Maan amun liɛ yo ye!
Maan amun liɛ yo ye!
“Like nga a yo’n ɔ́ yó ye.”—ZOZ. 1:8.
?WAFA SƐ YƐ AMÚN TƐ́ KOSAN NGA’M BE SU Ɔ?
?Salomɔn i liɛ yoli ye sakpa?
?Ngue ti yɛ e kwla se kɛ Pɔlu i liɛ yoli ye ɔ?
?Ngue yɛ sɛ e yo ɔ, e si kɛ e liɛ’n yó ye titi ɔ?
1, 2. (a) ?Kɛ be usa sran’m be kɛ sran benin yɛ be bu i kɛ i liɛ w’a yo ye’n, wafa sɛ yɛ be tɛ su ɔ? (b) ?Sɛ amun siman wafa nga amún tɛ́ kosan sɔ’n su’n, ngue yɛ amun kwla yo ɔ?
SƐ AMUN usa sran’m be kɛ kɛ be waan sran kun i liɛ w’a yo ye’n, i bo’n yɛle benin’n, amún wún i kɛ wafa nga bé fá tɛ́ amun su’n, ɔ timan kun. Wie’m bé sé kɛ sran nga i liɛ w’a yo ye’n, yɛle sran nga ɔ ti aunɲanfuɛ annzɛ w’a ɲɛn i junman kpa wie annzɛ kusu ɔ dili suklu dan’n. Wie mun ekun bé sé kɛ sran ng’ɔ nin i yi nin i mma’m be afiɛn sɛ annzɛ ɔ nin i janvuɛ annzɛ sran nga ɔ nin be di junman’n be ti be wun aniɛn’n, yɛ i liɛ w’a yo ye ɔ. Aniaan kun kusu kwla se i liɛ kɛ sran nga be mɛnnin i junman asɔnun’n nun annzɛ ɔ ukali sran kpanngban naan b’a kaci Zoova i Lalofuɛ’n, yɛ i liɛ w’a yo ye ɔ.
2 ?Yɛ amun li? ?Amun bu i sɛ? Atrɛkpa’n, amun wunman wafa nga amún tɛ́ kosan sɔ’n su’n. Sɛ ɔ ti sɔ’n, maan amun fa kosan nga’m be usa amun wun: ?Sran benin mun yɛ m bu i kɛ be liɛ w’a yo ye ɔ? ?Be nga be sa nun yo fɛ’n annzɛ be nga be ti sran dan mun ɔn? Wafa nga amún tɛ́ kosan sɔ’m be su’n, ɔ yi akunndan nga ɔ o amun klun lɔ’n i nglo. Yɛ i sɔ’n kwla ɲan ta kpa ajalɛ nga amun fa be’n, be su.—Lik 6:45.
3. (a) ?Ngue yɛ ɔ fata kɛ Zozie yo naan i liɛ w’a yo ye ɔ? (b) ?Ngue su yɛ é wá fá e ɲin é síe ɔ?
3 Kɛ mɔ Zoova yɛ ɔ boli e’n ti’n, i liɛ nga ɔ kɛn i ndɛ sɔ’n su’n yɛ ɔ ti su ɔ. Kɛ Zoova sieli Zozie kɛ ɔ fa Izraɛlifuɛ mun wlu mɛn nga ɔ seli kɛ ɔ́ fá mán be’n i nun’n, ɔ seli i kɛ ɔ kanngan Moizi Mmla’n nun “wia su nin kɔnguɛ” naan ɔ fa su sɛsɛsɛ. Ɲanmiɛn seli i ekun kɛ: “Sɛ a yo sɔ’n yɛ like nga a yo’n ɔ́ yó ye-ɔ.” (Zoz. 1:7, 8) Yɛ kusu e si kɛ Zozie liɛ yoli ye sakpa. ?Yɛ e li? ?E liɛ yó ye kɛ Zozie sa wie? ?Like nga Ɲanmiɛn jran su naan w’a se kɛ sran kun i liɛ w’a yo ye’n, i su wie yɛ e jran ɔn? Kɛ ɔ ko yo naan y’a wun i wlɛ’n, é wá fá e ɲin síe i sran nɲɔn mɔ Biblu’n kan be ndɛ’n, be su.
?SALOMƆN LIƐ YOLI YE?
