Hukom 19:1-30
-
Panglulupig kan mga Benjaminita sa Gibeah (1-30)
19 Kan panahon na idto, kan mayo nin hadi sa Israel,+ sarong Levita na nakaistar sa puwerang lugar sa kabukidan nin Efraim+ an nag-agom nin sarong babaying taga Betlehem+ sa Juda bilang saiyang sekondaryong agom.
2 Pero bakong maimbod sa saiya an saiyang sekondaryong agom, asin binayaan siya kaini tanganing magduman sa harong kan ama kaini sa Betlehem sa Juda. Nagdanay duman an babayi nin apat na bulan.
3 Dangan pigdumanan siya kan saiyang agom tanganing kumbinsiron siya na magbalik na; kaiba kan saiyang agom an lalaking suruguon kaini, asin may dara sindang duwang asno. Pag-abot kan agom niya, pinadagos niya ini sa harong kan saiyang ama. Ugmahon an saiyang ama kan mahiling kaini an saiyang agom.
4 Kaya pigkumbinsir siya kan saiyang panugangan, an ama kan hoben na babayi, na magdanay duman nin tulong aldaw; nagkakan sinda saka nag-inom, asin duman siya nagpalihis nin banggi.
5 Kan ikaapat na aldaw, amay sindang nagbangon pagkaaga para maghali na. Pero sinabi kan ama kan hoben na babayi sa manugang kaini: “Magkakan nguna kamo bago kamo maghali tanganing may kusog kamo sa pagbaklay.”
6 Kaya nagtukaw sinda asin magkaibanan na nagkakan saka nag-inom; pagkatapos kaiyan, sinabi kan ama kan hoben na babayi sa lalaki: “Magpalihis ka pa tabi nin sarong banggi digdi asin mag-ugma ka.”*
7 Kan magtindog an lalaki para maghali na, pigparapakiulayan siya kan saiyang panugangan, kaya duman siya giraray nagpalihis nin banggi.
8 Kan ikalimang aldaw, amay siyang nagbangon para maghali na. Pero nagsabi an ama kan hoben na babayi: “Magkakan ka nguna para may kusog ka.” Asin naghaloy-haloy pa sinda duman sagkod na maghapon na, asin pareho sindang padagos na nagkakan.
9 Kan magtindog an lalaki para maghali na kaiba an saiyang sekondaryong agom saka suruguon, an saiyang panugangan, an ama kan hoben na babayi, nagsabi sa saiya: “Hilinga! Pabanggi na baga. Magpalihis ka pa tabi nin sarong banggi digdi ta nagdidiklom na. Digdi ka na lang magpaaga asin mag-ugma ka. Magbangon na lang kamong amay sa aga tapos magpuli na.”*
10 Pero habo na kan lalaki na magpalihis duman nin saro pang banggi. Kaya naghali na siya kaiba an saiyang sekondaryong agom saka suruguon pati an duwang asno, asin nagpasiring sinda sa Jebus, na iyo an Jerusalem.+
11 Hapon nang marhay kan harani na sinda sa Jebus. Kaya hinapot siya kan saiyang suruguon: “Mahapit kita digdi sa siyudad na ini kan mga Jebusita para magpalihis nin banggi?”
12 Pero sinabi saiya kan saiyang amo: “Dai kita dapat maghapit sa sarong siyudad na bakong mga Israelita an nakaistar. Mapadagos kita sa pagbaklay sagkod sa Gibeah.”+
13 Dangan sinabi niya sa saiyang suruguon: “Madya, piriton tang makaabot sa Gibeah o sa Rama;+ mapalihis kita nin banggi sa saro sa mga lugar na iyan.”
14 Kaya nagpadagos sinda sa pagbaklay, asin nagsusulnop na an aldaw kan makaabot sinda harani sa Gibeah, na sakop kan Benjamin.
15 Kaya nagpundo sinda duman asin naglaog sa Gibeah para magpalihis nin banggi. Kan nasa laog na sinda, nagtukaw sinda sa plasa kan siyudad, pero mayo nin nagpadagos sa sainda sa harong para magpalihis nin banggi.+
16 Kan banggi na, may sarong gurang na lalaki na nag-abot hali sa pagtrabaho sa uma. Taga duman siya sa kabukidan nin Efraim,+ asin nag-iistar nguna siya sa Gibeah; pero mga Benjaminita an mga nakaistar sa siyudad na iyan.+
17 Mantang nasa plasa kan siyudad, nahiling sinda kan gurang na lalaki asin hinapot sinda kaini: “Pasain kamo saka sain kamo hali?”
