?Ɲanmiɛn wawɛ’n sie amun?

“Maan ɔ Wawɛ klun-ufuefuɛ’n ɔ dun mmua min nyrun atin b’ɔ ti kpa’n su.”​—JUE. 143:10.

1, 2. (a) Wafa nga Zoova fɛ i wawɛ’n ukɛ i sufuɛ mun’n, an kan wie’m be ndɛ. (b) ?Kɛ ndɛ’n tɔ cinnjin kpa’n, i sɔ’n nun ngunmin yɛ Ɲanmiɛn wawɛ’n yi i wun nglo ɔ? An yiyi nun.

 ?KƐ AMUN bu sa nga Ɲanmiɛn wawɛ’n maan sran yo’n be akunndan’n, ndɛ benin yɛ ɔ kpɛn amun klun ɔn? ?Amun bu sa dandan nga Zedeɔn nin Samsɔn be yoli’n be akunndan? (Jɔl. 6:33, 34; 15:14, 15) Atrɛkpa’n, amun bu wafa nga Klistfuɛ klikli’m be yoli yakpa’n i akunndan. Annzɛ kusu kɛ be fali Etiɛni ɔli Zuifu’m be jɔlɛ difuɛ dandan’m be ja su mɔ i klun w’a titimɛn i kaan sa’n, amun bu i akunndan wie. (Sa Nga Be Yoli’n 4:31; 6:15) ?Yɛ e blɛ liɛ nga nun’n aklunjuɛ nga aniaan’m be di i nvlenvle’m be aɲia’m be bo lɔ’n nin? ?Yɛ politiki mɔ e niaan Klistfuɛ’m be faman be wun wlaman nun mɔ i ti be wla be bisua mɔ sanngɛ be jran kekle’n nin? ?Yɛ jasin fɛ’n i bolɛ junman mɔ be su di i kpa kɔ i ɲrun’n nin? I kwlaa sɔ’n kle weiin kɛ Ɲanmiɛn wawɛ’n di junman.

² ?Kɛ ndɛ’n tɔ cinnjin kpa’n, i sɔ’n nun ngunmin yɛ Ɲanmiɛn wawɛ’n yi i wun nglo ɔ? Cɛcɛ. Ɲanmiɛn Ndɛ’n waan Klistfuɛ’m be ‘yo sa nga Nyanmiɛn Wawɛ’n kle be’n,’ yɛ ‘be fa atin nga Nyanmiɛn Wawɛ’n kle be’n su,’ kpɛkun ‘Nyanmiɛn Wawɛ’n maan b’a nyan nguan.’ (Galasifuɛ Mun 5:16, 18, 25) Ndɛ kwlaa sɔ’m be kle kɛ e mɛn dilɛ’n nun’n, Ɲanmiɛn wawɛ’n kwla uka e titi. I sɔ’n ti’n, cɛn ba kwlaa nun ɔ fata kɛ e srɛ Zoova naan ɔ fɛ i wawɛ’n tinngɛ akunndan nga e bu’n, ɔ nin ndɛ nga e kan’n yɛ ninnge nga e yo be’n. (An kanngan Jue Mun 143:10 nun.) Sɛ e man Ɲanmiɛn wawɛ’n i atin kɛ ɔ sie e’n, ɔ́ yó maan é yó sa nga Ɲanmiɛn wawɛ’n maan sran yo’n. Yɛ sa sɔ’n i yolɛ’n fɔ́nvɔ sran mun, kpɛkun ɔ́ mánmán Ɲanmiɛn.

3. (a) ?Ngue ti yɛ ɔ nin i fata kɛ Ɲanmiɛn wawɛ’n sie e ɔ? (b) ?Kosan benin mun yɛ é wá tɛ́ be su ɔ?