4. ?Ngue ti yɛ e kwla se kɛ ninnge nga Salomɔn yoli’n be yoli ye i sa nun ɔn?
4 Blɛ wie nun’n, Salomɔn yoli ninnge kpakpa kpanngban. Like nga ti yɛ ɔ yoli sɔ’n yɛle kɛ blɛ sɔ nun’n, ɔ nin Zoova nantili klanman yɛ Zoova kusu yrɛli i su. I nzuɛn klanman sɔ’n i ɲin fite ndɛ nga ɔ kan kleli Zoova’n nun. Yɛle kɛ cɛn kun Zoova seli i kɛ ɔ srɛ i like kwlaa nga ɔ klo’n. Salomɔn i liɛ ng’ɔ srɛli i’n yɛle kɛ ɔ mɛn i ngwlɛlɛ nga ɔ ko fa ko sie Izraɛli nvle’n. Kɛ ɔ srɛli i sɔ’n, Ɲanmiɛn mɛnnin i ngwlɛlɛ. Kpɛkun ɔ fali aɲanbeun ukali su. (An kanngan 1 Famiɛn Mun 3:10-14 nun.) Sanngɛ i ngwlɛlɛ liɛ’n, ‘ɔ trali wia afiliɛ lɔfuɛ mun, ɔ nin Ezipt lɔfuɛ mun be kwlakwla be liɛ’n.’ Ɔ maan i dunman’n ɔ “truli mɛn nga be mantan be lɛ’n be nun.” (1 Fam. 5:10, 11) M’ɔ ti aɲanbeun ninnge’n kusu, ɔ ɲannin wie. Afin afuɛ nuan kwlaa nun’n, sika ɔkwlɛ ngunmin nga ɔ ɲɛnnin i’n, ɔ ti tɔnun 25! (2 Nyo. 9:13) I politiki nun o, i sua kplanlɛ nun o, i aata dilɛ nun o, i ti nun kpɛli kpa. I kwlaa nga e kɛnnin i lɛ’n kle kɛ i nun nga Salomɔn nin Ɲanmiɛn be nantili klanman’n yɛ ninnge’m be yoli ye i sa nun ɔn.—2 Nyo. 9:22-24.
5. ?Salomɔn waan wan mun yɛ be liɛ w’a yo ye ɔ?
5 Ndɛ nga Salomɔn klɛli i Akunndanfuɛ’n fluwa nun’n kle kɛ nán be nga be lɛ sika annzɛ sran dandan’m be ngunmin yɛ be kwla di aklunjuɛ ɔ. Afin ɔ klɛli i kɛ: “N fa wunnin i wlɛ kɛ like ng’ɔ ti kpa man sran’n yɛlɛ aklunjuɛ dilɛ nin mɛn dilɛ blɛ b’ɔ tɛ o mɛn’n nun’n. Yɛ n wunnin kɛ blɛ bɔ sran kun di like b’ɔ nɔn nzan’n b’ɔ di i sa ti junman’n i nuan like’n, Nyanmiɛn yɛ ɔ fɛ i sɔ’n mɛn i-ɔ.” (Aku. 3:12, 13) Salomɔn wunnin ekun kɛ sran nga mɔ Ɲanmiɛn ɲrun’n i liɛ w’a yo ye’n, i liɛ’n ɔ si like nga ti yɛ Ɲanmiɛn fali ninnge fɛfɛ sɔ mun kwlaa mannin sran mun’n, i bo. I ti yɛ ɔ seli kɛ: “E sie e su e tie ndɛ’n kwlaa ng’ɔ o lɛ’m be atabo’n: maan ɔ nyin yi Nyanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ-ɔ.”—Aku. 12:13.
6. ?Ngue yɛ Salomɔn i ajalɛ’n kle e ɔ?
