod sa pagbasa kan Biblia. An pagbasa kaiyan puedeng makapaoswag, makaaling pa ngani. Alagad bako sanang arog kaiyan an Biblia. Iyan napapalaen na gikanan nin kaaraman.—Eclesiastes 12:9, 10.

Sinisimbag kan Biblia an mga hapot na haloy nang pinepensar nin mga tawo—mga hapot manongod sa satong nakaagi, sa satong presente, asin sa satong ngapit. Dakol an nag-iisip-isip: Saen kita hale? Ano an katuyohan nin buhay? Paano kita makanonompong nin kaogmahan sa buhay? Permi daw na magkakaigwa nin buhay digdi sa daga? Ano an tagama kan ngapit para sa sato?

An iribang puersa kan gabos na ebidensiang iinatubang digdi malinaw na nagpapatunay na an Biblia eksakto asin tunay. Naestudyaran na niato kun paano makatatabang sa sato an praktikal na hatol kaiyan tanganing makapamuhay nin makahulogan asin maogma ngonyan. Mantang nakakokontento an mga simbag kaiyan manongod sa presente, tunay na an mga simbag kaiyan manongod sa nakaagi asin an mga hula kaiyan manongod sa ngapit maninigong tawan nin maingat na atension.

Kun Paano Makukua an Pinakadakulang Pakinabang

Dakol an nagpoon na magbasa kan Biblia alagad ta puminondo kan madepisilan sindang masabotan an ibang kabtang kaiyan. Kun iyan an nagin eksperyensia nindo, may nagkapirang bagay na tibaad makatabang.

Pumili nin masasarigan na traduksion na nasa lenguaheng ginagamit sa presenteng aldaw, arog kan New World Translation of the Holy Scriptures. a An iba minapoon paagi sa pagbasa kan mga pagkasaysay sa Ebanghelyo kan buhay ni Jesus, na an madonong na mga tokdo, arog kan yaon sa Sermon sa Bukid, nagpapabanaag nin nakarororop na pakaaram sa ugaleng tawo asin sinusumaryo kun paano mapaooswag an kamugtakan niato sa buhay.—Helingon an Mateo kapitulo 5 sagkod 7.

Apuera sa diretsong pagbasa kan Biblia, puedeng magin biyong nakapagtotokdo an topikong paagi nin pag-adal. Kalabot digdi an pag-analisar kan sinasabi kan Biblia manongod sa sarong partikular na tema. Tibaad masorpresa kamong maaraman an talagang sinasabi kan Biblia manongod sa mga topiko na arog baga kan kalag, langit, daga, buhay, asin kagadanan, siring man an Kahadean nin Dios—kun ano iyan asin kun ano an gigibohon kaiyan. b An Mga Saksi ni Jehova may programa para sa topikong pag-adal sa Biblia, na itinatao nin daing bayad. Puede kamong maghapot manongod dian paagi sa pagsurat sa mga kagpublikar, na ginagamit an angay na adres na nalilista sa pahina 2.

Pakasiyasat kan ebidensia, dakol an nagkonklusyon na an Biblia gikan sa Dios, na ipinamimidbid kan Kasuratan na iyo “si Jehova.” (Salmo 83:18) Tibaad dai kamo kombensido na an Biblia gikan sa Dios. Alagad taano ta dai nindo iyan siyasaton mismo? Kompiado kami na pakatapos na manodan, mahorophorop, asin tibaad maeksperyensiahan mismo nindo an praktikal na halaga kan dai apektado nin panahon na kadonongan kaiyan, an magigin saboot nindo an Biblia talagang sarong libro para sa gabos na tawo, asin orog na—sarong libro para sa saindo.

[Mga Nota sa Ibaba]