³ ?Ngue ti yɛ ɔ ti cinnjin kpa kɛ Ɲanmiɛn wawɛ’n sie e ɔ? Afin like uflɛ o lɛ m’ɔ kunndɛ kɛ ɔ́ síe e wie ɔ. Like sɔ’n tanndan Ɲanmiɛn wawɛ’n i ɲrun. Biblu’n nun’n, be flɛ like sɔ’n kɛ “like nga klɔ sran klo i’n.” Like sɔ’n yɛle e ɲin m’ɔ o sa tɛ yolɛ’n i sin mɔ e nannan Adam fa sali e’n. (An kanngan Galasifuɛ Mun 5:17 nun.) ?Kɛ be se kɛ e yaci e wun lɛ naan Ɲanmiɛn wawɛ’n sie e’n, i bo’n yɛle benin? ?E kwla yo ninnge trele wie mun naan e ɲin w’a kaman sa tɛ’n yolɛ’n i sin? Kɛ é kókó “sa nga Nyanmiɛn wawɛ’n maan sran yo’n” i wafa nsiɛn onga’m be su yalɛ é kɔ́’n, é tɛ́ kosan sɔ’m be su. Sa sɔ’n i wafa nsiɛn sɔ mun yɛle ‘be anwlɛn tralɛ, sran ye yolɛ, aklunye yolɛ, nanwlɛ dilɛ *, wɛtɛɛ yolɛ, yɛ sa i nuan su yolɛ.’—Gal. 5:22, 23.

Wɛtɛɛ yolɛ’n nin awlɛn tralɛ’n maan fɔundi tran asɔnun’n nun

4. ?Wafa sɛ yɛ wɛtɛɛ yolɛ’n nin awlɛn tralɛ’n be yo maan fɔundi tran asɔnun’n nun ɔn?

⁴ An kanngan Kolɔsfuɛ Mun 3:12 nun. Kɛ wɛtɛɛ yolɛ’n nin awlɛn tralɛ’n be nɲɔn’n be o asɔnun’n nun’n, be yo maan fɔundi tran nun. Sa nga Ɲanmiɛn wawɛ’n maan sran yo’n i wafa nɲɔn sɔ’n, be yo maan e nin sran mun e tran klanman. Yɛ be yo maan sɛ sran klɔklɔ e’n, e tran diin. Kpɛkun sɛ sran wie kan ndɛ tɛ wie kle e’n, annzɛ ɔ yo e tɛ’n be uka e naan y’a yiman y’a manman be. Sɛ e nin e wiengu Klistfuɛ kun e kacikaci e nuan’n, e awlɛn tralɛ’n yó maan e  su yiman e niaan’n i blo. Sanngɛ ɔ́ úka e naan y’a siesie e afiɛn. ?Kɛ amun niɛn i sa’n, ɔ fata kɛ wɛtɛɛ yolɛ’n nin awlɛn tralɛ’n be tran asɔnun’n nun? Ɛɛn, afin fɔ o e ngba e nun.

5. ?Ngue ndɛ yɛ ɔ tɔli Pɔlu nin Barnabasi be afiɛn ɔn? ?Yɛ i sɔ’n kle sɛ?

⁵ Ndɛ wie tɔli Pɔlu nin Barnabasi be afiɛn. Maan e bu i akunndan kan e nian. Be sran nɲɔn’n be dili junman likawlɛ afuɛ kpanngban, naan jasin fɛ’n tru kpa. Be tinuntinun be nzuɛn’n ti kpa. Sanngɛ cɛn kun’n, “akplowa dan kpa tɔli be afiɛn, i agualiɛ su be titili nun.” (Yol. 15:36-39) I sɔ sa liɛ’n kle kɛ Ɲanmiɛn i sufuɛ kpa mun bɔbɔ’n, ɔ ju wie’n ndɛ kwla tɔ be afiɛn. ?Sɛ Klistfuɛ kun nin i wiengu kun b’a timan be wun aniɛn’n, ngue yɛ ɔ kwla yo naan i sɔ ndɛ’n w’a kaciman ndɛ dan naan be afiɛn w’a saciman mlɔnmlɔn ɔn?

6, 7. (a) ?Biblu’n nun afɔtuɛ benin yɛ é nánti su naan yalɛ nga e nin e wiengu Klistfuɛ kun e su koko’n w’a kaciman ndɛ dan ɔn? (b) ?Sɛ e ‘sie e su e tie ndɛ nga be kan’n kpa, naan e kanman ndɛ ndɛndɛ’n, yɛ e faman ya ndɛndɛ’n’ ye benin yɛ é ɲɛ́n i ɔ?