6 Salomɔn nin Ɲanmiɛn be nantili klanman cɛli. Biblu’n bɔbɔ seli kɛ ɔ “klo Anannganman Nyanmiɛn’n ti’n ɔ nian nga i si David kan kleli i’n su.” (1 Fam. 3:3) Nga Salomɔn yoli i lɛ’n, nanwlɛ, ɔ ti kpa dan. Asa’n, Ɲanmiɛn fanngan nun Salomɔn kplannin Ɲanmiɛn sulɛ sua klanman kpa kun yɛ ɔ klɛli Biblu’n i nun fluwa nsan. I yo, e kwlá yoman ninnge kunngba nga Salomɔn yoli’n wie. Sanngɛ ajalɛ ng’ɔ fali’n i nun nga ɔ nin Ɲanmiɛn nantili klanman’n, ɔ kle e ngwlɛlɛ. Yɛle kɛ ɔ uka e naan kɛ be se kɛ sran kun i liɛ w’a yo ye’n, y’a wun i wlɛ kpa. Yɛ ɔ uka e wie naan y’a yo naan e liɛ w’a yo ye. Maan e fa akunndan sɔ’n e fa sie e klun naan e fa e ɲin e sie ndɛ kun mɔ Salomɔn klɛli i fluwa nun’n su. Yɛle kɛ mɛn nunfuɛ’m be bu i kɛ sɛ sran kun i liɛ w’a yo ye’n, nn ɔ le sika yɛ ɔ si ngwlɛlɛ yɛ be bo i dunman lika kwlaa nun kpɛkun ɔ le kwlalɛ. Sanngɛ Salomɔn klɛli i kɛ nán ninnge sɔ mun yɛ maan sran kun i liɛ yo ye ɔ. I waan ɔ min kun nga a kunndɛ ninnge sɔ mun’n, ɔ ti kɛ a su kle ɔ wun yalɛ ngbɛn sa. Ɔ ti kɛ ɔ ‘waan á fúan aunngban’n naan á kó trɛ́ i sa.’ Afin be nga be klo sika’n, sika juman be le. Asa’n be la ɔ, be lafiman afin be sro kɛ ninnge nga be o be sa nun’n, be fi be sa. I wie ekun yɛle kɛ ninnge nga be o be sa nun’n, cɛn wie lele’n, bé yó sran uflɛ liɛ.—An kanngan Akunndanfuɛ’n 2:8-11, 17 ɔ nin 5:9-11 nun.
7, 8. ?Ajalɛ tɛ benin yɛ Salomɔn fali ɔ? ?Yɛ i bo’n guali sɛ mɛnnin i?
7 Sanngɛ nga ɔ yo ɲrɛnnɛn’n yɛle kɛ i agualiɛ su’n, Salomɔn w’a faman Zoova i mmla’m be su kun. Ɲanmiɛn Ndɛ’n waan: “Kɛ Salomɔn yoli kpɛnngbɛn’n, i yi’m be cuɛnnin i kɛ ɔ sɔ ninnge mun. Ɔ maan i Anannganman klolɛ’n yoli kun nin bue. W’a klo-mɛn i kɛ i si David yoli’n sa. [...] Salomɔn yoli sa nga Anannganman klo-mɛn i’n.”—1 Fam. 11:4-6.
8 Ajalɛ nga Salomɔn fali’n, w’a yoman Zoova fɛ kaan sa. Ɔ seli i kɛ: “Kɛ bɔ aenguɛ nga e nin wɔ e trali’n w’a yo-mɛn i su sa’n, kɛ bɔ w’a fa-man min mmla’m be su’n, i ti ń dé famiɛn diwlɛ’n ɔ sa nun, ń fá mán ɔ sufuɛ’m be nun kun.” (1 Fam. 11:11) Ndɛ sɔ’n yo ɲrɛnnɛn o! Afin kannzɛ bɔbɔ Salomɔn yoli ninnge kpakpa kpanngban’n, sanngɛ i agualiɛ su’n, ɔ guali Zoova i ɲin ase. Kɛ ɔ yo naan ɔ fa Ɲanmiɛn i atin liɛ’n su’n, ɔ ko fɛli i bɔbɔ i atin liɛ. Ndɛ sɔ’n ti e liɛ wie. I ti’n, maan e kwlakwla e usa e wun kɛ: ‘?N kunndɛ kɛ ń fá Salomɔn i ndɛ’n ń tú min wun fɔ nun naan min liɛ w’a yo ye?’
AKOTO PƆLU LIƐ YOLI YE
9. ?Mɛn nunfuɛ’m be ɲrun’n, Pɔlu i mɛn dilɛ’n yoli ye? An yiyi nun.
