Hukom 10:1-18
10 Pagkagadan ni Abimelec, si Tola na aki ni Pua asin makuapo ni Dodo an nagin paraligtas kan Israel.+ Hali siya sa tribo ni Isacar asin nakaistar sa Samir sa kabukidan nin Efraim.
2 Nagin hukom siya sa Israel sa laog nin 23 na taon. Dangan nagadan siya asin ilinubong sa Samir.
3 An suminunod sa saiya iyo si Jair na Gileadita, asin nagin hukom ini sa Israel sa laog nin 22 na taon.
4 Igwa siya nin 30 aking lalaki na nagsasakay sa 30 asno, asin igwa sinda nin 30 siyudad, na sagkod sa aldaw na ini inaapod na Havot-jair;+ yaon an mga iyan sa daga nin Gilead.
5 Dangan nagadan si Jair asin ilinubong sa Kamon.
6 Tapos ginibo na naman kan mga Israelita an maraot sa paghiling ni Jehova,+ asin nagpuon sindang magsamba sa mga Baal,+ sa mga imahen ni Astoret, sa mga diyos kan Aram,* sa mga diyos kan Sidon, sa mga diyos kan Moab,+ sa mga diyos kan mga Ammonita,+ asin sa mga diyos kan mga Filisteo.+ Binayaan ninda si Jehova, asin dai sinda naglingkod sa saiya.
7 Dangan naanggot na marhay si Jehova sa Israel, asin itinao* niya sinda sa mga Filisteo saka sa mga Ammonita.+
8 Kaya kan taon na idto, pinasakitan ninda asin inapi nin grabe an mga Israelita. Sa laog nin 18 taon, inapi ninda an gabos na Israelita na nasa sirangan na kampi kan Jordan, sa dating daga kan mga Amorita sa Gilead.
9 Nagbabalyo man an mga Ammonita sa Jordan tanganing makipaglaban sa tribo* ni Juda, Benjamin, asin Efraim; asin nagsakit na marhay an Israel.
10 Dangan nag-apod ki Jehova an mga Israelita para maghagad nin tabang,+ na sinasabi: “Nagkasala kami saimo, huli ta binayaan mi ika, na samuyang Diyos, asin naglingkod kami sa mga Baal.”+
11 Alagad sinabi ni Jehova sa mga Israelita: “Bakong ilinigtas ko kamo sa Ehipto+ asin sa mga Amorita,+ sa mga Ammonita, sa mga Filisteo,+
12 sa mga Sidonio, sa Amalek, asin sa Midian kan inapi ninda kamo? Kan mag-apod kamo sako, ilinigtas ko kamo sa kamot ninda.
13 Pero binayaan nindo ako, asin naglingkod kamo sa ibang mga diyos.+ Kaya dai ko na kamo ililigtas giraray.+
14 Magduman kamo sa mga diyos na pinili nindo, asin magpatabang kamo sa sainda.+ Sa sainda kamo magpaligtas sa panahon na nagsasakit kamo.”+
15 Alagad nagsabi an mga Israelita ki Jehova: “Nagkasala kami. Bahala ka na po kun anong gusto mong gibuhon sa samo. Iligtas mo lang tabi kami sa aldaw na ini.”
16 Tapos hinarali ninda an mga diyos kan ibang mga nasyon saka naglingkod sinda ki Jehova,+ kaya dai na niya kayang tiuson an* pagsakit kan Israel.+
17 Pag-abot nin panahon, nagtiripon an mga Ammonita+ asin nagkampo sa Gilead. Kaya nagtiripon man an mga Israelita asin nagkampo sa Mizpa.
18 An banwaan asin an mga pamayo* kan Gilead nagsabi sa lambang saro: “Siisay an manginginot sa sato sa pakikipaglaban sa mga Ammonita?+ Siya an magigin pamayo sa gabos na nakaistar sa Gilead.”
Mga Nota
^ O “Siria.”
^ Sa literal, “ipinabakal.”
^ Sa literal, “harong.”
^ O “asin an saiyang kalag dai na makatios dahil sa.”
^ O “prinsipe.”
