Kosan 2: ?Sɛ n wu’n, min liɛ yó sɛ?

BE FLƐ bian kun kɛ Romɛn. I nun nga ɔ te yo gbanflɛn kpa’n, loto kunnin i janvuɛ kpa kun. I waan: “Min janvuɛ’n i wie’n yoli min ya kpeli nun. I sin’n, n usali min wun kɛ: ‘?Kɛ sran wu’n i liɛ yo sɛ?’”

?Ngue ti yɛ sran’m be usa kosan sɔ’n niɔn? Klɔ sran nin wie fataman. Ɔ maan i bakan o, i kpɛnngbɛn o, e wie fi e kunndɛman kɛ é wú. Asa’n, sran kpanngban be sro sa nga ɔ o wie’n i sin’n.

?Wafa sɛ yɛ sran wie’m be tɛ kosan sɔ’n su ɔ? Sran kpanngban be bu i kɛ kɛ sran kun wu’n, ɔ le like kun m’ɔ o i nun m’ɔ wuman wie ɔ. Be bu i kɛ sran kpa mun bé kó dí ye ɲanmiɛn su lɔ, naan sran tɛ’m be liɛ’n, bé yrá be sin nun tititi. Sran wie’m be liɛ’n, be bu i kɛ kɛ sran wu’n, nn i liɛ w’a wie naan kɛ ɔ́ cɛ́ kɔ́’n, sran’m be wla fí i su mlɔnmlɔn.

?Wafa nga be tɛ kosan sɔ’n su’n, ɔ kle sɛ? Kosan’n i su tɛlɛ klikli’n kle kɛ sran nga ɔ wuli’n w’a wuman sakpasakpa. Kosan’n i su tɛlɛ nɲɔn su’n, ɔ kle kɛ klɔ sran’m be nguan’n leman bo. Ɔ maan be nga be bu i sɔ’n be yo sa ɔ, be bumɛn i sin kun. Akunndan nga be bu’n yɛ ɔ wo yɛ: “Maan e di like e nɔn nzan, ainman é wú, wuun e liɛ a wie.”​—1 Korɛntfuɛ Mun 15:32.

?Wafa sɛ yɛ Biblu’n tɛ kosan sɔ’n su ɔ? Biblu’n seman kɛ kɛ sran wu’n like kun o i nun m’ɔ wuman wie ɔ. I sɔ yɛ Ɲanmiɛn maan Famiɛn Salomɔn klɛli ɔ. Ɔ klɛli i kɛ: “Be nga be nyin o su’n, be si kɛ bé wú cɛn kun, sanngɛ be nga b’a wu’n be liɛ’n be wun-man sa fi wlɛ.” (Akunndanfuɛ’n 9:4, 5) Kɛ Biblu’n se kɛ be nga b’a wu’n ‘be wunman sa fi wlɛ’n’ i bo’n yɛle kɛ like nga be yo i wia’n i bo wa’n, be wunman nun kaan sa. Be kwlá yoman like fi. Ɔ maan be nga b’a wu’n, be kwlá ukaman be nga be ɲin te o su’n, yɛ kusu be kwlá yoman be sa tɛ.

Sran wie’m be bu i kɛ kɛ Ɲanmiɛn yili klɔ sran’n, ɔ sunnzunnin kɛ ɔ wu. Sanngɛ ɔ timan nanwlɛ. Ɲanmiɛn w’a sunnzunman klɔ sran nin wie. Afin ɔ yili Adam m’ɔ ti sran klikli’n kɛ ɔ tran asiɛ’n su tititi. Kpalɛ klikli nga Ɲanmiɛn kannin wie ndɛ’n, yɛle i nun nga ɔ  boli sa nga mɔ sɛ Adam i ɲin w’a yimɛn i’n, ɔ́ jú i su’n, i su kleli i’n. Ɔ seli Adam kɛ nán ɔ di waka kun i mma’n, naan sɛ ɔ di’n “saan wulɛ cɛ yɛ [ɔ́] wú-ɔ.” (Bo Bolɛ 2:17) Sɛ ɔ ti kɛ Adam nin Ɛvu be ɲin yili Ɲanmiɛn guɛli i ti nin i bo’n, nn be nin be osufuɛ nanwlɛfuɛ mun kwlaa be kwla trannin asiɛ’n su tititi.

