Ezekiel 3:1-27
3 Dangan sinabi niya sako: “Aki nin tawo, kakanon mo an nasa atubangan mo.* Kakanon mo an rolyong ini, tapos magduman ka, makipag-ulay ka sa banwaan* nin Israel.”+
2 Kaya ibinuka ko an nguso ko, asin ipinakakan niya sa sako an rolyo.
3 Sinabi niya pa sako: “Aki nin tawo, kakanon mo an rolyong ini na itinatao ko saimo, saka panuon mo kaini an saimong tulak.” Kaya kinakan ko iyan, asin kasinghamis iyan nin tangguli* sa laog kan sakuyang nguso.+
4 Sinabi niya sako: “Aki nin tawo, magduman ka sa banwaan nin Israel asin sabihon mo sainda an mensahe ko.
5 Huli ta isinusugo ka bako sa sarong banwaan na nagtataram nin dai naiintindihan na mga tataramon o dai nasasabutan na lengguwahe, kundi sa banwaan nin Israel.
6 Isinusugo ka bako sa dakul na banwaan na nagtataram nin dai naiintindihan na mga tataramon o dai nasasabutan na lengguwahe, na an mga pigsasabi dai mo masasabutan. Kun isusugo taka sa sainda, madangog sinda saimo.+
7 Pero an banwaan nin Israel dai madangog sa saimo, huling habo nindang magdangog sako.+ An gabos na nasa banwaan nin Israel matagas an payo saka matagas an puso.+
8 Hilinga! Ginibo kong kasingtagas kan lalawgon ninda an lalawgon mo asin kasingtagas kan angog ninda an angog mo.+
9 An angog mo ginibo kong garo diyamante, na mas matagas kisa sa matagason na gapo.+ Dai ka matakot sa sainda o sa saindang mga lalawgon,+ huli ta rebelyosong banwaan sinda.”
10 Sinabi niya pa sako: “Aki nin tawo, isapuso mo saka dangugon mo an gabos na sinasabi ko saimo.
11 Magduman ka sa saimong mga kahimanwa* na puwersahan na kinua sa sadiring nasyon+ asin makipag-ulay ka sa sainda. Sabihon mo sainda, ‘Ini an sinabi kan Soberanong Kagurangnan na Jehova,’ magdangog man sinda o dai.”+
12 Dangan dinara ako nin sarong espiritu+ asin may nadangog ako sa likudan ko na makusog na boses na nag-uurug-udog na nagsasabi: “Pag-umawon lugod an kamurawayan ni Jehova hali sa saiyang kinamumugtakan.”
13 Nadadangog an tanog kan mga pakpak kan mga buhay na linalang mantang nagsasaragidan an mga iyan,+ saka an tanog kan mga ruweda sa kataid ninda,+ pati an makusog na tanog nin pag-urug-udog.
14 Asin kinua ako tapos dinara kan espiritu, asin uminiba ako mantang nakakamati nin kauyaman saka grabeng kaanggutan.* Pinahiro nanggad ako kan kapangyarihan* ni Jehova.
15 Kaya dinumanan ko an banwaan na puwersahan na dinara sa Tel-abib, na nakaistar sa may salog nin Kebar,+ asin nag-istar ako duman kun sain sinda nag-iistar; asin pitong aldaw akong nag-istar sa kaibanan ninda mantang mayo ako sa sadiri ko.+
16 Sa katapusan kan pitong aldaw, uminabot sako an tataramon ni Jehova:
17 “Aki nin tawo, itinalaga taka bilang bantay sa banwaan nin Israel;+ asin pag nadangog mo an tataramon sa sakuyang nguso, magtao ka nin patanid sa sainda hali sa sako.+
18 Pag sinabi ko sa maraot, ‘Siguradong magagadan ka,’ pero dai mo siya pinatanidan, asin dai mo siya sinadol na talikdan niya an saiyang maraot na dalan para magdanay siyang buhay,+ magagadan siya dahil sa saiyang pagkakasala huli ta maraot siya,+ pero sisingilon ko sa saimo an* dugo niya.+
19 Pero kun pinatanidan mo an maraot asin dai niya tinalikdan an saiyang karatan saka an maraot niyang dalan, magagadan siya dahil sa saiyang pagkakasala, pero maililigtas mo nanggad an sadiri mong buhay.*+
20 Pero pag binayaan kan saro na matanos an saiyang matanos na mga gibo saka maggibo nin sala,* mabugtak ako nin singkugan sa atubangan niya asin magagadan siya.+ Kun dai mo siya pinatanidan, magagadan siya dahil sa saiyang kasalan asin an matanos niyang mga gibo dai na magigirumduman, pero sisingilon ko sa saimo an* dugo niya.+
21 Pero kun pinatanidan mo an matanos para dai siya magkasala, asin dai talaga siya nagkasala, magdadanay nanggad siyang buhay dahil napatanidan siya,+ asin maililigtas mo an sadiri mong buhay.”*
22 Nag-abot sako duman an kapangyarihan* ni Jehova, asin sinabi niya sako: “Magbuhat ka, magpasiring ka sa kapatagan sa kababan; makikipag-ulay ako saimo duman.”
23 Kaya nagbuhat ako asin nagpasiring sa kapatagan sa kababan, asin uya! yaon duman an kamurawayan ni Jehova,+ kapareho kan kamurawayan na nahiling ko sa may salog nin Kebar,+ dangan suminubsob ako sa daga.
24 Tapos nag-abot* sa sako an espiritu asin pinatindog ako.+ Nakipag-ulay sako an Diyos asin nagsabi:
“Magpuli ka. Maglaog ka sa harong mo tapos maminto ka.
25 Asin ika, aki nin tawo, gagapuson ka ninda nin mga pisi tanganing dai ka makaluwas asin makaduman sa sainda.
26 Tapos papadukuton ko an dila mo sa ngaragngag mo, saka magigi kang púla, na dai makakasaway sa sainda, huli ta rebelyosong banwaan sinda.
27 Pero pag nakipag-ulay ako sa saimo bubukahon ko an saimong nguso, asin dapat mong sabihon sainda,+ ‘Ini an sinabi kan Soberanong Kagurangnan na Jehova.’ Pabayaing magdangog an nagdadangog,+ asin pabayaing dai magdangog an habong magdangog, huli ta rebelyosong banwaan sinda.+
Mga Nota
^ Sa literal, “harong.”
^ Sa literal, “an manumpungan mo.”
^ O “dugos.”
^ Sa literal, “sa mga aking lalaki kan saimong banwaan.”
^ O “dagit.”
^ Sa literal, “kamot.”
^ O “papanimbagon taka para sa.”
^ O “kalag.”
^ O “papanimbagon taka para sa.”
^ O “inhustisya.”
^ O “kalag.”
^ Sa literal, “kamot.”
^ Sa literal, “naglaog.”
