Hukom 12:1-15
12 Dangan nagtiripon an mga lalaki kan Efraim, asin nagbalyo sinda sa Zafon* asin nagsabi ki Jefte: “Ano ta dai mo kami ipinaapod para umiba sa saimo kan magbalyo ka tanganing makipaglaban sa mga Ammonita?+ Susuluon mi an harong mo kaiba ka.”
2 Pero sinabi ni Jefte sa sainda: “Grabe su pakikipaglaban ko sa mga Ammonita kaiba kan banwaan ko. Naghagad ako nin tabang sa saindo, pero dai nindo ako ilinigtas sa sainda.
3 Kan mahiling ko na dai nindo ako tatabangan, isinapeligro ko an sakuyang buhay* asin nakipaglaban ako sa mga Ammonita,+ dangan itinao sinda ni Jehova sa sakong kamot. Kaya taano ta nagdigdi kamo ngunyan para makipaglaban sa sako?”
4 Dangan tiniripon ni Jefte an gabos na lalaki kan Gilead,+ asin nakipaglaban sinda sa Efraim; dinaog kan mga lalaki kan Gilead an Efraim, na nagsabi kaidto: “Kamong mga Gileadita sa Efraim asin sa Manases, mga dulag man sana kamo hali sa teritoryo kan Efraim.”
5 Nagibo kan mga lalaki kan Gilead na magpuwesto sa mga pigbabalyuhan na hababaw na parte kan Jordan+ para dai makadulag an mga Efraimita. Pag an siisay man na Efraimita nagpupurbar na dumulag, minasabi siya, “Pabalyuhon tabi nindo ako”; dangan naghahapot an mga lalaki kan Gilead, “Efraimita ka ano?” Pag nagsimbag siyang, “Bako!”
6 sasabihan ninda siya, “Magsabi ka daw nin Shibolet.” Pero an nasasabi kan sarong Efraimita, “Sibolet,” dahil dai niya iyan masayod nin tama. Dangan dadakupon ninda siya asin gagadanon sa mga pigbabalyuhan na hababaw na parte kan Jordan. Kaya 42,000 na Efraimita an nagadan kan panahon na idto.
7 Nagin hukom si Jefte sa Israel sa laog nin anom na taon, dangan nagadan si Jefte na Gileadita asin ilinubong sa saiyang siyudad sa Gilead.
8 Pagkatapos niya, si Ibzan na taga Betlehem an sunod na nagin hukom kan Israel.+
9 Igwa siya nin 30 aking lalaki asin 30 aking babayi. Ipinaagom niya an saiyang mga aking babayi sa mga lalaki na dai kabilang sa saiyang angkan, asin nagkua man siya nin 30 babayi tanganing ipaagom sa mga aki niyang lalaki. Pitong taon siyang nagin hukom sa Israel.
10 Dangan nagadan si Ibzan asin ilinubong sa Betlehem.
11 An suminunod sa saiya na nagin hukom kan Israel iyo si Elon na Zebulonita; sampulong taon siyang nagin hukom kan Israel.
12 Dangan nagadan si Elon na Zebulonita asin ilinubong sa Aijalon sa daga nin Zebulon.
13 An suminunod sa saiya na nagin hukom kan Israel iyo si Abdon na aki ni Hilel na Piratonita.
14 Igwa siya nin 40 aking lalaki asin 30 makuapong lalaki na nagsasakay sa 70 asno. Walong taon siyang nagin hukom kan Israel.
15 Dangan nagadan si Abdon na aki ni Hilel na Piratonita asin ilinubong sa Piraton sa daga nin Efraim sa bukid kan mga Amalekita.+
Mga Nota
^ O posibleng “nagbalyo sinda panorte.”
^ Sa literal, “ibinugtak ko sa sakong kamot an sakuyang kalag.”