Adam i ɲinfu kpaloli Ɲanmiɛn i mmla’n. I sɔ’n ti sa tɛ. I ti’n, ɔ wuli. (Rɔmfuɛ Mun 6:23) Adam wuli kusu ɔ, like fi w’a finmɛn i nun w’a ɔman lika fi. I liɛ wieli mlɔnmlɔn. Ndɛ nga Ɲanmiɛn kan kleli Adam yɛ’n, ɔ kle sɔ weiin. Ɔ seli i kɛ: “Nvufle tú wɔ kpa naan w’a nyan ɔ nuan nun aliɛ w’a di. Ɔ́ yó sɔ lele naan w’a fa sa ɔ sin a kaci fa ekun, afin fa yɛ n fa yili wɔ-ɔ. A ti fa yɛ á wá sá ɔ sin á káci fa ekun.” (Bo Bolɛ 3:19) Kɛ mɔ klɔ sran’m be kwlaa be fin Adam ti’n, sa tɛ nin wie’n be sali be.​—Rɔmfuɛ Mun 5:12.

Kannzɛ Adam yoli sa tɛ’n, sanngɛ Ɲanmiɛn wá yó naan i klun sa’n kpɛn su. Yɛle kɛ Ɲanmiɛn maan Adam i mma mun nin i anunman mun bé wá trán asiɛ’n su kɛ Ɲanmiɛn fa kunndɛ’n sa. Yɛ fɔ su tranman be nun kun. (Bo Bolɛ 1:28; Ezai 55:11) Ɔ ka kaan’n, Zoova wá cɛ́n sran nga be wuli’n be dan lika. Akoto Pɔlu kannin blɛ sɔ’n i ndɛ. Ɔ seli kɛ: “Sran kpa mun o, sran tɛ mun o, bé cɛ́n.”​—Sa Nga Be Yoli’n 24:15.

Sɛ a kunndɛ kɛ á sí like nga ɔ o wie’n i sin’n i su ndɛ ekun’n, nian fluwa ?Ngue like yɛ Biblu’n kle i sakpasakpa ɔ? i ndɛ tre 6 nun. A kwla ko fɛ i ɛntɛnɛti lika nga nun lɔ: www.isa4310.com

[Kuku, bue 7]

Wie’n i su ndɛ nga Zezi kannin’n

Zezi i blɛ su’n, asɔnun kpɛnngbɛn wie’m be waan sɛ sran wu’n ɔ cɛnman. Sanngɛ Zezi w’a seman sɔ wie. (Lik 20:27) Asa’n w’a seman le kɛ sɛ sran wu’n, ɔ le like kun m’ɔ o i nun m’ɔ wuman wie ɔ. Sanngɛ wie’n i su ndɛ nga Zezi kannin’n yɛ:

Zezi fali wie’n sunnzunnin lafilɛ. Kɛ Lazali m’ɔ ti Zezi i janvuɛ’n wuli’n, Zezi seli i sɔnnzɔnfuɛ’m be kɛ: “E janvuɛ Lazar a lafi, sanngɛ ń kɔ́ i tinngelɛ.” Be tɛli i su kɛ: “Nannan, sɛ ɔ su lafi’n, wuun ɔ́ yó juejue.” B’a wunman Zezi i ndɛ’n i wlɛ ti yɛ be tɛli i su sɔ ɔ. Biblu’n waan Lazali “i wie ndɛ yɛ Jésus kannin-ɔn, sanngɛ be buli i kɛ lafilɛ kpakpa ndɛ yɛ ɔ kannin-ɔn. Ɔ maan Jésus seli be weiin kɛ: ‘Lazar a wu.’”​—Zan 11:11-14.

Zezi waan be nga be wuli’n bé cɛ́n. Kɛ Zezi juli Lazali i klɔ lɔ’n, ɔ kannin ndɛ kun guali Lazali i niaan bla Marti i awlɛn su nzue. Ɔ seli i kɛ: “Ɔ niaan’n ɔ́ wá cɛ́n.” Yɛ Zezi kannin ndɛ cinnjin nga kleli i ekun ɔn. Ɔ seli i kɛ: “Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng’ɔ lafi n su’n, sɛ ɔ wu’n, ɔ́ nyán nguan ekun.” Nán ndɛ ngbɛn yɛ Zezi kannin ɔn. Afin ɔ ka lɛ cɛnnin Lazali m’ɔ wuli w’a di cɛn ba nnan’n. Ɔ yoli i sɔ’n sran kpanngban kpa be ɲrun lɛ.​—Zan 11:23, 25, 38-45.

Sa nga Zezi yili i nglo kleli akoto Zan’n i nun’n, ɔ kle ekun kɛ e ɲrun lɔ’n, be nga be wuli’n bé cɛ́n. Yɛle kɛ Zezi kɛnnin i kɛ wie’n ɔ́ wá yí sran nga be wuli’n mɔ be wo i sa nun’n mán.​—Sa Nglo Yilɛ 20:13.