9 Fɛ nga Famiɛn Salomɔn dili’n, akoto Pɔlu w’a diman wie. I liɛ’n, fɛlɛ yɛ ɔ fɛli ɔ. Yɛle kɛ blɛ sunman nun’n, awe nin nzuewe kunnin i, ayrɛ kunnin i yɛ ɔ miannin tralɛ wun. (2 Kor. 11:24-27) Kɛ ɔ fɛ i cɛn mɔ Pɔlu lafili su kɛ Zezi yɛ ɔ ti Mɛsi’n, w’a ɲanman ɲrun Zuifu’m be Ɲanmiɛn sulɛ wafa’n nun kun. I kpa’n bɔbɔ’n, kpɔlɛ yɛ be su kpɛn’m be kpɔli i ɔ. Asa’n, be wlɛli i bisua, be boli i nin ngble yɛ be finfinnin i yɛbuɛ. Pɔlu waan sran’m be kpɔli i nin i niaan Klistfuɛ mun naan be kleli be kplo nun ɲrɛnnɛn naan be kannin be wun ndɛ tɛtɛ. Ɔ klɛli i kɛ: “Sran’m be nyrun y’a kaci kɛ wla sa, e ti kɛ be ja bo fa sa, lele ndɛ be tɛ bu ye sɔ.”—1 Kor. 4:11-13.
10. ?Ngue ti yɛ sran’m be buli i kɛ Pɔlu káci i liɛ sran dan ɔn?
10 I nun nga Pɔlu te yo gbanflɛn kan mɔ be flɛ i Sɔlu’n, sran’m be buli i kɛ ɔ́ káci i liɛ sran dan. Afin be wuli i aɲanbeunfuɛ’m be awlo’n nun, kpɛkun Gamaliɛli m’ɔ ti like klefuɛ dan’n yɛ ɔ kleli i fluwa ɔ. Pɔlu kannin blɛ sɔ’n i ndɛ. Ɔ klɛli i kɛ: ‘N wiengu’m be nun’n n ti Nyanmiɛn sufuɛ dan kpa tra be nun kpanngban kpa.’ (Gal. 1:14) Asa’n, ɔ ti Ebre nin Glɛki aniɛn’m be kpa yɛ ɔ ti Rɔmufuɛ wie. I ti’n, ɔ le atin yo ninnge kpanngban kpa. Ɔ nin i sɔ ngba’n, w’a kunndɛman kɛ ɔ́ yó mɛn nun sran dan naan i dunman’n fu naan ɔ́ yó aɲanbeunfuɛ. Sanngɛ ɔ fali ajalɛ kun mɔ i blɛ sufuɛ nin i osufuɛ wie’m b’a wunmɛn i wlɛ ɔ. I ti’n, wie’m be buli i kɛ ɔ kpɛnman su kpa. ?Ajalɛ benin yɛ ɔ fali ti ɔ?
11. ?Ninnge benin mun yɛ be yoli Pɔlu i cinnjin ɔn? ?Yɛ ngue ti ɔ?
11 Pɔlu w’a buman sika nga ɔ kwla ɲɛn i mɛn nun’n, ɔ nin dunman kunndɛlɛ’n be like. Afin Zoova i klolɛ’n takali i awlɛn ba’n nun kpɛkun ɔ kunndɛli kɛ Zoova i klun jɔ i wun. Kɛ ɔ wunnin Ɲanmiɛn ndɛ’n i bo’n, ɔ buli Zezi i tɛ nga ɔ yili’n ɔ nin Ɲanmiɛn ndɛ’n i kanlɛ’n ɔ nin ɲanmiɛn su lɔ tranlɛ’n be like nanndoliɛ kpa. Mɛn nunfuɛ’m be liɛ’n, be buman ninnge sɔ’m be like fi. Asa’n, Pɔlu wunnin kɛ ɔ fata kɛ be kpɛ ndɛ kun nun. Ndɛ sɔ’n yɛle kɛ Satan sili i wue nun kɛ ɔ kwla yo naan sran’m be nun wie fi w’a suman Ɲanmiɛn. (Zɔb 1:9-11; 2:3-5) I kwlaa sɔ’n ti’n, Pɔlu fuali kpa kɛ ɔ nin Ɲanmiɛn nánti lele guɛ i ti nin i bo naan kannzɛ ɔ́ yó sɛ’n, ɔ su yaciman Zoova i sulɛ’n le. Sanngɛ mɛn nunfuɛ’m be buman akunndan sɔ’n wie.