18 Nagsimbag siya: “Hali kami sa Betlehem sa Juda asin pasiring kami ngunyan sa sarong puwerang lugar sa kabukidan nin Efraim, kun sain ako nakaistar. Nagduman kaya ako sa Betlehem sa Juda,+ asin mapasiring nguna ako sa harong ni Jehova,* pero mayo digdi nin nagpapadagos sako.
19 May igo kaming dagami saka sakati* para sa mga asno mi,+ asin tinapay+ saka arak para sako, sa babayi, asin sa samong suruguon. Igwa kami kan gabos ming kaipuhan.”
20 Pero nagsabi an gurang na lalaki: “Mapasaimo lugod an katuninungan! Ako na an maasikaso kan ano man na kaipuhan nindo. Basta dai lang kamo magpalihis nin banggi digdi sa plasa.”
21 Kaya iiniba niya siya sa saiyang harong asin binahog* an mga asno. Dangan hinugasan ninda an saindang mga bitis, tapos nagkakan sinda saka nag-inom.
22 Mantang nag-uugma sinda, pinalibutan nin mga daing kuwentang lalaki kan siyudad an harong asin pigpaparatubtob kan mga ini an pinto. Pauruutro nindang sinabi sa gurang na lalaki na kagsadiri kan harong: “Iluwas mo an lalaking nagdagos sa harong mo tanganing madurugan mi siya.”+
23 Kaya nagluwas an kagsadiri kan harong asin sinabi sa sainda: “Dai, mga tugang ko, dai tabi kamo maggibo nin maraot. Bisita ko siya sa sakong harong. Dai nindo paggibuhon an makasusupog na bagay na ini.
24 Yaon digdi an birhen kong aki saka an sekondaryong agom kan lalaki. Papaluwason ko sinda, asin puwede nindo sindang abusuhon kun talagang gusto nindo.*+ Pero dai nindo paggibuhan nin makasusupog na bagay an lalaking ini.”
25 Alagad dai sa saiya nagdangog an mga lalaki, kaya kinaputan kan Levita an saiyang sekondaryong agom+ asin ilinuwas ini sa sainda. Linupigan ninda ini asin inabuso nin bilog na banggi sagkod na mag-aga. Dangan kan maagahon na, pinahali na ninda ini.
26 Nag-abot an babayi nin amay na aga sa harong kan gurang na lalaki na pigdagusan kan saiyang agom.* Natumba siya sa may entrada kan harong asin nagdanay siyang nakahigda duman sagkod na magliwanag.
27 Kan magbangon an saiyang agom* pagkaaga asin bukasan kaini an mga pinto kan harong para lumuwas asin ipadagos na an saiyang pagbaklay, nahiling kaini an babayi, an saiyang sekondaryong agom, na nakahigda sa may entrada kan harong na nakaunat an mga kamot sa may pintuan.
28 Kaya sinabi niya digdi: “Bumangon ka na; mahali na kita.” Pero dai ini nagsimbag. Kaya kinarga niya ini tapos isinakay sa asno, asin nagpuli na siya sa saiyang harong.
29 Pag-abot niya sa saiyang harong, nagkua siya nin kutsilyong pambuno asin pigputol-putol niya sa 12 pidaso an hawak* kan saiyang sekondaryong agom. Dangan, pinadarahan niya nin tigsararong pidaso an lambang teritoryo kan Israel.
30 An gabos na nakahiling kaiyan nagsabi: “Dai pa lamang nangyari o nahiling an arog kaiyan puon kan aldaw na magluwas an mga Israelita sa daga nin Ehipto sagkod sa aldaw na ini. Pag-isipan* asin pag-urulayan nindo ini,+ tapos sabihon nindo kun ano sa hiling nindo an dapat gibuhon sa bagay na ini.”
Mga Nota
^ O “paugmaha an puso mo.”
^ Sa literal, “magduman ka na sa saimong tolda.”
^ O posibleng “asin naglilingkod ako sa harong ni Jehova.”
^ O “pambahog na duot.”
^ O “tinawan nin pigsaralak na bahog.”
^ O “supugon saka gibuhon sa sainda an gusto nindo.”
^ Sa literal, “kagurangnan.”
^ Sa literal, “kagurangnan.”
^ O “lawas.”
^ O “Ipokus nindo digdi an saindong puso.”