⁶ Biblu’n wie’m be kle kɛ ndɛ ng’ɔ tɔli Pɔlu nin Barnabasi be afiɛn’n, ɔ ka lɛ tɔli kpɛ kunngba, kpɛkun ɔ yoli dan kpa. Sɛ Klistfuɛ kun nin i wiengu kun bé kókó yalɛ naan ndɛ’n su lo i ngasi’n, ɔ ti kpa kɛ ɔ fa afɔtuɛ ng’ɔ o Zak 1:19, 20 nun’n i su. I waan: “Maan sran’m be kwlakwla be sie be su be tie ndɛ nga be kan’n kpa, nán maan sran fi kan ndɛ ndɛndɛ, yɛ nán maan ɔ fa ya ndɛndɛ. Afin sɛ sran fa ya’n, ɔ kwlá yo-man sa ng’ɔ ti kpa’n Nyanmiɛn nyrun’n.” Ɔ maan ka naan ndɛ w’a yo ndɛ dan’n, ɔ kwla kan ndɛ uflɛ annzɛ be kwla sie yalɛ kokolɛ’n i cɛn uflɛ. Annzɛ kusu ɔ kwla kpɛtɛ i wiengu’n.—Nya. 12:16; 17:14; 29:11.

⁷ ?Sɛ sran kun fa afɔtuɛ sɔ’n su’n, ye benin yɛ ɔ kwla ɲɛn i ɔ? Klistfuɛ ng’ɔ minndɛ kɛ i wla gua ase ka, m’ɔ srɛ Ɲanmiɛn kpɛkun ɔ bu wafa ng’ɔ kwla tɛ i wiengu’n i su klanman’n i akunndan’n, ɔ yaci i wun lɛ maan Ɲanmiɛn wawɛ’n sie i. (Nya. 15:1, 28) Ɲanmiɛn wawɛ’n m’ɔ sie i’n ti’n, ɔ kwla yo wɛtɛɛfuɛ yɛ ɔ kwla trɛ i awlɛn. Kɛ ɔ ko yo sɔ’n, ɔ kwla nanti afɔtuɛ ng’ɔ o Efɛzfuɛ Mun 4:26, 29 nun’n i su. I waan: “Sɛ an fa ya’n, nán an yo sa tɛ. [...] Nán ndɛ tɛ kun sa fin amun nuan fite, sanngɛ an kan ndɛ ng’ɔ ti kpa bɔ sran ti-ɔ ɔ yo sran’n, naan ɔ yo be kwlaa nga be ti’n be fɛ.” Nanwlɛ kɛ e yo wɛtɛɛfuɛ mɔ e tra e awlɛn’n, e yo maan fɔundi nin bo kun yolɛ’n be tran asɔnun’n nun.

Sran ye yolɛ nin aklunye’n maan awlobo’n nun tranlɛ’n yo fɛ

8, 9. ?Ngue yɛle sran ye yolɛ’n nin aklunye yolɛ’n? ?Yɛ kɛ awlobo’n nunfuɛ’m be yi i sɔ nzuɛn’m be nglo’n, awlo’n nun yo sɛ?

⁸ An kanngan Efɛzfuɛ Mun 4:31, 32; 5:8, 9 nun. Sran ye yolɛ’n nin aklunye’n be yo maan e wla’n gua ase fɔun. Be ti kɛ aunmuan fɛfɛ m’ɔ fita e wun awunyɛyɛ blɛ’n nun sa, annzɛ kɛ  nzue flɔlɔ mɔ kɛ lika’n lo kpa’n e nɔn m’ɔ jɔ e klun’n sa. Be yo maan awlobo’n nun tranlɛ’n yo fɛ. Sran ye yolɛ’n ti nzuɛn kpa kun. Ɔ fin sran’m be ndɛ m’ɔ lo e’n. Kpɛkun be ndɛ m’ɔ lo e’n maan e yo ninnge wie mun e fa uka be, yɛ e kan ndɛ fɛfɛ e kle be. Aklunye’n kusu ti kɛ sran ye yolɛ’n sa wie. Ɔ ti nzuɛn kpa kun mɔ i ɲin fite sa nga e yo e fa uka sran mun’n i nun ɔn. Nzuɛn sɔ’n fin e klun m’ɔ ti ufue’n. (Yol. 9:36, 39; 16:14, 15) Sanngɛ aklunye yolɛ’n kaman ngalɛ’n su.