12. ?Ngue ti yɛ e fa e wla e gua Ɲanmiɛn su ɔ?
12 ?Fualɛ nga Pɔlu fuali kɛ ɔ nin Ɲanmiɛn bé nánti lele gúɛ i ti nin i bo’n, amun a fua sɔ wie? I yo, Ɲanmiɛn sulɛ’n timan pɔpɔ. Sanngɛ e si kɛ, kɛ e mian e ɲin e su i’n, Zoova fɛ i sa’n sie e su. Ɔ maan e liɛ yo ye. (Nya. 10:22) Yɛ e lafi su kɛ e liɛ yó ye e ɲrun lɔ ekun. (An kanngan Mark 10:29, 30 nun.) Ɔ maan e faman e wla ‘guaman anyanbeun b’ɔ su ka-man lɛ’n su sanngɛ e fa gua Nyanmiɛn b’ɔ man e like kwlaa b’ɔ maan e klun jɔ’n i su.’ Kɛ ‘e yo sɔ’n, wuun bɛtrɔ kpa kun b’ɔ saci-man’n yɛ e kpɛ e sie-ɔ, yɛ é nyán nguan sakpa.’ (1 Tim. 6:17-19) I ti’n, sɛ ɔ wie afuɛ ya o annzɛ afuɛ akpi o annzɛ afuɛ akpi tra su o, e si kɛ nantilɛ klanman mɔ e nin Zoova e nantili’n, ɔ su yoman e nsisɔ. Nanwlɛ ɔ́ yó e kɛ ajalɛ’n i kpafuɛ nga sran kun kwla fɛ i nantilɛ nun’n, yɛ e fali ɔ.
?NIN YƐ AMUN SIELI AMUN AWLƐN SU NINNGE MUN ƆN?
13. ?Ndɛ benin yɛ Zezi kɛnnin i e awlɛn su ninnge’m be sielɛ’n su ɔ?
13 Zezi kannin e awlɛn su ninnge’m be sielɛ’n i ndɛ seli kɛ: “Nán an sie amun anwlɛn su ninnge’m be wa, afin nvɔlɛ nin annganblalɛ be saci be, yɛ awiefuɛ’m be bu anuan’n be wua asiɛ’n su wa. Sanngɛ an sie amun anwlɛn su ninnge mun nyanmiɛn su lɔ, lɔ liɛ’n nvɔlɛ nin annganblalɛ be saci-man like, yɛ awiefuɛ’m be bu-man anuan’n be wua-man. Afin lika nga wɔ anwlɛn su ninnge’n wo lɛ’n, lɛ yɛ wɔ akunndan’n wo-ɔ.”—Mat. 6:19-21.
14. ?Ngue ti yɛ sran ng’ɔ si ngwlɛlɛ’n, ɔ su kunndɛman mɛn nun aɲrunɲan’n niɔn?
14 Nán sika ngunmin yɛ ɔ kwla yo sran kun i awlɛn su like ɔ. Kɛ Salomɔn fa klɛli’n sa’n, like nga mɛn nunfuɛ’m be bu i kɛ sɛ sran le wie’n nn i liɛ w’a yo ye’n mɔ yɛle aɲrunɲan’n annzɛ dunman dan’n annzɛ kwlalɛ’n ɔ o nun wie. Ndɛ nga Salomɔn dun mmua kɛnnin i Akunndanfuɛ’n fluwa nun’n, yɛ Zezi flannin nun ɔn. Yɛle kɛ mɛn nun aɲanbeun ninnge’m be cɛman. Atrɛkpa’n, amun bɔbɔ amun a sie i sɔ’n i nzɔliɛ. Fluwa klɛfuɛ dan kun klɛli i kɛ: “Mɛn nga nun’n, aɲrunɲan’n cɛman. Ɔ ti kɛ nglɛmun bɔlɛ sa. Kɛ wia’n ko jaso cɛ kpɛkun via, w’a titi. Ɔ maan be nga laa be ɲannin dunman mɛn nga nun’n, kɛ é sé yɛ’n, be buman be wie kun. I ti yɛ Zezi seli i sɔnnzɔnfuɛ’m be kɛ nán maan be kunndɛ dunman mɛn’n nun’n niɔn. Afin ɔ kloman kɛ aklunfian kun be.” ?Ndɛ nga bian’n kɛnnin i lɛ’n, wan yɛ ɔ kwla se kɛ ɔ timan su ɔ? Sran fi. Sanngɛ be nga be fa ndɛ sɔ’n su’n, be juman lika fi. ?Yɛ amun li? ?Amún fá su?
