Bla’m be su sa mun

“Kɛ n wun wafa nga be fa yo bla mun’n, n kunndɛman kɛ n ɲin bɔbɔ.”​—ZAHRA M’Ɔ LE AFUƐ 15, i ndɛ sɔ’n o zronali nga be flɛ i GEO mɔ be klɛli i blɔfuɛ nun’n i nun.

NDƐ nga talua kan’n kannin m’ɔ o fama su lɛ’n, ɔ yi ɲrɛnnɛn sa kun i nglo. Yɛle kɛ asiɛ wunmuan’n su’n, i bla kanngan mun o, i bla kpɛnngbɛn mun o, be yo be kpokokpoko yɛ be bu be lufle. Maan e nian ndɛ nga mun.

● Be buman bla’m be kɛ be fa bu yasua mun’n sa. Azi mɛn’n nun lɔ’n, siɛ nin niɛn kaka be klo ba yasua tra ba bla. Afuɛ nga be flɛ i 2011 nun’n, anuannzɛ nga be flɛ i ONU kannin kɛ mɛn’n i bue sɔ’n su’n, bla kɔe akpinngbin 134 be tu nun. Yɛ i waan i sɔ’n fin kuɛ tulɛ’n, nin ba kanngan nin ba nɔnman’m be kunlɛ’n ɔ nin ba kanngan’m be lika mɔ be nianman’n.

● Suklu dilɛ. Asiɛ wunmuan’n su’n, be nga b’a diman suklu’n nin be nga sɛ be ɔli mmua o yɛle sua nnan’n, sɛ e bu be nun akpasua nsan’n, bla’m be ngunmin be ti akpasua nɲɔn.

● Be nin be si sua kekle nun. Bla akpi ngbinngbin nɲɔn akpinngbin ya nsiɛn tra su be tran nvle nga i nunfuɛ’m be bumɛn i kɛ sɛ yasua kun miɛn i yi naan ɔ nin i be la kekle nun’n ɔ ti sa tɛ’n, be nun.

● Be wun ayre yolɛ. Nvle nga i nunfuɛ’m be timan sikafuɛ’n be nun’n, miniti kɔe nɲɔn kwlaa nun’n, bla wunnzɛfuɛ’n kun wu. Annzɛ i ba wulɛ su’n ɔ wu. Afin tukpacɛ kanngan mun bɔbɔ’n be ɲanman be ayre.

● Be tiaun like ɲanlɛ. Fie nga be di be asiɛ’n su’n, sɛ e kan be kwlaa’n e bo nun naan e bu be nun bue nɲɔn’n, i bue kun tra su ti bla’m be sa nuan junman. Sanngɛ nvle kaka nun’n, bla’m be leman atin be ɲanman be tiaun asiɛ annzɛ be diman asiɛ aja.

?Ngue ti yɛ be bu mmla’m be lufle ninnge kwlaa sɔ’m be nun ɔn? Ɲanmiɛn sulɛ wafa wie’m be bu i kɛ mmla’m be lufle bulɛ’n nin be kpokokpoko yolɛ’n ti i su. Be ninnge yolɛ wafa’n su yɛ klɔ wie’m be su’n, sran’m be nian ɔn. Ɛndi lɔ bla kun m’ɔ kan sran’m be ti ndɛ jɔlɛ difuɛ’m be ja su’n, ɔ suan Chandra Rami Chopra. Aflansifuɛ’m be zronali kun nun’n, be klɛli ndɛ kun m’ɔ kannin’n. Ɔ seli kɛ: “Ɲanmiɛn sulɛ wafa kwlaa nun’n, mmla nga sran’m be di be su’n be suan like kunngba’n bo. Yɛle kɛ be kle kɛ bla’m be lufle bulɛ’n ti kpa.”

?Kɛ amun bu i sɔ wie ɔ? ?Kɛ nga Ɲanmiɛn sulɛ fluwa kpanngban wie’m be fa yo’n sa’n, amun bu i kɛ Biblu’n yo maan sran’m be bu i kɛ bla’m be timan sran nanndoliɛ? Ɔ yo sran wie’m be kɛ Biblu’n nun ndɛ mma wie’m be kle sɔ. ?Sanngɛ yoo, Ɲanmiɛn nga i nuan su ndɛ yɛle Biblu’n, wafa sɛ yɛ ɔ bu bla mun ɔn? Kannzɛ i sɔ ndɛ’n lo sran wie’m be ngasi ndɛndɛ’n, sanngɛ sɛ e bo e ɲin ase kpa e nian ndɛ nga Biblu’n kan’n nanwlɛ su’n, é wún sa sɔ’n i su nanwlɛ’n.

[Foto cifuɛ, bue 3]

© G.M.B. Akash/​Panos Pictures