⁹ Aklunye’n ti aeliɛ kpa. Ɔ kanman like nga e yo’n i ngunmin. Sanngɛ ng’ɔ ti cinnjin kpafuɛ’n yɛle kɛ ɔ kan sran’n i wafa nga e ti’n. Ɔ ti kɛ waka mma fɛfɛ kun m’ɔ ti kpa lele ju i klun lɔ’n sa. I kunngba’n, aklunye nga Ɲanmiɛn wawɛ’n maan sran kun yo’n, ɔ o like kwlaa nga Klistfuɛ’m be yo’n nun.

10. ?Ngue yɛ awlobo kpɛn’m be kwla yo naan b’a uka be awlobofuɛ mun naan b’a yo sa nga Ɲanmiɛn wawɛ’n maan sran yo’n niɔn?

¹⁰ ?Ngue yɛ ɔ kwla uka Klistfuɛ awlobo kun nunfuɛ mun naan b’a yi sran ye yolɛ’n nin aklunye yolɛ’n be nglo be wiengu lika ɔ? Sɛ be si Ɲanmiɛn Ndɛ’n kpa’n ɔ kwla uka be kpa. (Kol. 3:9, 10) Kɛ awlobo kpɛn wie’m be nin be awlobofuɛ’m bé sú Ɲanmiɛn awlo lɔ’n, be suan sa nga Ɲanmiɛn wawɛ’n maan sran yo’n i su like. I sɔ yolɛ’n timan kekle. Sa nga Ɲanmiɛn wawɛ’n maan sran yo’n i wafa kunngun’m be su like nga be klɛli i Biblu’n i akua’m be nun’n, e kwla niannian nun. Le mɔcuɛ kun nun’n, e kwla fɛ i nun ndɛ kpɔlɛ kan e koko su yalɛ. Ɔ maan kɛ e fa sa nga Ɲanmiɛn wawɛ’n maan sran yo’n i wafa kun’n, e kwla fa le mɔcuɛ kpanngban e koko su yalɛ. Kɛ é súan su like é kɔ́’n, maan e kanngan Biblu’n nun ndɛ mma’m be nun naan e koko be su yalɛ. Kpɛkun maan e nian wafa nga e kwla nanti like nga e suannin’n su’n. Yɛ maan e srɛ Zoova naan ɔ ra e ɲin mianlɛ’n su. (1 Tim. 4:15; 1 Zan 5:14, 15) ?Sanngɛ yoo, i sɔ like suanlɛ’n kwla yo maan awlobo’n nun tranlɛ’n yo fɛ?

11, 12. ?Kɛ Klistfuɛ nɲɔn be nin be yi’m be suannin sran ye yolɛ’n i su like’n, mmlusuɛ benin yɛ be ɲɛnnin i ɔ?

¹¹ Yasua kun nin i yi mɔ b’a ja uflɛuflɛ’n be kunndɛ kɛ be aja’n yo ye. Ɔ maan be fali ajalɛ kɛ bé súan sa nga Ɲanmiɛn wawɛ’n maan sran yo’n i su like kpa. ?Wafa sɛ yɛ be ɲannin su mmlusuɛ ɔ? I yi’n waan: “Aklunye yolɛ’n i su like suanlɛ’n ɔ yoli maan lele m’ɔ́ fá jú andɛ’n, e tranlɛ’n wa kacili. Ɔ kleli e wafa nga sɛ be yo e like’n, ɔ kwla sɔn e nun’n. Kpɛkun ɔ ukali e naan y’a si asenna’n nin ngbata’n.”

¹² Klistfuɛ kun nin i yi mɔ ndɛ tɔli be afiɛn’n, be wunnin i wlɛ kɛ be tranlɛ’n nun’n, b’a yiman ye yolɛ’n i nglo. Ɔ maan be nɲɔn’n be fali ajalɛ kɛ bé súan ye yolɛ’n i su like. ?I bo’n guali sɛ? Bian’n seli kɛ: “Ye yolɛ’n i su like nga e  suannin’n, ɔ ukali e naan y’a wun i wlɛ kɛ sɛ e wiengu kun’n yo e sa’n, maan e fa wlɛ i tro nun. Naan i nzuɛn kpa’n i su yɛ e fa e ɲin e sie ɔ. E wiengu i ndɛ wa loli e kpa trali laa’n. Min yi i ye yolɛ’n i wie yɛle kɛ m mɛn i atin naan ɔ kɛn i klun ndɛ, naan nán ndɛ ng’ɔ kan’n ɔ lo min ngasi. I bo’n yɛle kɛ nán maan n se kɛ min yɛ n ti yasua’n niɔn. Kɛ é yí ye yolɛ’n i nglo é kɔ́’n, e ngasi lolɛ’n w’a yoman tikatika kun. Nanwlɛ e wun wa fali e feke.” ?Kɛ amun niɛn i sa’n, sa nga Ɲanmiɛn wawɛ’n maan sran yo’n, i su like suanlɛ’n kwla yo amun awlobo’n i ye wie?