15. ?Like benin yɛ ɔ fata kɛ e mian e ɲin e yo ɔ?
15 Ɲanmiɛn sulɛ wafa wie’m be su kpɛnngbɛn’m be se sran’m be kɛ ɔ fataman kɛ be kunndɛ kɛ be liɛ yo ye. Sanngɛ Zezi w’a kanman sɔ. Nga ɔ kannin’n yɛle kɛ nán aɲanbeun kunndɛlɛ’n yɛ maan sran kun i liɛ yó ye ɔ. I waan e sie e anwlɛn su ninnge mun “nyanmiɛn su lɔ.” Yɛle kɛ like nga sran kun kwla yo naan Zoova w’a bu i kɛ i liɛ w’a yo ye’n, yɛ ɔ fata kɛ ɔ miɛn i ɲin yo ɔ. Ɔ maan ajalɛ’n o e sa nun. Zezi i ndɛ’n kle kɛ e bɔbɔ yɛ é klé like nga é klɛ́n e wun é mɛ́n i’n niɔn. Sanngɛ nán maan e wla fi kɛ lika nga e anwlɛn su like o lɛ’n, lɛ yɛ e akunndan’n wo ɔ. Yɛ titi’n, like sɔ’n yɛ e kunndɛ ɔ.
16. ?Ndɛ benin su yɛ e kwla fa e wla e gua ɔ?
16 Sran nga ɔ kunndɛ kɛ Zoova i klun jɔ i wun’n, maan ɔ lafi su kɛ saan Zoova níɛn i lika. Ɔ ju wie’n, Zoova kplín su kɛ awe nin nzuewe kun i kɛ akoto Pɔlu sa. (1 Kor. 4:11) Ɔ nin i sɔ ngba’n, e fa e wla e gua ngwlɛlɛ ndɛ nga Zezi kannin’n su ɔ, ɔ yo ye. Ɔ seli kɛ: “Nán an koko se kɛ: ‘?Ndɛ nguɛ yɛ é dí ɔ? Annzɛ, ?Nguɛ yɛ é nɔ́n-ɔn? Annzɛ, ?Nguɛ yɛ é klá-a?’ Like sɔ’n kwlaa be bɔ be su-man Nyanmiɛn’n be yɛ be kunndɛ-ɔ. Nán an yo sɔ, afin amun Si b’ɔ o nyanmiɛn su lɔ’n si kɛ amun sa mian like sɔ’m be wun. An dun mmua fa amun wun man Nyanmiɛn maan ɔ sie amun, yɛ an yo i klun sa’n, i sin ɔ́ wá fá ninnge sɔ’n kwlaa úka su mán amun.”—Mat. 6:31-33.
ƝANMIƐN MAAN AMUN LIƐ YO YE!
17, 18. (a) ?Ngue yɛ ɔ fata kɛ e yo naan e liɛ w’a yo ye ɔ? (b) ?Ninnge benin mun yɛ e kwlá jranman be su e seman kɛ sran kun i liɛ w’a yo ye ɔ?
17 Maan e fa ndɛ nga ɔ o yɛ’n, e sie e klun kpa. Yɛle kɛ sran nga i liɛ w’a yo ye’n, nɛ́n i yɛle sran nga ɔ yoli ninnge kpanngban mɛn nun annzɛ i dunman’n w’a fu’n. Asɔnun’n nun kusu’n, nán kɛ be mannin aniaan kun i junman ti yɛ ɔ́ bú i kɛ i liɛ w’a yo ye ɔ. Afin kɛ mɔ ɔ nin Ɲanmiɛn be nanti klanman’n m’ɔ fa ndɛ nga Ɲanmiɛn kan kle i’n su’n, i ti yɛ be mɛnnin i junman’n niɔn. Ɲanmiɛn se kɛ: “Sa ng’ɔ ti cinnjin’n, yɛlɛ kɛ sran ng’ɔ nian ninnge su’n, ɔ yo sran kpa.” (1 Kor. 4:2) Ng’ɔ ti cinnjin’n yɛle kɛ e tra e anwlɛn e yo sran kpa lele guɛ i ti nin i bo. Afin Zezi seli kɛ: “Sran ng’ɔ trɛ i anwlɛn lele ju i awieliɛ’n, ɔ́ fíte nun.” (Mat. 10:22) Yɛ sran nga w’a fite nun’n, e kwla se kɛ i liɛ w’a yo ye. ?Nɛ́n i ɔ?
