B’a yi Sasafuɛ Tranwlɛ’n uflɛ Angle nun

E WAAN é bó su é klé amun kɛ, kɛ ɔ fɛ i Sasafuɛ Tranwlɛ’n nga amun su kanngan nun yɛ’n i su’n, anglo kwlaa nun’n é wá yí kun ekun Angle nga i wlɛ wunlɛ’n timan kekle’n nun. É yí i sɔ lele afuɛ nuan kun é nían, kpɛkun sɛ ɔ ti mɔ e yi tititi’n é yó sɔ. Ɔ nin Sasafuɛ Tranwlɛ’n ng’ɔ fite titi’n bé fíte likawlɛ.

Ɔ ti cinnjin kpa kɛ sran’m be ngba be wun like nga e suɛn i Sasafuɛ Tranwlɛ’n nun le mɔcuɛ kwlaa nun’n i wlɛ. Afin Sasafuɛ Tranwlɛ’n yɛ ɔ ti like bɔbɔ ba nga “sran kpa nanwlɛfuɛ b’ɔ si ngwlɛlɛ’n” fa kle Ɲanmiɛn i sufuɛ’m be like andɛ ɔ. (Matie 24:45) ?Sanngɛ ngue ti yɛ ɔ fata kɛ e yi Angle nun Sasafuɛ Tranwlɛ’n nga i wlɛ wunlɛ’n timan kekle’n niɔn?

Asiɛ wunmuan’n su’n, e niaan nga be kɔ aɲia nga be yo i Angle nun’n be bo’n, be nun sunman be wunman like nga be suɛn i Angle Sasafuɛ Tranwlɛ’n nun’n i wlɛ kpa. Nán ngbɛn ti yɛ be wunmɛn i wlɛ kpa’n niɔn. Nvle kɛ Fiji, Ghana, Kenya, Liberia, Nigeria, Papouasie-Nouvelle-Guinée, îles Salomon, nin Zimbabwe sa’n be nun’n Angle yɛ be kan ɔn. Aniaan nga be trɛn i sɔ nvle’m be nun’n, be bo jasin fɛ’n yɛ be yo aɲia mun Angle’n nun. Sanngɛ atrɛkpa awlo lɔ’n, be klɔ aniɛn’n yɛ be kan ɔn. Asa ekun’n, aniaan sɔ mun’n, nán Angle nga be klɛ i Sasafuɛ Tranwlɛ’n nun’n yɛ be ngba be kan ɔn. E niaan wie’m be wanndili alɛ’n be ko fiali nvle nga be kan Angle lɔ’n be nun. Ɔ maan saan aɲia nga be yo be Angle nun’n yɛ be kwla kɔ be bo ɔ. Sanngɛ ndɛ ng’ɔ o Sasafuɛ Tranwlɛ’n nun’n i wlɛ wunlɛ’n kwla yo kekle man be, afin Angle’n timan be klɔ aniɛn. Ba kanngan wie mɔ Angle’n yɛ be tɛ i kan’n, ɔ ju wie’n, Sasafuɛ Tranwlɛ’n i nun ndɛ’n i wlɛ wunlɛ’n ti kekle man be wie. Sasafuɛ Tranwlɛ’n ng’ɔ ti pɔpɔfuɛ’n, ɔ́ yó maan aniaan nga be kan Angle mɛn wunmuan’n nun’n, bé wún like nga e suan’n i wlɛ.

Kannzɛ Angle ng’ɔ o Sasafuɛ Tranwlɛ’n uflɛ’n nun’n i wlɛ wunlɛ’n timan kekle’n, sanngɛ Biblu’n nun ndɛ nanwlɛ ng’ɔ o Sasafuɛ Tranwlɛ’n ng’ɔ fite titi’n nun’n i kunngba’n yɛ ɔ o nun ɔn. Ndɛ kpɔlɛ nga be o kun nun’n be traman kun liɛ’n. Yɛ kosan nin foto nin i nun flanlɛ kosan’m bé trán be nɲɔn’m be nun. Ɔ maan be nun kun nga sran kun waan ɔ́ súan nun like naan ɔ́ fá kɔ́ aɲia’m be bo’n, yɛ ɔ́ fá ɔ. Kɛ ɔ ko yo naan y’a wun ngbaciɛ ng’ɔ o Angle’n nun Sasafuɛ Tranwlɛ’n nɲɔn sɔ’m be afiɛn’n, i ti yɛ be fali kuku nga be o ja ngua lɛ’n be sieli i lɛ ɔ. Be nun ndɛ’n fin fluwa nga i like suanlɛ klikli’n i ndɛ kpɔlɛ nɲɔn’n nun.

E lafi su kɛ Angle nun Sasafuɛ Tranwlɛ’n ng’ɔ ti pɔpɔ’n ɔ́ úka aniaan mun nin ba kanngan mun naan ka naan b’a ɔ aɲia’n bo le mɔcuɛ kwlaa nun’n, be wun siesielɛ’n w’a yo pɔpɔ. Kɛ mɔ Zoova klo e “niaan Kristfuɛ mun” kwlaa ti’n, ɔ sin “sran kpa nanwlɛfuɛ b’ɔ si ngwlɛlɛ’n” i ja nun man e like kwlaa ng’ɔ mian e sa’n, blɛ ng’ɔ ti i nuan su’n i su. I ti’n, é lɛ́ i ase.—1 Piɛr 2:17.

Ɛ Ɲrun dinfuɛ’m be anuannzɛ’n