Kɛ e ngunmin e o’n maan e yi e Ɲanmiɛn sulafilɛ’n i nglo

13. ?Like ng’ɔ kwla saci e nin Zoova e afiɛn’n m’ɔ fata kɛ e nian e wun i lika’n, yɛle benin?

¹³ Kɛ Klistfuɛ’m be o nzra nun annzɛ kɛ be ngunmin be o’n, ɔ fata kɛ Ɲanmiɛn wawɛ’n sie be. Andɛ Satan i mɛn nga nun’n, ninnge ng’ɔ timan nianlɛ like’n, ɔ nin ngowa kanlɛ ng’ɔ nin i fataman’n, yɛ b’a tru lika’n nun ɔn. I sɔ’n kwla saci e nin Zoova e afiɛn. ?Ngue yɛ ɔ fata kɛ Klistfuɛ kun yo ɔ? Ɲanmiɛn Ndɛ’n se e kɛ: “An wla nzuɛn tɛtɛ’n nin klunwi’n kwlaa be ase. An yo amun wun aenvuɛ, an fa ndɛ nga Nyanmiɛn kan kle amun’n su. I yɛ maan amún nyán amun ti-ɔ.” (Zak 1:21) Maan e nian wafa nga Ɲanmiɛn sulafilɛ’n m’ɔ ti sa nga Ɲanmiɛn wawɛ’n maan sran yo’n i wafa kun ekun’n, ɔ kwla uka e naan y’a yo sanwun Zoova ɲrun titi’n.

14. ?Sɛ e lafiman Ɲanmiɛn su’n, wafa sɛ yɛ e kwla tɔ sa tɛ’n nun ɔn?

¹⁴ Ɲanmiɛn sulafilɛ’n i bo’n yɛle kɛ e bu i kɛ Ɲanmiɛn Zoova o lɛ sakpa. Sɛ e bumɛn i kɛ Ɲanmiɛn o lɛ sakpa’n, e kwla tɔ sa tɛ’n nun sa puɛɛ. Maan e fa e ɲin e sie i laa sa ng’ɔ juli Ɲanmiɛn i nvle’n su’n, i su e nian. Zoova yili tete sa nga Izraɛlifuɛ’m be yo i nvialiɛ nun’n, i nglo kleli i nuan ijɔfuɛ Ezekiɛli. Ɔ seli i kɛ: “?Klɔ sran, a wun like nga Izraɛl kpɛnngbɛn’m be fia be sua ba nga be sie be amuɛn’m be nun’n be nun be yo’n? Afin be ndɛ nga be kan’n yɛ: ‘Anannganman wun-man ye, Anannganman’n nin i nvle’n be nun-man nun kun.’” (Eze. 8:12) ?Amun si kɛ ndɛ’n fin’n? Yɛle kɛ b’a lafiman su kɛ Zoova si be tete sa sɔ’n i kwlaa nun. B’a bumɛn i kɛ Zoova o lɛ sakpa.

15. ?Sɛ e lafi Zoova su kpa’n, wafa sɛ yɛ i sɔ’n sasa e ɔ?