18 I kwlaa nga e kɛnnin i lɛ’n kle kɛ nán sran nga i dunman’n w’a fu’n annzɛ ɔ dili suklu dan’n annzɛ ɔ le sika kpa’n, annzɛ ɔ ti sran dan’n yɛ Ɲanmiɛn bu i kɛ i liɛ w’a yo ye ɔ. Asa’n, sran nga ɔ si ngwlɛlɛ annzɛ i sa si like yo’n, Ɲanmiɛn bumɛn i kɛ i liɛ w’a yo ye. Ɔ maan, kannzɛ e ti sɛ e ti sɛ o, e liɛ kwla yo ye. Akoto’m be blɛ su’n, Ɲanmiɛn sufuɛ wie’m be ti sikafuɛ yɛ wie’m be ti yalɛfuɛ. Pɔlu seli be nga be ti sikafuɛ’n kɛ “be yo sa ng’ɔ ti kpa’n, yɛ be yo sran ye, i sɔ’n yɛ ɔ ti anyanbeun kpa nin-ɔn. [Naan] be yo aklunye, yɛ be cɛ sran like.” Afɔtuɛ kpa sɔ’n ti yalɛfuɛ’m be liɛ wie. Sɛ be sran akpasua nɲɔn sɔ’n be fa Pɔlu i afɔtuɛ’n su’n, bé kwlá “nyán nguan sakpa.” (1 Tim. 6:17-19) Ndɛ sɔ’n ti e liɛ wie andɛ. Ɔ fata kɛ e mian e ɲin naan e nin Zoova e nanti titi naan e “yo sran ye.” I sɔ yolɛ’n yɛ ɔ ti e kwlakwla e junman m’ɔ fata kɛ e fa cici e ti ɔ. Sɛ e yo sɔ’n, e liɛ’n yó ye sakpa kpɛkun e Yifuɛ Ɲanmiɛn klun jɔ́ e wun afin e yo sa nga ɔ yo i fɛ’n.—Nya. 27:11.
19. ?Ngue yɛ ɔ o amun klun kpa kɛ amún yó naan amun liɛ w’a yo ye ɔ?
19 Atrɛkpa’n sa ng’ɔ o amun su’n, w’a blabla amun wun. Ɔ maan amun wunman amun wun kpɔciwlɛ kaan sa. Kannzɛ ɔ ti sɔ bɔbɔ’n, nán maan amun lo amun wun man sa sɔ’n naan ɔ tin amun su. Maan amun mian amun ɲin naan amun nin Ɲanmiɛn be nanti titi. Sɛ amun yo sɔ’n, amún wún i kɛ ɔ su yoman ngbɛn. Nán maan ɔ fi amun ɲin kɛ maan ɔ yo andɛ annzɛ ainman o, Zoova su yaciman amun muae bolɛ le. Asa kusu’n, maan ndɛ nga Zezi kan kleli be nga bé wá kɔ́ ɲanmiɛn su’n, ɔ tran amun klun titi. Ɔ seli kɛ: “Sɛ kunlɛ bɔbɔ yɛ bé kún amun’n, an tra amun anwlɛn, yɛ like nga ń fá yó amun mo’n yɛlɛ nguan’n, ɔ ti kɛ famiɛn kle sa.” (Ngl. 2:10) Sran ng’ɔ ɲɛn i sɔ like’n, nanwlɛ i liɛ su ti ye!
[Kosan mun]
[Foto, bue 14]
Sran’m be buli i kɛ Sɔlu káci i liɛ sran dan.
[Foto, bue 15]
Pɔlu liɛ yoli ye sakpa.
