Ɲanmiɛn kunndɛ kɛ a wun i wlɛ kɛ ɔ ti sran jrɛiin kun, naan a fa ɔ wun mɛntɛn i, naan a klo i tankaan kpa yɛ a su i. (Matie 22:37, 38; Zaki 4:8) Sɛ e waan é yó Ɲanmiɛn klun sa’n, ɔ fata kɛ e suan Zezi i su like. (Zan 7:16, 17) Zezi w’a kɛnmɛn i nuan nun sa ngbɛn kɛ ɔ yo Ɲanmiɛn i klun sa. Sanngɛ ɔ yili i nglo i ayeliɛ’n nun. I kpa bɔbɔ’n, ɔ seli kɛ: “Nán min klun sa yolɛ ti yɛ n fin ɲanmiɛn su lɔ n bali-ɔ. Sanngɛ n bali sran ng’ɔ sunmannin min’n, i klun sa yolɛ.”—Zan 6:38.

?Ɔ fata kɛ Ɲanmiɛn yo abonuan sa kun kle wɔ annzɛ ɔ flɛ wɔ ka naan w’a si like ng’ɔ kunndɛ kɛ a yo’n?

 Cɛcɛ. Afin ndɛ nga Ɲanmiɛn waan ɔ́ kán kle klɔ sran mun’n, i kwlaa’n wo Biblu’n nun. Biblu’n kwla uka e naan y’a ‘ɲan like y’a fa di junman kwlaa ng’ɔ ti kpa’n.’ (2 Timote 3:16, 17) Ɲanmiɛn kunndɛ kɛ e fa Biblu’n, yɛ e fa ‘ngwlɛlɛ nga e si i’n’ naan y’a si like ng’ɔ kunndɛ kɛ e yo’n.—Rɔmunfuɛ Mun 12:1, 2; Efɛzifuɛ Mun 5:17.

?N kwla yo Ɲanmiɛn i klun sa sakpa?

 Ɛɛn, a kwla yo. Afin Biblu’n se kɛ: “[Ɲanmiɛn] i mmla’m be su falɛ yoman ya.” (1 Zan 5:3) I sɔ’n kleman kɛ Ɲanmiɛn i mmla’m be su falɛ ti pɔpɔ. Sanngɛ sɛ a mian ɔ ɲin fɛ i mmla’m be su’n, i su ye nga á ɲɛ́n i’n ti dan. Zezi bɔbɔ seli kɛ: “Sran ng’ɔ tie Nyanmiɛn ndɛ’n b’ɔ fa su’n, i liɛ su ti ye!”—Liki 11:28, Nyanmiɛn Ndɛ’n.