¹⁵ Sanngɛ maan e fa e ɲin e sie Zozɛfu i ajalɛ’n su e nian. Kannzɛ bɔbɔ Zozɛfu nunmɛn i si nin i nin be bo wun kun’n, naan ɔ nunmɛn i nvle’n nun’n, w’a kplinman su kɛ ɔ nin Potifali i yi’n bé lá. ?Ngue ti ɔ? Ɔ seli kɛ: “N yo sa tɛ dan nga-a ɔ yo-man ye. Sɛ n yo sɔ-ɔ, wuun Nyanmiɛn yɛ m’an wɔ i safle-ɔ.” (Bob. 39:7-9) Nanwlɛ, ɔ buli i kɛ Zoova o lɛ sakpa ti ɔ. Sɛ e bu i kɛ Ɲanmiɛn o lɛ sakpa’n, nvialiɛ’n nun’n e su kanman ngowa ng’ɔ nin i fataman’n, yɛ e su yoman like uflɛ wie mɔ e si kɛ Ɲanmiɛn klomɛn i’n. É tá nda kunngba nga jue tofuɛ’n tali’n wie. Ɔ seli kɛ: “Ń nánti sein nin anwlɛn kpa min awlofuɛ’m be nyrun. Sa ng’ɔ nin yolɛ fata-man’n,  ɔ su kpɛn-man n klun kɛ ń yó.”—Jue. 101:2, 3.

Sa i nuan su yolɛ’n sasa e klun akunndan’n

16, 17. (a) ?Kɛ nga be fa kɛnnin i Nyanndra Mun fluwa’n nun sa’n, wafa sɛ yɛ ‘yasua kaan kun [mɔ] i sinnzin liɛ tra ngba’n’ ɔ tɔli sa tɛ’n nun ɔn? (b) ?Kɛ nga foto ng’ɔ o fluwa’n i bue 30 fa kle’n sa’n, wafa sɛ yɛ sa kunngba’n kwla ɲan e ngba andɛ ɔ?

¹⁶ Sa nga Ɲanmiɛn wawɛ’n maan sran yo’n i wafa kasiɛn’n mɔ yɛle sa nuan su yolɛ’n, ɔ yo maan e kanman ndɛ nga Ɲanmiɛn klomɛn i’n. Ɔ kwla uka e naan y’a sasa e klun akunndan’n. (Nya. 4:23) Maan e nian ndɛ ng’ɔ o Nyanndra Mun 7:6-23 nun’n. Ɔ kan wafa nga tekle bla kun lakali ‘yasua kaan kun [mɔ] i sinnzin liɛ tra ngba’n’ i ndɛ. “Mmuɛ wie sin bla tɛtɛ sɔ’n kun i awlo’n nyrun lɛ.” Lɛ yɛ ɔ sinnin ɔn, yɛ maan bla’n ɲɛnnin i ɔ. Atrɛkpa’n ɔ kunndɛli kɛ ɔ́ kpɛ́ sa kun bo, i ti yɛ ɔ sinnin lɛ ɔ. Nga w’a wunmɛn i wlɛ’n yɛle kɛ “wie atin yɛ w’a fa-a.”

¹⁷ ?Ngue yɛ gbanflɛn kan sɔ’n kwla yo naan w’a tɔman sa tɛ kɛ ngalɛ’n sa’n nun ɔn? Ɔ nin i fata kɛ ɔ fa afɔtuɛ nga su. Yɛle kɛ: “Nán fɛ i atin liɛ’n su, naan ko kun wɔ wun.” (Nya. 7:25) Ndɛ sɔ’n man e afɔtuɛ kun. Yɛle kɛ sɛ e waan Ɲanmiɛn wawɛ’n sie e’n, ɔ fataman kɛ e fa sa tɛ yolɛ’n atin’n su. Like kun mɔ sran kun kwla yo naan w’a di sinnzin kɛ “yasua kaan kun [mɔ] i sinnzin liɛ tra ngba” sa’n, yɛle televiziɔn nin ɛntɛnɛti’n i likalika’m be nun wlanwlanlɛ’n. Kannzɛ sran sɔ’n i ɲinfu o annzɛ nɛ́n i ɲinfu o, ɔ kwla fite sa sukusuku yolɛ’m be su. Kpɛkun blɛblɛblɛ ɔ kwla kaci bian nin bla nna nga be fa fite nzra nun’n i nianfuɛ. I sɔ’n kwla saci i klun akunndan’n, kpɛkun ɔ nin Ɲanmiɛn be afiɛn’n kwla saci. Yɛ i sɔ’n kwla fɛ i sie i wie atin’n su.—An kanngan Rɔmfuɛ Mun 8:5-8 nun.

18. ?Ajalɛ benin yɛ Klistfuɛ kun kwla fa naan w’a sɛsɛ i klun akunndan’n niɔn? ?Yɛ ngue ti yɛ ɔ fata kɛ Klistfuɛ sɔ’n yo sa i nuan su naan w’a kwla fɛ i sɔ ajalɛ mun ɔn?

