Talinhaga 11:1-31
11 An madayang timbangan makababaldi ki Jehova,Pero an eksaktong pantimbang* nakakapaugma sa saiya.+
2 Pag an kapangahasan mag-abot, kawaran nin onra an masunod,+Pero an kadunungan yaon sa mga hababa an buot.+
3 An integridad kan mga matanos iyo an naggigiya sa sainda,+Pero an katusuhan kan mga madaya iyo an malaglag sa sainda.+
4 An kayamanan* magigin daing pakinabang sa aldaw nin kabangisan,+Pero an katanusan iyo an magliligtas sa kagadanan.+
5 An katanusan kan daing katuyawan iyo an nagtatanos kan saiyang dalan,Pero an maraot matutumba huli kan saiya mismong karatan.+
6 An katanusan kan mga matanos iyo an magliligtas sa sainda,+Pero an mga madaya masisilo kan sadiring mga pagmawot ninda.+
7 Pag nagadan an tawong maraot, an saiyang paglaom napapara;Asin an saiyang mga inaasahan na nakasarig sa sadiri niyang puwersa napapara man.+
8 An matanos iliniligtas sa kasakitan,Asin an maraot an minasalida sa saiyang kinamumugtakan.+
9 Paagi sa saiyang nguso, an apostata* dinadara an saiyang kapwa sa kapahamakan,Pero paagi sa kaaraman, an mga matanos naililigtas.+
10 An karahayan kan mga matanos nakakapagaya-gaya sa sarong siyudad,Asin pag an mga maraot nagagadan, may kurahaw nin kaugmahan.+
11 Napapamuraway an sarong siyudad huli sa bendisyon sa* mga matanos,+Pero ginagaba iyan kan nguso kan mga maraot.+
12 An siisay man na mayo nin marahay na pagmansay* dinuduhagi* an saiyang kapwa,Pero an tawong may tunay na pakasabot nagdadanay na silensiyo.+
13 An sarong parapakaraot naglilibot asin ihinahayag an kumpidensiyal na urulay,+Pero an tawong mapagtitiwalaan* itinatago an kumpidensiyal na bagay.*
14 Kun mayo nin mahusay* na paggiya, minabagsak an banwaan,Pero may kapangganahan* pag dakul an parakonseho.*+
15 An siisay man na naggagarantiya sa utang nin* sarong estranghero siguradong mapaparaot,+Pero an siisay man na minalikay na* makipag-abrasa tanganing maggarantiya magigin tiwasay.
16 An babaying may marahay na buot* nagkakamit nin kamurawayan,+Pero an mga lalaking daing hirak nang-aagaw nin kayamanan.
17 An tawong mabuot* nagdadara sa sadiri niya nin pakinabang,*+Pero an tawong maringis nagdadara sa sadiri niya nin kapahamakan.*+
18 An sarong maraot nakakakua nin mapandayang kabayadan,+Pero an saro na nagsasabwag nin katanusan nagkakamit nin tunay na balos.+
19 An saro na marigon na naninindugan sa katanusan nakalinya para sa buhay,+Pero an saro na naglalapag sa karatan nakalinya para sa kagadanan.
20 Idtong mga biko an puso makababaldi ki Jehova,+Pero idtong mga daing katuyawan an dalan nakakapaugma sa saiya.+
21 Makakasigurado ka kaini:* An maraot na tawo dai makakalibre sa padusa,+Pero an mga aki kan mga matanos makakadulag.
22 Siring sa bulawan na singsing* sa ungos nin urigAn sarong magayon na babayi na isinisikwal an marahay na pagmansay.
23 An minamawot kan mga matanos pasiring sa karahayan,+Pero an linalauman kan mga maraot pasiring sa grabeng kaanggutan.
24 May saro na bukas-palad na nagtatao* asin nagkakaigwa nin urog pa;+May saro man na ipinapanguri an dapat itao, pero kadukhaan an kinakaabtan niya.+
25 An tawong* bukas-palad mag-uuswag,*+Asin an siisay man na nagpapaginhawa* sa iba papaginhawahon* man.+
26 Mamaldisyunon nin mga tawo an saro na nagtatago nin mga tipasi,Pero bebendisyunan* ninda an saro na nagpapabakal kaini.
27 An matiyagang naghahanap nin pagkakataon na makagibo nin marahay naghihinguwang makamtan an pag-uyon,+Pero an naghahanap nin pagkakataon na makagibo nin maraot—siguradong iyan man mismo an saiyang sasaparon.+
28 An saro na nananarig sa saiyang kayamanan mabagsak,+Pero an mga matanos magigin marambong na siring sa mga dahon.+
29 An siisay man na nagdadara nin kapahamakan* sa saiyang pamilya mamanahon an duros,+Asin an tawong mangmang magigin suruguon kan saro na may pusong madunong.
30 An bunga* kan sarong matanos kahoy nin buhay,+Asin an saro na napapahiro an iba na gumibo nin marahay* madunong.+
31 Iyo, kun binabalusan ngani an saro na matanos sa daga,Di lalo na an maraot asin an parakasala!+
Mga Nota
^ O “an kumpletong gapong pantimbang.”
^ O “An mahahalagang pagsadiri.”
^ O “an tawong daing Diyos.”
^ O “kan.”
^ O “kulang nin marahay na pagmansay.” Sa literal, “mayong (tikapo an) puso.”
^ O “hinahamak.”
^ Sa literal, “an saro na maimbod sa espiritu.”
^ Sa literal, “tinatahuban an sarong bagay.”
^ O “madunong.”
^ O “kaligtasan.”
^ O “parataong sadol.”
^ O “ginagarantiyahan an.”
^ Sa literal, “na ikinakaungis an.”
^ O “babaying kawili-wili.”
^ O “may maimbod na pagkamuot.”
^ O “naggigibo sa kalag niya nin karahayan.”
^ O “kasusupgan.”
^ Sa literal, “Kamot sa kamot.”
^ O “barangkiyaw.”
^ Sa literal, “saro na nananabwag.”
^ O “magiginhawahan.”
^ Sa literal, “nagbabaribi nin bastante.”
^ Sa literal, “papatabaon.”
^ O “kalag na.”
^ O “uumawon.”
^ O “kasusupgan.”
^ O “ginigibo.”