¹⁸ I yo, sɛ e fite sa sukusuku yolɛ’n i foto wie su naan e ka lɛ e kpalo i’n, e kwla yo sa i nuan su. I sɔ li yɛ ɔ fata kɛ e yo ɔ. Sanngɛ ɔ flunman lele kɛ e dun mmua e fa ajalɛ naan y’a fiteman ninnge sɔ’m be su! (Nya. 22:3) Sɛ e waan é fá ajalɛ ng’ɔ nin i fata’n maan e yo sa i nuan su. I wie yɛle kɛ awlo lɔ’n, sɛ e fa e ɔrdinatɛli e sie i lika nga sran ngba kwla wun i’n, i sɔ’n kwla sasa e. Wie’m be kusu be waan kɛ sran uflɛ o be wun lɛ’n, yɛ bé dí ɔrdinatɛli su junman annzɛ bé nían televiziɔn ɔn. Wie’m be liɛ’n, be kpɛ i kpo be se kɛ be kɔman ɛntɛnɛti bɔbɔ’n su lɔ kaan sa. (Mat. 5:27-30) Maan e fa ajalɛ kwlaa ng’ɔ nin i fata’n naan e sasa e bɔbɔ nin e awlobofuɛ mun. I liɛ’n Zoova i sulɛ’n nun’n, é kwlá yó sran mɔ “sa tɛ kaan sa nun-mɛn i anwlɛn’n nun, b’ɔ maan i klun titi-mɛn i’n, b’ɔ lafi Nyanmiɛn su sakpa’n.”—1 Tim. 1:5.

19. ?Sɛ Ɲanmiɛn wawɛ’n sie e’n, mmlusuɛ benin yɛ é ɲɛ́n i ɔ?

¹⁹ Sa nga Ɲanmiɛn wawɛ’n maan sran yo’n i su mmlusuɛ’n sɔnnin kpa. Wɛtɛɛ yolɛ’n nin awlɛn tralɛ’n be yo maan fɔundi tran asɔnun’n nun. Sran ye yolɛ’n nin aklunye’n be yo maan awlobo’n nun tranlɛ’n yo fɛ. Ɲanmiɛn sulafilɛ’n nin sa i nuan su yolɛ’n be uka e naan e nin Zoova e afiɛn’n w’a mantan titi naan y’a yo sanwun i ɲrun. Asa kusu’n, Galasifuɛ Mun 6:8 se e kɛ: “Sɛ sran kun [...] lua like nga Nyanmiɛn Wawɛ’n klo i’n, i mma nga Wawɛ sɔ’n maan ɔ ti’n yɛlɛ anannganman nguan’n.” Be nga be lo be wun man Ɲanmiɛn wawɛ’n kɛ ɔ sie be’n, Zoova jrán tɛ nga Klist yili’n su, ɔ́ fɛ́ i wawɛ’n mán be anannganman nguan.

[Ja ngua lɛ ndɛ’n]

?Amún tɛ́ su sɛ?

• ?Wafa sɛ yɛ wɛtɛɛ yolɛ’n nin awlɛn tralɛ’n be yo maan fɔundi tran asɔnun’n nun ɔn?

• ?Ngue yɛ ɔ kwla uka Klistfuɛ mun naan b’a yi ye yolɛ’n nin aklunye yolɛ’n be nglo awlobo’n nun ɔn?

• ?Wafa sɛ yɛ Ɲanmiɛn sulafilɛ’n nin sa nuan su yolɛ’n be kwla uka Klistfuɛ kun naan w’a sɛsɛ i klun akunndan’n niɔn?

[Kosan mun]

[Foto, bue 28]

?Ngue yɛ e kwla yo naan e yalɛ kokolɛ’n w’a kaciman ndɛnngan ɔn?

[Foto, bue 29]

Sa nga Ɲanmiɛn wawɛ’n maan sran yo’n i su like suanlɛ’n kwla yo amun awlobo’n i ye.

[Foto, bue 30]

?Sɛ e lafi Ɲanmiɛn su naan e yo sa i nuan su’n, sa tɛ benin yɛ ɔ kwla to fuan e ɔ?